1 مُلوك 16

١ وَ اللّٰهْ حَجَّى لِلنَّبِي يَاهُو وِلَيْد حَنَانِي كَلَامْ بُخُصّ الْمَلِكْ بَعَاشَى وَ قَالْ: ٢ «إِنْتَ الْمَا تِسَاوِي شَيّءْ كُلَ، أَنَا دَرَّجْتَكْ وَ سَوَّيْتَكْ كَبِيرْ هَنَا شَعَبِي بَنِي إِسْرَائِيلْ. وَ لَاكِنْ إِنْتَ تَابَعْت دَرِبْ يَرُبَعَامْ وَ لَزَّيْت شَعَبِي بَنِي إِسْرَائِيلْ فِي الذُّنُوبْ وَ بِذُنُوبْهُمْ دَا، هُمَّنْ غَضَّبَوْنِي. ٣ وَ هَسَّعْ دَا، أَنَا نُقُشَّكْ إِنْتَ وَ عَايِلْتَكْ. وَ عَايِلْتَكْ تَبْقَى مِثِلْ عَايِلَةْ يَرُبَعَامْ وِلَيْد نَبَاتْ. ٤ وَ أَيِّ نَادُمْ مِنْ عَايِلَةْ بَعَاشَى الْيُمُوتْ فِي لُبّ الْحِلَّةْ، الْكُلابْ يَاكُلُوهْ. وَ الْيُمُوتْ فِي الْكَدَادَةْ، طُيُورْ السَّمَاءْ يَاكُلُوهْ.»

٥ وَ الْبَاقِي مِنْ عَمَلْ بَعَاشَى وَ كُلَّ شَيّءْ السَّوَّاهْ وَ فَرَاسِيّتَهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ. ٦ وَ بَعَاشَى مَاتْ وَ لِحِقْ أَبَّهَاتَهْ وَ دَفَنَوْه فِي حِلَّةْ تِرْصَةْ. وَ وِلَيْدَهْ إِيلَى حَكَمْ فِي بَدَلَهْ.

٧ وَ اللّٰهْ حَجَّى بِوَاسِطَةْ النَّبِي يَاهُو وِلَيْد حَنَانِي لِبَعَاشَى وَ عَايِلْتَهْ بِسَبَبْ كُلَّ الْفَسَالَةْ الْغَضَّبَوْا بَيْهَا اللّٰهْ وَ الْأَشْيَاءْ السَّوَّوْهُمْ بِإِيدْهُمْ لِيَبْقَوْا سَوَا سَوَا مِثِلْ يَرُبَعَامْ وَ عَايِلْتَهْ. وَ أَشَانْ بَعَاشَى دَمَّرْ عَايِلَةْ يَرُبَعَامْ.

إِيلَى بِقي ملك في إسرائيل

٨ وَ فِي سَنِةْ 26 هَنَا حُكُمْ آسَا مَلِكْ مَمْلَكَةْ يَهُوذَا، إِيلَى وِلَيْد بَعَاشَى بِقِي مَلِكْ فِي مَمْلَكَةْ إِسْرَائِيلْ فِي حِلَّةْ تِرْصَةْ. وَ حَكَمْ سَنْتَيْن. ٩ وَ وَاحِدْ مِنْ مَسَائِيلَهْ الْأُسْمَهْ زِمْرِي أَتْمَرَّدْ ضِدَّهْ. وَ هُو دَا قَايِدْ دَيْش إِيلَى الْعِنْدَهْ مَسْؤُولِيَّةْ فِي نُصّ مِنْ عَرَبَاتْ الْحَرِبْ. وَ وَكِتْ إِيلَى قَاعِدْ يَشْرَبْ وَ يَسْكَرْ فِي تِرْصَةْ فِي بَيْت أَرْصَا الْهُو مَسْؤُولْ فِي قَصِرْ الْمَلِكْ، ١٠ زِمْرِي دَخَلْ لَيَّهْ وَ ضَرَبَهْ وَ كَتَلَهْ. وَ دَا فِي سَنِةْ 27 هَنَا حُكُمْ آسَا مَلِكْ مَمْلَكَةْ يَهُوذَا. وَ زِمْرِي حَكَمْ فِي بَدَلْ إِيلَى. ١١ وَ مِنْ قَعَدْ فِي كُرْسِي الْمُلُكْ، كَتَلْ كُلَّ عَايِلَةْ بَعَاشَى. مَا خَلَّى نَادُمْ وَاحِدْ كُلَ مِنْ الدُّكُورَةْ وَ لَا مِنْ عَايِلْتَهْ وَ لَا مِنْ رُفْقَانَهْ. ١٢ وَ حَسَبْ كَلَامْ اللّٰهْ الْقَالَهْ ضِدّ بَعَاشَى بِوَاسِطَةْ النَّبِي يَاهُو، زِمْرِي دَمَّرْ كُلَّ عَايِلَةْ بَعَاشَى. ١٣ وَ دَا بِسَبَبْ كُلَّ ذُنُوبْ بَعَاشَى وَ وِلَيْدَهْ إِيلَى. هُمَّنْ أَذْنَبَوْا وَ لَزَّوْا نَاسْ مَمْلَكَةْ إِسْرَائِيلْ فِي الذُّنُوبْ. وَ بَيْدَا، غَضَّبَوْا اللّٰهْ إِلٰـهْ بَنِي إِسْرَائِيلْ بِعِبَادَةْ الْأَصْنَامْ. ١٤ وَ الْبَاقِي مِنْ عَمَلْ إِيلَى وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ.

