حِزْقِيال 1

كتاب حِزْقِيال

من كتب الأنبياء

رُؤية مجْد اللّه

١ وَ فِي الْيَوْم الْخَامِسْ هَنَا الشَّهَرْ الرَّابِعْ فِي السَّنَةْ التَّلَاتِينْ مِنْ عُمْرِي، أَنَا حِزْقِيَالْ قَاعِدْ أَمْبَيْن النَّاسْ الْوَدَّوْهُمْ فِي الْغُرْبَةْ فِي بَلَدْ بَابِلْ جَنْب بَحَرْ خَابُورْ. وَ السَّمَاءْ أَنْفَتَحَتْ وَ أَنَا شِفْت رُؤْيَةْ مِنْ الرَّبّ. ٢ وَ دَا فِي الْيَوْم الْخَامِسْ هَنَا الشَّهَرْ دَا فِي السَّنَةْ الْخَامْسَةْ مِنْ وَدَّوْا يُيَكِينْ مَلِكْ مَمْلَكَةْ يَهُوذَا فِي الْغُرْبَةْ. ٣ وَ هِنَاكْ فِي بَلَدْ بَابِلْ قَرِيبْ لِبَحَرْ خَابُورْ، اللّٰهْ حَجَّى لَيِّ أَنَا حِزْقِيَالْ وِلَيْد بُوزِي رَاجِلْ الدِّينْ. وَ هِنَاكْ قُدْرَةْ اللّٰهْ قَاعِدَةْ فَوْقِي.

٤ وَ دَاهُو أَنَا شِفْت رِيحْ أَمْ زَوْبَعَانَةْ جَايَةْ مِنْ مُنْشَاقْ. وَ جَابَتْ سَحَابَايْ كَبِيرَةْ مُحَوَّقَةْ بِضَيّ التَّمْرُقْ مِنْهَا بَرَّاقَةْ. وَ فِي أُسُطْهَا فِي شَيّءْ يِرَارِي مِثِلْ نَحَاسْ صَافِي. ٥ وَ فِي لُبّ السَّحَابَايْ، شِفْت شَيّءْ الْيِشَابِهْ أَرْبَعَةْ مَخْلُوقِينْ وَ شَكِلْهُمْ مِثِلْ شَكِلْ الْإِنْسَانْ. ٦ وَ أَيِّ مَخْلُوقْ عِنْدَهْ أَرْبَعَةْ وِجِهْ وَ أَرْبَعَةْ جَنَاحَيْ. ٧ وَ رِجْلَيْهُمْ عُدُلْ وَ مَشَّايَاتْهُمْ مِثِلْ ضَلَافَيْ الْعِجِلْ وَ يِرَارُوا مِثِلْ نَحَاسْ صَافِي. ٨ وَ تِحِتْ أَيِّ جِنْح، فِيَّهْ إِيدْ مِثِلْ إِيدْ إِنْسَانْ. أَيِّ نَايِطْ مِنْ نَوَايْطَهْ الْأَرْبَعَةْ عِنْدَهْ إِيدْ وَ وِجِهْ وَ جِنْح. ٩ وَ أَيِّ مَخْلُوقْ، جَنَاحَيْه يِلَمُّسُوا مَعَ جَنَاحَيْ الْمَخْلُوقْ الْآخَرْ. وَ وَكِتْ الْمَخْلُوقِينْ يَمْشُوا، مَا يِنْلَفْتُوا وَ لَاكِنْ يَمْشُوا عَدِيلْ قِدَّامْهُمْ.

١٠ وَ أَيِّ مَخْلُوقْ عِنْدَهْ أَرْبَعَةْ وِجِهْ. مِنْ قِدَّامْ، عِنْدَهْ وِجِهْ هَنَا إِنْسَانْ وَ بِالزَّيْنَةْ، عِنْدَهْ وِجِهْ هَنَا دُودْ وَ بِالْإِسْرَةْ، عِنْدَهْ وِجِهْ هَنَا تَوْر وَ مِنْ وَرَاءْ، عِنْدَهْ وِجِهْ هَنَا صَقُرْ. ١١ وَ دَوْل وُجُوهُّمْ. وَ أَيِّ مَخْلُوقْ عِنْدَهْ جَنَاحَيْ إِتْنَيْن مُمَطَّطِينْ فَوْق وَ يِلَمُّسُوا مَعَ جَنَاحَيْ الْمَخْلُوقْ الْآخَرْ. وَ جَنَاحَيْه الْإِتْنَيْن الْآخَرِينْ كَمَانْ، يِغَطِّي بَيْهُمْ جِسْمَهْ. ١٢ وَ أَيِّ مَخْلُوقْ يَمْشِي عَدِيلْ قِدَّامَهْ وَ يَمْشِي عَلَيْ الْجِيهَةْ الْيَمْشِي عَلَيْهَا الرُّوحْ. وَ مَا يِنْلَفِتْ وَكِتْ هُو مَاشِي. ١٣ وَ الْمَخْلُوقِينْ دَوْل يِشَابُهُوا جَمُرْ هَنَا نَارْ التَّحْرِقْ وَ يِشَابُهُوا مَشَاهِيبْ النَّارْ. وَ النَّارْ دِي تَمْشِي أَمْبَيْن الْمَخْلُوقِينْ دَوْل. وَ النَّارْ دِي تِضَوِّي وَ تَمْرُقْ مِنْهَا بَرَّاقَةْ. ١٤ وَ الْمَخْلُوقِينْ دَوْل يَمْشُوا وَ يَجُوا بِسُرْعَةْ مِثِلْ الْبَرَّاقَةْ.

