١٧
١ أَخَيْر تَاكُلُوا عَيْش قَرْقَاشْ بِالسَّلَامَةْ
مِنْ تَاكُلُوا لَحَمْ عُدُرْ بِمُشْكِلَةْ.
٢ عَبِدْ عَاقِلْ يَمْلُكْ فِي وِلَيْد عَايِبْ هَنَا سِيدَهْ
وَ فِي أُسُطْ عِيَالْ سِيدَهْ،
يَلْقَى وَرَثَتَهْ.
٣ بِالنَّارْ،
الصَّيَّاغِي يِصَفِّي
الدَّهَبْ وَ الْفُضَّةْ
وَ لَاكِنْ الْفِي قُلُوبْ النَّاسْ،
اللّٰهْ بَسْ يَكْشِفَهْ.
٤ النَّادُمْ الْفَسِلْ يُخُطّ بَالَهْ
لِلْكَلَامْ الشَّيْن
وَ الْكَدَّابْ يَسْمَعْ
الْكَلَامْ الْيَخْرِبْ.
٥ الْيِشَّمَّتْ لِلْمَسَاكِينْ
يَحْقِرْ خَالِقْهُمْ
وَ الْيَفْرَحْ بِدَمَارْ الْآخَرِينْ،
مَا يَجْعَلَوْه بَرِي.
٦ عِيَالْ الْعِيَالْ تَاجْ لِجُدُودْهُمْ
وَ الْأَبَّهَاتْ شَرَفْ لِعِيَالْهُمْ.
٧ الْكَلَامْ الْعَدِيلْ
مَا بِوَافِقْ لِلْمَطْمُوسْ
وَ الْكَلَامْ الْكِدِبْ
مَا بِشَابِهْ لِلْحَاكِمْ.
٨ الرَّشْوَةْ مِثِلْ سِحِرْ
فِي فِكِرْ النَّادُمْ الْيَنْطِيهَا.
فِي أَيِّ بَكَانْ يِوَجِّهْ،
يَنْجَحْ.
٩ الْيِسَامِحْ الْخَطَا،
يِفَتِّشْ الْمَحَبَّةْ
وَ الْيِحَجِّي فِي الْخَطَا دَا،
يِفَرِّقْ الرُّفْقَانْ.
١٠ بِاللُّوَامَةْ،
يَفْهَمْ النَّادُمْ الْفَاهِمْ
وَ بِمِيَةْ ضَرْبَةْ كُلَ،
الْمَطْمُوسْ مَا يَفْهَمْ.
١١ النَّادُمْ الْفَسِلْ يِفَتِّشْ إِلَّا عَمَلْ الْعَاصِي
وَ يِجِيبْ لِنَفْسَهْ عَذَابْ بَلَا رَحْمَةْ.
١٢ أَخَيْر تِقَابِلْ مَرْة الدُّودْ الْمُوَدِّرَةْ عِيَالْهَا
مِنْ تِقَابِلْ الْمَطْمُوسْ وَ نِفَاقَهْ.
١٣ الْيِبَدِّلْ الْخَيْر بِالشَّرّ،
الشَّرّ مَا يِكِسّ مِنْ بَيْتَهْ.
١٤ بِدَايَةْ الْهُرَاجْ مِثِلْ أَلْمِي السَّيْل.
قُبَّالْ مَا يَاكُلَكْ،
أَمْرُقْ نَفْسَكْ.
١٥ أَشْيَاءْ إِتْنَيْن اللّٰهْ حَرَّمَاهُمْ،
تِبَرِّي الْغَلْطَانْ
وَ تِغَلِّطْ الْبَرِي.
١٦ شُنُو نِفِعْ الْقُرُسْ فِي إِيدْ الْمَطْمُوسْ؟
هَلْ يَشْرِي بَيَّهْ حِكْمَةْ؟
مُسْتَحِيلْ!
هُو مَا عِنْدَهْ رَاسْ!
١٧ الرَّفِيقْ يِحِبَّكْ فِي كُلَّ وَكِتْ
وَ وَلْد أَمَّكْ وِلْدَوْه لِيِسَاعِدَكْ فِي الضِّيقَةْ.
١٨ إِلَّا قَلِيلْ الْفِهِمْ يُدُقّ صَدْرَهْ
وَ يَضْمَنْ قَرِيبَهْ.
١٩ الْيِحِبّ الْهُرَاجْ يِحِبّ الْخَطَا
وَ الْيِوَصِّفْ نَفْسَهْ يِجِيبْ لَيْهَا الدَّمَارْ.
٢٠ الْقَلِبْ الْأَزْرَقْ مَا يَلْقَى خَيْر
وَ اللِّسَانْ الْكَدَّابْ يَقَعْ فِي الشَّرّ.
٢١ الْيَلْدَ الْمَطْمُوسْ يَلْقَى الْحِزِنْ
وَ أَبُو الْمُغَفَّلْ كُلَ مَا يَفْرَحْ.
٢٢ الْقَلِبْ الْفَرْحَانْ يَشْفِي الْجِسِمْ
وَ الْقَلِبْ الْحَزْنَانْ يِيَبِّسْ الْجِلِدْ.
٢٣ الْعَاصِي يِشِيلْ الرَّشْوَةْ بِسِرّ
أَشَانْ يِعَوِّجْ دُرُوبْ الشَّرِيعَةْ.
٢٤ الْفَاهِمْ يُخُطّ عَيْنَهْ فِي الْحِكْمَةْ
وَ لَاكِنْ الْمَطْمُوسْ كَامِلْ مَا يِوَجِّهَّا.
٢٥ الْوِلَيْد الْمَطْمُوسْ
يِجِيبْ الْحِزِنْ لِأَبُوهْ
وَ لِأَمَّهْ الْوِلْدَتَهْ،
يِمَرِّرْ لَيْهَا الْحَيَاةْ.
٢٦ مَا عَدِيلْ تِعَاقِبْ الصَّالِحِينْ
وَ مَا عِنْدَكْ حَقّ تُدُقّ الْمُكَرَّمِينْ.
٢٧ سِيدْ الْمَعْرَفَةْ مَا يِكَتِّرْ كَلَامَهْ،
وَ سِيدْ الْفِهِمْ هَادِي فِي نَفْسَهْ.
٢٨ حَتَّى الْمُنَافِقْ كَنْ سَكَتْ،
يَجْعَلَوْه حَكِيمْ.
وَ كَنْ سَدَّ قَدُّومَهْ،
يَجْعَلَوْه فَاهِمْ.