مَرْخُوس 5

النادم العِنْده شواطين

١ وَ خَلَاصْ قَطَعَوْا الْبَحَرْ وَ وَصَّلَوْا بَلَدْ الْقَرَاسِيِّينْ. ٢ وَ وَكِتْ عِيسَى دَلَّى مِنْ الْمَرْكَبَةْ طَوَّالِي نَادُمْ وَاحِدْ مُشَوْطِنْ جَاءْ لَاقَاهْ. وَ النَّادُمْ دَا، جَاءْ لَيَّهْ مِنْ الْقُبُورْ. ٣ وَ هُو سَاكِنْ فِي الْقُبُورْ وَ مَا فِي نَادُمْ الْيَقْدَرْ يَرْبُطَهْ بَتَّانْ. كَنْ بِجِنْزِيرْ كُلَ مَا يِنْرَبِطْ. ٤ دَايْماً رَبَطَوْا إِيدَيْنَهْ وَ رِجِلَيْنَهْ بِقُيُودْ مِنْ حَدِيدْ وَ جَنْزَرَوْه. وَ لَاكِنْ الْجَنَازِيرْ هُو قَطَّعَاهُمْ وَ الْقُيُودْ هُو دَايْماً كَسَّرَاهُمْ. وَ مَا فِي إِنْسَانْ الْيَقْدَرْ يِثَبِّتَهْ. ٥ لَيْل وَ نَهَارْ هُو قَاعِدْ يِعِيطْ فِي أُسْط الْقُبُورْ وَ فِي الْجِبَالْ وَ يَجْرَحْ نَفْسَهْ بِحُجَارْ.

٦ وَ مِنْ بَعِيدْ هُو شَافْ عِيسَى وَ جَرَى لَيَّهْ وَ سَجَدْ قِدَّامَهْ. ٧ وَ بِحِسّ شَدِيدْ عَاطْ وَ قَالْ: «يَا عِيسَى إِبْن اللّٰهْ الْعَالِي. تِدَوْر مِنِّي شُنُو؟ نَشْحَدَكْ بِأُسُمْ اللّٰهْ، مَا تِعَذِّبْنِي!» ٨ وَ قَالْ الْكَلَامْ دَا أَشَانْ أَوَّلْ عِيسَى قَالْ لَيَّهْ: «يَا شَيْطَانْ، أَمْرُقْ مِنَّهْ!» ٩ وَ خَلَاصْ عِيسَى سَأَلَهْ وَ قَالْ: «أُسْمَكْ يَاتُو؟» وَ الْمُشَوْطِنْ رَدَّ لَيَّهْ وَ قَالْ: «أَنَا أُسْمِي دَيْش أَشَانْ أَنِحْنَ شَوَاطِينْ كَتِيرِينْ». ١٠ وَ الشَّوَاطِينْ شَحَدَوْا عِيسَى بِشِدَّةْ أَشَانْ مَا يَطْرُدْهُمْ فِي بَكَانْ بَعِيدْ.

١١ وَ فِي الْبَكَانْ دَا، فِي خَنَازِيرْ كَتِيرِينْ قَاعِدِينْ يَسْرَحَوْا فِي طَرَفْ الْحَجَرْ. ١٢ وَ الشَّوَاطِينْ شَحَدَوْا عِيسَى وَ قَالَوْا: «رَسِّلْنَا فِي الْخَنَازِيرْ دَوْل وَ خَلِّينَا نِنْدَسَّوْا فَوْقهُمْ». ١٣ وَ عِيسَى أَنْطَاهُمْ إِذِنْ. وَ خَلَاصْ الشَّوَاطِينْ مَرَقَوْا مِنْ الْمُشَوْطِنْ وَ دَخَلَوْا فِي الْخَنَازِيرْ. وَ عَدَدْ الْخَنَازِيرْ قَرِيبْ 2 000. وَ كُلُّهُمْ جَرَوْا مِنْ طَرَفْ الْحَجَرْ وَ وَقَعَوْا فِي الْبَحَرْ وَ خَلَاصْ الْأَلْمِي أَكَلَاهُمْ.

١٤ وَ رُعْيَانْ الْخَنَازِيرْ عَرَّدَوْا وَ مَشَوْا خَبَّرَوْا كُلَّ النَّاسْ الْفِي الْحِلَّةْ وَ فِي الزِّرَاعَةْ. وَ كُلَّ النَّاسْ مَرَقَوْا مِنْ الْحِلَّةْ أَشَانْ يِشِيفُوا الشَّيّءْ الْبِقِي. ١٥ وَ جَوْا لِعِيسَى وَ شَافَوْا الْمُشَوْطِنْ عَقْلَهْ عَافَيْ. هُو قَاعِدْ سَاكِتْ وَ لَابِسْ خُلْقَانْ. وَ عِرْفَوْا دَا بَسْ النَّادُمْ الْأَوَّلْ دَيْش الشَّوَاطِينْ قَاعِدْ فَوْقَهْ. وَ خَافَوْا مَرَّةْ وَاحِدْ. ١٦ وَ النَّاسْ الشَّافَوْه، خَبَّرَوْا النَّاسْ الْآخَرِينْ بِالشَّيّءْ الْبِقِي لِلْمُشَوْطِنْ وَ الْخَنَازِيرْ. ١٧ وَ خَلَاصْ شَحَدَوْا عِيسَى يَمْرُقْ مِنْ بَلَدْهُمْ.

