مَرْخُوس 1

كتاب مَرْخُوس

من إنجيل المسيح

خِدْمة يَحْيَى المُغطِّس

١ دِي هِي بِشَارَةْ عِيسَى الْمَسِيحْ إِبْن اللّٰهْ. وَ الْبِشَارَةْ بَدَتْ ٢ مِثِلْ كَلَامْ اللّٰهْ الْمَكْتُوبْ فِي كِتَابْ النَّبِي إِشَعْيَا. هُو قَالْ:

﴿دَاهُو نِرَسِّلْ رَسُولِي قِدَّامَكْ

وَ هُو يِعَدِّلْ لَيْك الدَّرِبْ.﴾

٣ ﴿وَ فِي حِسّ قَاعِدْ يِعِيطْ فِي الْخَلَاءْ

وَ يُقُولْ:

«جَهُّزُوا دَرِبْ الرَّبّ

وَ عَدُّلُوا لَيَّهْ الطُّرُقْ!»﴾

٤ وَ خَلَاصْ يَحْيَى الْمُغَطِّسْ، هُو بَسْ النَّادُمْ الْقَمَّ فِي الْخَلَاءْ وَ بَدَا يِنَادِي النَّاسْ أَشَانْ يُتُوبُوا. وَ يِغَطِّسْهُمْ فِي الْأَلْمِي وَ اللّٰهْ يَغْفِرْ لَيْهُمْ ذُنُوبْهُمْ. ٥ وَ نَاسْ كَتِيرِينْ مِنْ دَارْ الْيَهُودِيَّةْ وَ مَدِينَةْ الْقُدُسْ مَرَقَوْا وَ مَشَوْا لِيَحْيَى فِي الْخَلَاءْ. وَ أَعْتَرَفَوْا بِذُنُوبْهُمْ وَ يَحْيَى غَطَّسَاهُمْ فِي بَحَرْ الْأُرْدُنْ.

٦ وَ يَحْيَى لَابِسْ خَلَقْ مِنْ صُوفْ أَلْبِلْ وَ رَابِطْ صُلْبَهْ بِسَيْر وَ قَاعِدْ يَاكُلْ جَرَادْ وَ عَسَلْ النَّحَلْ. ٧ وَ هُو يِبَشِّرْ النَّاسْ وَ يُقُولْ: «نَادُمْ وَاحِدْ جَايِ وَرَايِ وَ هُو قَادِرْ مِنِّي بِلْحَيْن وَ أَنَا مَا تَمَّيْت لَيَّهْ خَدَّامْ كُلَ. ٨ وَ أَنَا غَطَّسْتُكُو فِي الْأَلْمِي وَ لَاكِنْ هُو يِغَطِّسْكُو بِالرُّوحْ الْقُدُّوسْ».

المسيح غطّسوه و إِبْلِيس جرّبه

٩ وَ فِي الْوَكِتْ دَا، عِيسَى قَمَّ مِنْ حِلَّةْ النَّاصِرَةْ الْفِي دَارْ الْجَلِيلْ وَ مَشَى لِيَحْيَى. وَ يَحْيَى غَطَّسَهْ فِي بَحَرْ الْأُرْدُنْ. ١٠ وَ طَوَّالِي وَكِتْ عِيسَى قَمَّ مِنْ الْأَلْمِي، هُو شَافْ السَّمَاوَاتْ أَنْفَتَحَوْا وَ الرُّوحْ الْقُدُّوسْ جَايِ مِنْ السَّمَاءْ وَ نَزَلْ فَوْقَهْ مِثِلْ حَمَامَةْ. ١١ وَ حِسّ مِنْ السَّمَاءْ أَنْسَمَعْ وَ قَالْ: «إِنْتَ بَسْ إِبْنِي وَ أَنَا نِحِبَّكْ وَ أَنَا فَرْحَانْ بَيْك بِلْحَيْن.»

١٢ وَ طَوَّالِي الرُّوحْ الْقُدُّوسْ قَادَهْ لِعِيسَى وَ وَدَّاهْ فِي لُبّ الْخَلَاءْ. ١٣ وَ هُو قَعَدْ فِي الْخَلَاءْ وَ إِبْلِيسْ جَرَّبَهْ 40 يَوْم. وَ فِي الْوَكِتْ دَا، عِيسَى قَاعِدْ مَعَ حَيْوَانَاتْ الْكَدَادَةْ وَ الْمَلَائِكَةْ قَاعِدِينْ يِسَاعُدُوهْ.

أوّل تلاميذ المسيح

١٤ وَ يَحْيَى كَرَبَوْه فِي السِّجِنْ. وَ بَعَدْ دَا، عِيسَى مَشَى فِي دَارْ الْجَلِيلْ وَ بَلَّغْ لِلنَّاسْ بِشَارَةْ اللّٰهْ. ١٥ وَ قَمَّ يُقُولْ: «الْوَكِتْ تَمَّ وَ مَمْلَكَةْ اللّٰهْ قَرَّبَتْ. تُوبُوا مِنْ ذُنُوبْكُو وَ آمُنُوا بِالْبِشَارَةْ.»

