رُؤية البيت المُقدّس
٤٠
١ فِي الْيَوْم الْعَاشِرْ فِي الشَّهَرْ هَنَا بِدَايَةْ السَّنَةْ فِي سَنِةْ 25 مِنْ وَدَّوْنَا فِي الْغُرْبَةْ وَ دَا 14 سَنَةْ بَعَدْ وَقِعِينْ هَنَا مَدِينَةْ الْقُدُسْ فِي نَفْس الْيَوْم دَا بَسْ فِي رُؤْيَةْ،
قُدْرَةْ اللّٰهْ نَزَلَتْ فَوْقِي وَ وَدَّتْنِي فِي الْمَدِينَةْ دِي.
٢ وَ فِي الرُّؤْيَةْ الْإِلٰـهِيَّةْ دِي،
اللّٰهْ وَدَّانِي فِي بَلَدْ إِسْرَائِيلْ وَ خَطَّانِي فِي جَبَلْ عَالِي مَرَّةْ وَاحِدْ الْفَوْقَهْ مَبْنِيَّةْ مِثِلْ حِلَّةْ فِي نُصَّهْ الْجُنُوبِي.
٣ هُو وَدَّانِي هِنَاكْ وَ هِنَاكْ،
أَنَا شِفْت رَاجِلْ الْجِلْدَهْ يِشَابِهْ نَحَاسْ.
وَ عِنْدَهْ فِي إِيدَهْ حَبِلْ هَنَا كَتَّانْ وَ عُودْ هَنَا كِيَالْ.
وَ هُو وَاقِفْ فِي خَشُمْ الْبَابْ.
٤ وَ الرَّاجِلْ دَا قَالْ لَيِّ:
«يَا إِبْن آدَمْ،
فُكّ عُيُونَكْ وَ شِيفْ وَ خُطّ أَدَانَكْ وَ أَسْمَعْ!
فَكِّرْ تَمَامْ فِي كُلَّ شَيّءْ النِّوَصِّفَهْ لَيْك أَشَانْ جَابَوْك هِنِي لِتِشِيفْ.
وَ تِأَوْرِي بَنِي إِسْرَائِيلْ بِكُلَّ شَيّءْ الْإِنْتَ شِفْتَهْ.»
فضايِة بيت اللّه البرّانيّة
٥ وَ دَاهُو أَنَا شِفْت دُرْدُرْ مُحَوِّقْ الْبَيْت الْمُقَدَّسْ.
وَ فِي إِيدْ الرَّاجِلْ،
فِيَّهْ عُودْ هَنَا كِيَالْ الطُّولَهْ 6 دُرَاعْ وَ أَيِّ دُرَاعْ زَايِدْ بِأَرْبَعَةْ أُصْبَعْ.
وَ هُو كَالْ تُخُنْ الدُّرْدُرْ وَ لِقِيهْ عُودْ وَاحِدْ وَ طُولَهْ فَوْق كُلَ عُودْ وَاحِدْ.
٦ وَ الرَّاجِلْ دَا مَشَى عَلَيْ الْبَيْت هَنَا الْمَدَخَلْ الصَّبْحَانِي وَ رِكِبْ الْعَتَبَةْ.
وَ كَالْ تُخُنْ خَشُمْ الْبَابْ وَ لِقِيهْ عُودْ وَاحِدْ.
٧ وَ بَيْت الْمَدَخَلْ دَا عِنْدَهْ سِتَّةْ غُرَفْ هَنَا حَرَسْ.
وَ أَيِّ غُرْفَةْ،
طُولْهَا عُودْ وَاحِدْ وَ عُرْضَهَا عُودْ وَاحِدْ.
وَ بَيْن غُرْفَةْ وَ آخَرَةْ،
فِيَّهْ 5 دُرَاعْ.
وَ الْبَابْ قِدَّامْ الْغُرْفَةْ الْمُقَابِلَةْ الْفَضَايْ،
هُو كُلَ عُرْضَهْ عُودْ وَاحِدْ.
