1 مُلوك 21

أَخَاب كتل نَابُوت

١ وَ بَعَدْ دَا، فِي شَيّءْ آخَرْ كُلَ حَصَلْ. فِيَّهْ نَادُمْ وَاحِدْ أُسْمَهْ نَابُوتْ. هُو مِنْ حِلَّةْ يَزْرَعِيلْ وَ عِنْدَهْ جِنَيْنَةْ عِنَبْ فِي يَزْرَعِيلْ جَنْب قَصِرْ أَخَابْ مَلِكْ السَّامِرَةْ. ٢ وَ يَوْم وَاحِدْ، أَخَابْ مَلِكْ مَمْلَكَةْ إِسْرَائِيلْ قَالْ لِنَابُوتْ: «أَنْطِينِي جِنَيْنِتَكْ وَ نَحْرِتْ فَوْقهَا خَضَارْ أَشَانْ هِي قَرِيبَةْ لِبَيْتِي. وَ أَنَا نَنْطِيكْ جِنَيْنَةْ آخَرَةْ الْأَحْسَنْ مِنْ دِي. وَ لَاكِنْ كَنْ إِنْتَ تِدَوْر تَمَنْهَا، نَنْطِيكْ فُضَّةْ.» ٣ وَ نَابُوتْ رَدَّ لِأَخَابْ وَ قَالْ: «إِسْتَغْفَرْ اللّٰهْ! أَبَداً مَا نَنْطِيكْ الْجِنَيْنَةْ الْأَنَا لِقِيتْهَا وَرَثَةْ مِنْ جُدُودِي.»

٤ وَ أَخَابْ قَبَّلْ بَيْتَهْ زَعْلَانْ وَ عِنْدَهْ هَمّ أَشَانْ الْكَلَامْ النَّابُوتْ الْمِنْ حِلَّةْ يَزْرَعِيلْ قَالَهْ لَيَّهْ: «أَنَا مَا نَنْطِيكْ الْجِنَيْنَةْ اللِّقِيتْهَا وَرَثَةْ مِنْ جُدُودِي.» هُو مَشَى رَقَدْ فِي سَرِيرَهْ وَ وَجَّهْ عَلَيْ الدُّرْدُرْ وَ أَبَى مَا يَاكُلْ شَيّءْ.

٥ وَ فِي الْبَكَانْ دَا، مَرْتَهْ إِزَبِيلْ جَاتْ لِقَتَهْ وَ سَأَلَتَهْ: «مَالَكْ إِنْتَ زَعْلَانْ كَيْ وَ مَا تِدَوْر تَاكُلْ؟» ٦ وَ أَخَابْ رَدَّ لَيْهَا وَ قَالْ: «أَنَا حَجَّيْت لِنَابُوتْ الْمِنْ حِلَّةْ يَزْرَعِيلْ وَ قُلْت لَيَّهْ: ‹بِيعْ لَيِّ جِنَيْنِتَكْ هَنَا الْعِنَبْ وَ كَنْ مَا فِي كَمَانْ، نِبَدِّلْهَا لَيْك بِجِنَيْنَةْ آخَرَةْ.› وَ لَاكِنْ هُو قَالْ لَيِّ: ‹أَنَا مَا نَنْطِيكْ جِنَيْنِتِي.›» ٧ وَ خَلَاصْ، إِزَبِيلْ مَرْتَهْ قَالَتْ لَيَّهْ: «هَلْ دَا مَا إِنْتَ بَسْ الْقَاعِدْ تَحْكِمْ فِي مَمْلَكَةْ إِسْرَائِيلْ وَلَّا؟ قُمّ آكُلْ وَ أَفْرَحْ. وَ أَنَا نَنْطِيكْ جِنَيْنَةْ نَابُوتْ الْمِنْ حِلَّةْ يَزْرَعِيلْ.»

