2 مُلوك 10

يَاهُو دمّر عايِلة أَخَاب

١ وَ الْمَلِكْ أَخَابْ عِنْدَهْ 70 نَاسْ مِنْ عَايِلْتَهْ السَّاكْنِينْ فِي مَدِينَةْ السَّامِرَةْ. وَ يَاهُو رَسَّلْ جَوَابَاتْ فِي السَّامِرَةْ لِشُيُوخْ حِلَّةْ يَزْرَعِيلْ وَ لِكُبَارَاتْ الشَّعَبْ وَ لِلنَّاسْ الْمُكَلَّفِينْ بِتَرْبِيَةْ عِيَالْ أَخَابْ. وَ قَالْ لَيْهُمْ: ٢ «إِنْتُو مُكَلَّفِينْ بِعِيَالْ سِيدْكُو وَ عَرَبَاتْ الْحَرِبْ وَ الْخَيْل وَ الْمُدُنْ الْقَوِيِّينْ وَ السِّلَاحْ. وَ مِنْ تَلْقَوْا الْجَوَابْ دَا، ٣ فَتُّشُوا نَادُمْ زَيْن وَ عَدِيلْ مِنْ عِيَالْ سِيدْكُو وَ خُطُّوهْ فِي كُرْسِي الْمُلُكْ فِي قَدّ أَبُوهْ. وَ بَعَدْ دَا، أَقْعُدُوا جَاهِزِينْ لِتِحَارُبُوا لِتَحْفَضَوْا عَايِلَةْ سِيدْكُو.»

٤ وَ وَكِتْ النَّاسْ دَوْل لِقَوْا الْجَوَابَاتْ، خَافَوْا خَوْف شَدِيدْ وَ قَالَوْا: «مُلُوكْ إِتْنَيْن كُلَ مَا قِدْرَوْا فَوْق يَاهُو وَ أَنِحْنَ كَمَانْ نَقْدَرَوْا نِسَوُّوا شُنُو ضِدَّهْ؟» ٥ وَ خَلَاصْ، الْمَسْؤُولْ فِي قَصِرْ الْمَلِكْ وَ شَيْخ الْحِلَّةْ وَ كُبَارَاتْ الشَّعَبْ وَ النَّاسْ الْمُكَلَّفِينْ بِتَرْبِيَةْ عِيَالْ الْمَلِكْ، كُلُّهُمْ رَسَّلَوْا لِيَاهُو وَ قَالَوْا لَيَّهْ: «أَنِحْنَ عَبِيدَكْ وَ نِسَوُّوا كُلَّ شَيّءْ التَّامُرْنَا بَيَّهْ. وَ نَادُمْ وَاحِدْ كُلَ، أَنِحْنَ مَا نِدَرُّجُوهْ مَلِكْ. إِنْتَ سَوِّي كُلَّ شَيّءْ التِّدَوْرَهْ.»

٦ وَ يَاهُو كَتَبْ جَوَابْ تَانِي وَ قَالْ: «كَنْ إِنْتُو مَعَايِ وَ تَسْمَعَوْا كَلَامِي، أَقْطَعَوْا رُوسَيْ أَوْلَادْ سِيدْكُو وَ جِيبُوهُمْ لَيِّ أَمْبَاكِرْ فَجُرْ فِي نَفْس السَّاعَةْ فِي يَزْرَعِيلْ.»

وَ أَوْلَادْ الْمَلِكْ السَّبْعِينْ سَاكْنِينْ بَكَانْ كُبَارَاتْ الْحِلَّالْ الْمُكَلَّفِينْ بِتَرْبِيِتْهُمْ. ٧ وَ مِنْ الْكُبَارَاتْ دَوْل لِقَوْا الْجَوَابْ، خَلَاصْ قَمَّوْا كَرَبَوْهُمْ لِعِيَالْ الْمَلِكْ السَّبْعِينْ وَ دَبَحَوْهُمْ وَ قَطَعَوْا رُوسَيْهُمْ. وَ بَعَدْ دَا، صَبَّوْا الرُّوسَيْ دَوْل فِي قُفَفْ وَ رَسَّلَوْهُمْ لِيَاهُو فِي يَزْرَعِيلْ. ٨ وَ طَوَّالِي، نَادُمْ وَاحِدْ جَاءْ خَبَّرَهْ لِيَاهُو وَ قَالْ: «دَاهُو جَابَوْا رُوسَيْ أَوْلَادْ الْمَلِكْ.» وَ يَاهُو قَالْ لَيَّهْ: «خُطّ الرُّوسَيْ دَوْل فِي كَوْم إِتْنَيْن فِي خَشُمْ بَابْ الْحِلَّةْ وَ خَلِّيهُمْ يَقْعُدُوا فِي بَكَانْهُمْ دَا لَحَدِّي فَجُرْ.»