٨ وَ الرَّاجِلْ دَا كَالْ الْغُرْفَةْ الْمُقَابِلَةْ الْفَضَايْ
٩ وَ لِقِي طُولْهَا 8 دُرَاعْ وَ عَمَدْهَا 2 دُرَاعْ.
وَ الْغُرْفَةْ الْمُقَابِلَةْ الْفَضَايْ دِي،
هِي دَاخَلْ عَلَيْ جِيهَةْ الْبَيْت الْمُقَدَّسْ.
١٠ وَ الْغُرَفْ هَنَا الْحَرَسْ الْفِي بَيْت الْمَدَخَلْ الصَّبْحَانِي،
هُمَّنْ مُلْقَابِلِينْ،
تَلَاتَةْ بِالْإِسْرَةْ وَ تَلَاتَةْ بِالزَّيْنَةْ.
وَ كُلُّهُمْ عِنْدُهُمْ نَفْس الْمَقَاسْ.
وَ الدَّرَادِرْ أَمْبَيْن غُرْفَةْ وَ آخَرَةْ،
كُلُّهُمْ عِنْدُهُمْ نَفْس الْمَقَاسْ.
١١ وَ الرَّاجِلْ كَالْ خَشُمْ الْبَابْ وَ لِقِي عُرْضَهْ 10 دُرَاعْ وَ عُرْض الْبَابْ كُلَ 13 دُرَاعْ.
١٢ وَ قِدَّامْ أَيِّ غُرْفَةْ هَنَا حَرَسْ،
فِيَّهْ دُرْدُرْ صَغَيَّرْ طُولَهْ دُرَاعْ.
وَ أَيِّ غُرْفَةْ هَنَا حَرَسْ عُرْضَهَا 6 دُرَاعْ وَ طُولْهَا 6 دُرَاعْ.
١٣ وَ الْبِيبَانْ هَنَا غُرَفْ الْحَرَسْ مُلْقَابِلِينْ.
وَ الرَّاجِلْ كَالْ مِنْ دَخَلْ غُرْفَةْ الْحَرَسْ الْوَاحِدَةْ لَحَدِّي دَاخَلْ غُرْفَةْ الْحَرَسْ الْمُقَابِلَيْهَا وَ لِقِي الطُّولْ أَمْبَيْنَاتْهُمْ 25 دُرَاعْ.
١٤ وَ كَالْ عَمَدْ الْبَيْت وَ طُولْهُمْ فَوْق 60 دُرَاعْ.
وَ الْغُرْفَةْ مُقَابِلَةْ الْفَضَايْ وَ الْفَضَايْ مُحَوِّقَيْهَا بِقِدَّامْ وَ جَايْ وَ جَايْ لَيْهَا.
١٥ وَ بَيْت الْمَدَخَلْ طُولَهْ 50 دُرَاعْ أَمْبَيْن الْبَابْ الْبَرَّانِي وَ الْبَابْ الدَّخْلَانِي.
١٦ وَ فِيَّهْ شَبَابِيكْ الْعِنْدُهُمْ حَدِيدْ مَضْفُورْ فِي غُرَفْ الْحَرَسْ وَ فِي الدَّرَادِرْ الْأَمْبَيْنَاتْهُمْ وَ فِي الْغُرْفَةْ الْمُقَابِلَةْ الْفَضَايْ.
وَ فِيَّهْ شَدَرْ نَخَلْ مَرْسُومْ فِي أَيِّ بَكَانْ فِي الدَّرَادِرْ.
١٧ وَ الرَّاجِلْ دَا وَدَّانِي فِي الْفَضَايْ الْبَرَّانِيَّةْ هَنَا الْبَيْت الْمُقَدَّسْ.
الْفَضَايْ دِي عِنْدَهَا 30 غُرَفْ مُحَوِّقِينْهَا وَ هِي مَطْلُوسَةْ بِحُجَارْ مُلُسْ مِنْ كُلِّ جِيهَةْ.
١٨ الْفَضَايْ دِي مَطْلُوسَةْ لَحَدِّي بُيُوتْ الْمَدَاخِلْ.
