1 مُلوك 22

أَخَاب دوّر يشيل حِلّة رَامُوت

١ وَ فِي مُدَّةْ تَلَاتَةْ سَنَةْ، مَا فِي حَرِبْ أَمْبَيْن الْأَرَامِيَّيْن وَ مَمْلَكَةْ إِسْرَائِيلْ. ٢ وَ فِي السَّنَةْ التَّالْتَةْ، يَهُوشَفَطْ مَلِكْ مَمْلَكَةْ يَهُوذَا جَاءْ لِمَلِكْ مَمْلَكَةْ إِسْرَائِيلْ. ٣ وَ مَلِكْ مَمْلَكَةْ إِسْرَائِيلْ قَالْ لِمَسَائِيلَهْ: «إِنْتُو تَعَرْفُوا كَدَرْ حِلَّةْ رَامُوتْ الْفِي قِلْعَادْ دِي هِنْتِنَا. وَ مَالَا مَا نَمْشُوا نِشِيلُوهَا مِنْ إِيدْ مَلِكْ الْأَرَامِيَّيْن؟» ٤ وَ الْمَلِكْ قَالْ لِيَهُوشَفَطْ: «هَلْ إِنْتَ كُلَ تَمْشِي مَعَايِ لِنَهْجُمُوا حِلَّةْ رَامُوتْ الْفِي قِلْعَادْ وَلَّا؟» وَ يَهُوشَفَطْ رَدَّ لِمَلِكْ مَمْلَكَةْ إِسْرَائِيلْ وَ قَالْ لَيَّهْ: «أَيْوَى، أَنَا وَ إِنْتَ كُلِّنَا سَوَا وَ شَعَبِي مِثِلْ شَعَبَكْ وَ خَيْلِي مِثِلْ خَيْلَكْ.» ٥ وَ لَاكِنْ يَهُوشَفَطْ قَالْ بَتَّانْ لِمَلِكْ مَمْلَكَةْ إِسْرَائِيلْ: «هَسَّعْ دَا مِنْ فَضْلَكْ، أَمْشِي أَسْأَلْ اللّٰهْ قَبُلْ.»

الأنبياء أتْنبّأوا بالنصُر

٦ وَ مَلِكْ مَمْلَكَةْ إِسْرَائِيلْ لَمَّ الْأَنْبِيَاء وَ عَدَدْهُمْ 400 رَاجِلْ وَ قَالْ لَيْهُمْ: «هَلْ نَمْشِي نَهْجِمْ حِلَّةْ رَامُوتْ الْفِي قِلْعَادْ وَلَّا مَا نَمْشِي؟» وَ هُمَّنْ رَدَّوْا لَيَّهْ وَ قَالَوْا: «أَمْشِي! الرَّبّ يِسَلِّمْهَا لَيْك فِي إِيدَكْ، يَا الْمَلِكْ!»

٧ وَ لَاكِنْ يَهُوشَفَطْ قَالْ: «هَلْ مَا فِي هِنِي نَبِي اللّٰهْ النَّقْدَرَوْا نَسْأَلَوْا بَيَّهْ اللّٰهْ وَلَّا؟» ٨ وَ مَلِكْ مَمْلَكَةْ إِسْرَائِيلْ قَالْ لِيَهُوشَفَطْ: «فِيَّهْ نَادُمْ وَاحِدْ الْيَقْدَرْ يَسْأَلْ لَيْنَا اللّٰهْ. وَ لَاكِنْ أَنَا نَكْرَهَهْ أَشَانْ هُو مَا يِتْنَبَّأْ بَيِّ بِالْخَيْر لَاكِنْ دَايْماً يِتْنَبَّأْ بَيِّ بِالْفَسَالَةْ. وَ النَّادُمْ دَا، هُو مِيكَا وِلَيْد يِمْلَا.» وَ يَهُوشَفَطْ قَالْ: «خَلِّي الْمَلِكْ مَا يِحَجِّي كَلَامْ مِثِلْ دَا!» ٩ وَ خَلَاصْ، الْمَلِكْ نَادَى وَاحِدْ مِنْ خَدَّامِينَهْ وَ قَالْ لَيَّهْ: «أَمْشِي عَجَلَةْ نَادِيهْ لِمِيكَا وِلَيْد يِمْلَا.»

