غَلاطِية 1

جواب لغَلاطِية

من جوابات الرسول بولس

١ جَوَابْ مِنِّي أَنَا بُولُسْ الْبِقِيتْ رَسُولْ مَا بِإِذِنْ النَّاسْ وَ لَا بِنِيِّتْهُمْ، لَاكِنْ بِإِذِنْ عِيسَى الْمَسِيحْ وَ اللّٰهْ أَبُوهْ الْبَعَثَهْ مِنْ أُسْط الْمَيْتِينْ. ٢ الْجَوَابْ دَا جَايِ مِنِّي وَ مِنْ كُلَّ الْأَخْوَانْ الْمَعَايِ وَ هُو لِجَمَاعَاتْ الْمُؤمِنِينْ الْفِي بَلَدْ غَلَاطِيَةْ. ٣ عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ ٤ الْقَدَّمْ نَفْسَهْ ضَحِيَّةْ فِي شَانْ ذُنُوبْنَا أَشَانْ يِنَجِّينَا مِنْ شَرّ الدُّنْيَا دِي حَسَبْ نِيَّةْ اللّٰهْ أَبُونَا. ٥ وَ الْحَمْدُ للّٰهْ دَايْماً وَ إِلَى الْأَبَدْ. آمِينْ.

بِشارة المسيح هي واحِدة

٦ أَنَا عَجَّبْت لَيْكُو بِلْحَيْن. اللّٰهْ نَادَاكُو أَشَانْ تِعِيشُوا بِنِعْمَةْ الْمَسِيحْ وَ طَوَّالِي إِنْتُو قَمَّيْتُوا خَلَّيْتُوهَا أَشَانْ تِدَوْرُوا تِتَابُعُوا بِشَارَةْ آخَرَةْ. ٧ وَ بِالصَّحِيحْ، مَا فِي بِشَارَةْ آخَرَةْ لَاكِنْ نَاسْ وَاحِدِينْ قَمَّوْا يِبَرْجُلُوكُو بِكَلَامْهُمْ وَ يِدَوْرُوا يِتَلُّفُوا بِشَارَةْ الْمَسِيحْ.

٨ وَ لَاكِنْ كَنْ أَيِّ نَادُمْ مِنِّنَا وَلَّا مَلَكْ مِنْ مَلَائِكَةْ اللّٰهْ يَجِي يِبَلِّغْ لَيْكُو بِشَارَةْ بِالْمَسِيحْ شِقْ مِنْ الْبِشَارَةْ الْبَلَّغْنَاهَا لَيْكُو دِي، خَلِّي اللّٰهْ يَلْعَنَهْ. ٩ أَوَّلْ قُلْنَاهْ وَ هَسَّعْ أَنَا نُقُولَهْ بَتَّانْ، كَنْ نَادُمْ يِبَلِّغْ لَيْكُو بِالْمَسِيحْ بِشَارَةْ شِقْ مِنْ الْبِشَارَةْ الْأَوَّلْ سِمِعْتُوهَا دِي، خَلِّي اللّٰهْ يَلْعَنْ النَّادُمْ دَا.

١٠ شُنُو فِكِرْكُو فِي الْكَلَامْ دَا؟ نِدَوْر نَلْقَى بَيَّهْ رِضَى مِنْ النَّاسْ وَلَّا رِضَى مِنْ اللّٰهْ؟ نِدَوْر نَعَجِبْ النَّاسْ وَلَّا؟ نُقُولْ لَيْكُو كَنْ أَنَا لِسَّاعْ نِدَوْر نَعَجِبْ النَّاسْ، خَلَاصْ أَنَا مَا عَبْد الْمَسِيحْ.

بِشارة المسيح جات من اللّه

١١ يَا أَخْوَانِي، نِدَوْر كَدَرْ إِنْتُو تَعَرْفُوا الْبِشَارَةْ الْبَلَّغْتَهَا لَيْكُو مَا جَاتْ مِنْ النَّاسْ. ١٢ وَ نَادُمْ مَا أَنْطَاهَا لَيِّ وَ مَا فِي نَادُمْ قَرَّاهَا لَيِّ. لَاكِنْ عِيسَى الْمَسِيحْ بَسْ بَيَّنْهَا لَيِّ. ١٣ أَكِيدْ تَعَرْفُوا حَالِي وَكِتْ أَنَا لِسَّاعْ نِتَابِعْ دِينْ الْيَهُودْ. سِمِعْتُوا أَنَا تَعَّبْت بِشِدَّةْ نَاسْ اللّٰهْ أُمَّةْ الْمَسِيحْ وَ دَوَّرْت نِدَمِّرْهُمْ مَرَّةْ وَاحِدْ. ١٤ وَ فِي دِينْ الْيَهُودْ، أَنَا فَايِتْ نَاسْ كَتِيرِينْ الْعُمْرِي مَعَاهُمْ سَوَا أَشَانْ أَنَا مُنْكَرِبْ بِلْحَيْن فِي عَادَاتْ جُدُودْنَا.

١٥ لَاكِنْ مِنْ أَنَا فِي بَطُنْ أَمِّي، اللّٰهْ عَزَلَانِي وَ بِنِعْمَتَهْ، نَادَانِي. وَ فِي الْوَكِتْ الْاللّٰهْ قَطَعَهْ لَيِّ، ١٦ هُو بَيَّنْ إِبْنَهْ فِي قَلْبِي أَشَانْ نِبَشِّرْ بَيَّهْ فِي بُلْدَانْ هَنَا نَاسْ الْمَا يَهُودْ. وَ أَنَا مَا شَاوَرْت أَيِّ إِنْسَانْ. ١٧ وَ مَا مَشَيْت لَمَّيْت مَعَ النَّاسْ الْبِقَوْا رُسُلْ قُبَّالِي الْقَاعِدِينْ فِي مَدِينَةْ الْقُدُسْ. لَاكِنْ فُتّْ طَوَّالِي فِي دَارْ الْعَرَبْ وَ بَعَدَيْن قَبَّلْت فِي مَدِينَةْ دِمَشْق.

١٨ وَ بَعَدْ تَلَاتَةْ سَنَةْ، خَلَاصْ مَشَيْت مَدِينَةْ الْقُدُسْ أَشَانْ نِلْعَارَفَوْا مَعَ بُطْرُسْ. وَ قَعَدْت مَعَايَهْ 15 يَوْم. ١٩ لَاكِنْ مَا شِفْت نَادُمْ آخَرْ مِنْ الرُّسُلْ إِلَّا شِفْت يَعْقُوبْ أَخُو الرَّبّ عِيسَى. ٢٠ وَ كُلَّ الْكَلَامْ الْكَتَبْتَهْ لَيْكُو دَا صَحِيحْ. وَ اللّٰهْ يَعَرْفَهْ.

٢١ وَ بَعَدْ دَا، قَمَّيْت نُرُوغْ فِي سُورِيَا وَ كِلِكِيَّةْ. ٢٢ وَ فِي الْوَكِتْ دَا، جَمَاعَاتْ الْمَسِيحِيِّينْ الْفِي دَارْ الْيَهُودِيَّةْ لِسَّاعْهُمْ مَا عِرْفَوْنِي. ٢٣ سِمْعَوْا الْخَبَرْ الْبُقُولْ: «النَّادُمْ الْأَوَّلْ تَعَّبَانَا، هَسَّعْ قَاعِدْ يِبَلِّغْ لِلنَّاسْ بِالْإِيمَانْ الْأَوَّلْ دَوَّرْ يِدَمِّرَهْ.» ٢٤ وَ شَكَرَوْا اللّٰهْ فِي شَانِي.