كتاب مَتَّى
من إنجيل المسيح
مقدمة
اللّه بس العليم و الحكيم و من قُبّال البِداية، قاعد في عِلْمه كدر هو يرسِّل عِيسَى المسيح و هو حجّى بيه للأنبياء.
زمان، اللّه واعد سيِّدنا إِبْرَاهِيم ينْطي بذُرّيّته بركة كبيرة التبْقى لكل الأُمم. و البركة دي جات بعِيسَى المسيح و أشان دا، عِيسَى معْروف بإبْن إِبْرَاهِيم.
و زمان، اللّه واعد الملك دَاوُد و قال ليه هو يعزِل نادم من ذُرّيّته و يجْعله ملك كبير بِلْحَيْن المُلْكه أبداً ما يكمِّل. و المسيح جاء و هو بس بِقي ملك المُلوك و مُلْكه أبداً ما يكمِّل. و أشان دا، هو معْروف بإبْن دَاوُد.
و زمان، اللّه حجّى للنبي دَنْيال و قال هو يأسِّس ممْلكته في الدُنْيا. و اللّه جعل المسيح حاكِم في ممْلكته الأبديّة دي. و الناس يدْخُلوا في المملكة دي بالإيمان و بالتَوْبة و يلْقوا السلام و الغُفْران و رحْمة اللّه.
أُسُم النادم الاللّه عزله ليكْتِب الكتاب دا، هو مَتَّى لَاوِي وِلَيْد حَلْفَا و هو كتبه بقُدْرة الروح القُدّوس. و قُبّال ما بِقي تِلْميذ المسيح، هو من ناس الجمارِك. و مَتَّى كتب كدر عِيسَى المسيح، هو ملك اليَهُود القاعدين يرْجوه. الكِلْمة «مسيح» معناته الملك العظيم المسحوه و درّجوه ملك.
و الكتاب دا يبْدا بأسامَي جُدود المسيح و يوصِّف ككيف والودْته العجيبة بِقت. و يأوْرينا بككيف سيِّدنا يَحْيَى غطّس المسيح و بككيف إِبْلِيس جرّبه. و يأوْرينا بتعْليم المسيح و بقُدُرْته العجيبة السوّى بيها الخَيْر لكل الناس. و يأوْرينا بمَوْته في الصليب الاللّه قدّره ليه و ببُعاثه المجيد.
خلّي أيِّ نادم اليقْري الكلام دا يدْخُل في مملكة اللّه و يلْقى بركاتها. آمين.