١٠ وَ مَلِكْ مَمْلَكَةْ إِسْرَائِيلْ وَ يَهُوشَفَطْ مَلِكْ مَمْلَكَةْ يَهُوذَا أَيِّ وَاحِدْ لَابِسْ خَلَقَهْ هَنَا الْمُلُكْ وَ قَعَدَوْا فِي كَرَاسِيهُمْ فِي الْمَدَقّ جَنْب خَشُمْ بَابْ مَدِينَةْ السَّامِرَةْ. وَ كُلَّ الْأَنْبِيَاء قَاعِدِينْ يِتْنَبَّأَوْا قِدَّامْهُمْ. ١١ وَ وَاحِدْ مِنْ الْأَنْبِيَاء دَوْل أُسْمَهْ صِدْقِيَّا وِلَيْد كَنْعَانَا. هُو سَوَّى لَيَّهْ قُرُونْ هَنَا حَدِيدْ وَ قَالْ: «دَاهُو اللّٰهْ قَالْ: ‹بِالْقُرُونْ دَوْل تَضْرُبْ الْأَرَامِيَّيْن لَحَدِّي تِدَمِّرْهُمْ.›» ١٢ وَ كُلَّ الْأَنْبِيَاء يِتْنَبَّأَوْا بِنَفْس الْكَلَامْ وَ قَالَوْا: «أَمْشِي أَهْجِمْ حِلَّةْ رَامُوتْ الْفِي قِلْعَادْ وَ إِنْتَ تَنْجَحْ وَ اللّٰهْ يِسَلِّمْهَا لَيْك فِي إِيدَكْ، يَا الْمَلِكْ.»

النبي مِيكَا حجّى بالهزيمة

١٣ وَ الْمُرْسَالْ الْمَشَى يِنَادِيهْ لِمِيكَا قَالْ لَيَّهْ: «دَاهُو كُلَّ الْأَنْبِيَاء كَلَامْهُمْ وَاحِدْ وَ يِحَجُّوا بِالْخَيْر لِلْمَلِكْ. هَسَّعْ دَا، خَلِّي كَلَامَكْ إِنْتَ يَبْقَى سَوَا مَعَ كَلَامْهُمْ. إِنْتَ كُلَ حَجِّي بِالْخَيْر.» ١٤ وَ لَاكِنْ مِيكَا قَالْ لَيَّهْ: «نَحْلِفْ بِاللّٰهْ الْحَيّ كَدَرْ إِلَّا الْكَلَامْ الْقَالَهْ لَيِّ اللّٰهْ، دَا بَسْ نُقُولَهْ.»

١٥ وَ وَكِتْ وَصَّلْ بَكَانْ الْمَلِكْ، الْمَلِكْ قَالْ لَيَّهْ: «يَا مِيكَا، هَلْ نَمْشُوا نَهْجُمُوا حِلَّةْ رَامُوتْ الْفِي قِلْعَادْ وَلَّا مَا نَمْشُوا؟» وَ مِيكَا رَدَّ لَيَّهْ وَ قَالْ: «أَمْشِي! إِنْتَ تَنْجَحْ وَ اللّٰهْ يِسَلِّمْهَا لَيْك فِي إِيدَكْ، يَا الْمَلِكْ!» ١٦ وَ لَاكِنْ الْمَلِكْ قَالْ لَيَّهْ: «نَحَلِّفَكْ كَمْ مَرَّةْ لِتِأَوْرِينِي إِلَّا الْحَقّ بِأُسُمْ اللّٰهْ؟» ١٧ وَ مِيكَا رَدَّ لَيَّهْ وَ قَالْ: «أَنَا شِفْت كُلَّ بَنِي إِسْرَائِيلْ مُشَتَّتِينْ فِي الْجِبَالْ مِثِلْ غَنَمْ بَلَا رَاعِي. وَ اللّٰهْ قَالْ: ‹النَّاسْ دَوْل بَتَّانْ مَا عِنْدُهُمْ سِيدْ. خَلِّي أَيِّ وَاحِدْ يِقَبِّلْ بَيْتَهْ بِالسَّلَامَةْ.›»

