لِدَاوُدْ
١٤٤
١ بَارَكْ اللّٰهْ،
مَلْجَئِي
الْيِعَلِّمْ إِيدَيْنِي الْحَرِبْ
وَ أَصَابْعِي الدُّوَاسْ.
٢ هُو الْيَرْحَمْنِي وَ هُو بَكَانِي الْقَوِي،
هُو مَسْكَنِي وَ هُو الْيِنَجِّينِي.
هُو دَرَقَتِي وَ مَلْجَئِي
وَ هُو الْخَطَّ الشَّعَبْ تِحْتِي.
٣ يَا اللّٰهْ!
بَنِي آدَم،
هُو شُنُو
وَ مَالَا تَجْعَلَهْ؟
شُنُو الْإِنْسَانْ
وَ مَالَا تِفَكِّرْ فَوْقَهْ؟
٤ الْإِنْسَانْ مِثِلْ الرِّيحْ
وَ أَيَّامَهْ مِثِلْ الضُّلّ الْيُفُوتْ.
٥ يَا اللّٰهْ!
فِلّ سَمَاوَاتَكْ وَ دَلِّي،
أَلْمَسْ الْجِبَالْ وَ يِدَخُّنُوا!
٦ أَطْلِقْ الْبَرْق وَ شَتِّتْ الْعُدْوَانْ،
رَسِّلْ نَشَاشِيبَكْ وَ أَطْرُدْهُمْ!
٧ مِدّ إِيدَيْنَكْ مِنْ فَوْق،
أَفْزَعْنِي وَ نَجِّينِي مِنْ أَلْمِي الْغَرِيقْ.
أَفْزَعْنِي مِنْ إِيدَيْن الْأَجَانِبْ
٨ اللِّسَانْهُمْ يُقُولْ الْكِدِبْ
وَ إِيدْهُمْ الزَّيْنَةْ مَلَانَةْ بِغَشّ.
٩ يَا رَبّ!
نِغَنِّي لَيْك غِنَيْ جَدِيدْ
وَ نَضْرُبْ لَيْك الْجِقِنْدِيَّةْ الْحُبَالْهَا عَشَرَةْ.
١٠ لَيْك إِنْتَ التَّنْطِي النَّصُرْ لِلْمُلُوكْ
وَ تِنَجِّي عَبْدَكْ دَاوُدْ مِنْ السَّيْف الْكَاتِلْ.
١١ أَفْزَعْنِي وَ نَجِّينِي مِنْ إِيدَيْن الْأَجَانِبْ
اللِّسَانْهُمْ يُقُولْ الْكِدِبْ
وَ إِيدْهُمْ الزَّيْنَةْ مَلَانَةْ بِغَشّ.
١٢ خَلِّي أَوْلَادْنَا يَبْقَوْا مِثِلْ بِذْرَةْ
التَّكْبُرْ فِي شَبَابْهَا
وَ بَنَاتْنَا يَبْقَنْ مِثِلْ عَمَدْ
الْيِجَمُّلُوا بَيْهُمْ قَصِرْ.
١٣ خَلِّي دَبَنْقَاتْنَا
يَمْلَوْا مَرَّةْ وَاحِدْ بِكُلَّ شَيّءْ
وَ غَنَمْنَا يِزِيدُوا بِآلَافْ
أَيْوَى،
يِزِيدُوا فِي كَدَادِتْنَا بِعَشَرَاتْ الْآلَافْ!
١٤ خَلِّي بَقَرْنَا يَبْقَوْا سُمَانْ
وَ مَا فِي خُرْمَةْ وَ لَا دَرِبْ الْيَدْخُلْ بَيَّهْ الْعَدُو
وَ مَا فِي كُرَوْرَاكْ فِي شَوَارِعْنَا.
١٥ مَبْرُوكْ لِلشَّعَبْ
اللِّقَوْا بَرَكَةْ مِثِلْ دِي!
أَيْوَى،
مَبْرُوكْ لِلشَّعَبْ
الْيَعَبُدُوا اللّٰهْ الرَّبّ.