Al‑unuf al‑Chakiim sawwaah le Diina
34
1 Yoom waahid,
Diina bineeyit Yaakhuub al‑Leeya wildatha leyah maragat machat tuzuur banaat al‑balad.
2 Wa Chakiim wileed Hamuur cheekh balad al‑Hiwwiyiin chaafaaha.
Wa hu khatafha wa liʼib maʼaaha wa tallaf charafha.
3 Wa galbah allag foog Diina bineeyit Yaakhuub.
Wa hu habbaaha wa fattach tariiga al‑hi takhbal beeha kalaamah.
4 Wa Chakiim gaal le abuuh Hamuur :
« Aakhud leyi al‑bineeye di achaan tabga marti. »
5 Wa Yaakhuub simiʼ kadar Chakiim tallaf charaf Diina bineeytah.
Wa laakin awlaadah gaaʼidiin fi l‑khala yasraho be bahaaymah.
Achaan da,
Yaakhuub sakat saakit lahaddi yaju.
Tahharo naas abu Chakiim
6 Wa Hamuur abu Chakiim macha le Yaakhuub achaan yihajji leyah.
7 Wa wakit awlaad Yaakhuub simʼo be l‑cheyy al‑kaan da,
jo min al‑khala wa zaʼlaaniin zaʼal chadiid.
Achaan Chakiim sawwa fiʼil cheen fi gabiilat Israaʼiil wakit khatafha wa tallaf charafha le bineeyit Yaakhuub.
Wa l‑cheyy da,
ma waajib yukuun abadan.
8 Wa Hamuur hajja leehum wa gaal :
« Wileedi Chakiim,
galbah allag fi bittuku.
Min fadulku,
antuuha leyah le tabga martah.
9 Wa intu tagdaro tinaasubuuna,
naakhudu min banaatku wa taakhudu min banaatna.
10 Wa taskunu maʼaana.
Wa l‑balad gaaʼide maftuuha leeku.
Taajuru wa aksabo foogha ard le nufuusku. »
11 Wa Chakiim zaatah gaal le Yaakhuub abu Diina wa akhwaanha :
« Ardo leyi wa ana nantiiku ayyi cheyy al‑tatulbuuh minni.
12 Wa khuttu foogi al‑maal al‑tidooruuh wa hadiiye katiire wa ana nantiiku kulla cheyy al‑tidooruuh.
Laakin nidoor al‑bineeye di tabga marti. »
13 Wa awlaad Yaakhuub raddo be najaada le Chakiim wa Hamuur abuuh achaan Chakiim tallaf charaf akhuthum Diina
14 Wa gaalo leehum :
« Al‑cheyy da,
ma mumkin leena.
Ma nagdaro nantu akhutna le raajil ma mutahhar achaan da eeb leena.
15 Aniina nikhassudu leeku illa fi haala waahide bas.
Tabgo misilna,
tahhuru ayyi dakar minku.
16 Wa be da khalaas,
intu tagdaro taakhudu min banaatna wa aniina kula naakhudu min banaatku.
Wa kullina nabgo chaʼab waahid.
17 Wa laakin kan abeetu ma titahhuru,
aniina nichiilu akhutna wa namchu. »
18 Wa Chakiim wa abuuh Hamuur khassado be l‑kalaam da.
19 Wa Chakiim tabbag ajala ke bas al‑kalaam al‑humman dawwarooh achaan biriidha marra waahid le Diina bineeyit Yaakhuub.
Wa Chakiim hu muhtaram min kulla naas beet abuuh.
20 Wa Hamuur maʼa wileedah Chakiim macho fi khachum baab hillithum,
al‑bakaan al‑naas yilimmu foogah.
Wa hajjo le naas al‑hille
21 wa gaalo leehum :
« Al‑naas dool ma induhum ayyi kalaam maʼaana.
Khalli yagoodu fi l‑balad wa yitaajuru wa di hi al‑balad wasiiʼe leehum.
Wa aniina naakhudu banaathum wa humman kula yaakhudu banaatna.
22 Wa laakin humman yikhassudu yagoodu maʼaana wa nabgo gabiila waahide,
illa kan aniina nitahhuru kulla dakar minnina misil humman zaathum mutahhariin.
23 Wa kan aniina khassadna be l‑cheyy al‑humman talabooh minnina,
humman yaju yaskunu maʼaana.
Wa be da,
bahaayimhum wa maalhum wa kulla cheyy al‑induhum ma yabgo hanaana walla ? »
24 Wa kulla l‑naas al‑macho fi khachum baab al‑hille,
khassado be kalaam Hamuur wa wileedah Chakiim.
Wa khalaas,
kulla l‑dukuur al‑macho fi khachum baab al‑hille tahharoohum.
Chimʼuun wa Laawi chaalo al‑taar
25 Wa baʼad talaata yoom,
wakit al‑rujaal lissaaʼ ma biro min al‑tahuura di,
awlaad Yaakhuub Chimʼuun wa Laawi akhwaan Diina chaalo suyuufhum.
Wa dakhalo al‑hille bala khoof wa katalo kulla l‑dukuur.
26 Wa katalo Hamuur wa wileedah Chakiim kula be seef wa dakhalo fi beet Chakiim wa chaalo akhuthum wa macho.
27 Wa awlaad Yaakhuub al‑aakhariin katalo al‑majruuhiin wa kasabo al‑hille achaan charaf akhuthum Diina tilif.
28 Wa chaalo kulla khanam al‑Hiwwiyiin wa bagarhum wa hamiirhum wa kulla maalhum al‑fi lubb al‑hille wa l‑fi l‑khala.
29 Wa kasabo kulla maalhum wa kulla iyaalhum wa kulla awiinhum wa chaalo kulla cheyy al‑fi buyuuthum.
30 Wa baʼad da,
Yaakhuub gaal le iyaalah Chimʼuun wa Laawi :
« Intu zaraʼtu leyi machaakil !
Wa be sababku intu,
al‑Kanʼaaniyiin wa l‑Firizziyiin naas al‑balad yakrahooni !
Indi rujaal chiyya bas.
Wa kan humman lammo foogi wa hajamooni,
yidammuruuni ana wa naas beeti. »
31 Laakin humman raddo leyah wa gaalo :
« Hu ma jaʼal akhutna zannaaya walla ? »