أسْتِير 1

كتاب أسْتِير

من كتب تاريخ بني إسرائيل

عازومة الملك أَشَوِرُوش

١ التَّارِيخْ دَا بِقِي فِي وَكِتْ الْمَلِكْ أَشَوِرُوشْ. وَ أَشَوِرُوشْ دَا حَكَمْ فِي 127 وُلَايَةْ مِنْ بَلَدْ الْهِنْد لَحَدِّي بَلَدْ الْحَبَشَةْ. ٢ وَ فِي الْوَكِتْ دَا بَسْ، الْمَلِكْ أَشَوِرُوشْ قَعَدْ فِي قَصِرْ الْمَمْلَكَةْ وَ حَكَمْ فِي مَدِينَةْ شُوشَةْ الْقَوِيَّةْ.

٣ وَ فِي السَّنَةْ التَّالْتَةْ هَنَا حُكْمَهْ، هُو سَوَّى عَازُومَةْ كَبِيرَةْ وَ لَمَّ كُلَّ مَسَائِيلَهْ وَ خَدَّامِينَهْ وَ عَسْكَرْ الْفَارِسِيِّينْ وَ الْمَادِيِّينْ وَ الْحُكَّامْ وَ كُبَارَاتْ الْوُلَايَاتْ. ٤ وَ فِي مُدَّةْ 180 يَوْم، هُو وَصَّفْ لَيْهُمْ الْغُنَى الْكَتِيرْ هَنَا مَمْلَكَتَهْ وَ قِيمْتَهْ الْكَبِيرَةْ.

٥ وَ بَعَدْ الْأَيَّامْ دَوْل كَمَّلَوْا، الْمَلِكْ عَزَمْ فِي الْعَازُومَةْ كُلَّ النَّاسْ السَّاكْنِينْ فِي مَدِينَةْ شُوشَةْ الْقَوِيَّةْ مِنْ الْغَنِيْ لَحَدِّي الْفَقْرِي. وَ هُمَّنْ قَعَدَوْا سَبْعَةْ يَوْم فِي الْفَضَايْ هَنَا جِنَيْنَةْ قَصِرْ الْمَلِكْ. ٦ وَ الْبَكَانْ دَا مُجَمَّلْ بِسَتَايِرْ هَنَا قُمَاشْ أَبْيَضْ وَ قَرَضِي. وَ عَلَّقَوْهُمْ بِحُبَالْ بُيُضْ وَ حُمُرْ تُشْو فِي خَوَاتِمْ هَنَا فُضَّةْ وَ رَبَطَوْهُمْ فِي رَاسْ عَمَدْ هَنَا رُخَامْ. وَ خَطَّوْا سَرَايِرْ هَنَا دَهَبْ وَ فُضَّةْ فِي الْأَرْض الْجَمَّلَوْهَا بِرُخَامْ أَبْيَضْ وَ أَزْرَقْ وَ حَجَرْ سَمَحْ. ٧ وَ النَّاسْ قَاعِدِينْ يَشَرْبَوْا بِمَوَاعِينْ هَنَا دَهَبْ نَفَرْهُمْ شِقْ شِقْ. وَ الْمَلِكْ قَدَّمْ لَيْهُمْ خَمَرْ كَتِيرْ مَرَّةْ وَاحِدْ بِجُودْ الْمَمْلَكَةْ. ٨ وَ أَيِّ وَاحِدْ يَشْرَبْ حَسَبْ نِيّتَهْ أَشَانْ الْمَلِكْ أَمَرْ كُلَّ خَدَّامِينَهْ يَنْطُوا لِأَيِّ نَادُمْ الشَّيّءْ الْيِدَوْرَهْ.

٩ وَ الْمَلِكَةْ وَشْتِي، هِي كُلَّ سَوَّتْ عَازُومَةْ لِلْعَوِينْ فِي قَصِرْ الْمَلِكْ أَشَوِرُوشْ.

حُقْرة الملِكة وَشْتِي

١٠ وَ فِي الْيَوْم السَّابِعْ وَكِتْ الْمَلِكْ أَشَوِرُوشْ شِرِبْ الْخَمَرْ وَ بِقِي فَرْحَانْ، هُو نَادَى خَدَّامِينَهْ مَهُمَانْ وَ بِزْتَا وَ حَرْبُونَا وَ بِقْتَا وَ أَبَقْتَا وَ زِيتَرْ وَ كَرْكَسْ، دَوْل الْخَدَّامِينْ السَّبْعَةْ الْقَاعِدِينْ يَخْدُمُوا تِحْتَهْ. ١١ وَ الْمَلِكْ أَمَرْ يِجِيبُوا قِدَّامَهْ الْمَلِكَةْ وَشْتِي بِتَاجْهَا هَنَا الْمَمْلَكَةْ لِيِوَصِّفْ جَمَالْهَا لِلشَّعَبْ وَ لِمَسَائِيلَهْ أَشَانْ هِي جَمِيلَةْ مَرَّةْ وَاحِدْ. ١٢ وَ لَاكِنْ الْمَلِكَةْ وَشْتِي أَبَتْ مَا تَجِي حَسَبْ أَمُرْ الْمَلِكْ الْقَالَهْ لَيْهَا بِوَاسِطَةْ خَدَّامِينَهْ. وَ خَلَاصْ، الْمَلِكْ غِضِبْ غَضَبْ شَدِيدْ وَ الزَّعَلْ دَا حَرَّقْ قَلْبَهْ.

