مَرْخُوس 4

مَثَل الحرّاتي اليتَيْرِب

١ وَ بَتَّانْ عِيسَى قَمَّ يِعَلِّمْ النَّاسْ فِي خَشُمْ الْبَحَرْ. وَ نَاسْ كَتِيرِينْ مَرَّةْ وَاحِدْ لَمَّوْا فَوْقَهْ أَشَانْ يَسْمَعَوْا كَلَامَهْ. أَشَانْ دَا، هُو رِكِبْ فِي مَرْكَبَةْ وَ قَعَدْ تِحِتْ. وَ الْمَرْكَبَةْ قَاعِدَةْ فِي الْبَحَرْ وَ كُلَّ النَّاسْ قَاعِدِينْ فِي التُّرَابْ فِي خَشُمْ الْبَحَرْ. ٢ وَ حَجَّى لَيْهُمْ بِأَمْثَالْ وَ عَلَّمَاهُمْ كَلَامْ كَتِيرْ. وَ فِي تَعْلِيمَهْ، هُو قَالْ: ٣ «أَسْمَعَوْا! يَوْم مِنْ الْأَيَّامْ، حَرَّاتِي وَاحِدْ مَرَقْ وَ مَشَى فِي الزَّرَعْ أَشَانْ يِتَيْرِبْ. ٤ وَ وَكِتْ هُو قَاعِدْ يِشَتِّتْ تَيْرَابَهْ، تَيْرَابْ وَاحِدْ وَقَعْ فِي الدَّرِبْ وَ طُيُورْ جَوْا أَكَلَوْه. ٥ وَ تَيْرَابْ آخَرْ وَقَعْ فِي بَكَانْ عِنْدَهْ حَصْحَصْ كَتِيرْ وَ تُرَابْ شِيَّةْ. وَ الْبِذْرَةْ قَمَّتْ عَجَلَةْ أَشَانْ التُّرَابْ شِيَّةْ. ٦ وَ لَاكِنْ وَكِتْ الْحَرَّايْ بِقَتْ حَامِيَةْ، طَقَّتْ الْبِذْرَةْ دِي وَ الْبِذْرَةْ يِبْسَتْ أَشَانْ مَا عِنْدَهَا عُرُوقْ. ٧ وَ تَيْرَابْ آخَرْ وَقَعْ فِي أُسْط الشَّوْك وَ الْبِذْرَةْ قَمَّتْ مَعَ الشَّوْك سَوَا وَ الشَّوْك خَنَقَاهَا وَ مَا وِلْدَتْ. ٨ وَ تَيْرَابْ آخَرْ وَقَعْ فِي تُرَابْ عَدِيلْ وَ الْبِذْرَةْ قَمَّتْ وَ وِلْدَتْ وَ أَنْتَجَتْ وَ كُلِّ قَنْدُولْ عِنْدَهْ 30 أَوْ 60 أَوْ 100 حَبَّةْ». ٩ وَ خَلَاصْ قَالْ لَيْهُمْ: «أَيِّ نَادُمْ الْعِنْدَهْ أَدَانْ لِلسَّمَعْ، خَلِّي يَسْمَعْ!»

١٠ وَ وَكِتْ عِيسَى وَ النَّاسْ الْآخَرِينْ الْمَعَايَهْ وَ التَّلَامِيذ الْأَتْنَا عَشَرْ قَاعِدِينْ وِحَيْدهُمْ، هُمَّنْ سَأَلَوْه مِنْ أَمْثَالْ وَ مَعَنَاتْهُمْ. ١١ وَ عِيسَى قَالْ: «لَيْكُو إِنْتُو أَنْطَوْكُو سِرّ مَمْلَكَةْ اللّٰهْ لَاكِنْ لِلنَّاسْ الْآخَرِينْ نِحَجِّي لَيْهُمْ دَايْماً بِأَمْثَالْ. ١٢ وَ بِمِثِلْ دَا، ﴿أَكِيدْ عِنْدُهُمْ عُيُونْ وَ لَاكِنْ مَا يِشِيفُوا. وَ أَكِيدْ يَسْمَعَوْا الْكَلَامْ لَاكِنْ مَا يَفْهَمَوْه. وَ كَنْ مَا مِثِلْ دَا، هُمَّنْ يُتُوبُوا مِنْ ذُنُوبْهُمْ وَ اللّٰهْ يَغْفِرْ لَيْهُمْ.﴾»