٩ وَ بِفَجُرْ، يَاهُو مَرَقْ وَ وَقَفْ قِدَّامْ الشَّعَبْ وَ قَالْ: «إِنْتُو بَرِيِّينْ! أَنَا بَسْ أَتْمَرَّدْت ضِدّ سِيدِي الْمَلِكْ وَ كَتَلْتَهْ. وَ لَاكِنْ كُلَّ النَّاسْ دَوْل، يَاتُو كَتَلَاهُمْ؟ ١٠ هَسَّعْ دَا، أَعَرْفُوا تَمَامْ كَدَرْ مَا فِي كِلْمَةْ وَاحِدَةْ كُلَ مِنْ كَلَامْ اللّٰهْ الْمَا تِلْحَقَّقْ. اللّٰهْ حَقَّقْ كُلَّ كَلَامَهْ الْقَالَهْ ضِدّ عَايِلَةْ أَخَابْ بِوَاسِطَةْ عَبْدَهْ النَّبِي إِلِيَاسْ.»

١١ وَ يَاهُو كَتَلْ كُلَّ النَّاسْ الْفَضَّلَوْا مِنْ عَايِلَةْ أَخَابْ الْقَاعِدِينْ فِي يَزْرَعِيلْ. وَ كَتَلْ كُلَّ كُبَارَاتَهْ وَ رُفْقَانَهْ وَ رُجَالْ الدِّينْ الْيَخْدُمُوا لَيَّهْ. وَ نَادُمْ وَاحِدْ كُلَ مِنْهُمْ مَا فَضَّلْ.

يَاهُو دمّر عايِلة أَخَزْيَا

١٢ وَ بَعَدْ دَا، يَاهُو مَشَى مَدِينَةْ السَّامِرَةْ. وَ فِي دَرِبْ هَنَا حِلَّةْ بَيْت عِقَيْد هَنَا الرُّعْيَانْ، ١٣ هُو لَمَّ مَعَ أَخْوَانْ أَخَزْيَا مَلِكْ مَمْلَكَةْ يَهُوذَا. وَ هُو قَالْ لَيْهُمْ: «إِنْتُو دَوْل يَاتُمَّنْ؟» وَ هُمَّنْ رَدَّوْا لَيَّهْ وَ قَالَوْا: «أَنِحْنَ أَخْوَانْ أَخَزْيَا مَاشِينْ نِسَلُّمُوا أَوْلَادْ الْمَلِكْ وَ أَوْلَادْ الْمَيْرَمْ.»

١٤ وَ طَوَّالِي، يَاهُو أَمَرْ وَ قَالْ: «يَلَّا! كَرُّبُوهُمْ حَيِّينْ.» خَلَاصْ، كَرَبَوْهُمْ وَ بَعَدْ دَا، دَبَحَوْهُمْ وَ دَفَّقَوْهُمْ فِي بِيرْ هَنَا بَيْت عِقَيْد. وَ النَّاسْ دَوْل عَدَدْهُمْ 42 رَاجِلْ وَ يَاهُو مَا خَلَّى وَاحِدْ مِنْهُمْ كُلَ حَيّ.

١٥ وَ يَاهُو قَمَّ مِنْ الْبَكَانْ دَا وَ مَشَى لَاقَاهْ لِيُنَدَابْ وِلَيْد رِكَابْ الْهُو كُلَ جَايِ لَيَّهْ. يَاهُو سَلَّمَهْ وَ قَالْ: «هَلْ نِيّتَكْ مُخْلِصَةْ مِثِلْ نِيّتِي أَنَا؟» وَ يُنَدَابْ قَالْ: «أَيْوَى!» وَ يَاهُو قَالْ لَيَّهْ: «أَنْطِينِي إِيدَكْ.» وَ يُنَدَابْ مَدَّ إِيدَهْ وَ يَاهُو كَرَبَهْ وَ رَكَّبَهْ مَعَايَهْ فِي عَرَبَتَهْ. ١٦ وَ قَالْ لَيَّهْ: «تَعَالْ مَعَايِ وَ تِشِيفْ زَعَلِي الشَّدِيدْ ضِدّ عُدْوَانْ اللّٰهْ.» وَ يَاهُو وَدَّاهْ مَعَايَهْ فِي عَرَبَتَهْ.

١٧ وَ وَكِتْ وَصَّلْ فِي السَّامِرَةْ، يَاهُو كَتَلْ كُلَّ النَّاسْ الْفَضَّلَوْا مِنْ عَايِلَةْ أَخَابْ السَّاكْنِينْ فِي الْحِلَّةْ. هُو دَمَّرَاهُمْ كُلُّهُمْ حَسَبْ كَلَامْ اللّٰهْ الْقَالَهْ لِلنَّبِي إِلِيَاسْ.

يَاهُو دمّر اليعبُدوا إلٰـه بَعَل

١٨ وَ يَاهُو لَمَّ كُلَّ الشَّعَبْ وَ قَالْ لَيْهُمْ: «أَخَابْ عَبَدْ إِلٰـهْ بَعَلْ شِيَّةْ بَسْ وَ أَنَا نَعَبُدَهْ زِيَادَةْ مِنَّهْ. ١٩ وَ هَسَّعْ دَا، لِمُّوا كُلَّ أَنْبِيَاء بَعَلْ وَ كُلَّ النَّاسْ الْقَاعِدِينْ يَعَبُدُوهْ وَ كُلَّ رُجَالْ الدِّينْ هَنَا بَعَلْ. خَلِّي نَادُمْ وَاحِدْ كُلَ مَا يِفَضِّلْ لَاكِنْ كُلُّهُمْ يَجُوا لَيِّ أَشَانْ نِدَوْر نِقَدِّمْ ضَحَايَا لِإِلٰـهْ بَعَلْ. وَ أَيِّ نَادُمْ الْمَا جَاءْ دَا، مَا يِعِيشْ.» وَ لَاكِنْ يَاهُو حَجَّى الْكَلَامْ دَا بِنَجَاضَةْ أَشَانْ هُو يِدَوْر يِدَمِّرْ النَّاسْ الْقَاعِدِينْ يَعَبُدُوا بَعَلْ.

٢٠ وَ يَاهُو أَمَرْ يِخَصُّصُوا عِيدْ لِبَعَلْ. وَ سَوَّوْا مِثِلْ كَيْ. ٢١ وَ يَاهُو رَسَّلْ نَاسْ فِي كُلَّ بَلَدْ إِسْرَائِيلْ. وَ كُلَّ النَّاسْ الْقَاعِدِينْ يَعَبُدُوا بَعَلْ جَوْا وَ نَادُمْ أَبَى مَا يَجِي دَا، مَا فِيهْ. وَ هُمَّنْ دَخَلَوْا فِي بَيْت الْعِبَادَةْ هَنَا بَعَلْ وَ الْبَيْت دَا أَنْمَلَى تَكْ. ٢٢ وَ يَاهُو أَمَرْ مَسْؤُولْ خُلْقَانْ الْعِبَادَةْ هَنَا بَعَلْ وَ قَالْ لَيَّهْ: «أَنْطِي خُلْقَانْ لِكُلَّ النَّاسْ الْيَعَبُدُوا بَعَلْ.» وَ الْمَسْؤُولْ أَنْطَاهُمْ الْخُلْقَانْ.

٢٣ وَ خَلَاصْ، يَاهُو وَ يُنَدَابْ وِلَيْد رِكَابْ مَشَوْا فِي بَيْت الْعِبَادَةْ هَنَا بَعَلْ. وَ يَاهُو قَالْ لِلنَّاسْ الْقَاعِدِينْ يَعَبُدُوا بَعَلْ: «أَكُّدُوا وَ شِيفُوا كَدَرْ فِي لُبُّكُو مَا فِي نَادُمْ وَاحِدْ الْيَعَبُدْ اللّٰهْ لَاكِنْ إِلَّا النَّاسْ الْيَعَبُدُوا إِلٰـهْ بَعَلْ بَسْ.» ٢٤ وَ يَاهُو خَطَّ 80 عَسْكَرْ بِبَرَّا وَ قَالْ لَيْهُمْ: «كَنْ نَادُمْ أَنْبَلَصْ مِنْ النَّاسْ الْأَنَا سَلَّمْتُهُمْ لَيْكُو دَوْل، النَّادُمْ الْخَلَّاهْ أَنْبَلَصْ دَا يُمُوتْ.» وَ بَعَدْ دَا، يَاهُو وَ يُنَدَابْ دَخَلَوْا فِي بَيْت الْعِبَادَةْ لِيِقَدُّمُوا ضَحَايَا مُحَرَّقِينْ وَ ضَحَايَا آخَرِينْ.