١٣ وَ الْمَلِكْ حَجَّى مَعَ الْعُلَمَاءْ وَ الْمُنَجِّمِينْ أَشَانْ أَيِّ شَيّءْ الْبُخُصّ الْمَمْلَكَةْ، يِقَدِّمَهْ قِدَّامْ النَّاسْ الْيَعَرْفُوا الْقَانُونْ وَ الشَّرِيعَةْ. ١٤ وَ النَّاسْ دَوْل الْجَنْب الْمَلِكْ، هُمَّنْ كَرْشَنَا وَ شِتَارْ وَ أَدْمَاتَا وَ تَرْشِيشْ وَ مَرَسْ وَ مَرْسَنَا وَ مَمُوكَانْ، دَوْل السَّبْعَةْ مَسَائِيلْ هَنَا الْفَارِسِيِّينْ وَ الْمَادِيِّينْ. وَ هُمَّنْ دَوْل قَاعِدِينْ فِي الدَّرَجَةْ الْأَوَّلْ هَنَا الْمَمْلَكَةْ وَ يِشِيفُوا الْمَلِكْ فِي أَيِّ وَكِتْ.

١٥ وَ الْمَلِكْ قَالْ لَيْهُمْ: «حَسَبْ الْقَانُونْ، نِسَوِّي شُنُو ضِدّ الْمَلِكَةْ وَشْتِي؟ أَشَانْ هِي مَا طَبَّقَتْ أَمْرِي أَنَا الْمَلِكْ أَشَوِرُوشْ الْقُلْتَهْ لَيْهَا بِوَاسِطَةْ خَدَّامِينِي.»

١٦ وَ مَمُوكَانْ شَالْ الْكَلَامْ قِدَّامْ الْمَلِكْ وَ مَسَائِيلَهْ وَ قَالْ: «يَا الْمَلِكْ! وَشْتِي الْمَلِكَةْ مَا حَقَرَتَكْ إِنْتَ وِحَيْدَكْ بَسْ لَاكِنْ هِي حَقَرَتْ كُلَّ الْمَسَائِيلْ وَ الشَّعَبْ هَنَا كُلَّ وُلَايَاتْ الْمَلِكْ أَشَوِرُوشْ. ١٧ وَ كَلَامْ الْمَلِكَةْ دَا، كُلَّ الْعَوِينْ يَسْمَعَنَّهْ وَ يَحْقِرَنْ رُجَالْهِنْ وَ يُقُولَنْ: ‹الْمَلِكْ أَشَوِرُوشْ ذَاتَهْ قَالْ يِجِيبُوا الْمَلِكَةْ وَشْتِي قِدَّامَهْ لَاكِنْ هِي أَبَتْ مَا تَجِي.› ١٨ وَ مِنْ الْيَوْم الْمَيَارِمْ هَنَا الْفَارِسِيِّينْ وَ الْمَادِيِّينْ سِمْعَنْ بِحُقْرَةْ الْمَلِكَةْ، هِنَّ كُلَ يَحْقِرَنْ رُجَالْهِنْ مَسَائِيلْ الْمَلِكْ. وَ الْحُقْرَةْ دِي تِجِيبْ الزَّعَلْ. ١٩ يَا سِيدِي الْمَلِكْ! كَنْ عَدِيلْ لَيْك، خَلِّي يَمْرُقْ قَرَارْ مَلَكِي الْيَكْتُبُوهْ فِي قَانُونْ الْفَارِسِيِّينْ وَ الْمَادِيِّينْ الْأَبَداً مَا يِلْغَيَّرْ. وَ خَلِّي يُقُولْ: ‹أَبَداً الْمَلِكَةْ وَشْتِي مَا تَجِي قِدَّامْ الْمَلِكْ أَشَوِرُوشْ. وَ هُو يَنْطِي دَرَجَتْهَا هِنْت الْمَلِكَةْ لِمَرَةْ آخَرَةْ أَخَيْر مِنْهَا.› ٢٠ وَ وَكِتْ قَرَارْ الْمَلِكْ دَا يَنْشُرُوهْ فِي كُلَّ الْمَمْلَكَةْ، خَلَاصْ كُلَّ الْعَوِينْ يِكَرِّمَنْ رُجَالْهِنْ مِنْ الْغَنِيْ لَحَدِّي الْفَقْرِي كُلَ.»

٢١ وَ الْكَلَامْ دَا بِقِي عَدِيلْ لِلْمَلِكْ وَ لِمَسَائِيلَهْ وَ الْمَلِكْ طَبَّقْ وَصِيَّةْ مَمُوكَانْ. ٢٢ وَ الْمَلِكْ رَسَّلْ جَوَابَاتْ فِي كُلَّ وُلَايَاتْ الْمَمْلَكَةْ، لِأَيِّ وُلَايَةْ حَسَبْ كِتَابِتْهَا وَ لِأَيِّ شَعَبْ حَسَبْ لُغِّتَهْ، وَ قَرَّرْ كَدَرْ أَيِّ رَاجِلْ يَبْقَى مَسْؤُولْ فِي بَيْتَهْ. وَ الْجَوَابَاتْ دَوْل لِأَيِّ شَعَبْ حَسَبْ لُغِّتَهْ.