2 مُلوك 8

الملك قطع الشريعة للمرة

١ وَ يَوْم وَاحِدْ، أَلْيَسَعْ حَجَّى لِلْمَرَةْ الْأَوَّلْ حَيَّى لَيْهَا وِلَيْدهَا وَ قَالْ: «قُمِّي إِنْتِ وَ عَايِلِتْكِ وَ أَمْشِي أَلْجَأَيْ فِي الْبَكَانْ التَّقْدَرَوْا تِعِيشُوا فَوْقَهْ. أَشَانْ اللّٰهْ قَرَّرْ يِجِيبْ الْجُوعْ فِي الْبَلَدْ دِي وَ يَقْعُدْ مُدَّةْ سَبْعَةْ سَنَةْ.» ٢ وَ خَلَاصْ، الْمَرَةْ سَوَّتْ مِثِلْ نَبِي اللّٰهْ قَالَهْ لَيْهَا. هِي قَمَّتْ مَعَ عَايِلِتْهَا وَ مَشَتْ سَكَنَتْ سَبْعَةْ سَنَةْ فِي بَلَدْ الْفِلِسْطِيِّينْ.

٣ وَ بَعَدْ سَبْعَةْ سَنَةْ، الْمَرَةْ قَبَّلَتْ مِنْ بَلَدْ الْفِلِسْطِيِّينْ. وَ مَشَتْ بَكَانْ الْمَلِكْ لِتَطْلُبْ مِنَّهْ فَزَعْ فِي شَيّءْ الْبُخُصّ بَيْتهَا وَ زَرَعْهَا. ٤ وَ الْمَلِكْ قَاعِدْ يِحَجِّي مَعَ قِحَازِي خَدَّامْ نَبِي اللّٰهْ وَ هُو قَاعِدْ يَسْأَلَهْ وَ يُقُولْ لَيَّهْ: «أَوْرِينِي كُلَّ الْعَجَايِبْ الْكُبَارْ السَّوَّاهُمْ أَلْيَسَعْ.» ٥ وَ وَكِتْ قِحَازِي قَاعِدْ يِحَجِّي لِلْمَلِكْ بِكِكَّيْف أَلْيَسَعْ حَيَّى الْوِلَيْد الْمَاتْ، طَوَّالِي أَمّ الْوِلَيْد الْحِيِي جَاتْ لِتَطْلُبْ مِنْ الْمَلِكْ فَزَعْ فِي شَيّءْ الْبُخُصّ بَيْتهَا وَ زَرَعْهَا.

وَ قِحَازِي قَالْ لِلْمَلِكْ: «يَا سِيدِي الْمَلِكْ! دِي بَسْ الْمَرَةْ الْأَلْيَسَعْ حَيَّى لَيْهَا وِلَيْدهَا.» ٦ وَ الْمَلِكْ وَجَّهْ سُؤَالَاتْ لِلْمَرَةْ وَ هِي حَجَّتْ لَيَّهْ بِكُلَّ شَيّءْ الْكَانْ. وَ خَلَاصْ، الْمَلِكْ نَادَى وَاحِدْ مِنْ مَسَائِيلَهْ وَ قَالْ لَيَّهْ: «أَمْشِي قَبِّلْ كُلَّ خُمَامْ الْمَرَةْ دِي. وَ أَنْطِيهَا كُلَّ إِنْتَاجْ زَرَعْهَا مِنْ يَوْم الْهِي مَرَقَتْ مِنْ الْبَلَدْ لَحَدِّي الْيَوْم.»

أَلْيَسَع قال حَزَيِيل يبْقى ملك

٧ وَ يَوْم وَاحِدْ، أَلْيَسَعْ مَشَى مَدِينَةْ دِمَشْق وَ فِي الْوَكِتْ دَا، بَنْهَدَادْ مَلِكْ بَلَدْ أَرَامْ مَرْضَانْ. وَ وَكِتْ الْمَلِكْ سِمِعْ كَدَرْ نَبِي اللّٰهْ جَاءْ فِي الْمَدِينَةْ، ٨ قَالْ لِحَزَيِيلْ: «شِيلْ مَعَاكْ هَدِيَّةْ وَ وَدِّيهَا لِنَبِي اللّٰهْ. وَ أَطْلُبْ مِنَّهْ يَسْأَلْ اللّٰهْ أَشَانْ نَعَرِفْ كَنْ نَلْقَى الْعَافَيْ مِنْ مَرَضِي دَا وَلَّا لَا.»