٢٥ وَ وَكِتْ قَدَّمَوْا ضَحَايَاهُمْ خَلَاصْ، يَاهُو قَالْ لِلْعَسْكَرْ وَ قُيَّادْهُمْ: «أَدْخُلُوا وَ أَكْتُلُوهُمْ! خَلِّي نَادُمْ وَاحِدْ كُلَ مَا يِعَرِّدْ.» وَ الْعَسْكَرْ دَخَلَوْا وَ كَتَلَوْهُمْ بِالْسَّيْف وَ خَمَّوْا الْجَنَازَاتْ وَ دَفَّقَوْهُمْ بَرَّا مِنْ الْحِلَّةْ. وَ بَعَدْ دَا، الْعَسْكَرْ مَشَوْا دَاخَلْ لَحَدِّي الْبَكَانْ الْخَاصّ الْقَاعِدْ فِي لُبّ بَيْت الْعِبَادَةْ هَنَا بَعَلْ. ٢٦ وَ الْحَجَرْ الْغَزَّوْه لِلْعِبَادَةْ، هُمَّنْ رَمَوْه وَ وَدَّوْه بَرَّا وَ تَشَّوْه فِي النَّارْ. ٢٧ وَ بَعَدْ مَرَقَوْا الْحَجَرْ دَا مِنْ بَيْت الْعِبَادَةْ، هَدَّمَوْا الْبَيْت ذَاتَهْ وَ الْبَكَانْ دَا، سَوَّوْه وَرَاءْ بَيْت عَامّ الْقَاعِدْ لَحَدِّي الْيَوْم. ٢٨ وَ بِمِثِلْ دَا بَسْ، يَاهُو قَشَّ إِلٰـهْ بَعَلْ مِنْ بَلَدْ إِسْرَائِيلْ.

حُكُم يَاهُو في إسرائيل

٢٩ وَ لَاكِنْ يَاهُو أَنْرَبَطْ فِي ذَنِبْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ وَ دَا عِبَادَةْ الْعَجَّالْ هَنَا الدَّهَبْ الْفِي بَيْت إِيلْ وَ حِلَّةْ دَانْ. ٣٠ وَ يَوْم وَاحِدْ، اللّٰهْ قَالْ لِيَاهُو: «أَشَانْ إِنْتَ سَوَّيْت الْعَدِيلْ قِدَّامِي وَ دَمَّرْت عَايِلَةْ أَخَابْ سَوَا سَوَا مِثِلْ أَنَا دَوَّرْتَهْ، أَوْلَادَكْ يَقْعُدُوا فِي كُرْسِي الْمُلُكْ فِي مَمْلَكَةْ إِسْرَائِيلْ لَحَدِّي الذُّرِّيَّةْ الرَّابْعَةْ.» ٣١ وَ لَاكِنْ يَاهُو مَا طَبَّقْ وَصَايَا اللّٰهْ إِلٰـهْ بَنِي إِسْرَائِيلْ بِكُلَّ قَلْبَهْ. وَ مَا خَلَّى مِنَّهْ نَفْس الذُّنُوبْ السَّوَّاهُمْ يَرُبَعَامْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.

٣٢ وَ فِي نَفْس الْوَكِتْ دَا بَسْ، اللّٰهْ بَدَا يَنْقُصْ مِنْ تُرَابْ مَمْلَكَةْ إِسْرَائِيلْ. حَزَيِيلْ مَلِكْ بَلَدْ أَرَامْ حَارَبَاهُمْ لِنَاسْ مَمْلَكَةْ إِسْرَائِيلْ فِي كُلَّ حُدُودْ بَلَدْهُمْ. ٣٣ وَ هُو شَالْ مِنْهُمْ الْمَنَاطِقْ الصَّبَاحْ لِبَحَرْ الْأُرْدُنْ وَ دَا تُرَابْ قِلْعَادْ وَ أَرْض قَبَايِلْ قَادْ وَ رَأُوبِينْ وَ مَنَسَّى. وَ دَا مِنْ حِلَّةْ عَرُوعِرْ الْقَاعِدَةْ فِي وَادِي أَرْنُونْ فِي الْوَطِي لَحَدِّي تُرَابْ قِلْعَادْ وَ بَاشَانْ فِي الْمُنْشَاقْ.

٣٤ وَ الْبَاقِي مِنْ عَمَلْ يَاهُو وَ كُلَّ شَيّءْ السَّوَّاهْ وَ فَرَاسِيّتَهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ. ٣٥ وَ يَاهُو مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ السَّامِرَةْ. وَ وِلَيْدَهْ يَهُوحَازْ حَكَمْ فِي بَدَلَهْ. ٣٦ وَ يَاهُو حَكَمْ 28 سَنَةْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ.