2 مُلوك 1

الكتاب التاني هنا

المُلوك

من كتب تاريخ بني إسرائيل

مرض الملك أَخَزْيَا

١ وَ بَعَدْ مَوْت أَخَابْ، بَلَدْ مُوَابْ أَتْمَرَّدَتْ ضِدّ بَنِي إِسْرَائِيلْ. ٢ وَ يَوْم وَاحِدْ فِي مَدِينَةْ السَّامِرَةْ، الْمَلِكْ أَخَزْيَا وَقَعْ مِنْ شُبَّاكْ قَصْرَهْ وَ تِعِبْ زِيَادَةْ. وَ خَلَاصْ، رَسَّلْ نَاسْ وَ قَالْ لَيْهُمْ: «أَمْشُوا أَسْأَلَوْا لَيِّ بَعَلْ زَبُوبْ إِلٰـهْ مَدِينَةْ عَقْرُونْ فِي بَلَدْ الْفِلِسْطِيِّينْ لِنَعَرِفْ كَنْ نَلْقَى الْعَافَيْ وَلَّا لَا.»

٣ وَ لَاكِنْ مَلَكْ اللّٰهْ جَاءْ لِلنَّبِي إِلِيَاسْ الْمِنْ التِّشْبِي وَ قَالْ لَيَّهْ: «قُمّ أَمْشِي قَابِلْ نَاسْ مَلِكْ مَمْلَكَةْ إِسْرَائِيلْ الرَّسَّلَاهُمْ مِنْ مَدِينَةْ السَّامِرَةْ وَ قُولْ لَيْهُمْ: ‹مَا فِي إِلٰـهْ فِي بَلَدْ إِسْرَائِيلْ وَلَّا؟ مَالَا إِنْتُو مَاشِينْ تَسْأَلَوْا بَعَلْ زَبُوبْ إِلٰـهْ مَدِينَةْ عَقْرُونْ؟ ٤ وَ فِي شَانْ دَا، دَاهُو اللّٰهْ قَالْ: ”السَّرِيرْ الْهُو رَاقِدْ فَوْقَهْ دَا مَا يُقُمّ مِنَّهْ أَشَانْ أَكِيدْ هُو يُمُوتْ.“›»

وَ بَعَدْ دَا، إِلِيَاسْ مَشَى وَ حَجَّى لَيْهُمْ. ٥ وَ طَوَّالِي، النَّاسْ الرَّسَّلَاهُمْ الْمَلِكْ قَبَّلَوْا جَوْا لَيَّهْ. وَ الْمَلِكْ سَأَلَاهُمْ وَ قَالْ: «مَالْكُو قَبَّلْتُوا عَجَلَةْ؟» ٦ وَ هُمَّنْ رَدَّوْا لَيَّهْ وَ قَالَوْا: «رَاجِلْ وَاحِدْ جَرَى لِحِقْنَا وَ قَالْ لَيْنَا: ‹عَجَلَةْ قَبُّلُوا لِمَلِكُّو الرَّسَّلَاكُو وَ قُولُوا لَيَّهْ: دَاهُو اللّٰهْ قَالْ: ”هَلْ مَا فِي إِلٰـهْ فِي بَلَدْ إِسْرَائِيلْ لَحَدِّي تِرَسِّلْ نَاسْ يَمْشُوا يَسْأَلَوْا بَعَلْ زَبُوبْ إِلٰـهْ مَدِينَةْ عَقْرُونْ وَلَّا؟ وَ بِسَبَبْ دَا، السَّرِيرْ الْإِنْتَ رَاقِدْ فَوْقَهْ دَا مَا تُقُمّ مِنَّهْ أَشَانْ أَكِيدْ إِنْتَ تُمُوتْ.“›»

٧ وَ الْمَلِكْ سَأَلَاهُمْ وَ قَالْ: «الرَّاجِلْ الْمَشَى لِحِقْكُو وَ قَالْ لَيْكُو الْكَلَامْ دَا، شَبَهَهْ كِكَّيْف؟» ٨ وَ هُمَّنْ رَدَّوْا وَ قَالَوْا لَيَّهْ: «الرَّاجِلْ دَا لَابِسْ خَلَقْ هَنَا صُوفْ وَ مُلْحَزِّمْ بِفَرْوَةْ.» وَ طَوَّالِي، الْمَلِكْ قَالْ: «دَا إِلِيَاسْ الْمِنْ حِلَّةْ تِشْبِي.»