٩ وَ خَلَاصْ، حَزَيِيلْ شَالْ هَدِيَّةْ مِنْ الْخُمَامْ الْأَحْسَنْ هَنَا دِمَشْق وَ شَدَّاهْ فِي 40 جُمَالْ وَ مَشَى لِأَلْيَسَعْ. وَ وَكِتْ وَصَّلْ بَكَانَهْ، وَقَفْ قِدَّامَهْ وَ قَالْ: «وِلَيْدَكْ بَنْهَدَادْ مَلِكْ أَرَامْ رَسَّلَانِي لَيْك وَ قَالْ: ‹أَنَا نَلْقَى الْعَافَيْ مِنْ مَرَضِي دَا وَلَّا لَا؟›» ١٠ وَ أَلْيَسَعْ رَدَّ لَيَّهْ وَ قَالْ: «أَمْشِي قُولْ لَيَّهْ هُو يَلْقَى الْعَافَيْ! وَ لَاكِنْ أَكِيدْ اللّٰهْ بَيَّنْ لَيِّ كَدَرْ هُو يُمُوتْ.»

١١ وَ فِي الْبَكَانْ دَا، أَلْيَسَعْ قَمَّ يِحَمِّرَهْ لِحَزَيِيلْ دَاخَلْ فِي عَيْنَهْ لَحَدِّي الْعَيْب سَوَّاهْ. وَ بَعَدْ دَا، نَبِي اللّٰهْ بَكَى. ١٢ وَ حَزَيِيلْ قَالْ: «مَالَا سَيِّدِي قَاعِدْ يَبْكِي؟» وَ أَلْيَسَعْ رَدَّ لَيَّهْ وَ قَالْ: «أَشَانْ أَنَا نَعَرِفْ الْفَسَالَةْ الْبَعَدَيْن إِنْتَ تِسَوِّيهَا لِبَنِي إِسْرَائِيلْ. تِتِشّ مُدُنْهُمْ الْقَوِيِّينْ وَ تَكْتُلْ صُبْيَانْهُمْ بِالْسَّيْف وَ تِدَمِّرْ عِيَالْهُمْ الدُّقَاقْ وَ تُشُقّ بُطُونْ عَوِينْهُمْ الْغَلْبَانَاتْ.» ١٣ وَ حَزَيِيلْ قَالْ لَيَّهْ: «وَ لَاكِنْ كِكَّيْف أَنَا عَبْدَكْ الْمِثِلْ الْكَلِبْ نَقْدَرْ نِسَوِّي شَيّءْ مِثِلْ دَا؟» وَ أَلْيَسَعْ رَدَّ لَيَّهْ وَ قَالْ: «اللّٰهْ بَيَّنْ لَيِّ كَدَرْ إِنْتَ تَبْقَى مَلِكْ فِي بَلَدْ أَرَامْ.»

١٤ وَ خَلَاصْ، حَزَيِيلْ خَلَّاهْ لِأَلْيَسَعْ وَ قَبَّلْ بَكَانْ سِيدَهْ. وَ سِيدَهْ سَأَلَهْ وَ قَالْ: «أَلْيَسَعْ قَالْ لَيْك شُنُو؟» وَ هُو رَدَّ لَيَّهْ وَ قَالْ: «هُو قَالْ لَيِّ أَكِيدْ إِنْتَ تَلْقَى الْعَافَيْ.»

١٥ وَ أَمْبَاكِرْ، حَزَيِيلْ بَلَّ غَطَّايْ وَ غَطَّى بَيْهَا وِجْه الْمَلِكْ وَ الْمَلِكْ مَاتْ. وَ حَزَيِيلْ حَكَمْ فِي بَدَلَهْ.

يَهُورَام بِقي ملك في يَهُوذَا

١٦ وَ فِي السَّنَةْ الْخَامْسَةْ هَنَا حُكُمْ يُورَامْ وِلَيْد أَخَابْ مَلِكْ مَمْلَكَةْ إِسْرَائِيلْ، يَهُورَامْ وِلَيْد يَهُوشَفَطْ بِقِي مَلِكْ فِي مَمْلَكَةْ يَهُوذَا. ١٧ وَ يَهُورَامْ عِنْدَهْ 32 سَنَةْ وَكِتْ بِقِي مَلِكْ وَ حَكَمْ 8 سَنَةْ فِي مَدِينَةْ الْقُدُسْ. ١٨ وَ هُو تَابَعْ دَرِبْ مُلُوكْ مَمْلَكَةْ إِسْرَائِيلْ مِثِلْ عَايِلَةْ أَخَابْ سَوَّتَهْ أَشَانْ هُو أَخَدْ بِنَيَّةْ أَخَابْ. وَ هُو سَوَّى الْفَسَالَةْ قِدَّامْ اللّٰهْ. ١٩ وَ بَيْدَا كُلَ، اللّٰهْ مَا دَوَّرْ يِدَمِّرْ مَمْلَكَةْ يَهُوذَا فِي شَانْ عَبْدَهْ دَاوُدْ. أَشَانْ هُو وَاعَدَهْ وَ قَالْ لَيَّهْ دَايْماً نَادُمْ وَاحِدْ مِنْ ذُرِّيّتَهْ يَقْعُدْ فِي الْمُلُكْ.