١٦ وَ وَكِتْ عِيسَى رَايِغْ فِي خَشُمْ بَحَرْ الْجَلِيلْ، هُو شَافْ نَادُمْ أُسْمَهْ سِمْعَانْ مَعَ أَخُوهْ أُسْمَهْ أَنْدَرَيَّسْ. وَ هُمَّنْ حَوَّاتِينْ وَ قَاعِدِينْ يَزْقُلُوا شَرَكْهُمْ فِي الْبَحَرْ أَشَانْ يَكُرْبُوا حُوتْ. ١٧ وَ عِيسَى قَالْ لَيْهُمْ: «تَعَالُوا تَابُعُونِي. أَوَّلْ إِنْتُو قَاعِدِينْ تَكُرْبُوا حُوتْ وَ لَاكِنْ مِنْ الْيَوْم أَنَا نِسَوِّيكُو تَكُرْبُوا النَّاسْ لِتِوَصُّفُوهُمْ دَرِبْ اللّٰهْ.» ١٨ وَ طَوَّالِي خَلَّوْا شَرَكْهُمْ وَ قَمَّوْا تَابَعَوْه.

١٩ وَ عِيسَى مَشَى قِدَّامْ شِيَّةْ وَ شَافْ يَعْقُوبْ مَعَ أَخُوهْ يُوحَنَّا أَوْلَادْ زَبَدِي. وَ هُمَّنْ قَاعِدِينْ يِعَدُّلُوا شَرَكْهُمْ فِي مَرْكَبَتْهُمْ. ٢٠ وَ طَوَّالِي عِيسَى نَادَاهُمْ. وَ هُمَّنْ قَمَّوْا خَلَّوْا أَبُوهُمْ زَبَدِي فِي الْمَرْكَبَةْ مَعَ خَدَّامِينَهْ وَ تَابَعَوْا عِيسَى.

المسيح طرد شَيْطان من نادم

٢١ وَ عِيسَى وَ تَلَامِيذَهْ مَشَوْا فِي حِلَّةْ كَفَرْ نَاحُومْ. وَ فِي يَوْم السَّبْت هُو دَخَلْ فِي بَيْت الصَّلَاةْ وَ قَمَّ يِعَلِّمْ النَّاسْ. ٢٢ وَ النَّاسْ أَلْعَجَّبَوْا بِلْحَيْن مِنْ تَعْلِيمَهْ أَشَانْ عَلَّمَاهُمْ بِقُدْرَةْ الْاللّٰهْ أَنْطَاهَا لَيَّهْ وَ مَا مِثِلْ كَلَامْ الْعُلَمَاءْ.

٢٣ وَ طَوَّالِي، نَادُمْ وَاحِدْ مُشَوْطِنْ قَمَّ فِي بَيْت الصَّلَاةْ. وَ عِنْدَهْ شَيْطَانْ فَسِلْ. وَ هُو عَاطْ ٢٤ وَ قَالْ: «يَا عِيسَى مِنْ النَّاصِرَةْ! تِدَوْر مِنِّنَا شُنُو؟ جِيتْ هِنِي أَشَانْ تَهْلِكْنَا وَلَّا؟ أَنَا نَعَرْفَكْ. إِنْتَ بَسْ الْقُدُّوسْ الْاللّٰهْ رَسَّلَهْ!» ٢٥ وَ لَاكِنْ عِيسَى كَشَّ لَيَّهْ وَ قَالْ: «أَسْكُتْ وَ أَمْرُقْ مِنَّهْ!» ٢٦ وَ الشَّيْطَانْ رَمَى النَّادُمْ وَ هُو قَمَّ يِفَتْفِتْ وَ عَاطْ بِحِسّ حَارّ وَ خَلَاصْ الشَّيْطَانْ مَرَقْ مِنَّهْ.

٢٧ وَ كُلَّ النَّاسْ أَلْعَجَّبَوْا بِلْحَيْن وَ أَسَّاءَلَوْا أَمْبَيْنَاتْهُمْ وَ قَالَوْا: «هَايْ! دَا شُنُو؟ عِنْدَهْ تَعْلِيمْ جَدِيدْ وَ سُلْطَةْ لَحَدِّي يَامُرْ الشَّوَاطِينْ وَ يَسْمَعَوْا كَلَامَهْ!» ٢٨ وَ طَوَّالِي خَبَرَهْ شَتَّ فِي كُلَّ دَارْ الْجَلِيلْ.

المسيح داوى ناس كتيرين

٢٩ وَ طَوَّالِي، عِيسَى وَ تَلَامِيذَهْ مَرَقَوْا مِنْ بَيْت الصَّلَاةْ وَ أَنْدَسَّوْا فِي بَيْت سِمْعَانْ وَ أَنْدَرَيَّسْ. وَ يَعْقُوبْ وَ يُوحَنَّا كُلَ مَعَاهُمْ. ٣٠ وَ نَسِيبْتَهْ لِسِمْعَانْ رَاقْدَةْ عِنْدَهَا وِرْدَةْ. وَ طَوَّالِي أَوْرَوْا عِيسَى بَيْهَا. ٣١ وَ عِيسَى مَشَى لَيْهَا وَ كَرَبْ إِيدْهَا وَ قَوَّمَاهَا. وَ طَوَّالِي الْوِرْدَةْ خَلَّتْهَا وَ هِي ضَيَّفَتْهُمْ.