١٥ وَكِتْ أَنَا قَاعِدْ نِشِيفْ فِي الْمَخْلُوقِينْ الْعِنْدُهُمْ أَرْبَعَةْ وِجِهْ دَوْل، دَاهُو شِفْت جَنْب أَيِّ مَخْلُوقْ فِيَّهْ عَجَلَةْ فِي الْأَرْض. ١٦ وَ الْعَجَلَاتْ بِرَارُوا مِثِلْ صَنَعَوْهُمْ بِحَجَرْ غَالِي وَ الْعَجَلَاتْ الْأَرْبَعَةْ دَوْل بِشَّابَهَوْا. وَ مَصْنُوعِينْ مِثِلْ عَجَلَةْ وَاحِدَةْ فِي لُبّ عَجَلَةْ آخَرَةْ. ١٧ وَ وَكِتْ يَمْشُوا، يَقْدَرَوْا يَمْشُوا فِي أَيِّ جِيهَةْ بَلَا مَا يِنْلَفْتُوا. ١٨ وَ دَايِرْ هَنَا أَيِّ عَجَلَةْ، طُولَهْ فَوْق بِخَوِّفْ. وَ أَيِّ دَايِرْ مُحَوَّقْ بِعُيُونْ.

١٩ وَ وَكِتْ الْمَخْلُوقِينْ يَمْشُوا، الْعَجَلَاتْ كُلَ يَمْشُوا مَعَاهُمْ. وَ وَكِتْ الْمَخْلُوقِينْ يِنْرَفْعُوا فَوْق مِنْ الْأَرْض، الْعَجَلَاتْ كُلَ يِنْرَفْعُوا. ٢٠ وَ الْمَخْلُوقِينْ يَمْشُوا عَلَيْ الْجِيهَةْ الْيَمْشِي عَلَيْهَا الرُّوحْ وَ الْعَجَلَاتْ كُلَ يِنْرَفْعُوا مَعَاهُمْ. أَشَانْ رُوحْ الْمَخْلُوقِينْ دَوْل قَاعِدَةْ فِي الْعَجَلَاتْ. ٢١ وَ وَكِتْ الْمَخْلُوقِينْ يَمْشُوا، الْعَجَلَاتْ كُلَ يَمْشُوا وَ وَكِتْ يَقِيفُوا، الْعَجَلَاتْ كُلَ يَقِيفُوا وَ وَكِتْ يِنْرَفْعُوا مِنْ الْأَرْض، الْعَجَلَاتْ كُلَ يِنْرَفْعُوا مَعَاهُمْ أَشَانْ رُوحْ الْمَخْلُوقِينْ دَوْل قَاعِدَةْ فِي الْعَجَلَاتْ.

٢٢ وَ مِنْ فَوْق لِرُوسَيْ الْمَخْلُوقِينْ دَوْل، فِي شَيّءْ قَوِي مَفْرُوشْ وَ هُو عَجِيبْ، يِرَارِي مِثِلْ قَزَّازْ وَ قَاعِدْ مِنْ فَوْق لِرُوسَيْ الْمَخْلُوقِينْ. ٢٣ وَ تِحِتْ الشَّيّءْ الْمَفْرُوشْ دَا، أَيِّ مَخْلُوقْ عِنْدَهْ جَنَاحَيْ إِتْنَيْن يِلَمُّسُوا مَعَ جَنَاحَيْ الْمَخْلُوقْ الْآخَرْ. وَ جَنَاحَيْه الْإِتْنَيْن الْآخَرِينْ كَمَانْ، يِغَطِّي بَيْهُمْ جِسْمَهْ. ٢٤ وَ وَكِتْ الْمَخْلُوقِينْ مَاشِينْ، أَنَا قَاعِدْ نَسْمَعْ حَرَكَةْ جَنَاحَيْهُمْ وَ دَا مِثِلْ حَرَكَةْ مَطَرَةْ تَقِيلَةْ وَ مِثِلْ حِسّ الْقَادِرْ وَ مِثِلْ حِسّ نَاسْ كَتِيرِينْ وَ مِثِلْ حَرَكَةْ دَيْش كَبِيرْ. وَ وَكِتْ يَقِيفُوا، يِدَلُّوا جَنَاحَيْهُمْ. ٢٥ وَ حِسّ جَايِ مِنْ فَوْق لِلشَّيّءْ الْقَوِي الْمَفْرُوشْ الْقَاعِدْ مِنْ فَوْق لِرُوسَيْ الْمَخْلُوقِينْ.

٢٦ وَ مِنْ فَوْق لِلشَّيّءْ الْقَوِي الْمَفْرُوشْ، فِي شَيّءْ يِشَابِهْ عَرْش مِنْ حَجَرْ هَنَا يَاقُوتْ أَخْضَرْ. وَ فَوْق الْعَرْش دَا، فِي شَكِلْ يِشَابِهْ إِنْسَانْ. ٢٧ وَ مِنْ صُلْبَهْ لَحَدِّي فَوْق، أَنَا شِفْت كَدَرْ يِرَارِي مِثِلْ نَحَاسْ صَافِي وَ مُحَوَّقْ بِنَارْ. وَ مِنْ صُلْبَهْ لَحَدِّي تِحِتْ، أَنَا شِفْت ضَيّ هَنَا نَارْ مُحَوِّقَهْ مِنْ كُلِّ جِيهَةْ. ٢٨ وَ الضَّيّ الْمُحَوِّقَهْ يِشَابِهْ حَجَّازْ الْمَطَرْ الْيِبِينْ فِي السَّحَابْ فِي يَوْم الْمَطَرْ. وَ مَجْد اللّٰهْ هُو مِثِلْ كَيْ. وَ وَكِتْ أَنَا شِفْتَهْ، وَقَعْت بِوِجْهِي فِي الْأَرْض وَ سِمِعْت حِسّ قَاعِدْ يِحَجِّي.