أسْتِير 7

مَوْت هَمَان

١ الْمَلِكْ وَ هَمَانْ مَشَوْا لِيَشَرْبَوْا وَ يَفْرَحَوْا مَعَ أَسْتِيرْ الْمَلِكَةْ. ٢ وَ فِي الْعَازُومَةْ، الْمَلِكْ سَأَلَاهَا لِأَسْتِيرْ تَانِي مَرَّةْ وَ قَالْ: «شُنُو طَلَبْكِ، يَا أَسْتِيرْ الْمَلِكَةْ؟ نَنْطِيهْ لَيْكِ. وَ شُنُو مُنَاكِ؟ لَحَدِّي كَنْ نُصّ مَمْلَكَتِي كُلَ، نَنْطِيهْ لَيْكِ.» ٣ وَ أَسْتِيرْ الْمَلِكَةْ رَدَّتْ وَ قَالَتْ: «كَنْ نَلْقَى مِنَّكْ الرِّضَى وَ كَنْ بِقِي لَيْك عَدِيلْ، يَا الْمَلِكْ، أَقْبَلْ طَلَبِي وَ نَجِّي حَيَاتِي! وَ حَقِّقْ مُنَايِ وَ نَجِّي حَيَاةْ شَعَبِي! ٤ أَشَانْ أَنَا وَ شَعَبِي بَاعَوْنَا لِيِدَمُّرُونَا وَ يَكْتُلُونَا وَ يِكَمُّلُونَا. وَ صَحِيحْ، كَنْ أَوَّلْ بَاعَوْنَا مِثِلْ عَبِيدْ وَ خَدِيمْ بَسْ، أَنَا نَسْكُتْ أَشَانْ دِي مُضَايَقَةْ هَيْنَةْ لَيْنَا، مَا وَاجِبْ نِبَشْتِنْ بَيْهَا الْمَلِكْ.»

٥ وَ خَلَاصْ، الْمَلِكْ أَشَوِرُوشْ رَدَّ لِأَسْتِيرْ وَ قَالْ: «يَاتُو النَّادُمْ دَا؟ وَيْن النَّادُمْ الْعِنْدَهْ فِكْرَةْ مِثِلْ دِي؟» ٦ وَ أَسْتِيرْ قَالَتْ: «الْعَدُو وَ الْخَصِيمْ، هُو هَمَانْ الْفَسِلْ دَا!»

وَ خَلَاصْ فِي الْبَكَانْ دَا، هَمَانْ قَاعِدْ يَرْجِفْ مِنْ الْخَوْف قِدَّامْ الْمَلِكْ وَ الْمَلِكَةْ. ٧ وَ فِي زَعَلَهْ، الْمَلِكْ مَرَقْ عَجَلَةْ مِنْ بَكَانْ الْعَازُومَةْ وَ مَشَى فِي جِنَيْنَةْ الْقَصِرْ. وَ هَمَانْ كَمَانْ قَعَدْ يَشْحَدْ الْمَلِكَةْ أَسْتِيرْ لِتِنَجِّي حَيَاتَهْ أَشَانْ هُو عِرِفْ كَدَرْ الْمَلِكْ شَالْ نِيَّةْ لِيِوَدِّرَهْ. ٨ وَ وَكِتْ الْمَلِكْ قَبَّلْ مِنْ جِنَيْنَةْ الْقَصِرْ لِبَكَانْ الْعَازُومَةْ، هَمَانْ وَقَعْ فِي رَاسْ السَّرِيرْ الْأَسْتِيرْ قَاعِدَةْ فَوْقَهْ. وَ طَوَّالِي الْمَلِكْ قَالْ: «هَلْ الرَّاجِلْ دَا يِدَوْر يَرْقُدْ بِقُوءْ مَعَ الْمَلِكَةْ قِدَّامِي أَنَا فِي لُبّ بَيْتِي وَلَّا؟»

وَ لِسَّاعْ الْمَلِكْ مَا كَمَّلْ كَلَامَهْ كَيْ بَسْ، خَدَّامِينَهْ جَوْا غَطَّوْا وِجِهْ هَمَانْ بِقِطْعَةْ. ٩ وَ حَرْبُونَا وَاحِدْ مِنْ الْخَدَّامِينْ حَجَّى قِدَّامْ الْمَلِكْ وَ قَالْ: «هَمَانْ جَهَّزْ عُودْ لِيِعَلُّقُوا فَوْقَهْ مَرْدَكَايْ هُو الْكَلَّمْ كَلَامْ مُهِمّ فِي شَانْ الْمَلِكْ. وَ الْعُودْ دَا قَاعِدْ فِي بَيْت هَمَانْ وَ طُولَهْ 50 دُرَاعْ.» وَ الْمَلِكْ قَالْ: «عَلُّقُوهْ فَوْقَهْ!»

١٠ وَ خَلَاصْ، عَلَّقَوْا هَمَانْ فِي رَاسْ الْعُودْ الْهُو جَهَّزَهْ لِمَرْدَكَايْ. وَ بَعَدْ دَا، زَعَلْ الْمَلِكْ دَلَّى.