١٨ وَ مَلِكْ مَمْلَكَةْ إِسْرَائِيلْ قَالْ لِيَهُوشَفَطْ: «أَنَا مَا قُلْت لَيْك كَدَرْ النَّادُمْ دَا مَا يِتْنَبَّأْ لَيِّ بِالْخَيْر لَاكِنْ يِتْنَبَّأْ لَيِّ بِالشَّرّ بَسْ.» ١٩ وَ خَلَاصْ، مِيكَا قَالْ لَيَّهْ: «هَسَّعْ دَا، أَسْمَعْ كَلَامْ اللّٰهْ! أَنَا شِفْت اللّٰهْ قَاعِدْ فِي عَرْشَهْ وَ كُلَّ قُوَّاتْ السَّمَاءْ وَاقْفِينْ جَنْبَهْ بِنُصَّهْ الزَّيْنَايْ وَ الْإِسْرَايْ. ٢٠ وَ اللّٰهْ سَأَلَاهُمْ وَ قَالْ: ‹يَاتُو يَقْدَرْ يُغُشّ الْمَلِكْ أَخَابْ لِيَمْشِي يَهْجِمْ حِلَّةْ رَامُوتْ الْفِي قِلْعَادْ وَ يُمُوتْ هِنَاكْ؟› وَ أَيِّ وَاحِدْ يِحَجِّي كَلَامْ شِقْ. ٢١ وَ خَلَاصْ فِي الْبَكَانْ دَا، رُوحْ وَاحِدْ جَاءْ قِدَّامْ اللّٰهْ وَ قَالْ: ‹أَنَا بَسْ نُغُشَّهْ.› وَ اللّٰهْ قَالْ لَيَّهْ: ‹بِطَرِيقَةْ الْوَيْنِي؟› ٢٢ وَ الرُّوحْ قَالْ: ‹أَنَا نَمْشِي وَ نَبْقَى رُوحْ الْكَدَّابْ فِي خُشُومْ كُلَّ أَنْبِيَاء الْمَلِكْ.› وَ اللّٰهْ قَالْ لَيَّهْ: ‹أَكِيدْ، مِثِلْ كَيْ تَقْدَرْ تُغُشَّهْ وَ تَنْجَحْ. أَمْشِي وَ سَوِّي مِثِلْ إِنْتَ قُلْتَهْ.›» ٢٣ وَ مِيكَا قَالْ: «دَاهُو اللّٰهْ بَسْ رَسَّلْ رُوحْ الْكَدَّابْ فِي خُشُومْ أَنْبِيَائَكْ وَ هُو بَسْ قَرَّرْ يِرَسِّلْ لَيْك الشَّرّ دَا.»

٢٤ وَ طَوَّالِي فِي الْبَكَانْ دَا، صِدْقِيَّا وِلَيْد كَنْعَانَا قَرَّبْ لِمِيكَا وَ شَدَّقَهْ وَ قَالْ لَيَّهْ: «كِكَّيْف رُوحْ اللّٰهْ مَرَقْ مِنِّي وَ حَجَّى لَيْك؟» ٢٥ وَ مِيكَا قَالْ لَيَّهْ: «تِشِيفَهْ يَوْم تَمْشِي تِلَّبَّدْ مِنْ غُرْفَةْ لِغُرْفَةْ فِي بَيْتَكْ.»

٢٦ وَ مَلِكْ مَمْلَكَةْ إِسْرَائِيلْ قَالْ: «أَكُرْبُوهْ لِمِيكَا وَ قَبُّلُوهْ بَكَانْ آمُونْ حَاكِمْ الْمَدِينَةْ وَ يُوَاشْ وِلَيْد الْمَلِكْ. ٢٧ وَ قُولُوا لَيْهُمْ: ‹دَاهُو كَلَامْ الْمَلِكْ هُو قَالْ: ”دِسُّوا النَّادُمْ دَا فِي السِّجِنْ وَ أَنْطُوهْ خُبْزَةْ وَ أَلْمِي شِيَّةْ شِيَّةْ بَسْ لَحَدِّي أَنَا نِقَبِّلْ بِالصِّحَّةْ وَ السَّلَامَةْ.“›» ٢٨ وَ مِيكَا قَالْ لِلْمَلِكْ: «كَنْ صَحِيحْ كَيْ إِنْتَ بَسْ قَبَّلْت بِصِحَّةْ وَ سَلَامَةْ دَا، اللّٰهْ مَا حَجَّى كَلَامَهْ لَيِّ أَنَا.» وَ قَالْ بَتَّانْ: «أَسْمَعَوْا، يَا كُلَّ الشَّعَبْ.»