٣٢ وَ الْحَرَّايْ وَقَعَتْ خَلَاصْ وَ الْمَغْرِبْ جَاءْ. وَ جَابَوْا لِعِيسَى أَيِّ نَادُمْ الْمَرْضَانْ وَلَّا مُشَوْطِنْ. ٣٣ وَ نَاسْ الْحِلَّةْ كُلُّهُمْ لَمَّوْا فِي خَشُمْ الْبَيْت. ٣٤ وَ هُو دَاوَى نَاسْ كَتِيرِينْ الْمَرَضْهُمْ شِقْ شِقْ وَ طَرَدْ شَوَاطِينْ كَتِيرِينْ. وَ هُو أَمَرَاهُمْ لِلشَّوَاطِينْ مَا يِحَجُّوا أَشَانْ هُمَّنْ عِرْفَوْه.

المسيح راغ في دار الجَلِيل

٣٥ وَ بِفَجُرْ بَدْرِي قُبَّالْ الْحَرَّايْ مَا تَطْلَعْ، عِيسَى قَمَّ مَرَقْ وَ مَشَى فِي بَكَانْ مَا عِنْدَهْ نَاسْ. وَ هُو صَلَّى هِنَاكْ. ٣٦ وَ سِمْعَانْ وَ النَّاسْ الْمَعَايَهْ فَتَّشَوْه. ٣٧ وَ لِقَوْه وَ حَجَّوْا لَيَّهْ وَ قَالَوْا: «كُلَّ النَّاسْ قَاعِدِينْ يِفَتُّشُوكْ.» ٣٨ وَ هُو رَدَّ لَيْهُمْ وَ قَالْ: «تَعَالُوا نَمْشُوا فِي الْحِلَّالْ الْآخَرِينْ لِنِبَلِّغْ لَيْهُمْ كَلَامْ اللّٰهْ. أَشَانْ دَا بَسْ أَنَا جِيتْ». ٣٩ وَ قَمَّ رَاغْ فِي كُلَّ دَارْ الْجَلِيلْ وَ قَاعِدْ يِبَشِّرْ النَّاسْ فِي بُيُوتْ الصَّلَاةْ وَ يَطْرُدْ الشَّوَاطِينْ.

المسيح داوى المُجدِّم

٤٠ وَ رَاجِلْ وَاحِدْ عِنْدَهْ جِدَامْ جَاءْ لِعِيسَى وَ بَرَكْ قِدَّامَهْ. وَ شَحَدَهْ وَ قَالْ: «كَنْ تِدَوْر تَشْفِينِي، أَكِيدْ إِنْتَ تَقْدَرْ وَ أَنَا نَبْقَى طَاهِرْ.» ٤١ وَ عِيسَى حَنَّ فَوْقَهْ وَ مَدَّ إِيدَهْ وَ لِمِسْ الرَّاجِلْ الْعِنْدَهْ جِدَامْ وَ قَالْ: «نِدَوْر نَشْفِيكْ. أَبْقَى طَاهِرْ!» ٤٢ وَ طَوَّالِي، جِلْدَهْ بِرِي مِنْ الْجِدَامْ وَ هُو بِقِي طَاهِرْ. ٤٣ وَ عِيسَى رَسَّلَهْ وَ أَمَرَهْ بِكَلَامْ قَوِي ٤٤ وَ قَالْ لَيَّهْ: «أَسْمَعْ. مَا تِأَوْرِي نَادُمْ بِالشَّيّءْ الْبِقِي لَيْك. أَمْشِي وَصِّفْ نَفْسَكْ لِرَاجِلْ الدِّينْ قَبُلْ. وَ قَدِّمْ ضَحِيَّةْ لِلّٰهْ مِثِلْ النَّبِي مُوسَى أَمَرَانَا بَيْهَا وَ مِثِلْ دَا، النَّاسْ يَعَرْفُوا كَدَرْ إِنْتَ لِقِيتْ الْعَافَيْ وَ بِقِيتْ طَاهِرْ.»

٤٥ لَاكِنْ النَّادُمْ دَا مَشَى وَ بَدَا يِحَجِّي بَيَّهْ لِكُلَّ النَّاسْ وَ شَتَّتْ الْخَبَرْ. وَ أَشَانْ دَا، عِيسَى مَا قِدِرْ يَدْخُلْ فِي أَيِّ حِلَّةْ كَنْ النَّاسْ يَعَرْفُوا هُو جَايِ. وَ لَاكِنْ هُو قَعَدْ فِي الْكَدَادَةْ وَ نَاسْ كَتِيرِينْ مَشَوْا لَيَّهْ مِنْ كُلِّ بَكَانْ.