١٣ وَ عِيسَى قَالْ لِتَلَامِيذَهْ: «مَا فِهِمْتُوا مَثَلْ الْحَرَّاتِي الْيِتَيْرِبْ وَلَّا؟ كَنْ مَا فِهِمْتُوهْ، كِكَّيْف تَفْهَمَوْا كُلَّ الْأَمْثَالْ الْآخَرِينْ؟ ١٤ فِي الْمَثَلْ دَا، الْحَرَّاتِي الْيِتَيْرِبْ، هُو النَّادُمْ الْيِبَلِّغْ كَلَامْ اللّٰهْ. ١٥ وَ التَّيْرَابْ الْوَقَعْ فِي الدَّرِبْ، هُو يِمَثِّلْ النَّاسْ الْيَسْمَعَوْا كَلَامْ اللّٰهْ وَ طَوَّالِي شَيْطَانْ يَجِي وَ يِشِيلْ مِنْ قُلُوبْهُمْ الْكَلَامْ الْبَلَّغَوْه لَيْهُمْ. ١٦ وَ بَتَّانْ التَّيْرَابْ التَّيْرَبَوْه فِي بَكَانْ حَصْحَصْ يِمَثِّلْ النَّاسْ الْيَسْمَعَوْا كَلَامْ اللّٰهْ وَ طَوَّالِي يَقْبَلَوْه بِفَرْحَةْ ١٧ لَاكِنْ هُمَّنْ مِثِلْ بِذْرَةْ الْمَا عِنْدَهَا عُرُوقْ. وَ مَا يَقْعُدُوا ثَابْتِينْ إِلَّا لِوَكِتْ شِيَّةْ بَسْ. وَ وَكِتْ الضِّيقَةْ تَجِي فَوْقهُمْ وَلَّا النَّاسْ يِتَعُّبُوهُمْ بِسَبَبْ كَلَامْ اللّٰهْ، النَّاسْ دَوْل، يَمُرْقُوا عَجَلَةْ مِنْ الدَّرِبْ. ١٨ وَ نَاسْ آخَرِينْ هُمَّنْ مِثِلْ التَّيْرَابْ الْوَقَعْ فِي أُسْط الشَّوْك. هُمَّنْ النَّاسْ الْيَسْمَعَوْا كَلَامْ اللّٰهْ ١٩ وَ لَاكِنْ مَشَاكِلْ الدُّنْيَا وَ رَيْدِتْهُمْ لِلْمَالْ وَ شَهْوَاتْهُمْ يَكْتُلُوا الْكَلَامْ الْفِي قُلُوبْهُمْ. وَ بَيْدَا، كَلَامْ اللّٰهْ مَا يِجِيبْ فَايْدَةْ. ٢٠ وَ التَّيْرَابْ الْوَقَعْ فِي التُّرَابْ الْعَدِيلْ يِمَثِّلْ النَّاسْ الْيَسْمَعَوْا كَلَامْ اللّٰهْ وَ يَكُرْبُوهْ عَدِيلْ. وَ هُمَّنْ يِجِيبُوا إِنْتَاجْ سَمَحْ، وَاحِدِينْ مِنْهُمْ 30 أَوْ 60 أَوْ 100 حَبَّةْ.»

مَثَل الفانوس

٢١ وَ عِيسَى قَالْ بَتَّانْ: «كَنْ نَادُمْ يِجِيبْ فَانُوسْ فِي بَيْتَهْ، هُو يِدِسَّهْ فِي تِحِتْ دَوْزَمْ وَلَّا؟ أَوْ تِحِتْ سَرِيرَهْ وَلَّا؟ لَا. هُو يُخُطَّهْ فِي بَكَانْ فَوْق. ٢٢ أَشَانْ مَا فِي شَيّءْ مُلَبَّدْ الْبَعَدَيْن مَا يِنْشَافْ وَ مَا فِي سِرّ الْبَعَدَيْن مَا يِنْعَرِفْ. ٢٣ أَيِّ نَادُمْ الْعِنْدَهْ أَدَانْ لِلسَّمَعْ، خَلِّي يَسْمَعْ!»

مَثَل البِذْرة

٢٤ وَ عِيسَى حَجَّى لَيْهُمْ بَتَّانْ وَ قَالْ: «الْمِكْيَالْ الْإِنْتُو كِلْتُوا بَيَّهْ لِلْآخَرِينْ هُو نَفَسْ الْمِكْيَالْ الْيِكِيلُوا لَيْكُو بَيَّهْ وَ يِزِيدُوهْ لَيْكُو آخَرْ. ٢٥ أَشَانْ يَنْطُوا النَّادُمْ الْعِنْدَهْ. وَ لَاكِنْ النَّادُمْ الْمَا عِنْدَهْ الشِّيَّةْ الْعِنْدَهْ كُلَ يِشِيلُوهْ مِنَّهْ.»

٢٦ وَ عِيسَى قَالْ: «مَمْلَكَةْ اللّٰهْ تَبْقَى مِثِلْ كَيْ. نَادُمْ وَاحِدْ شَتَّتْ تَيْرَابْ فِي زَرْعَهْ. ٢٧ وَ بِلَيْل النَّادُمْ يُنُومْ وَ بِنَهَارْ يُقُمّ وَ التَّيْرَابْ يَبْذُرْ وَ يِزِيدْ. وَ لَاكِنْ هُو مَا يَعَرِفْ الْبِذْرَةْ قَاعِدَةْ تَكْبُرْ كِكَّيْف. ٢٨ فِي الْبِدَايَةْ، الْأَرْض تِقَوِّمْ نَبَاتْ. وَ بَعَدْ دَا، النَّبَاتْ يِسِلّ قَنْدُولْ. وَ فِي الْآخِرْ، الْقَنْدُولْ يَنْطِي حُبُوبْ. ٢٩ وَ وَكِتْ الْحُبُوبْ نِجْضَوْا خَلَاصْ، هُو يِشِيلْ خَنْجَرَهْ أَشَانْ دَا وَكْت الْقَطِعْ.»

