غَلاطِية 5

أقْعُدوا ثابْتين في الحُرّيّة

١ الْمَسِيحْ سَوَّانَا نَاسْ حُرِّينْ أَشَانْ نِعِيشُوا فِي الْحُرِّيَّةْ. أَقْعُدُوا ثَابْتِينْ فِي الْحُرِّيَّةْ وَ آبَوْا مَا تَبْقَوْا بَتَّانْ عَبِيدْ. ٢ فُكُّوا أَدَانْكُو. أَنَا بُولُسْ نُقُولْ لَيْكُو كَنْ تِخَلُّوهُمْ يِطَهُّرُوكُو، بَرَكَةْ الْمَسِيحْ مَا تَنْفَعْ لَيْكُو أَبَداً. ٣ نَشْهَدْ لَيْكُو بَتَّانْ كَدَرْ أَيِّ نَادُمْ الْيِخَلِّي نَفْسَهْ يِطَهُّرُوهْ بِطَهُورَةْ التَّوْرَاةْ، وَاجِبْ لَيَّهْ يِطَبِّقْ شُرُوطْ التَّوْرَاةْ كُلُّهُمْ كَيْ. ٤ إِنْتُو التِّدَوْرُوا تَبْقَوْا صَالِحِينْ بِطَبِّقِينْ شُرُوطْ التَّوْرَاةْ دَوْل، أَنْفَرَقْتُوا مَرَّةْ وَاحِدْ مِنْ الْمَسِيحْ وَ خَلَّيْتُوا مِنْكُو نِعْمَةْ اللّٰهْ.

٥ لَاكِنْ بِقُدْرَةْ الرُّوحْ الْقُدُّوسْ، أَنِحْنَ نُخُطُّوا عَشَمْنَا فِي اللّٰهْ الْيِسَوِّينَا صَالِحِينْ بِسَبَبْ إِيمَانَّا الْقَاعِدِينْ نِتْمَنَّوْه بِزِيَادَةْ. ٦ أَشَانْ فِي دَرِبْ الْمَسِيحْ عِيسَى، كَنْ نَادُمْ مُطَهَّرْ وَلَّا مَا مُطَهَّرْ كُلَ، دَا مَا مُهِمّ. الشَّيّءْ الْمُهِمّ دَا، هُو الْإِيمَانْ بِالْمَسِيحْ وَ الْمَحَبَّةْ الْجَايَةْ مِنْ الْإِيمَانْ دَا.

٧ بَدَيْتُوا عَدِيلْ فِي دَرِبْ الْمَسِيحْ. كِكَّيْف خَلَّيْتُوا نَادُمْ يَمْرُقْكُو مِنْ الدَّرِبْ الصَّحِيحْ دَا؟ ٨ الْكَلَامْ دَا مَا جَايِ مِنْ اللّٰهْ الْقَاعِدْ يِنَادِيكُو. ٩ أَنْقَرْعُوا! تَوَّارَةْ شِيَّةْ بَسْ تَكْفِي لِتِقَوِّمْ الْعَجِينَةْ كُلَّهَا كَيْ. ١٠ لَاكِنْ الرَّبّ أَنْطَانِي ضَمَانْ لَيْكُو وَ نَعَرِفْ كَدَرْ إِنْتُو مَا تَقْبَلَوْا فِكِرْ شِقْ مِنْ فِكِرْنَا. وَ النَّادُمْ الْقَاعِدْ يِبَرْجِلْكُو دَا، الْحُكُمْ يَجِي فَوْقَهْ كَنْ يَبْقَى يَاتُو كُلَ.

١١ يَا أَخْوَانِي، كَنْ أَنَا ذَاتِي قَاعِدْ نِعَلِّمْ النَّاسْ كَدَرْ الطَّهُورَةْ وَاجْبَةْ، مَالَا الْيَهُودْ قَاعِدِينْ يِتَعُّبُونِي؟ كَنْ أَوَّلْ أَنَا نِعَلِّمْ بِالطَّهُورَةْ وَ مَا نِبَشِّرْ بِالصَّلِيبْ، نَادُمْ مَا يَلْقَى مُشْكِلَةْ. ١٢ وَ هَسَّعْ لِلنَّاسْ الْقَاعِدِينْ يِبَرْجُلُوكُو بِالطَّهُورَةْ دَوْل، خَلِّي يِخَصُّوا نُفُوسْهُمْ مَرَّةْ وَاحِدْ!