١٨ وَ وَكِتْ عِيسَى يِدَوْر يَرْكَبْ فِي الْمَرْكَبَةْ، النَّادُمْ الْأَوَّلْ مُشَوْطِنْ شَحَدْ عِيسَى أَشَانْ يَمْشِي مَعَايَهْ. ١٩ لَاكِنْ عِيسَى أَبَى. وَ قَالْ لَيَّهْ: «قَبِّلْ بَيْتَكْ وَ أَوْرِي نَاسَكْ بِكُلَّ شَيّءْ الْاللّٰهْ سَوَّاهْ لَيْك وَ بِكِكَّيْف هُو رَحَمَاكْ». ٢٠ وَ خَلَاصْ النَّادُمْ دَا، مَشَى وَ بَدَا يِبَلِّغْ لِنَاسْ الْمُدُنْ الْعَشَرَةْ وَ أَوْرَاهُمْ بِكُلَّ شَيّءْ الْعِيسَى سَوَّاهْ لَيَّهْ. وَ كُلَّ النَّاسْ أَلْعَجَّبَوْا.

بِنيّة جَايْرُس و المرة

٢١ وَ عِيسَى رِكِبْ فِي الْمَرْكَبَةْ بَتَّانْ وَ قَطَعْ الْبَحَرْ بِنُصَّهْ الْآخَرْ. وَ نَاسْ كَتِيرِينْ لَمَّوْا فَوْقَهْ. وَ هُو قَاعِدْ فِي خَشُمْ الْبَحَرْ. ٢٢ وَ فِي الْبَكَانْ دَا، نَادُمْ وَاحِدْ جَاءْ لَيَّهْ وَ هُو مِنْ مَسَائِيلْ بَيْت الصَّلَاةْ وَ أُسْمَهْ جَايْرُسْ. وَ وَكِتْ شَافْ عِيسَى، هُو سَجَدْ قِدَّامَهْ. ٢٣ وَ شَحَدْ عِيسَى زِيَادَةْ وَ قَالْ: «بِنَيِّتِي صَغَيْرَةْ قَرَّبَتْ لِلْمَوْت! تَعَالْ خُطّ إِيدَيْنَكْ فَوْقهَا وَ هِي تَلْقَى الْعَافَيْ وَ مَا تُمُوتْ.»

٢٤ وَ عِيسَى قَمَّ مَشَى مَعَايَهْ. وَ نَاسْ كَتِيرِينْ مَرَّةْ وَاحِدْ مَاشِينْ مَعَايَهْ وَ قَاعِدِينْ يِعَصُّرُوهْ مِنْ كُلِّ جِيهَةْ. ٢٥ وَ فِي مَرَةْ وَاحِدَةْ فِي أُسْط النَّاسْ. وَ عِنْدَهَا 12 سَنَةْ دَمَّهَا يِدَفِّقْ. ٢٦ وَ هِي أَوَّلْ مَشَتْ لِدَكَاتِيرْ كَتِيرِينْ وَ تِعِبَتْ كَتِيرْ مِنْ عِلَاجْهُمْ. وَ هِي دَفَعَتْ لَيْهُمْ كُلَّ مَالْهَا وَ لَاكِنْ مَا لِقَتْ الْعَافَيْ. وَ مَرَضْهَا زَادْ مِنْ أَوَّلْ. ٢٧ وَ هِي سِمْعَتْ بِعِيسَى. وَ مَشَتْ لَيَّهْ فِي أُسْط النَّاسْ وَ قَرَّبَتْ لَيَّهْ مِنْ وَرَاءْ وَ مَدَّتْ إِيدْهَا وَ لِمْسَتْ خَلَقَهْ. ٢٨ وَ قَالَتْ فِي قَلِبْهَا: «كَنْ نَلْمَسْ خَلَقَهْ بَسْ، نَلْقَى الْعَافَيْ.» ٢٩ وَ طَوَّالِي دَمَّهَا وَقَفْ. وَ هِي عِرْفَتْ فِي نَفِسْهَا كَدَرْ لِقَتْ الْعَافَيْ.

