الحرْبة في قِلْبُوعَة و مَوْت شَاوُول
١٠
١ وَ يَوْم وَاحِدْ،
الْفِلِسْطِيِّينْ هَجَمَوْا بَنِي إِسْرَائِيلْ وَ بَنِي إِسْرَائِيلْ جَرَوْا قِدَّامْ الْفِلِسْطِيِّينْ وَ كَتِيرِينْ مِنْهُمْ مَاتَوْا فِي جَبَلْ قِلْبُوعَةْ.
٢ وَ الْفِلِسْطِيِّينْ زَرَّوْهُمْ لِشَاوُولْ وَ عِيَالَهْ.
وَ هُمَّنْ كَتَلَوْا يُونَتَانْ وَ أَبِنَدَابْ وَ مَلْكِشُوعْ،
عِيَالْ شَاوُولْ.
٣ وَ فِي الْبَكَانْ دَا،
الْحَرِبْ بِقِي شَدِيدْ لِشَاوُولْ.
وَ سِيَادْ النُّشَّابْ شَافَوْه وَ وَكِتْ هُو شَافَاهُمْ،
قَمَّ يَرْجِفْ قِدَّامْهُمْ.
٤ وَ شَاوُولْ قَالْ لِلصَّبِي الشَّايِلْ لَيَّهْ سِلَاحَهْ:
«سِلّ سَيْفَكْ وَ أَكْتُلْنِي.
أَشَانْ مَا نِدَوْر الْمَا مُطَهَّرِينْ دَوْل يِعَذُّبُونِي.»
لَاكِنْ الصَّبِي أَبَى أَشَانْ هُو خَافْ مَرَّةْ وَاحِدْ.
وَ خَلَاصْ شَاوُولْ شَالْ سَيْفَهْ وَ وَقَعْ فَوْقَهْ وَ مَاتْ.
٥ وَ وَكِتْ الصَّبِي دَا شَافْ شَاوُولْ مَاتْ،
هُو كُلَ وَقَعْ فِي سَيْفَهْ وَ مَاتْ.
٦ وَ بِمِثِلْ دَا،
شَاوُولْ وَ أَوْلَادَهْ التَّلَاتَةْ وَ كُلَّ عَايِلْتَهْ مَاتَوْا سَوَا.
٧ وَ وَكِتْ بَنِي إِسْرَائِيلْ السَّاكْنِينْ جَنْب الْوَادِي سِمْعَوْا بِهَزِيمَةْ بَنِي إِسْرَائِيلْ وَ مَوْت شَاوُولْ وَ أَوْلَادَهْ،
هُمَّنْ كُلَ عَرَّدَوْا وَ خَلَّوْا حِلَّالْهُمْ.
وَ الْفِلِسْطِيِّينْ جَوْا وَ سَكَنَوْا فِي الْحِلَّالْ دَوْل.
٨ وَ أَمْبَاكِرْ،
وَكِتْ الْفِلِسْطِيِّينْ جَوْا فِي بَكَانْ الدُّوَاسْ لِيِشِيلُوا خُمَامْ الْمَيْتِينْ،
لِقَوْا شَاوُولْ وَ أَوْلَادَهْ مَيْتِينْ فِي رَاسْ جَبَلْ قِلْبُوعَةْ.
٩ وَ هُمَّنْ شَالَوْا سِلَاحْ شَاوُولْ وَ قَطَعَوْا رَاسَهْ.
وَ رَسَّلَوْا الْخَبَرْ دَا فِي كُلَّ بَلَدْ الْفِلِسْطِيِّينْ وَ خَبَّرَوْا بَيَّهْ شَعَبْهُمْ وَ فِي بُيُوتْ أَصْنَامْهُمْ.
١٠ وَ هُمَّنْ خَطَّوْا سِلَاحْ شَاوُولْ فِي بَيْت إِلٰـهَاتْهُمْ.
وَ عَلَّقَوْا رَاسَهْ فِي بَيْت إِلٰـهُّمْ دَقُون.
١١ وَ كُلَّ سُكَّانْ حِلَّةْ يَابِيشْ فِي تُرَابْ قِلْعَادْ سِمْعَوْا بِكُلَّ شَيّءْ الْفِلِسْطِيِّينْ سَوَّوْه فِي شَاوُولْ.
١٢ خَلَاصْ كُلَّ الرُّجَالْ الْفَحَلِينْ قَمَّوْا وَ مَشَوْا شَالَوْا جَنَازَاتْ شَاوُولْ وَ أَوْلَادَهْ وَ جَابَوْهُمْ فِي يَابِيشْ.
وَ هُمَّنْ دَفَنَوْا عُضَامْهُمْ فِي قَعَرْ الشَّدَرَةْ الْكَبِيرَةْ الْقَاعِدَةْ فِي يَابِيشْ.
وَ صَامَوْا سَبْعَةْ يَوْم.