درِب الروح القُدّوس

١٣ يَا أَخْوَانِي، اللّٰهْ نَادَاكُو أَشَانْ يِدَوْر إِنْتُو تِعِيشُوا فِي الْحُرِّيَّةْ. لَاكِنْ مَا تِسَوُّوا الْحُرِّيَّةْ دِي فُرْصَةْ لِتِتَابُعُوا شَهْوَاتْكُو الْفَسْلِينْ. أَخَيْر تَخْدُمُوا لِأَخْوَانْكُو بِمَحَبَّةْ. ١٤ أَشَانْ كُلَّ شُرُوطْ التَّوْرَاةْ، زِبْدِتْهُمْ تِنْلَقِي فِي وَصِيَّةْ وَاحِدَةْ وَ هِي: ﴿حِبّ أَخُوكْ مِثِلْ تِحِبّ نَفْسَكْ.﴾ ١٥ لَاكِنْ كَنْ تِلْخَالَفَوْا أَمْبَيْنَاتْكُو وَ تِدَّاوَسَوْا مِثِلْ كُلابْ، خَلَاصْ فِي الأَخِيرْ تِلْآكَلَوْا مَرَّةْ وَاحِدْ.

١٦ نُقُولْ لَيْكُو تَابُعُوا اللّٰهْ بِدَرِبْ الرُّوحْ الْقُدُّوسْ وَ مِثِلْ دَا، مَا تِتَابُعُوا شَهْوَاتْكُو الْفَسْلِينْ. ١٧ أَشَانْ الشَّيّءْ الْيِرِيدَهْ قَلِبْ الْإِنْسَانْ شِقْ مِنْ الْيِرِيدَهْ الرُّوحْ الْقُدُّوسْ. وَ الشَّيّءْ الْيِرِيدَهْ الرُّوحْ الْقُدُّوسْ شِقْ مِنْ الْيِرِيدَهْ قَلِبْ الْإِنْسَانْ. الْإِتْنَيْن دَوْل يِدَّاوَسَوْا أَمْبَيْنَاتْهُمْ أَشَانْ يَدْحَرَوْكُو مِنْ الشَّيّءْ التِّدَوْرُوا تِسَوُّوهْ. ١٨ وَ كَنْ الرُّوحْ الْقُدُّوسْ قَاعِدْ يُقُودْكُو، إِنْتُو مَا قَاعِدِينْ تِحِتْ شُرُوطْ التَّوْرَاةْ.

١٩ وَ خَلَاصْ، الذُّنُوبْ الْيَجُوا مِنْ قَلِبْ الْإِنْسَانْ مَعْرُوفِينْ. هُمَّنْ الزِّنَى وَ الْخَبَاثَةْ وَ الْفَسَادْ ٢٠ وَ عِبَادَةْ الْأَصْنَامْ وَ السِّحِرْ وَ الْهُرَاجْ وَ الدُّوَاسْ وَ الْحُسُدْ وَ الْغَبِينَةْ وَ الْخِلَافْ وَ الْمُخَاصَمَاتْ وَ التَّفْرِقَةْ ٢١ وَ الطَّمَعْ وَ السَّكَرْ وَ السَّفَاهَةْ وَ شَيّءْ آخَرْ الْمِثِلْهُمْ. نُقُولْ لَيْكُو مِثِلْ أَوَّلْ قُلْتَهْ لَيْكُو، النَّاسْ الْيِسَوُّوا الْأَشْيَاءْ دَوْل مَا يَوْرُثُوا شَيّءْ فِي مَمْلَكَةْ اللّٰهْ.

٢٢ لَاكِنْ مِثِلْ الشَّدَرْ يَلْدَ عِيَالْ، دَاهُو عِيَالْ الرُّوحْ الْقُدُّوسْ هُمَّنْ الْمَحَبَّةْ وَ الْفَرَحْ وَ السَّلَامْ وَ الصَّبُرْ وَ الْقَلِبْ الْأَبْيَضْ وَ الْخَيْر وَ الْأَمَانْ ٢٣ وَ النَّفَسْ الْبَارِدْ وَ ثَبِّتِينْ النَّفْس. الْأَشْيَاءْ دَوْل، مَا فِي شَرْط وَاحِدْ ضِدُّهُمْ. ٢٤ وَ النَّاسْ الْبِقَوْا نَاسْ هَنَا الْمَسِيحْ عِيسَى خَطَّوْا شَهْوَاتْهُمْ الْفَسْلِينْ فِي الصَّلِيبْ وَ كَتَلَوْهُمْ. ٢٥ وَ كَنْ نِعِيشُوا بِقُدْرَةْ الرُّوحْ الْقُدُّوسْ، وَاجِبْ نُرُوغُوا بِقُدْرَةْ الرُّوحْ الْقُدُّوسْ. ٢٦ خَلِّي مَا نِسْتَكْبَرَوْا وَ لَا نِزَّاعَلَوْا أَمْبَيْنَاتْنَا وَ لَا نِلْحَاسَدَوْا.