زِمْرِي بِقي ملك في إسرائيل

١٥ وَ فِي سَنِةْ 27 هَنَا حُكُمْ آسَا مَلِكْ مَمْلَكَةْ يَهُوذَا، زِمْرِي بِقِي مَلِكْ وَ حَكَمْ سَبْعَةْ يَوْم فِي حِلَّةْ تِرْصَةْ. وَ فِي الْوَكِتْ دَا، عَسْكَرْ مَمْلَكَةْ إِسْرَائِيلْ قَعَدَوْا مُقَابِلْ حِلَّةْ قِبَّتُونْ الْفِي إِيدْ الْفِلِسْطِيِّينْ. ١٦ وَ الْعَسْكَرْ لِقَوْا خَبَرْ كَدَرْ زِمْرِي أَتْمَرَّدْ ضِدّ الْمَلِكْ وَ كَتَلَهْ. وَ فِي الْيَوْم دَا، طَوَّالِي هُمَّنْ دَرَّجَوْه لِعُمْرِي قَايِدْ الدَّيْش مَلِكْ فِي بَنِي إِسْرَائِيلْ. ١٧ وَ خَلَاصْ، عُمْرِي وَ كُلَّ عَسْكَرْ بَنِي إِسْرَائِيلْ قَمَّوْا مِنْ حِلَّةْ قِبَّتُونْ وَ جَوْا حَاصَرَوْا حِلَّةْ تِرْصَةْ. ١٨ وَ وَكِتْ زِمْرِي عِرِفْ كَدَرْ الْحِلَّةْ دِي شَالَوْهَا، خَلَاصْ دَخَلْ فِي قَصِرْ هَنَا الْمَلِكْ. وَ تَشَّ قَصِرْ الْمَلِكْ وَ نَفْسَهْ كُلَ وَ مَاتْ. ١٩ وَ دَا بِقِي أَشَانْ ذُنُوبَهْ وَكِتْ سَوَّى الْفَسَالَةْ قِدَّامْ اللّٰهْ. وَ هُو تَابَعْ كُلَّ الْفَسَالَةْ السَّوَّاهَا يَرُبَعَامْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.

٢٠ وَ الْبَاقِي مِنْ عَمَلْ زِمْرِي وَ مُؤآمَرَتَهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ.

٢١ وَ بَعَدْ مَوْت زِمْرِي، شَعَبْ مَمْلَكَةْ إِسْرَائِيلْ أَنْقَسَمَوْا بَكَانْتَيْن. وَاحِدِينْ تَابَعَوْا تِبْنِي وِلَيْد قِينَتْ لِيِدَرُّجُوهْ مَلِكْ. وَ وَاحِدِينْ تَابَعَوْا عُمْرِي. ٢٢ وَ النَّاسْ التَّابَعَوْا عُمْرِي غِلْبَوْا نَاسْ تِبْنِي وِلَيْد قِينَتْ. وَ تِبْنِي مَاتْ وَ عُمْرِي بِقِي مَلِكْ.