٢٠ وَ فِي حُكُمْ يَهُورَامْ مَلِكْ مَمْلَكَةْ يَهُوذَا، نَاسْ بَلَدْ أَدَوْم أَتْمَرَّدَوْا ضِدّ حُكْمَهْ وَ دَرَّجَوْا لَيْهُمْ مَلِكْ آخَرْ. ٢١ وَ يَهُورَامْ قَمَّ وَ مَشَى سَعِيرْ وَ شَالْ مَعَايَهْ كُلَّ عَرَبَاتَهْ هَنَا الْحَرِبْ لِيِحَارُبُوا الْأَدَوْمِيِّينْ. وَ بِاللَّيْل، الْأَدَوْمِيِّينْ حَوَّقَوْهُمْ وَ لَاكِنْ يَهُورَامْ وَ كُبَارَاتْ عَرَبَاتَهْ هَنَا الْحَرِبْ قَمَّوْا حَارَبَوْهُمْ. وَ لَاكِنْ عَسْكَرَهْ عَرَّدَوْا مَشَوْا بُيُوتْهُمْ. ٢٢ وَ التَّمَرُّدْ هَنَا بَلَدْ أَدَوْم ضِدّ حُكُمْ يَهُورَامْ قَاعِدْ لَحَدِّي الْيَوْم. وَ فِي الْوَكِتْ دَا، حِلَّةْ لِبْنَةْ كُلَ أَتْمَرَّدَتْ ضِدّ حُكْمَهْ.

٢٣ وَ الْبَاقِي مِنْ عَمَلْ يَهُورَامْ وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا. ٢٤ وَ يَهُورَامْ مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ. وَ وِلَيْدَهْ أَخَزْيَا حَكَمْ فِي بَدَلَهْ.

أَخَزْيَا بِقي ملك في يَهُوذَا

٢٥ وَ فِي سَنِةْ 12 هَنَا حُكُمْ يُورَامْ وِلَيْد أَخَابْ مَلِكْ مَمْلَكَةْ إِسْرَائِيلْ، أَخَزْيَا وِلَيْد يَهُورَامْ بِقِي مَلِكْ فِي مَمْلَكَةْ يَهُوذَا. ٢٦ وَ أَخَزْيَا عِنْدَهْ 22 سَنَةْ وَكِتْ بِقِي مَلِكْ وَ حَكَمْ سَنَةْ وَاحِدَةْ فِي مَدِينَةْ الْقُدُسْ. وَ أَمَّهْ أُسُمْهَا عَتَلْيَا مِنْ عَايِلَةْ عُمْرِي مَلِكْ مَمْلَكَةْ إِسْرَائِيلْ. ٢٧ وَ أَخَزْيَا تَابَعْ دَرِبْ عَايِلَةْ أَخَابْ وَ سَوَّى الْفَسَالَةْ قِدَّامْ اللّٰهْ مِثِلْ عَايِلَةْ أَخَابْ سَوَّتَهْ أَشَانْ هُو أَخَدْ مِنْ عَايِلَةْ أَخَابْ.

٢٨ وَ أَخَزْيَا مَشَى مَعَ يُورَامْ وِلَيْد أَخَابْ وَ حَارَبَوْه حَزَيِيلْ مَلِكْ أَرَامْ فِي حِلَّةْ رَامُوتْ الْفِي قِلْعَادْ. وَ الْأَرَامِيَّيْن جَرَحَوْه لِيُورَامْ. ٢٩ وَ الْمَلِكْ يُورَامْ قَبَّلْ فِي حِلَّةْ يَزْرَعِيلْ لِيِعَالِجْ الْجِرَاحْ الْجَرَحَوْه الْأَرَامِيَّيْن وَكِتْ قَاعِدْ يِحَارِبْ ضِدّ حَزَيِيلْ مَلِكْ أَرَامْ. وَ أَخَزْيَا وِلَيْد يَهُورَامْ مَلِكْ مَمْلَكَةْ يَهُوذَا مَشَى يِشِيفْ يُورَامْ وِلَيْد أَخَابْ أَشَانْ هُو تَعْبَانْ.