غَلاطِية 6

المسْؤوليّة الأخويّة

١ يَا أَخْوَانِي، كَنْ وَاحِدْ مِنْكُو وَقَعْ فِي خَطَا، وَاجِبْ إِنْتُو الْقَوِيِّينْ بِقُدْرَةْ الرُّوحْ الْقُدُّوسْ تِخَتُّمُوا لَيَّهْ بِنَفَسْ بَارِدْ وَ تِقَبُّلُوهْ فِي الدَّرِبْ الْعَدِيلْ. وَ فَكُّرُوا لِنُفُوسْكُو أَشَانْ الذَّنِبْ الْيَجِي بِالتَّجْرِبَةْ مَا يِنَّصِرْ فَوْقكُو إِنْتُو كُلَ. ٢ وَ فِي وَكِتْ التَّعَبْ، أَسَّاعَدَوْا أَمْبَيْنَاتْكُو. وَ مِثِلْ دَا، تِطَبُّقُوا وَصَايَا الْمَسِيحْ. ٣ وَ كَنْ نَادُمْ سَوَّى نَفْسَهْ عَالِي مِنْ أَخْوَانَهْ لَحَدِّي مَا يِسَاعِدْهُمْ، بِالصَّحِيحْ هُو مَا يِسَاوِي شَيّءْ وَ غَشَّ نَفْسَهْ.

٤ خَلِّي أَيِّ وَاحِدْ يِجَرِّبْ الْخِدْمَةْ الْهُو ذَاتَهْ يِسَوِّيهَا لِلرَّبّ. وَ مِثِلْ دَا، هُو يَفْرَحْ بِخِدِمْتَهْ وَ مَا يِشِيفْ خِدْمَةْ هَنَا نَادُمْ آخَرْ. ٥ أَشَانْ أَيِّ وَاحِدْ مَسْؤُولْ مِنْ نَفْسَهْ.

٦ كَنْ نَادُمْ قَاعِدْ يِعَلِّمْكُو كَلَامْ اللّٰهْ، وَاجِبْ تَنْطُوهْ مِنْ الْمَالْ الْعِنْدُكُو. ٧ مَا تُغُشُّوا نُفُوسْكُو. اللّٰهْ مَا يِنْغَشَّ. الشَّيّءْ النَّادُمْ يِتَيْرِبَهْ، دَا بَسْ الْيَلْقَاهْ. ٨ كَنْ نَادُمْ يِتَابِعْ شَهْوَاتَهْ الْفَسْلِينْ، هُو يَلْقَى مِنْ شَهْوَاتَهْ الْهَلَاكْ. وَ كَنْ نَادُمْ يِتَابِعْ الرُّوحْ الْقُدُّوسْ، خَلَاصْ هُو يَلْقَى مِنْ الرُّوحْ الْقُدُّوسْ الْحَيَاةْ الْأَبَدِيَّةْ. ٩ أَشَانْ دَا، خَلِّي نِسَوُّوا الْخَيْر دَايْماً وَ أَبَداً مَا نَكْسَلَوْا مِنَّهْ. بَعَدَيْن كَنْ مَا كِسِلْنَا، نَلْقَوْا مِنَّهْ فَايْدَةْ. ١٠ وَ أَشَانْ دَا، فِي أَيِّ وَكِتْ عِنْدِنَا فُرْصَةْ، خَلِّي نِسَوُّوا الْخَيْر لِكُلَّ النَّاسْ وَ خَاصَّةً لِأَهَلْ الْإِيمَانْ.

نِهاية الجواب

١١ شِيفُوا الْحُرُوفْ الْكُبَارْ دَوْل. أَنَا شِلْت الْقَلَمْ وَ أَنَا ذَاتِي قَاعِدْ نَكْتِبْ الْكَلَامْ دَا. ١٢ النَّاسْ الْيِدَوْرُوا يِسَوُّوا الطَّهُورَةْ شَرْط لَيْكُو، هُمَّنْ يِدَوْرُوا رِضَى مِنْ النَّاسْ بَسْ. يِدَوْرُوا الْيَهُودْ مَا يِتَعُّبُوهُمْ بَتَّانْ بِسَبَبْ بِشَارَةْ مَوْت الْمَسِيحْ فِي الصَّلِيبْ. ١٣ وَ النَّاسْ الْمُطَهَّرِينْ دَوْل ذَاتْهُمْ مَا يِطَبُّقُوا كُلَّ شُرُوطْ التَّوْرَاةْ. لَاكِنْ يِدَوْرُوا يِطَهُّرُوكُو أَشَانْ يِفَاشُرُوا لِلنَّاسْ بِجِلِدْكُو الْمُطَهَّرْ.

١٤ وَ كَنْ لَيِّ أَنَا، أَبَداً مَا نِدَوْر نِفَاشِرْ لِلنَّاسْ بِأَيِّ شَيّءْ، إِلَّا بِصَلِيبْ هَنَا رَبِّنَا عِيسَى الْمَسِيحْ. وَ الصَّلِيبْ دَا، كَتَلْ لَيِّ شَهْوَاتِي هَنَا الدُّنْيَا وَ بَيَّهْ أَنَا كُلَ بِقِيتْ مِثِلْ نَادُمْ مَيِّتْ لِلدُّنْيَا. ١٥ أَشَانْ كَنْ نَادُمْ مُطَهَّرْ وَلَّا مَا مُطَهَّرْ كُلَ، دَا مَا مُهِمّ. الشَّيّءْ الْمُهِمّ دَا، أَيِّ نَادُمْ وَاجِبْ يَدْخُلْ فِي الْخَلِيقَةْ الْجَدِيدَةْ.

١٦ السَّلَامْ وَ الرَّحْمَةْ لِكُلَّ النَّاسْ الْيِتَابُعُوا الْوَصِيَّةْ دِي. هُمَّنْ بَسْ أُمَّةْ اللّٰهْ. ١٧ خَلَاصْ، خَلِّي نَادُمْ وَاحِدْ مِنْكُو مَا يِبَشْتِنِّي بَتَّانْ أَشَانْ عِنْدِي أَلَمْ فِي جِلْدِي مِنْ زَعَلْ النَّاسْ وَ دِي الْعَلَامَةْ التِّوَصِّفْ أَنَا عَبْد عِيسَى بِالصَّحِيحْ.

١٨ يَا أَخْوَانِي، عَلَيْكُمْ رَحْمَةْ رَبِّنَا عِيسَى الْمَسِيحْ. آمِينْ.