٨ وَ هِي قَمَّتْ كَتَبَتْ جَوَابَاتْ بِأُسُمْ أَخَابْ وَ خَتَمَتْهُمْ بِخِتْمَهْ. وَ رَسَّلَتْ الْجَوَابَاتْ دَوْل لِلْكُبَارَاتْ وَ الشُّيُوخْ السَّاكْنِينْ مَعَ نَابُوتْ فِي حِلِّتَهْ. ٩ وَ فِي الْجَوَابَاتْ دَوْل، هِي كَتَبَتْ قَالَتْ: «قَرُّرُوا يَوْم هَنَا صِيَامْ وَ خُطُّوهْ لِنَابُوتْ قِدَّامْ الشَّعَبْ. ١٠ وَ خُطُّوا نَاسَيْن الْمَا نَافْعِينْ مُقَابِلِينَهْ وَ خَلِّي يَشْهَدَوْا فَوْقَهْ وَ يُقُولُوا: ‹هُو عَيَّرْ الرَّبّ وَ الْمَلِكْ.› وَ بَعَدْ دَا، أَمُرْقُوهْ بَرَّا مِنْ الْحِلَّةْ وَ أَرْجُمُوهْ لَحَدِّي يُمُوتْ.»

١١ وَ الْكُبَارَاتْ وَ الشُّيُوخْ السَّاكْنِينْ فِي حِلَّةْ يَزْرَعِيلْ سَوَّوْا كُلَّ شَيّءْ الْإِزَبِيلْ أَمَرَتْ بَيَّهْ فِي جَوَابَاتْهَا الرَّسَّلَتْهُمْ لَيْهُمْ. ١٢ وَ خَلَاصْ، هُمَّنْ قَرَّرَوْا يَوْم هَنَا صِيَامْ وَ خَطَّوْه لِنَابُوتْ قِدَّامْ الشَّعَبْ ١٣ وَ النَّاسَيْن الْمَا نَافْعِينْ جَوْا قَابَلَوْه. وَ هُمَّنْ قَمَّوْا يَشْهَدَوْا فِي نَابُوتْ قِدَّامْ الشَّعَبْ وَ قَالَوْا: «نَابُوتْ عَيَّرْ الرَّبّ وَ الْمَلِكْ.» وَ خَلَاصْ، قَمَّوْا مَرَقَوْه بَرَّا مِنْ الْحِلَّةْ وَ رَجَمَوْه لَحَدِّي هُو مَاتْ. ١٤ وَ رَسَّلَوْا لِإِزَبِيلْ وَ قَالَوْا لَيْهَا: «نَابُوتْ رَجَمَوْه وَ مَاتْ خَلَاصْ.»

١٥ وَ وَكِتْ إِزَبِيلْ سِمْعَتْ كَدَرْ نَابُوتْ رَجَمَوْه وَ مَاتْ، خَلَاصْ هِي قَالَتْ لِأَخَابْ: «قُمّ وَ شِيلْ جِنَيْنَةْ نَابُوتْ الْمِنْ حِلَّةْ يَزْرَعِيلْ هُو الْأَبَى مَا يَنْطِيهَا لَيْك بِفُضِّتَكْ أَشَانْ هُو فَارَقْ الْحَيَاةْ وَ مَاتْ خَلَاصْ.» ١٦ وَ وَكِتْ أَخَابْ سِمِعْ كَدَرْ نَابُوتْ مَاتْ، قَمَّ وَ مَشَى فِي جِنَيْنَةْ نَابُوتْ الْمِنْ حِلَّةْ يَزْرَعِيلْ لِيِشِيلْهَا.

١٧ وَ خَلَاصْ، اللّٰهْ حَجَّى لِإِلِيَاسْ الْمِنْ حِلَّةْ تِشْبِي وَ قَالْ: ١٨ «قُمّ أَمْشِي أَلْقَاهْ لِأَخَابْ مَلِكْ مَمْلَكَةْ إِسْرَائِيلْ الْقَاعِدْ فِي السَّامِرَةْ. هَسَّعْ هُو قَاعِدْ فِي جِنَيْنَةْ نَابُوتْ، مَشَى أَشَانْ يِشِيلْ الْجِنَيْنَةْ دِي. ١٩ أَمْشِي وَ قُولْ لَيَّهْ: ‹دَاهُو اللّٰهْ قَالْ: ”بَعَدْ كَتَلْت نَابُوتْ، بَتَّانْ تِدَوْر تِشِيلْ جِنَيْنِتَهْ وَلَّا؟“› وَ قُولْ لَيَّهْ بَتَّانْ: ‹دَاهُو اللّٰهْ قَالْ: ”فِي نَفْس الْبَكَانْ الْفَوْقَهْ الْكُلابْ لِحْسَوْا دَمّ نَابُوتْ، إِنْتَ كُلَ الْكُلابْ يَلْحَسَوْا دَمَّكْ.“›»

