كتاب مَرْخُوس
من إنجيل المسيح
مقدمة
الحمْدُ للّٰه، ربِّنا اللّه القادِر يعرِف كدر الإنْسان ضعيف و تعْبان. و اللّه رسّل النبي يَحْيَى أشان يجهِّز الدرِب و رسّل المسيح أشان يجيب النجاة. و اللّه وصّف محنِّته للناس بعِيسَى المسيح، بالكلام الهو قاله و بالخِدْمة الهو سوّاها.
و دا كتاب واحِد من إنجيل المسيح. هو يبْدا بخِدْمة النبي يَحْيَى في الصحراء. و يكمِّل بكلام المسيح لتلاميذه وكت هو بعث من أُسْط المَيْتين. و يأوْرينا كلام كتير في تاريخ هنا عِيسَى المسيح و تعبه الشديد و نصْره المجيد. و يوصِّف ككيف الناس عِرْفوا عِيسَى هو إبْن اللّه.
النادم الربِّنا عزله أشان يكْتِب الكتاب دا، هو السيِّد يُوحَنَّا البِنادوه مَرْخُوس و هو كتبه بإذِن الربّ و بقُدْرة الروح القُدّوس. و وكت المسيح رايِغ في الأرْض، مَرْخُوس دا صبي. و هو مَوْجود وكت الكُبارات كربوا المسيح. بَيْته في مدينة القدس و من الأوّل، المُؤمِنين قاعدين يلِمّوا فَوْقه. هو سافر مع الرسول بُولُس و حسب الناس العِنْدُهم خِبْرة، الرسول سِمْعَان بُطْرُس كل قاعد معايه وكت مَرْخُوس قاعد يكْتِب الكتاب دا.
و خلّي اللّه يجهِّز قلِب هنا أيِّ نادم اليقْري الكلام دا أشان يلْقى النجاة الاللّه رسّلاها بالمسيح. آمين.