وَ هِي شِيَّةْ تِحِتْ مِنْ الْفَضَايْ الدَّخْلَانِيَّةْ.
١٩ وَ الرَّاجِلْ كَالْ مِنْ بَيْت الْمَدَخَلْ هَنَا الْفَضَايْ الْبَرَّانِيَّةْ لَحَدِّي بَيْت الْمَدَخَلْ هَنَا الْفَضَايْ الدَّخْلَانِيَّةْ وَ لِقِيهْ عِنْدَهْ 100 دُرَاعْ عَلَيْ الصَّبَاحْ.
٢٠ وَ بَعَدْ دَا،
الرَّاجِلْ مَشَى عَلَيْ بَيْت الْمَدَخَلْ الْمُنْشَاقِي.
وَ هُو كَالْ الطُّولْ وَ الْعُرْض هَنَا بَيْت الْمَدَخَلْ هَنَا الْفَضَايْ الْبَرَّانِيَّةْ.
٢١ وَ غُرَفَهْ هَنَا الْحَرَسْ مُلْقَابِلِينْ،
تَلَاتَةْ بِزَيْنَةْ وَ تَلَاتَةْ بِإِسْرَةْ.
وَ دَرَادِرَهْ وَ غُرْفِتَهْ الْمُقَابِلَةْ الْفَضَايْ عِنْدُهُمْ نَفْس الْمَقَاسْ مَعَ بَيْت الْمَدَخَلْ الْأَوَّلَانِي.
وَ طُولْ الْبَيْت دَا 50 دُرَاعْ وَ عُرْضَهْ 25 دُرَاعْ.
٢٢ وَ شَبَابِيكَهْ وَ غُرْفِتَهْ الْمُقَابِلَةْ الْفَضَايْ وَ نَخَلَهْ عِنْدُهُمْ نَفْس الْمَقَاسْ مَعَ بَيْت الْمَدَخَلْ الصَّبْحَانِي.
وَ الْعَتَبَةْ الْيَطْلَعَوْا بَيْهَا عِنْدَهَا سَبْعَةْ دَرَجَاتْ وَ قَاعِدَةْ قِدَّامْ الْغُرْفَةْ الْكَبِيرَةْ هَنَا الْمَدَخَلْ.
٢٣ وَ فِيَّهْ بَيْت مَدَخَلْ الْيَفْتَحْ فِي الْفَضَايْ الدَّخْلَانِيَّةْ مُقَابِلْ بَيْت الْمَدَخَلْ الْمُنْشَاقِي وَ دَا مِثِلْ بَيْت الْمَدَخَلْ الصَّبْحَانِي.
وَ الرَّاجِلْ كَالْ الْفَرَقَةْ مِنْ بَيْت الْمَدَخَلْ الْوَاحِدْ لِلْآخَرْ وَ لِقِيهَا 100 دُرَاعْ.
٢٤ وَ الرَّاجِلْ وَدَّانِي بِالنُّصّ الْوَطِيَانِي الْقَاعِدْ فَوْقَهْ بَيْت الْمَدَخَلْ الْوَطِيَانِي.
وَ هُو كَالْ دَرَادِرَهْ وَ غُرْفِتَهْ الْمُقَابِلَةْ الْفَضَايْ وَ مَقَاسْهُمْ بِقِي سَوَا مَعَ بُيُوتْ الْمَدَاخِلْ الْآخَرِينْ.
٢٥ وَ الْبَيْت دَا عِنْدَهْ شَبَابِيكْ مُحَوِّقِينَهْ مِثِلْ الشَّبَابِيكْ هَنَا بُيُوتْ الْمَدَاخِلْ الْآخَرِينْ.
وَ بَيْت الْمَدَخَلْ الْوَطِيَانِي طُولَهْ 50 دُرَاعْ وَ عُرْضَهْ 25 دُرَاعْ.
٢٦ وَ الْعَتَبَةْ الْيَطْلَعَوْا بَيْهَا عِنْدَهَا سَبْعَةْ دَرَجَاتْ وَ قَاعِدَةْ قِدَّامْ الْغُرْفَةْ الْكَبِيرَةْ هَنَا الْمَدَخَلْ.
وَ فِيَّهْ شَدَرْ نَخَلْ مَرْسُومْ فِي الدَّرَادِرْ بِجَايْ وَ جَايْ.
٢٧ وَ فِيَّهْ بَيْت مَدَخَلْ الْيَفْتَحْ فِي الْفَضَايْ الدَّخْلَانِيَّةْ مُقَابِلْ بَيْت الْمَدَخَلْ الْوَطِيَانِي.
وَ الرَّاجِلْ كَالْ الْفَرَقَةْ مِنْ بَيْت الْمَدَخَلْ الْوَاحِدْ لِلْآخَرْ وَ لِقِيهَا 100 دُرَاعْ.
فضايِة بيت اللّه الدخْلانيّة
٢٨ وَ الرَّاجِلْ وَدَّانِي فِي الْفَضَايْ الدَّخْلَانِيَّةْ بِالدَّرِبْ هَنَا بَيْت الْمَدَخَلْ الْوَطِيَانِي.
وَ هُو كَالْ بَيْت الْمَدَخَلْ دَا وَ هُو عِنْدَهْ نَفْس الْمَقَاسْ مَعَ الْآخَرِينْ.
٢٩ وَ غُرَفَهْ هَنَا الْحَرَسْ وَ دَرَادِرَهْ وَ غُرْفِتَهْ التَّفْتَحْ فِي الْفَضَايْ الدَّخْلَانِيَّةْ،
كُلُّهُمْ عِنْدُهُمْ نَفْس الْمَقَاسْ مَعَ الْآخَرِينْ.
وَ بَيْت الْمَدَخَلْ دَا بِغُرْفِتَهْ الْكَبِيرَةْ،
طُولْهُمْ 50 دُرَاعْ وَ عُرْضُهُمْ 25 دُرَاعْ وَ مُحَوَّقِينْ بِشَبَابِيكْ.
٣٠ وَ مُحَوِّقِينَهْ غُرَفْ الطُّولْهُمْ 25 دُرَاعْ وَ عُرْضُهُمْ 5 دُرَاعْ.
٣١ وَ غُرْفِتَهْ الْكَبِيرَةْ تَفْتَحْ فِي الْفَضَايْ الْبَرَّانِيَّةْ.
وَ فِيَّهْ شَدَرْ نَخَلْ مَرْسُومْ فِي دَرَادِرْهَا.
وَ الْعَتَبَةْ عِنْدَهَا تَمَانَةْ دَرَجَاتْ لِيَطْلَعَوْا بَيْهَا.
٣٢ وَ الرَّاجِلْ وَدَّانِي فِي الْفَضَايْ الدَّخْلَانِيَّةْ بِالدَّرِبْ هَنَا بَيْت الْمَدَخَلْ الصَّبْحَانِي.
وَ هُو كَالْ بَيْت الْمَدَخَلْ دَا وَ هُو عِنْدَهْ نَفْس الْمَقَاسْ مَعَ الْآخَرِينْ.
٣٣ وَ غُرَفَهْ هَنَا الْحَرَسْ وَ دَرَادِرَهْ وَ غُرْفِتَهْ التَّفْتَحْ فِي الْفَضَايْ الدَّخْلَانِيَّةْ،
كُلُّهُمْ عِنْدُهُمْ نَفْس الْمَقَاسْ مَعَ الْآخَرِينْ.
وَ بَيْت الْمَدَخَلْ دَا بِغُرْفِتَهْ الْكَبِيرَةْ،
طُولْهُمْ 50 دُرَاعْ وَ عُرْضُهُمْ 25 دُرَاعْ وَ مُحَوَّقِينْ بِشَبَابِيكْ.
٣٤ وَ غُرْفِتَهْ الْكَبِيرَةْ تَفْتَحْ فِي الْفَضَايْ الْبَرَّانِيَّةْ.
وَ فِيَّهْ شَدَرْ نَخَلْ مَرْسُومْ فِي دَرَادِرْهَا بِجَايْ وَ جَايْ.
وَ الْعَتَبَةْ عِنْدَهَا تَمَانَةْ دَرَجَاتْ لِيَطْلَعَوْا بَيْهَا.
٣٥ وَ الرَّاجِلْ وَدَّانِي بِبَيْت الْمَدَخَلْ الْمُنْشَاقِي.
وَ هُو كَالْ بَيْت الْمَدَخَلْ دَا وَ هُو عِنْدَهْ نَفْس الْمَقَاسْ مَعَ الْآخَرِينْ.
٣٦ وَ عِنْدَهْ غُرَفَهْ هَنَا الْحَرَسْ وَ دَرَادِرَهْ وَ غُرْفِتَهْ التَّفْتَحْ فِي الْفَضَايْ الدَّخْلَانِيَّةْ،
كُلُّهُمْ بِشَبَابِيكْ مُحَوِّقِينْهُمْ.
وَ الْبَيْت دَا طُولَهْ 50 دُرَاعْ وَ عُرْضَهْ 25 دُرَاعْ.
٣٧ وَ غُرْفِتَهْ الْكَبِيرَةْ تَفْتَحْ فِي الْفَضَايْ الْبَرَّانِيَّةْ.
وَ فِيَّهْ شَدَرْ نَخَلْ مَرْسُومْ فِي دَرَادِرْهَا بِجَايْ وَ جَايْ.
وَ الْعَتَبَةْ عِنْدَهَا تَمَانَةْ دَرَجَاتْ لِيَطْلَعَوْا بَيْهَا.
٣٨ وَ فِيَّهْ غُرْفَةْ آخَرَةْ التَّفْتَحْ فِي الْغُرْفَةْ الْكَبِيرَةْ هِنْت بَيْت الْمَدَخَلْ الْمُنْشَاقِي.
وَ دَا الْبَكَانْ الْيِغَسُّلُوا فَوْقَهْ الْبَهَايِمْ الْيِقَدُّمُوهُمْ ضَحَايَا مُحَرَّقِينْ.
٣٩ وَ فِي لُبّ الْغُرْفَةْ الْكَبِيرَةْ هَنَا الْمَدَخَلْ،
فِيَّهْ طَرَابِيزْ أَرْبَعَةْ مُلْقَابِلِينْ،
تِنَيْن بِالزَّيْنَةْ وَ تِنَيْن بِالْإِسْرَةْ.
وَ الطَّرَابِيزْ دَوْل يَدْبَحَوْا فَوْقهُمْ أَيِّ بَهِيمَةْ الْيِقَدُّمُوهَا ضَحِيَّةْ مُحَرَّقَةْ أَوْ ضَحِيَّةْ لِكَفَّارَةْ الذَّنِبْ أَوْ ضَحِيَّةْ لِكَفَّارَةْ الْخَطَا.
٤٠ وَ بَرَّا مِنْ بَيْت الْمَدَخَلْ الْمُنْشَاقِي،
فِيَّهْ طَرَابِيزْ أَرْبَعَةْ،
تِنَيْن بِالزَّيْنَةْ وَ تِنَيْن بِالْإِسْرَةْ.
٤١ وَ بَيْدَا،
أَرْبَعَةْ طَرَابِيزْ قَاعِدِينْ بِالزَّيْنَةْ وَ أَرْبَعَةْ طَرَابِيزْ قَاعِدِينْ بِالْإِسْرَةْ.
وَ بِالْجُمْلَةْ،
فِيَّهْ تَمَانَةْ طَرَابِيزْ الْيَدْبَحَوْا فَوْقهُمْ بَهَايِمْ الْيِقَدُّمُوهُمْ ضَحَايَا.
٤٢ وَ الْأَرْبَعَةْ طَرَابِيزْ هَنَا الضَّحَايَا الْمُحَرَّقِينْ دَوْل،
هُمَّنْ هَنَا حَجَرْ مَقْطُوعْ.
وَ طُولْهُمْ دُرَاعْ وَ نُصّ وَ عُرْضُهُمْ كُلَ دُرَاعْ وَ نُصّ وَ طُولْهُمْ فَوْق دُرَاعْ.
وَ فِي الطَّرَابِيزْ دَوْل،
يُخُطُّوا مُعِدَّاتْ الْيَدْبَحَوْا بَيْهُمْ الْبَهَايِمْ الْيِقَدُّمُوهُمْ ضَحَايَا مُحَرَّقِينْ وَ ضَحَايَا آخَرِينْ.
٤٣ وَ فِي كُلَّ خُشُومْ الطَّرَابِيزْ دَوْل،
سَوَّوْا مَجْرَةْ الْعُرْضَهْ أَرْبَعَةْ أُصْبَعْ.
وَ يُخُطُّوا فِي الطَّرَابِيزْ دَوْل لَحَمْ الْبَهَايِمْ الْيِقَدُّمُوهُمْ ضَحَايَا.
٤٤ وَ فِي الْفَضَايْ الدَّخْلَانِيَّةْ جَنْب بَيْت الْمَدَخَلْ،
فِيَّهْ غُرَفْ تِنَيْن هَنَا غَنَّايِينْ.
غُرْفَةْ وَاحِدَةْ قَاعِدَةْ جَنْب بَيْت الْمَدَخَلْ الْمُنْشَاقِي وَ مُوَجِّهَةْ وَطِي.
وَ الْغُرْفَةْ الْآخَرَةْ قَاعِدَةْ جَنْب بَيْت الْمَدَخَلْ الْوَطِيَانِي وَ مُوَجِّهَةْ مُنْشَاقْ.
٤٥ وَ الرَّاجِلْ قَالْ لَيِّ:
«الْغُرْفَةْ الْمُوَجِّهَةْ وَطِي،
دِي هِنْت رُجَالْ الدِّينْ الْيَحْفَضَوْا خِدْمَةْ الْبَيْت الْمُقَدَّسْ.
٤٦ وَ الْغُرْفَةْ الْمُوَجِّهَةْ مُنْشَاقْ،
دِي هِنْت رُجَالْ الدِّينْ الْيَحْفَضَوْا خِدْمَةْ الْمَدْبَحْ.
وَ هُمَّنْ مِنْ ذُرِّيَّةْ صَدُوقْ مِنْ قَبِيلَةْ لَاوِي وَ يِقَرُّبُوا لِلّٰهْ لِيِسَوُّوا خِدِمْتَهْ.»
مقاس البيت المُقدّس
٤٧ وَ الرَّاجِلْ كَالْ الْفَضَايْ الدَّخْلَانِيَّةْ وَ طُولْهَا 100 دُرَاعْ وَ عُرْضَهَا 100 دُرَاعْ مُرَبَّعَةْ.
وَ الْمَدْبَحْ قَاعِدْ فِي الْفَضَايْ دِي قِدَّامْ الْبَيْت الْمُقَدَّسْ.
٤٨ وَ الرَّاجِلْ وَدَّانِي دَاخَلْ فِي غُرْفَةْ الْمَدَخَلْ هَنَا بَيْت اللّٰهْ.
وَ هُو كَالْ دَرَادِرْهَا جَايْ وَ جَايْ وَ أَيِّ وَاحِدْ عِنْدَهْ 5 دُرَاعْ.
وَ عُرْض الْبَابْ 14 دُرَاعْ وَ الدَّرَادِرْ جَايْ وَ جَايْ لِلْبَابْ،
أَيِّ وَاحِدْ عِنْدَهْ 3 دُرَاعْ.
٤٩ وَ غُرْفَةْ الْمَدَخَلْ عُرْضَهَا 20 دُرَاعْ وَ طُولْهَا 11 دُرَاعْ وَ الْعَتَبَةْ عِنْدَهَا عَشَرَةْ دَرَجَاتْ الْيَطْلَعَوْا بَيْهُمْ.
وَ جَنْب الْبَابْ،
فِيَّهْ عَمَدْ إِتْنَيْن جَايْ جَايْ لَيَّهْ،
الْوَاحِدْ بِهِنِي وَ الْآخَرْ بِهِنَاكْ.