الملك أَخَاب كتلوه في الدواس

٢٩ وَ مَلِكْ مَمْلَكَةْ إِسْرَائِيلْ وَ يَهُوشَفَطْ مَلِكْ مَمْلَكَةْ يَهُوذَا مَشَوْا لِيَهْجُمُوا حِلَّةْ رَامُوتْ الْفِي قِلْعَادْ. ٣٠ وَ مَلِكْ مَمْلَكَةْ إِسْرَائِيلْ قَالْ لِيَهُوشَفَطْ: «أَنَا نِغَيِّرْ خُلْقَانِي هَنَا الْمُلُكْ وَ نَمْشِي الدُّوَاسْ. وَ إِنْتَ كَمَانْ، أَقْعُدْ بِخُلْقَانَكْ هَنَا الْمُلُكْ.» وَ خَلَاصْ، مَلِكْ مَمْلَكَةْ إِسْرَائِيلْ غَيَّرْ خُلْقَانَهْ وَ مَشَى الدُّوَاسْ.

٣١ وَ مَلِكْ بَلَدْ أَرَامْ أَنْطَى أَمُرْ لِـ‍ 32 مِنْ كُبَارَاتْ عَرَبَاتَهْ هَنَا الْحَرِبْ وَ قَالْ لَيْهُمْ: «مَا تَهْجُمُوا الْعَسْكَرْ وَ لَا كُبَارَاتْهُمْ لَاكِنْ أَهْجُمُوا مَلِكْ مَمْلَكَةْ إِسْرَائِيلْ.» ٣٢ وَ وَكِتْ كُبَارَاتْ عَرَبَاتَهْ شَافَوْه لِيَهُوشَفَطْ، قَالَوْا: «أَكِيدْ، هُو دَا بَسْ مَلِكْ مَمْلَكَةْ إِسْرَائِيلْ.» وَ هُمَّنْ وَجَّهَوْا عَلَيَّهْ لِيِحَارُبُوهْ وَ لَاكِنْ يَهُوشَفَطْ كَوْرَكْ. ٣٣ وَ وَكِتْ كُبَارَاتْ الْعَرَبَاتْ عِرْفَوْا كَدَرْ دَا مَا مَلِكْ مَمْلَكَةْ إِسْرَائِيلْ، هُمَّنْ قَبَّلَوْا مِنْ وَرَايَهْ. ٣٤ وَ لَاكِنْ نَادُمْ وَاحِدْ زَرَقْ نُشَّابَهْ بَلَا هَدَفْ وَ النُّشَّابْ دَا لِحِقْ مَلِكْ مَمْلَكَةْ إِسْرَائِيلْ وَ ضَرَبَهْ أَمْبَيْن فَرَقَاتْ الدِّرِعْ. وَ طَوَّالِي، مَلِكْ مَمْلَكَةْ إِسْرَائِيلْ صَرَخْ لِسَوَّاقْ عَرَبَتَهْ وَ قَالْ: «قَبِّلْ! أَمْرُقْنِي مِنْ بَكَانْ الْحَرِبْ أَشَانْ أَنَا أَنْجَرَحْت.»

٣٥ وَ فِي الْيَوْم دَا، الْحَرِبْ بِقِي شَدِيدْ مَرَّةْ وَاحِدْ وَ الْمَلِكْ قَعَدْ فِي لُبّ عَرَبَتَهْ قِدَّامْ الْأَرَامِيَّيْن. وَ دَمّ جِرَاحَهْ دَا جَرَى فِي قَعَرْ الْعَرَبَةْ. وَ كَدَرْ لِلْعَشِيَّةْ دَا هُو مَاتْ. ٣٦ وَ مَعَ وَقُوعْ الْحَرَّايْ، الْعَسْكَرْ كَوْرَكَوْا فِي الْمُعَسْكَرْ وَ قَالَوْا: «خَلِّي أَيِّ وَاحِدْ يَمْشِي لِحِلِّتَهْ وَ لِبَلَدَهْ.»

٣٧ وَ بِمِثِلْ دَا، الْمَلِكْ مَاتْ وَ جَابَوْه فِي السَّامِرَةْ وَ دَفَنَوْه فَوْقهَا. ٣٨ وَ وَكِتْ غَسَّلَوْا الْعَرَبَةْ فِي الرِّجِلْ هَنَا السَّامِرَةْ فِي الْبَكَانْ الْيِلْبَرَّدَنْ فَوْقَهْ الشَّرَامِيطْ، الْكُلابْ لِحْسَوْا دَمّ أَخَابْ دَا حَسَبْ كَلَامْ اللّٰهْ الْقَالَهْ.

