١٦
١ الْإِنْسَانْ يِشِيلْ النِّيَّةْ فِي قَلْبَهْ
وَ لَاكِنْ اللّٰهْ بَسْ سِيدْ الْقَرَارْ.
٢ كُلَّ خِدْمَةْ الْإِنْسَانْ
سَمْحَةْ فِي عُيُونَهْ
وَ لَاكِنْ الْفِي قَلِبْ الْإِنْسَانْ،
اللّٰهْ بَسْ يَوْزِنَهْ.
٣ خُطّ خِدِمْتَكْ فِي إِيدَيْن اللّٰهْ
وَ كُلَّ شَيّءْ التِّتْمَنَّاهْ يِلْحَقَّقْ.
٤ اللّٰهْ خَلَقْ كُلَّ شَيّءْ لِهَدَفْ
حَتَّى الْعَاصِي كُلَ خَلَقَهْ لِيَوْم الْعِقَابْ.
٥ اللّٰهْ حَرَّمْ الْإِسْتِكْبَارْ.
أَكِيدْ سِيدَهْ مَا يَجْعَلَوْه بَرِي.
٦ سِيدْ الْخَيْر وَ الْأَمَانْ،
خَطَايَهْ يِسَامُحُوهْ
وَ الْخَوْف مِنْ اللّٰهْ
يِبَعِّدْ مِنْ الْفَسَالَةْ.
٧ وَكِتْ اللّٰهْ يَرْضَى بِعَمَلْ الْإِنْسَانْ،
يِسَهِّلْ لَيَّهْ السَّلَامْ مَعَ الْعُدْوَانْ.
٨ أَخَيْر تَلْقَى شِيَّةْ بِالْعَدَالَةْ
مِنْ تَلْقَى كَتِيرْ بَلَا حَقّ.
٩ قَلْب الْإِنْسَانْ
يِفَكِّرْ فِي الدَّرِبْ الْيِشِيلَهْ
وَ لَاكِنْ اللّٰهْ بَسْ
يُقُودْ خَطْوَاتَهْ.
الملك و العدالة
١٠ كَلَامْ مِنْ اللّٰهْ فِي خَشُمْ الْمَلِكْ.
فِي الشَّرِيعَةْ،
لِسَانَهْ مَا يِمِيلْ.
١١ الْمِيزَانْ الْعَادِلْ،
اللّٰهْ يَرْضَى بَيَّهْ
وَ الْمِكْيَالْ الْعَدِيلْ،
هُو بَسْ ثَبَّتَهْ.
١٢ الْمَلِكْ يِحَرِّمْ عَمَلْ الشَّرّ
أَشَانْ بِالْعَدَالَةْ بَسْ،
هُو يِثَبِّتْ مُلْكَهْ.
١٣ الْمَلِكْ يَرْضَى بِالْكَلَامْ الصَّحِيحْ
وَ يِحِبّ الْيِكَلِّمْ لَيَّهْ بِالْحَقّ.
١٤ غَضَبْ الْمَلِكْ يِجِيبْ الْمَوْت
وَ الرَّاجِلْ الْحَكِيمْ يِصَبِّرَهْ.
١٥ فَرَحْ الْمَلِكْ يِجِيبْ الْحَيَاةْ
وَ رِضَايَهْ مِثِلْ سَحَابْ الرِّشَاشْ.
ككيف تِعيش مع الناس
١٦ كَنْ تَلْقَى حِكْمَةْ،
دَا أَخَيْر مِنْ تَلْقَى دَهَبْ
وَ كَنْ تَلْقَى فِهِمْ،
دَا أَخَيْر مِنْ تَلْقَى فُضَّةْ.
١٧ دَرِبْ النَّاسْ الْعَدِيلِينْ
يِبَعِّدْ مِنْ الْفَسَالَةْ.
الْحَفَضْ دَرْبَهْ،
حَفَضْ نَفْسَهْ.
١٨ قَبُلْ الْخَرَابْ،
الْإِسْتِكْبَارْ
وَ قَبُلْ الْوَقَعَانْ،
الْكِبْرِيَاءْ.
١٩ كَنْ تِمَسْكِنْ نَفْسَكْ
وَ تَقْعُدْ مَعَ الْمَسَاكِينْ،
دَا أَخَيْر مِنْ تِقَسِّمْ الْغَنِيمَةْ
مَعَ الْمُسْتَكْبِرِينْ.
٢٠ الْيِفَكِّرْ عَدِيلْ فِي الْوَصِيَّةْ يَلْقَى الْخَيْر
وَ مَبْرُوكْ لِلْيِتْوَكَّلْ عَلَيْ اللّٰهْ.
٢١ الْقَلْبَهْ حَكِيمْ يِنَادُوهْ فَاهِمْ
وَ اللِّسَانْ الْحَلُو يَنْطِي الْعِلِمْ.
٢٢ عَقُلْ عَدِيلْ مِثِلْ عَيْن أَلْمِي،
تِجِيبْ الْحَيَاةْ لِسِيدْهَا.
وَ لَاكِنْ نِفَاقْ الْمُنَافِقْ
يِأَدِّبَهْ.
٢٣ قَلْب الْحَكِيمْ يِعَدِّلْ كَلَامْ خَشْمَهْ
وَ لِسَانَهْ يَنْطِي الْعِلِمْ.
٢٤ الْكَلَامْ الْحَلُو مِثِلْ الْعَسَلْ،
حَلُو فِي اللِّسَانْ وَ شِفَاءْ لِلْجِسِمْ.
٢٥ فِيَّهْ دَرِبْ يِنْشَافْ فِي عُيُونَكْ عَدِيلْ
وَ لَاكِنْ فِي آخِرَهْ،
تَلْقَى الْمَوْت.
٢٦ الْجُوعْ يِلِزّ الْخَدَّامْ فِي الْخِدْمَةْ
أَشَانْ خَشْمَهْ يِدَوْر يَاكُلْ لُقْمَةْ.
٢٧ الْمَا نَافِعْ يِجِيبْ الشَّرّ
وَ كَلَامَهْ حَارّ مِثِلْ النَّارْ.
٢٨ الْكَدَّابْ يَزْرَعْ الْخِلَافْ
وَ الْيَنْقُلْ الْكَلَامْ يِفَرِّقْ الرُّفْقَانْ.
٢٩ سِيدْ الْعُنُفْ يُغُشّ رَفِيقَهْ
وَ فِي الطَّرِيقْ الْفَسِلْ يُقُودَهْ.
٣٠ الْيَغْمِزْ بِعَيْنَهْ يَنْوِي فَسَادَهْ
وَ الْيِعَضِّي شَلُّوفْتَهْ يِسَوِّي الْفَسَالَةْ.
٣١ الشَّيْب مِثِلْ تَاجْ شَرَفْ فِي رَاسْ سِيدَهْ،
مَا يِنْلَقِي إِلَّا بِالْعَمَلْ الصَّالِحْ الدَّايِمْ.
٣٢ الْمَا يَزْعَلْ عَجَلَةْ أَخَيْر مِنْ الْفَارِسْ
وَ الْيَمْلُكْ نَفْسَهْ أَخَيْر مِنْ الْيَقْلَعْ الْمَدِينَةْ.
٣٣ الْيِخَطِّطْ يُصُبّ الْوَدَعْ
وَ لَاكِنْ الْيِقَرِّرْ،
هُو اللّٰهْ.