٣٠ وَ طَوَّالِي عِيسَى عِرِفْ فِي نَفْسَهْ كَدَرْ قُدْرَةْ مَرَقَتْ مِنَّهْ. وَ أَلَّفَّتْ فِي أُسْط النَّاسْ الْكَتِيرِينْ الْمَاشِينْ مَعَايَهْ وَ سَأَلَاهُمْ وَ قَالْ: «يَاتُو اللِّمِسْ خَلَقِي؟» ٣١ وَ تَلَامِيذَهْ قَالَوْا: «سَيِّدْنَا، فِي نَاسْ كَتِيرِينْ مُحَوِّقِينَكْ وَ قَاعِدِينْ يِعَصُّرُوكْ. مَالَا تَسْأَلْنَا يَاتُو اللِّمِسَاكْ؟»

٣٢ وَ عِيسَى قَاعِدْ يِلَّفَّتْ أَشَانْ يِشِيفْ النَّادُمْ اللِّمِسَهْ. ٣٣ وَ الْمَرَةْ عِرْفَتْ الشَّيّءْ الْبِقِي فَوْقهَا وَ قَاعِدَةْ تَرْجِفْ مِنْ الْخَوْف. وَ جَاتْ لِعِيسَى وَ سَجَدَتْ قِدَّامَهْ وَ أَوْرَتَهْ بِكُلَّ شَيّءْ الْبِقِي لَيْهَا. ٣٤ وَ عِيسَى حَجَّى لَيْهَا وَ قَالْ: «يَا بِنَيِّتِي، إِيمَانْكِ بَيِّ نَجَّاكِ. أَمْشِي بِالسَّلَامْ وَ أَلْقَيْ الْعَافَيْ الْكَامِلَةْ».

٣٥ وَ وَكِتْ عِيسَى قَاعِدْ يِحَجِّي لَيْهَا، فِي نَاسْ وَاحِدِينْ جَوْا مِنْ بَيْت الْمَسْؤُولْ الْبِنَيِّتَهْ مَرْضَانَةْ وَ قَالَوْا: «بِنَيِّتَكْ مَاتَتْ خَلَاصْ. خَلِّي الْمُعَلِّمْ يِنْجَمَّ». ٣٦ وَ لَاكِنْ عِيسَى أَبَى مَا يَسْمَعْ كَلَامْهُمْ وَ حَجَّى لِلْمَسْؤُولْ وَ قَالْ: «مَا تَخَافْ. آمِنْ بَيِّ بَسْ». ٣٧ وَ هُو مَا خَلَّى أَيِّ نَادُمْ يَمْشِي مَعَايَهْ إِلَّا بُطْرُسْ وَ يَعْقُوبْ وَ يُوحَنَّا أَخُو يَعْقُوبْ.

٣٨ وَ وَصَّلَوْا فِي بَيْت الْمَسْؤُولْ وَ عِيسَى شَافْ النَّاسْ قَاعِدِينْ يِسَوُّوا حَرَكَةْ كَتِيرَةْ. وَ هُمَّنْ قَاعِدِينْ يَبْكُوا بِحِسّ عَالِي حَزْنَانِينْ لِلْبِنَيَّةْ الْمَاتَتْ. ٣٩ وَ هُو دَخَلْ فِي الْبَيْت وَ حَجَّى لَيْهُمْ وَ قَالْ: «مَالَا تَبْكُوا بِحِسّ عَالِي مِثِلْ دَا؟ الْبِنَيَّةْ مَا مَاتَتْ. هِي نَايْمَةْ بَسْ».

٤٠ وَ ضِحْكَوْا لَيَّهْ بِشَمَاتَةْ وَ هُو مَرَقَاهُمْ كُلُّهُمْ مِنْ الْبَيْت. وَ شَالْ مَعَايَهْ أَبُو الْبِنَيَّةْ وَ أَمَّهَا وَ النَّاسْ الْمَعَايَهْ وَ دَخَلَوْا فِي لُبّ الْبَيْت فِي الْبَكَانْ الْبِنَيَّةْ رَاقْدَةْ فَوْقَهْ. ٤١ وَ كَرَبْ إِيدْهَا وَ حَجَّى لَيْهَا بِاللُّغَّةْ الْأَرَامِيَّةْ وَ قَالْ: «تَلِثَا كُومِي» وَ مَعَنَاتَهْ: «يَا بِنْتِي، قُمِّي.» ٤٢ وَ طَوَّالِي الْبِنَيَّةْ قَمَّتْ وَ رَاغَتْ. وَ هِي عُمُرْهَا 12 سَنَةْ. وَ كُلَّ النَّاسْ أَلْعَجَّبَوْا مَرَّةْ وَاحِدْ. ٤٣ وَ عِيسَى أَنْطَاهُمْ أَمُرْ أَشَانْ مَا يِكَلُّمُوا لِنَاسْ بِالشَّيّءْ الْبِقِي. وَ قَالْ لَيْهُمْ: «أَنْطُوهَا أَكِلْ».