٣٩ وَ الْبَاقِي مِنْ عَمَلْ أَخَابْ وَ كُلَّ شَيّءْ السَّوَّاهْ وَ الْبَيْت هَنَا الْعَاجْ وَ الْحِلَّالْ الْبَنَاهُمْ، كُلَّ الشَّيّءْ دَا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ. ٤٠ وَ أَخَابْ مَاتْ وَ لِحِقْ أَبَّهَاتَهْ. وَ وِلَيْدَهْ أَخَزْيَا حَكَمْ فِي بَدَلَهْ.

يَهُوشَفَط بِقي ملك في يَهُوذَا

٤١ وَ فِي السَّنَةْ الرَّابْعَةْ هَنَا حُكُمْ أَخَابْ مَلِكْ مَمْلَكَةْ إِسْرَائِيلْ، يَهُوشَفَطْ وِلَيْد آسَا بِقِي مَلِكْ فِي مَمْلَكَةْ يَهُوذَا. ٤٢ وَ هُو عِنْدَهْ 35 سَنَةْ وَكِتْ بِقِي مَلِكْ وَ حَكَمْ 25 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا عَزُوبَةْ بِنَيَّةْ شِلْحِي. ٤٣ وَ يَهُوشَفَطْ تَابَعْ دَرِبْ أَبُوهْ آسَا وَ مَا بَارَى مِنَّهْ. وَ سَوَّى الْعَدِيلْ قِدَّامْ اللّٰهْ. وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ وَ فَوْقهُمْ، الشَّعَبْ يِقَدُّمُوا ضَحَايَا وَ يِحَرُّقُوا بَخُورْ. ٤٤ وَ يَهُوشَفَطْ سَوَّى سَلَامْ مَعَ مَلِكْ مَمْلَكَةْ إِسْرَائِيلْ.

٤٥ وَ الْبَاقِي مِنْ عَمَلْ يَهُوشَفَطْ وَ فَرَاسِيّتَهْ وَ الْحُرُوبْ السَّوَّاهُمْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا. ٤٦ وَ هُو قَشَّ النَّاسْ الْبِسَوُّوا الشَّرْمَطَةْ فِي الْبَكَانَاتْ الْعَالِيِينْ هَنَا عِبَادَةْ الْأَصْنَامْ الْفَضَّلَوْا فِي الْبَلَدْ مِنْ وَكِتْ أَبُوهْ آسَا.

٤٧ وَ فِي الْوَكِتْ دَا، مَا فِي مَلِكْ فِي بَلَدْ أَدَوْم وَ لَاكِنْ مُمَثِّلْ هَنَا الْمَلِكْ بَسْ قَاعِدْ.

٤٨ وَ يَهُوشَفَطْ عَدَّلْ سُفُنْ كُبَارْ هَنَا التِّجَارَةْ الْيَمْشُوا لِأُفِيرْ يَنْقُلُوا دَهَبْ. وَ لَاكِنْ السُّفُنْ دَوْل مَا قِدْرَوْا مَشَوْا أَشَانْ هُمَّنْ أَلْكَسَّرَوْا فِي حِلَّةْ عَصْيُونْ قِيبَرْ. ٤٩ وَ خَلَاصْ، أَخَزْيَا وِلَيْد أَخَابْ قَالْ لِيَهُوشَفَطْ: «خَلِّي خَدَّامِينِي يَمْشُوا مَعَ خَدَّامِينَكْ فِي السُّفُنْ.» وَ لَاكِنْ يَهُوشَفَطْ أَبَى.

٥٠ وَ يَهُوشَفَطْ مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ جِدَّهْ. وَ وِلَيْدَهْ يَهُورَامْ حَكَمْ فِي بَدَلَهْ.

٥١ وَ فِي سَنِةْ 17 هَنَا حُكُمْ يَهُوشَفَطْ مَلِكْ مَمْلَكَةْ يَهُوذَا، أَخَزْيَا وِلَيْد أَخَابْ بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. وَ هُو حَكَمْ سَنْتَيْن فِي مَمْلَكَةْ إِسْرَائِيلْ. ٥٢ وَ هُو سَوَّى الْفَسَالَةْ قِدَّامْ اللّٰهْ وَ تَابَعْ دَرِبْ أَمَّهْ وَ أَبُوهْ وَ دَرِبْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ. ٥٣ وَ هُو عَبَدْ الْإِلٰـهْ بَعَلْ وَ سَجَدْ لَيَّهْ. وَ بَيْدَا، هُو غَضَّبْ اللّٰهْ إِلٰـهْ بَنِي إِسْرَائِيلْ مِثِلْ أَبُوهْ سَوَّاهْ.