أَخَزْيَا دوّر يكْرُب النبي إِلِيَاس

٩ وَ خَلَاصْ، الْمَلِكْ رَسَّلْ قَايِدْ بِخَمْسِينْ عَسْكَرْ لِيَكُرْبُوا إِلِيَاسْ. وَ إِلِيَاسْ قَاعِدْ فِي رَاسْ الْجَبَلْ فَوْق وَ الْقَايِدْ قَالْ لَيَّهْ: «يَا نَبِي اللّٰهْ! الْمَلِكْ بُقُولْ أَنْزِلْ!» ١٠ وَ لَاكِنْ إِلِيَاسْ قَالْ لِقَايِدْ الْخَمْسِينْ: «كَنْ أَنَا نَبِي اللّٰهْ، خَلِّي نَارْ تَنْزِلْ مِنْ السَّمَاءْ وَ تَاكُلَكْ إِنْتَ وَ عَسْكَرَكْ الْخَمْسِينْ.» وَ طَوَّالِي، نَارْ نَزَلَتْ مِنْ السَّمَاءْ وَ أَكَلَتْهُمْ هُو وَ عَسْكَرَهْ الْخَمْسِينْ.

١١ وَ بَتَّانْ كُلَ، الْمَلِكْ رَسَّلْ قَايِدْ آخَرْ بِخَمْسِينْ عَسْكَرْ لِيَكُرْبُوا إِلِيَاسْ. وَ الْقَايِدْ قَالْ لِإِلِيَاسْ: «يَا نَبِي اللّٰهْ! الْمَلِكْ بُقُولْ أَنْزِلْ عَجَلَةْ!» ١٢ وَ إِلِيَاسْ رَدَّ لَيَّهْ وَ قَالْ: «كَنْ أَنَا نَبِي اللّٰهْ، خَلِّي نَارْ تَنْزِلْ مِنْ السَّمَاءْ وَ تَاكُلَكْ إِنْتَ وَ عَسْكَرَكْ الْخَمْسِينْ.» وَ طَوَّالِي، نَارْ اللّٰهْ نَزَلَتْ مِنْ السَّمَاءْ وَ أَكَلَتْهُمْ هُو وَ عَسْكَرَهْ الْخَمْسِينْ.

١٣ وَ لِتَالِتْ مَرَّةْ بَتَّانْ، الْمَلِكْ رَسَّلْ قَايِدْ بِخَمْسِينْ عَسْكَرْ لِيَكُرْبُوا إِلِيَاسْ. وَ الْقَايِدْ التَّالِتْ دَا قَمَّ مَشَى وَ بَرَكْ قِدَّامْ إِلِيَاسْ وَ شَحَدَهْ وَ قَالْ: «يَا نَبِي اللّٰهْ! خَلِّي حَيَاتِي وَ حَيَاةْ خَدَّامِينَكْ الْخَمْسِينْ دَوْل تَبْقَى لَيْك مُهِمَّةْ. ١٤ وَ دَاهُو نَارْ نَزَلَتْ مِنْ السَّمَاءْ وَ أَكَلَتْ قُيَّادْ الْإِتْنَيْن الْأَوَّلَانِيِّينْ وَ عَسْكَرْهُمْ. وَ لَاكِنْ هَسَّعْ، خَلِّي حَيَاتِي تَبْقَى لَيْك مُهِمَّةْ.»

١٥ وَ فِي الْبَكَانْ دَا، مَلَكْ اللّٰهْ حَجَّى لِإِلِيَاسْ وَ قَالْ لَيَّهْ: «أَنْزِلْ وَ أَمْشِي مَعَايَهْ، مَا تَخَافْ مِنَّهْ.» وَ خَلَاصْ، إِلِيَاسْ نَزَلْ وَ مَشَى مَعَ الْقَايِدْ دَا بَكَانْ الْمَلِكْ.

١٦ وَ إِلِيَاسْ قَالْ لِلْمَلِكْ: «دَاهُو اللّٰهْ قَالْ: ‹هَلْ مَا فِي إِلٰـهْ فِي بَلَدْ بَنِي إِسْرَائِيلْ الْإِنْتَ تَقْدَرْ تَسْأَلَهْ وَلَّا؟ أَشَانْ إِنْتَ رَسَّلْت نَاسْ يَسْأَلَوْا لَيْك بَعَلْ زَبُوبْ إِلٰـهْ مَدِينَةْ عَقْرُونْ. وَ بِسَبَبْ دَا، السَّرِيرْ الْإِنْتَ رَاقِدْ فَوْقَهْ دَا مَا تُقُمّ مِنَّهْ أَشَانْ أَكِيدْ إِنْتَ تُمُوتْ.›»

مَوْت الملك أَخَزْيَا

١٧ وَ الْمَلِكْ أَخَزْيَا مَاتْ حَسَبْ كَلَامْ اللّٰهْ الْقَالَهْ النَّبِي إِلِيَاسْ. وَ أَخَزْيَا مَا عِنْدَهْ وِلَيْد. وَ بَيْدَا، أَخُوهْ يُورَامْ حَكَمْ فِي بَدَلَهْ فِي السَّنَةْ التَّانِيَةْ هَنَا حُكُمْ يَهُورَامْ وِلَيْد يَهُوشَفَطْ مَلِكْ مَمْلَكَةْ يَهُوذَا. ١٨ وَ الْبَاقِي مِنْ عَمَلْ أَخَزْيَا وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ.