مَزْمُورْ لِدَاوُدْ
١٤٣
١ يَا اللّٰهْ،
أَسْمَعْ صَلَاتِي
وَ خُطّ أَدَانَكْ لِشِحِدْتِي.
رُدّ لَيِّ بِصِدْقَكْ وَ عَدَالْتَكْ!
٢ مَا تِوَدِّينِي أَنَا عَبْدَكْ فِي الشَّرِيعَةْ
أَشَانْ مَا فِي مَخْلُوقْ حَيّ صَالِحْ قِدَّامَكْ.
٣ الْعَدُو قَاعِدْ يِطَارِدْنِي
وَ رَمَانِي فِي الْأَرْض لِيَرْحَكْنِي.
وَ هُو قَعَّدْنِي فِي الضَّلَامْ
مِثِلْ الْمَاتَوْا زَمَانْ.
٤ رُوحِي بِقَتْ ضَعِيفَةْ
وَ قَلْبِي أَلْحَيَّرْ.
٥ أَنَا أَذَّكَّرْت الْأَيَّامْ الْفَاتَوْا
وَ فِي نَفْسِي،
حَجَّيْت بِكُلَّ عَمَلَكْ
وَ فَكَّرْت فِي خِدْمَةْ إِيدَيْنَكْ.
٦ أَنَا رَفَعْت إِيدَيْنِي عَلَيْك
وَ قِدَّامَكْ،
أَنَا مِثِلْ أَرْض عَطْشَانَةْ.
وَقْفَةْ.
٧ يَا اللّٰهْ،
رُدّ لَيِّ بِسُرْعَةْ!
رُوحِي ضِعْفَتْ.
وَجِّهْ وِجْهَكْ عَلَيِّ
أَشَانْ مَا نَبْقَى مِثِلْ الْيَنْزُلُوا فِي الْقُبُورْ.
٨ وَ بِفَجُرْ،
خَبِّرْنِي بِرَحْمَتَكْ
أَشَانْ أَنَا مُتَوَكِّلْ عَلَيْك.
وَصِّفْنِي الطَّرِيقْ النِّشِيلَهْ
أَشَانْ أَنَا مُتَوَجِّهْ عَلَيْك.
٩ يَا اللّٰهْ،
نَجِّينِي مِنْ عُدْوَانِي
أَشَانْ أَنَا جِيتْ نِلَّبَّدْ جَنْبَكْ.
١٠ عَلِّمْنِي لِنِسَوِّي نِيّتَكْ
أَشَانْ إِنْتَ إِلٰـهِي.
خَلِّي رُوحَكْ الْعَدِيلْ
يِوَدِّينِي فِي أَرْض مُسْتَوِيَةْ!
١١ يَا اللّٰهْ،
حَيِّينِي فِي شَانْ أُسْمَكْ
وَ بِعَدَالْتَكْ،
أَمْرُقْنِي مِنْ الضِّيقَةْ!
١٢ وَ بِرَحْمَتَكْ،
إِنْتَ تَكْتُلْ عُدْوَانِي
وَ تِدَمِّرْ كُلَّ الْيُقُمُّوا ضِدِّي
أَشَانْ أَنَا عَبْدَكْ.