كتاب نشيد الأنْشاد
من كتب الحكمة
١
١ الْغِنَيْ الْعَظِيمْ هَنَا الْمَلِكْ سُلَيْمَانْ.
كلام المحْبوبة
٢ حِبِّنِي!
مِنْ فَضْلَكْ،
حِبِّنِي!
أَشَانْ حُبَّكْ حَلُو مِنْ عَصِيرْ الْعِنَبْ.
٣ عِطْرَكْ يِنْشَمَّ حَلُو
وَ أُسْمَكْ شَتَّتْ مِثِلْ رِيحَةْ الْعِطِرْ.
فِي شَانْ دَا،
الْبَنَاتْ بِحِبَّنَّكْ.
٤ شِيلْنِي مَعَاكْ.
يَلَّا نَجْرُوا!
يَا مَلِكِي،
وَدِّينِي فِي غُرْفِتَكْ
وَ هِنَاكْ،
نَلْعَبَوْا وَ نَفْرَحَوْا سَوَا.
وَ نِذَّكَّرَوْا حُبَّكْ الْحَلُو مِنْ عَصِيرْ الْعِنَبْ.
الْبِحِبَّنَّكْ عِنْدِهِنْ حَقّ!
٥ يَا بَنَاتْ مَدِينَةْ الْقُدُسْ،
أَنَا سَمْرَةْ وَ لَاكِنْ جَمِيلَةْ،
زَرْقَةْ مِثِلْ خِيَمْ السَّيَّارَةْ
وَ جَمِيلَةْ مِثِلْ سِتَارَةْ بَيْت سُلَيْمَانْ.
٦ مَا تِشِيفَنِّي أَشَانْ أَنَا سَمْرَةْ.
دِي الْحَرَّايْ بَسْ قَلَبَتْ لَوْنِي.
أَوْلَادْ أَمِّي زِعِلَوْا ضِدِّي
وَ سَوَّوْنِي حَارِسَةْ جِنَيْنَةْ عِنَبْ.
وَ لَاكِنْ جِسْمِي الْمِثِلْ جِنَيْنِتِي،
أَنَا مَا حَرَسْتَهْ.
٧ قُولْ لَيِّ،
إِنْتَ الْأَنَا نِحِبَّكْ،
وَيْن تِسَرِّحْ غَنَمَكْ؟
وَيْن بَكَانْ تِقَيِّلْ فَوْقَهْ؟
وَصِّفْنِي أَشَانْ مَا نِفَتِّشْ وَ نُرُوحْ
وَ نَقَعْ فِي دِيرَانْ جِيرَانَكْ.
كلام الرُعْيان
٨ مَا تَعَرْفِيهْ،
إِنْتِ الْأَجْمَلْ مِنْ الْعَوِينْ؟
تَابْعِي دَرِبْ غَنَمَهْ
وَ أَسْرَحَيْ بِعِنْزَيْكِ
جَنْب ضَرَا أَنِحْنَ الرُّعْيَانْ.
كلام المحْبوب
٩ يَا حَبِيبْتِي،
إِنْتِ مِثِلْ فَرَسْ عَرَبَةْ فِرْعَوْن مَلِكْ مَصِرْ.
١٠ خُدُودْكِ جَمِيلِينْ
أَمْبَيْنَاتْ خُرُوسْكِ
وَ رَقَبَتْكِ سَمْحَةْ
فِي أُسُطْ رِبِقْ زَيْتُونْكِ.
١١ نِسَوُّوا لَيْكِ خُرُوس هَنَا دَهَبْ
وَ زِينَةْ هِنْت فُضَّةْ.
كلام المحْبوبة
١٢ وَكِتْ مَلِكِي قَاعِدْ فِي أُسُطْ رُفْقَانَهْ،
رِيحَةْ عِطْرِي أَنْشَمَّتْ.
١٣ حَبِيبِي مِثِلْ بَلْعُومِي هَنَا صَنْدَلْ الْمُعَلَّقْ فِي رَقَبَتِي
وَ يَرْقُدْ فِي صَدْرِي بِاللَّيْل.
١٤ حَبِيبِي مِثِلْ نُوَّارْ الْحِنَّةْ
فِي جِنَيْنَةْ عِنَبْ فِي عَيْن جِدِي.
كلام المحْبوب
١٥ إِنْتِ جَمِيلَةْ،
يَا حَبِيبْتِي.
أَيْوَى،
إِنْتِ جَمِيلَةْ
وَ عُيُونْكِ سَمْحِينْ
مِثِلْ الْحَمَامْ.
كلام المحْبوبة
١٦ إِنْتَ جَمِيلْ،
يَا حَبِيبِي.
إِنْتَ كُلَ حَلُو.
وَ نَرُقْدُوا فِي قَوْزنَا الْأَخْضَرْ.
١٧ نَرُقْدُوا تِحِتْ شَدَرْ الْأَرْز مِثِلْ شِعَبْ بَيْتنَا
وَ تِحِتْ فُرُوعْ السَّرْوِي مِثِلْ عَمَدَهْ.