الكتاب الأول هنا
أخبار الأيّام
من كتب تاريخ بني إسرائيل
مقدمة
الكُتُب الإتْنَيْن هنا أخبار الأيّام، زمان همن كتاب واحِد بس و بعد دا، قسّموا كُتُب إتْنَيْن و سمّوهم الكتاب الأوّل هنا أخبار الأيّام و الكتاب التاني هنا أخبار الأيّام. و ليكْتِب الكتاب دا، الكاتِب أسْتعْمل كُتُب الجوا أوّل و همن دَوْل كتاب التكوين و 1 صَمُوِيل و 2 صَمُوِيل و الزَبُور. و في شان دا، آيات واحِدين مُتشابِهين.
و كتاب أخبار الأيّام دا يبْدا بقُرْمة هنا جُدود بني إسرائيل من آدَم لحدي وكت الناس الودّوهم في الغُرْبة في بَابِل قبّلوا في بلدهم. و بعد دا، الكتاب يحجّي بتاريخ بني إسرائيل قُبّال ما أنْقسموا ممالِك إتْنَيْن. يحجّي بمَوْت هنا الملك شَاوُول و درِّجين هنا الملك دَاوُد. و بتان، يحجّي بتاريخ حُكُم دَاوُد و ينْطي أسامَي هنا مسائيله و عسْكره و عياله. و دَاوُد سوّى شيّء كتير ليِنظِّم عِبادة اللّه. هو جاب صنْدوق مُعاهدة اللّه في مدينة القدس و نظّم خِدْمة رجال الدين و اللاوِيِّين و الغنّايين و حُرّاس البيبان. و في الأخير، جهّز كل شيّء الواجِب لبُنى بيت اللّه و كلّف بيه وِلَيْده سُلَيْمَان.