حِزْقِيال 38

جُوج و مَاجُوج

١ وَ اللّٰهْ حَجَّى لَيِّ وَ قَالْ: ٢ «يَا إِبْن آدَمْ، وَجِّهْ عَلَيْ جُوجْ الْقَايِدْ الْكَبِيرْ هَنَا مَاشَكْ وَ تُوبَلْ الْقَاعِدْ فِي بَلَدْ مَاجُوجْ وَ أَتْنَبَّأْ ضِدَّهْ. ٣ وَ قُولْ: ‹دَاهُو اللّٰهْ الرَّبّ قَالْ: ”أَكِيدْ أَنَا نُقُمّ ضِدَّكْ، يَا جُوجْ الْقَايِدْ الْكَبِيرْ هَنَا مَاشَكْ وَ تُوبَلْ. ٤ وَ أَنَا نِدِسّ لَيْك جَنْبَاتْ فِي خَشْمَكْ وَ نِوَدِّيكْ. وَ نَمُرْقَكْ إِنْتَ وَ كُلَّ عَسْكَرَكْ وَ خَيْلَكْ وَ سِيَادْ الْخَيْل اللَّابْسِينْ كُلُّهُمْ خُلْقَانْ سَمْحِينْ. وَ هُمَّنْ جَمَاعَاتْ كَتِيرِينْ الْعِنْدُهُمْ دَرَقْ كُبَارْ وَ دَرَقْ دُقَاقْ وَ كُلُّهُمْ كَارْبِينْ سُيُوفْ. ٥ وَ مَعَاهُمْ عَسْكَرْ فَارِسْ وَ الْحَبَشَةْ وَ لِيبِيَا وَ كُلُّهُمْ عِنْدُهُمْ دَرَقْ وَ طَوَاقِي هَنَا حَرِبْ. ٦ وَ نَاسْ قُومَرْ وَ كُلَّ عَسْكَرْهُمْ وَ نَاسْ بَيْت تُقَرْمَا الْغَادِي فِي الْمُنْشَاقْ مَعَ كُلَّ عَسْكَرْهُمْ وَ شَعَبْ كَتِيرِينْ مَعَاكْ.

٧ «‹”وَ جَهِّزْ نَفْسَكْ عَدِيلْ، إِنْتَ وَ كُلَّ الْجَمَاعَةْ اللَّمَّيْتهُمْ مَعَاكْ. وَ أَبْقَى قَايِدْهُمْ. ٨ وَ بَعَدْ أَيَّامْ وَ فِي آخِرْ الْوَكِتْ، تِنَظِّمْ دَيْشَكْ وَ تَهْجِمْ بَلَدْ إِسْرَائِيلْ. زَمَانْ، شَعَبْهَا نِجَوْا مِنْ الْحَرِبْ وَ هَسَّعْ، قَبَّلَوْا كَتِيرِينْ مِنْ بَيْن الشُّعُوبْ وَ جَوْا لَمَّوْا فِي جِبَالْ إِسْرَائِيلْ الْخَرْبَانِينْ مِنْ مُدَّةْ طَوِيلَةْ. وَ هَسَّعْ كُلُّهُمْ سَاكْنِينْ بِأَمَانْ. ٩ تَرْكَبْ وَ تَمْشِي ضِدُّهُمْ مِثِلْ رِيحْ شَدِيدَةْ. إِنْتَ تَبْقَى مِثِلْ السَّحَابْ الْيِغَطِّي كُلَّ الْبَلَدْ، إِنْتَ وَ كُلَّ عَسْكَرَكْ وَ الشَّعَبْ الْكَتِيرِينْ الْمَعَاكْ.“›»

١٠ وَ دَاهُو اللّٰهْ الرَّبّ قَالْ: «فِي الْيَوْم دَا، كَلَامْ كَتِيرْ يَجِي فِي قَلْبَكْ وَ إِنْتَ تِشِيلْ نِيَّةْ فَسْلَةْ. ١١ وَ تُقُولْ: ‹أَنَا نُقُمّ ضِدّ بَلَدْ الْمَا عِنْدَهَا حِمَايَةْ وَ نَهْجِمْ النَّاسْ الْقَاعِدِينْ بِرَاحَةْ وَ أَمَانْ فِي مَسَاكِنْهُمْ. وَ هُمَّنْ سَاكْنِينْ فِي حِلَّالْ الْمَا عِنْدُهُمْ دَرَادِرْ وَ لَا حَوَادِرْ وَ لَا بِيبَانْ. ١٢ وَ أَنَا نَمْشِي نِشِيلْ غَنِيمَةْ وَ نَنْهَبْ.› وَ إِنْتَ تَهْجِمْ بَكَانْ أَوَّلْ خَرَابْ وَ هَسَّعْ مَسْكُونْ بِالشَّعَبْ اللَّمَّوْهُمْ مِنْ بَيْن الْأُمَمْ وَ عِنْدُهُمْ بَهَايِمْ وَ خُمَامْ وَ سَاكْنِينْ فِي صُرَّةْ الْأَرْض. ١٣ وَ سُكَّانْ سَبَأ وَ دَدَانْ وَ تُجَّارْ تَرْشِيشْ وَ كُلَّ حِلَّالْهُمْ يُقُولُوا لَيْك: ‹لِتِلِمّ الْغَنِيمَةْ بَسْ إِنْتَ جِيتْ وَلَّا؟ وَ لَمَّيْت جَمَاعْتَكْ لِتَنْهَبْ وَلَّا؟ وَ جِيتْ لِتِشِيلْ الْفُضَّةْ وَ الدَّهَبْ وَ الْبَهَايِمْ وَ الْخُمَامْ وَ لِتِلِمّ غَنِيمَةْ كَبِيرَةْ وَلَّا؟›

