Min al‑bidaaya,

Allah gaaʼid yihajji le l‑naas.

Wa hu khalag al‑dunya wa Bani Adam wa antaahum al‑wasaaya wa waaʼadaahum be rahmatah.

Wa kalaam Allah da maktuub fi l‑kitaab al‑gaaʼid fi iideenak.

Al‑kitaab da usmah al‑Ahad al‑Gadiim maʼanaatah al‑muʼaahada al‑gadiime.

Al‑muʼaahada al‑gadiime di,

hi al‑alaakha al‑Allah sawwaaha maʼa chaʼabah Bani Israaʼiil be waasitat al‑nabi Muusa.

Al‑kitaab da yiwassif kadar Allah tabbag al‑muʼaahada al‑sawwaaha maʼa chaʼabah hatta kan humman ma tabbagooha kula.

Wa l‑kitaab da,

hu kalaam Allah.

Allah nazzal al‑Ruuh al‑Khudduus fi l‑anbiya achaan yaktubu kalaamah be iznah wa be gudurtah.

Wa l‑kitaab da tarjamooh be kalaam arab daariji min al‑lukhkhaat al‑asliyiin wa humman al‑lukhkha al‑ibraaniiye wa l‑araamiiye.

Wa nalgo faayde min kalaam Allah kan nasmaʼooh adiil wa nafhamooh wa nitaabuʼuuh.

Kan ma fihimnaah kamaan,

abadan ma nalgo minnah faayde.

Wa Allah yidoor al‑naas yitarjumu kalaamah achaan kulla l‑naas yafhamooh wa yitaabuʼuuh wa yalgo minnah baraka.

Allah hu akbar !

Wa l‑Ahad al‑Gadiim indah arbaʼa juzu.

Al‑juzu al‑awwal hu Tawraat Muusa wa mukawwan min 5 kutub.

Wa Tawraat Muusa da yihajji be khaliigit al‑dunya wa hayaat abuuna Adam wa ammina Hawwa wa abuuna Ibraahiim wa sayyidna Yuusuf.

Wa battaan yihajji be Bani Israaʼiil al‑humman chaʼab Allah.

Bani Israaʼiil induhum 12 gabiila wa humman min zurriiyit Yaakhuub abu Yuusuf.

Wa Tawraat Muusa battaan yihajji be kikkeef abbado Bani Israaʼiil fi balad Masir wa kikkeef Allah maragaahum be waasitat al‑nabi Muusa wa antaahum al‑wasaaya al‑achara wa gawaaniin aakhariin wa waddaahum fi balad Kanʼaan al‑baʼadeen tabga balad Israaʼiil.

Al‑juzu al‑taani hu Kutub Taariikh Bani Israaʼiil wa mukawwan min 12 kutub.

Wa l‑juzu da yihajji be taariikh Bani Israaʼiil wa kikkeef Allah jaabaahum fi balad Israaʼiil tihit masʼuuliiyit Yachuuʼ wa sakano hinaak tihit al‑hukkaam al‑yinaaduuhum al‑gudiya.

Wa baʼad da,

al‑nabi Samuwiil darraj leehum malik.

Wa l‑malik al‑awwal da,

hu Chaawuul wa baʼadah,

hakam al‑malik Dawuud wa baʼad Dawuud,

hakam wileedah al‑malik Suleymaan.

Wa baʼad hukum Suleymaan,

al‑mamlaka angasamat mamaalik itneen.

Al‑waahide usumha mamlakat Israaʼiil wa hi gaaʼide fi munchaakh al‑balad wa aasimatha madiinat al‑Saamira.

Wa muluukha hakamo foogha hawaale 200 sana wa baʼad da,

balad Achuur jaat dammaratha le l‑mamlaka di.

Wa l‑mamlaka al‑aakhara usumha mamlakat Yahuuza wa hi gaaʼide fi wati al‑balad wa aasimatha Madiinat al‑Khudus.

Wa muluukha hakamo foogha hawaale 350 sana wa baʼad da,

balad Baabil jaat chaalatha wa waddat katiir min naasha fi l‑khurba fi Baabil.

Wa baʼad 70 sana,

katiiriin min chaʼab Allah gabbalo min Baabil wa jo fi baladhum Israaʼiil wa banooha battaan.

Al‑juzu al‑taalit hu Kutub al‑Hikma wa mukawwan min 5 kutub.

Al‑kutub dool kataboohum achaan yantuuna al‑hikma fi hayaatna.

Al‑kitaab hana Ayyuub yihajji be l‑diige al‑jaat fi naadum waahid saalih wa sababha.

Wa kitaab al‑Zabuur hu indah chiʼir wa nuwaah wa chukur katiir al‑beehum yachhado wa yahmudu Allah.

Wa kitaab al‑Amsaal wa kitaab al‑Jaamiʼa yiʼallumuuna kikkeef niʼiichu hayaatna al‑yoomiiye be hikma.

Wa kitaab Nachiid al‑Anchaad yihajji be l‑mahabba been al‑raajil wa l‑mara.

Wa l‑juzu al‑raabiʼ wa l‑akhiir,

hu Kutub al‑Anbiya wa mukawwan min 17 kutub.

Wa fi l‑kutub dool,

Allah hajja le chaʼabah be waasitat al‑anbiya al‑hu rassalaahum.

Wa humman hazzaro chaʼab Allah be sabab fasaalithum misil al‑zulum wa l‑dimme wa ibaadat al‑asnaam.

Wa fi chaan fasaalithum,

al‑anbiya gaalo Allah yamrughum min baladhum wa yiwaddiihum fi l‑khurba.

Laakin al‑anbiya gaalo kadar baʼadeen,

Allah yigabbil chaʼabah fi baladhum battaan wa yaskunu foogha wa yitaabuʼu Allah be l‑sahiih wa yiʼiichu fi l‑raaha wa l‑salaama.

Wa Allah yukhutt fi raashum al‑Masiih al‑hu masahah wa darrajah malik.

Ayyi naadum al‑yagri kalaam Allah yalga minnah faayde.

Wa l‑kalaam da yiʼallimna mahabbat Allah wa rahmatah le chaʼabah wa khadabah didd al‑zulum wa l‑fasaala.

Wa yisabbitna fi iimaanna wa yiwassifna kikkeef nitaabuʼu Allah fi kulla wakit.

Al‑Ahad al‑Gadiim be l‑lukhkhaat al‑asliyiin mawjuud lahaddi al‑yoom.

Wa be da,

al‑naas yagdaro yagruuh be l‑kalaam al‑asli wa yitarjumuuh be lukhkhaathum.

Al‑suura al‑tihit di tiwassif nuskha min kitaab Ichaʼya be l‑lukhkha al‑asliiye hana l‑Ahad al‑Gadiim yaʼni be kalaam ibraani.

Wa l‑nuskha di gadiime marra waahid,

indaha hawaale 150 sana gubbaal waaluudit Isa al‑Masiih.