مَثَل الخرْدل

٣٠ وَ عِيسَى قَالْ: «بِشُنُو نِشَبُّهُوا مَمْلَكَةْ اللّٰهْ؟ وَ بِشُنُو نِمَثُّلُوهَا؟ ٣١ هِي مِثِلْ حَبَّةْ وَاحِدَةْ هَنَا كِرَيْب. وَ هِي أَصْغَرْ حَبَّةْ مِنْ كُلَّ التَّيْرَابْ الْيِتَيْرُبُوهْ النَّاسْ فِي الْأَرْض. ٣٢ لَاكِنْ وَكِتْ يِتَيْرُبُوهَا هِي تَبْذُرْ وَ تَبْقَى كَبِيرَةْ مِنْ كُلَّ نَبَاتَاتْ الْجِنَيْنَةْ. وَ تِسَوِّي فُرُوعْ كُبَارْ وَ ضَلِيلِينْ لَحَدِّي طُيُورْ السَّمَاءْ يَبْنُوا عُشُوشْهُمْ فَوْقهَا.»

٣٣ وَ عِيسَى حَجَّى لِلنَّاسْ بِأَمْثَالْ كَتِيرِينْ مِثِلْ الْأَمْثَالْ دَوْل وَ بَلَّغْ لَيْهُمْ كَلَامْ اللّٰهْ. وَ حَجَّى لَيْهُمْ بِكَلَامْ مَا قَاسِي لِيَفْهَمَوْه. ٣٤ وَ هُو مَا حَجَّى لَيْهُمْ شَيّءْ بَلَا مَثَلْ. وَ لَاكِنْ لِتَلَامِيذَهْ كَمَانْ هُو فَسَّرْ لَيْهُمْ كُلَّ شَيّءْ وَكِتْ هُو وَ هُمَّنْ قَاعِدِينْ وِحَيْدهُمْ.

المسيح وقّف الريح الشديدة

٣٥ وَ فِي نَفْس الْيَوْم بِمَغْرِبْ، عِيسَى حَجَّى لِتَلَامِيذَهْ وَ قَالْ: «تَعَالُوا نَقْطَعَوْا الْبَحَرْ.» ٣٦ وَ بَعَدْ قَمَّوْا خَلَّوْا النَّاسْ، هُمَّنْ رِكْبَوْا فِي الْمَرْكَبَةْ الْعِيسَى قَاعِدْ فَوْقهَا وَ مَشَوْا. وَ فِي مَرَاكِبْ آخَرِينْ كُلَ مَعَاهُمْ. ٣٧ وَ بِغَفْلَةْ رِيحْ شَدِيدَةْ مَرَّةْ وَاحِدْ سَاقَتْ وَ قَوَّمَتْ شَلَّالْ وَ الشَّلَّالْ هَزَّ الْمَرْكَبَةْ وَ الْمَرْكَبَةْ تِدَوْر تِنْمَلِي أَلْمِي.

٣٨ وَ عِيسَى رَاقِدْ وَرَاءْ فِي الْمَرْكَبَةْ وَ نَايِمْ فِي وَسَّادَةْ. وَ تَلَامِيذَهْ قَوَّمَوْه مِنْ النَّوْم وَ قَالَوْا: «سَيِّدْنَا، مَا لَمَّاكْ كَنْ نُمُوتُوا وَلَّا؟» ٣٩ وَ هُو قَمَّ وَ كَشَّ لِلرِّيحْ وَ قَالْ لِلْبَحَرْ: «أَقِيفْ! أَسْكُتْ!» وَ خَلَاصْ الرِّيحْ وَقَفَتْ وَ الْوَطَاةْ بِقَتْ هَادِيَةْ مَرَّةْ وَاحِدْ. ٤٠ وَ هُو حَجَّى لِتَلَامِيذَهْ وَ قَالْ: «مَالَا إِنْتُو خَايْفِينْ؟ لِسَّاعْ مَا عِنْدُكُو إِيمَانْ وَلَّا؟»

٤١ وَ هُمَّنْ خَافَوْا خَوْف شَدِيدْ وَ حَجَّوْا أَمْبَيْنَاتْهُمْ وَ قَالَوْا: «النَّادُمْ دَا يَاتُو؟ لَحَدِّي الرِّيحْ وَ الْبَحَرْ كُلَ يَسْمَعَوْا كَلَامَهْ!»