١٤ «وَ فِي شَانْ دَا، يَا إِبْن آدَمْ، أَتْنَبَّأْ وَ قُولْ لِجُوجْ: ‹دَاهُو اللّٰهْ الرَّبّ قَالْ: ”وَكِتْ شَعَبِي بَنِي إِسْرَائِيلْ سَاكْنِينْ بِأَمَانْ، إِنْتَ قَمَّيْت وَ جَايِ. ١٥ إِنْتَ تَجِي مِنْ بَلَدَكْ غَادِي فِي الْمُنْشَاقْ، إِنْتَ وَ الشُّعُوبْ الْكَتِيرِينْ الْمَعَاكْ، كُلُّكُو رَاكْبِينْ فِي خَيْل. بِقِيتُوا جَمَاعَةْ كَتِيرِينْ وَ دَيْش كَبِيرْ. ١٦ وَ تَهْجُمُوا شَعَبِي بَنِي إِسْرَائِيلْ لَحَدِّي تِغَطُّوا الْبَلَدْ مِثِلْ سَحَابَايْ. وَ دَا يَبْقَى فِي آخِرْ الْوَكِتْ. يَا جُوجْ، أَنَا نِجِيبَكْ ضِدّ بَلَدِي وَ بَيْك إِنْتَ، نِوَصِّفْ قَدَاسْتِي قِدَّامْ الْأُمَمْ أَشَانْ يَعَرْفُونِي.“›»

١٧ دَاهُو اللّٰهْ الرَّبّ قَالْ: «زَمَانْ، أَنَا حَجَّيْت بَيْك بِوَاسِطَةْ عَبِيدِي أَنْبِيَاء بَنِي إِسْرَائِيلْ الْأَتْنَبَّأَوْا فِي الْوَكِتْ دَاكْ مُدَّةْ سِنِينْ. وَ إِنْتَ بَسْ الْأَنَا نِجِيبَكْ ضِدُّهُمْ. ١٨ يَا جُوجْ، يَوْم إِنْتَ تَجِي فِي بَلَدْ إِسْرَائِيلْ، أَنَا نَغْضَبْ شَدِيدْ ضِدَّكْ. وَ دَا كَلَامْ اللّٰهْ الرَّبّ. ١٩ وَ فِي غِيرْتِي وَ غَضَبِي الشَّدِيدْ، أَنَا نَحْلِفْ فِي الْيَوْم دَا، الْأَرْض تَرْجِفْ شَدِيدْ فِي بَلَدْ إِسْرَائِيلْ. ٢٠ وَ كُلَّ حُوتْ الْبَحَرْ وَ طُيُورْ السَّمَاءْ وَ حَيْوَانَاتْ الْكَدَادَةْ وَ زَوَاحِفْ الْأَرْض وَ كُلَّ بَنِي آدَم الْفِي وِجْه الْأَرْض، كُلُّهُمْ يَرْجُفُوا قِدَّامِي. وَ الْجِبَالْ يِلْهَدَّمَوْا وَ الْحُجَارْ وَ كُلَّ الدَّرَادِرْ يَقَعَوْا فِي الْأَرْض. ٢١ وَ فِي كُلَّ جِبَالِي، أَنَا نِنَادِي بِالْحَرِبْ ضِدّ جُوجْ. وَ أَيِّ عَسْكَرِي هَنَا جُوجْ يِوَجِّهْ سَيْفَهْ ضِدّ أَخُوهْ. وَ دَا كَلَامْ اللّٰهْ الرَّبّ. ٢٢ وَ أَنَا نُقُمّ ضِدَّهْ وَ نِحَاكِمَهْ بِالْوَبَاءْ وَ الْحَرِبْ. وَ فِي جُوجْ وَ عَسْكَرَهْ وَ الشُّعُوبْ الْكَتِيرِينْ الْمَعَايَهْ، نِنَزِّلْ فَوْقهُمْ مَطَرَةْ شَدِيدَةْ هَنَا حُجَارْ وَ بَرَدْ وَ كِبْرِيتْ وَ نَارْ. ٢٣ وَ نِوَصِّفْ عَظَمَتِي وَ قَدَاسْتِي وَ نِعَرِّفْ نَفْسِي لِأُمَمْ كَتِيرِينْ. وَ بَيْدَا، يَعَرْفُوا كَدَرْ أَنَا بَسْ اللّٰهْ.»