٢٠ وَ أَخَابْ قَالْ لِإِلِيَاسْ: «إِنْتَ جِيتْ لِقِيتْنِي وَلَّا، يَا عَدُويِ؟» وَ إِلِيَاسْ قَالْ لَيَّهْ: «أَيْوَى! أَنَا جِيتْ لِقِيتَكْ أَشَانْ إِنْتَ شِلْت نِيَّةْ تِسَوِّي الْفَسَالَةْ قِدَّامْ اللّٰهْ. ٢١ وَ دَاهُو اللّٰهْ قَالْ: ‹أَنَا نِنَزِّلْ فَوْقَكْ شَرّ وَ نُقُشَّكْ إِنْتَ وَ كُلَّ عَايِلْتَكْ مِنْ وِجْه الْأَرْض. وَ نِدَمِّرْ كُلَّ الرُّجَالْ مِنْ عَايِلْتَكْ كَنْ عَبِيدْ وَلَّا حُرِّينْ كُلَ فِي لُبّ بَنِي إِسْرَائِيلْ. ٢٢ وَ نِسَوِّي عَايِلْتَكْ تَبْقَى مِثِلْ عَايِلَةْ يَرُبَعَامْ وِلَيْد نَبَاتْ وَ مِثِلْ عَايِلَةْ بَعَاشَى وِلَيْد أَخِيَّا فِي شَانْ الْغَضَبْ الْغَضَّبْتِنِي وَ لَزَّيْت نَاسْ مَمْلَكَةْ إِسْرَائِيلْ فِي الذُّنُوبْ.› ٢٣ وَ اللّٰهْ حَجَّى بَتَّانْ فِي الشَّيّءْ الْبُخُصّ إِزَبِيلْ وَ قَالْ: ‹الْكُلابْ يَاكُلُوهَا لِإِزَبِيلْ فِي قَعَرْ الدُّرْدُرْ هَنَا حِلَّةْ يَزْرَعِيلْ. ٢٤ وَ أَيِّ نَادُمْ مِنْ عَايِلَةْ أَخَابْ الْيُمُوتْ فِي لُبّ الْحِلَّةْ، الْكُلابْ يَاكُلُوهْ. وَ الْيُمُوتْ فِي الْكَدَادَةْ، طُيُورْ السَّمَاءْ يَاكُلُوهْ.›»

٢٥ وَ أَبَداً مَا فِي نَادُمْ مِثِلْ أَخَابْ الشَّالْ نِيَّةْ وَ سَوَّى الْفَسَالَةْ قِدَّامْ اللّٰهْ. وَ مَرْتَهْ إِزَبِيلْ كُلَ قَاعِدَةْ تِلِزَّهْ. ٢٦ هُو سَوَّى شَيّءْ مُحَرَّمْ، تَابَعْ الْأَصْنَامْ مِثِلْ سَوَّوْه الْأَمُورِيِّينْ هُمَّنْ الْاللّٰهْ قَلَعْ مِنْهُمْ أَرْضُهُمْ وَ أَنْطَاهَا لِبَنِي إِسْرَائِيلْ.

٢٧ وَ وَكِتْ أَخَابْ سِمِعْ الْكَلَامْ دَا، شَرَّطْ خُلْقَانَهْ وَ لِبِسْ خَلَقْ هَنَا تَوْبَةْ وَ صَامْ. وَ هُو يُنُومْ وَ يُقُمّ بِخَلَقْ التَّوْبَةْ دَا وَ يُرُوغْ بِشَيْش بِشَيْش. ٢٨ وَ خَلَاصْ، اللّٰهْ حَجَّى لِإِلِيَاسْ الْمِنْ حِلَّةْ تِشْبِي وَ قَالْ: ٢٩ «هَلْ شِفْت كِكَّيْف أَخَابْ أَلْمَسْكَنْ قِدَّامِي؟ وَ أَشَانْ دَا، أَنَا مَا نِنَزِّلْ الشَّرّ دَا فِي وَكِتْ حُكْمَهْ. لَاكِنْ نِنَزِّلْ الشَّرّ دَا فِي عَايِلْتَهْ فِي وَكِتْ حُكُمْ وِلَيْدَهْ.»