غِنَيْ شُكُرْ هَنَا دَاوُدْ
١٤٥
١ *يَا إِلٰـهِي،
إِنْتَ الْمَلِكْ!
أَنَا نِعَظِّمَكْ.
نِبَارِكْ أُسْمَكْ دَايْماً وَ إِلَى الْأَبَدْ.
٢ كُلَّ يَوْم نِبَارِكَكْ.
نَحْمُدْ أُسْمَكْ دَايْماً وَ إِلَى الْأَبَدْ.
٣ اللّٰهْ عَظِيمْ وَ وَاجِبْ لَيَّهْ الْحَمْد الْكَتِيرْ
وَ عَظَمَتَهْ مَا عِنْدَهَا حَدّ.
٤ كُلِّ ذُرِّيَّةْ تِمَجِّدْ أَعْمَالَكْ لِلذُّرِّيَّةْ الْبَعَدْهَا
وَ تِخَبِّرْ بِقُدُرْتَكْ.
٥ نِذَّكَّرْ مَجْدَكْ وَ جَلَالَكْ وَ عَظَمَتَكْ
وَ أَخْبَارْ عَجَايْبَكْ.
٦ بِقُدْرَةْ أَعْمَالَكْ الْيِخَوُّفُوا،
يِحَجُّوا
وَ بِأَعْمَالَكْ الْكُبَارْ،
نِكَلِّمْ.
٧ يِذَّكَّرَوْا خَيْرَكْ الْكَتِيرْ السَّايِلْ
وَ بِعَدَالْتَكْ،
يَفْرَحَوْا.
٨ اللّٰهْ هُو الرَّحْمـٰنْ الرَّحِيمْ
وَ الصَّبُورْ وَ الْمُحِبّ.
٩ اللّٰهْ زَيْن لِكُلَّ النَّاسْ
وَ رَحِيمْ لِكُلَّ مَخْلُوقِينَهْ.
١٠ يَا اللّٰهْ!
كُلَّ مَخْلُوقِينَكْ يَشْكُرُوكْ
وَ كُلَّ صَالِحِينَكْ يِبَارُكُوكْ!
١١ هُمَّنْ يِحَجُّوا بِعَظَمَةْ مَمْلَكَتَكْ
وَ يِكَلُّمُوا بِقُدُرْتَكْ.
١٢ وَ يِعَرُّفُوا النَّاسْ بِقُدُرْتَكْ
وَ عَظَمَةْ مَجْدَكْ فِي مَمْلَكَتَكْ.
١٣ وَ مَمْلَكَتَكْ تَقْعُدْ فِي كُلَّ وَكِتْ
وَ سُلْطِتَكْ دَايْمَةْ مِنْ ذُرِّيَّةْ لِذُرِّيَّةْ.
اللّٰهْ يِتِمّ كُلَّ كَلِمَاتَهْ،
هُو أَمِينْ فِي كُلَّ أَعْمَالَهْ.
١٤ اللّٰهْ يِعَاوِنْ كُلَّ الْوَقَعَوْا
وَ يِسَاعِدْ كُلَّ الْعِيَوْا.
١٥ عُيُونْهُمْ كُلُّهُمْ يِشِيفُوا عَلَيْك بِعَشَمْ
أَشَانْ تَنْطِيهُمْ الْمَعَاشْ فِي كُلَّ وَكِتْ.
١٦ إِنْتَ تَفْتَحْ إِيدَكْ
وَ تِتِمّ مُنَى كُلَّ الْحَيِّينْ.
١٧ اللّٰهْ صَادِقْ فِي كُلَّ دُرُوبَهْ
وَ أَمِينْ فِي كُلَّ أَعْمَالَهْ.
١٨ اللّٰهْ قَرِيبْ لِكُلَّ الْيِنَادُوهْ،
قَرِيبْ لِكُلَّ الْيِنَادُوهْ بِالْحَقّ.
١٩ هُو يِحَقِّقْ نِيَّةْ الْخَايْفِينْ مِنَّهْ
وَ يَسْمَعْ صِرَاخْهُمْ وَ يِنَجِّيهُمْ.
٢٠ اللّٰهْ يَحْفَضْ كُلَّ الْيِحِبُّوهْ
وَ يِدَمِّرْ كُلَّ الْعَاصِيِينْ.
٢١ خَلِّي لِسَانِي يَحْمُدْ اللّٰهْ
وَ خَلِّي أَيِّ مَخْلُوقْ يِمَجِّدْ أُسْمَهْ الْمُقَدَّسْ
دَايْماً وَ إِلَى الْأَبَدْ.