عُمْري بِقي ملك في إسرائيل

٢٣ وَ فِي سَنِةْ 31 هَنَا حُكُمْ آسَا مَلِكْ مَمْلَكَةْ يَهُوذَا، عُمْرِي بِقِي مَلِكْ فِي مَمْلَكَةْ إِسْرَائِيلْ وَ حَكَمْ 12 سَنَةْ. وَ قَبُلْ دَا، هُو حَكَمْ 6 سَنَةْ فِي حِلَّةْ تِرْصَةْ. ٢٤ وَ هُو شَرَى مِنْ سَامَرْ جَبَلْ بِـ‍ 70 كِيلَوْ فُضَّةْ. وَ بَنَى مَدِينَةْ فِي رَاسْ الْجَبَلْ دَا وَ قَوَّاهَا وَ سَمَّاهَا مَدِينَةْ السَّامِرَةْ. وَ دَا الْأُسُمْ الْأَوَّلْ هَنَا سَامَرْ سِيدْ الْجَبَلْ.

٢٥ وَ عُمْرِي سَوَّى الْفَسَالَةْ قِدَّامْ اللّٰهْ زِيَادَةْ مِنْ كُلَّ الْمُلُوكْ الْحَكَمَوْا قَبْلَهْ. ٢٦ هُو تَابَعْ كُلَّ دُرُوبْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ. وَ بَيْدَا، غَضَّبَوْا اللّٰهْ إِلٰـهْ بَنِي إِسْرَائِيلْ بِعِبَادَةْ الْأَصْنَامْ.

٢٧ وَ الْبَاقِي مِنْ عَمَلْ عُمْرِي وَ كُلَّ شَيّءْ السَّوَّاهْ وَ فَرَاسِيّتَهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ. ٢٨ وَ عُمْرِي مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ السَّامِرَةْ. وَ وِلَيْدَهْ أَخَابْ حَكَمْ فِي بَدَلَهْ.

أَخَاب بِقي ملك في إسرائيل

٢٩ وَ فِي سَنِةْ 38 هَنَا حُكُمْ آسَا مَلِكْ مَمْلَكَةْ يَهُوذَا، أَخَابْ وِلَيْد عُمْرِي بِقِي مَلِكْ فِي مَمْلَكَةْ إِسْرَائِيلْ. وَ أَخَابْ وِلَيْد عُمْرِي حَكَمْ 22 سَنَةْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. ٣٠ وَ أَخَابْ وِلَيْد عُمْرِي سَوَّى الْفَسَالَةْ قِدَّامْ اللّٰهْ زِيَادَةْ مِنْ كُلَّ الْمُلُوكْ الْحَكَمَوْا قَبْلَهْ. ٣١ وَ هُو تَابَعْ الذُّنُوبْ السَّوَّاهُمْ يَرُبَعَامْ وِلَيْد نَبَاتْ. وَ دَا كُلَ، هُو شَافَهْ شِيَّةْ وَ سَوَّى زِيَادَةْ مِنَّهْ! أَخَابْ مَشَى أَخَدَاهَا لِإِزَبِيلْ بِنَيَّةْ أَتْبَعَلْ مَلِكْ بَلَدْ صَيْدَا وَ سَجَدْ لِإِلٰـهْ الْأُسْمَهْ بَعَلْ وَ عَبَدَهْ. ٣٢ وَ فِي السَّامِرَةْ، بَنَى مَدْبَحْ وَ بَيْت لِيَعَبُدُوا فَوْقَهْ إِلٰـهْ بَعَلْ. ٣٣ وَ أَخَابْ غَزَّ عِيدَانْ لِعِبَادَةْ أَشِيرَةْ لِيِغَضِّبْ اللّٰهْ إِلٰـهْ بَنِي إِسْرَائِيلْ زِيَادَةْ مِنْ كُلَّ مُلُوكْ إِسْرَائِيلْ الْحَكَمَوْا قَبْلَهْ.

٣٤ وَ فِي وَكْتَهْ، حِيِيلْ الْمِنْ حِلَّةْ بَيْت إِيلْ قَمَّ يَبْنِي حِلَّةْ أَرِيحَا بَتَّانْ. وَ وَكِتْ بَدَا يُخُطّ أَسَاسْهَا، وِلَيْدَهْ الْبِكِرْ أَبِرَامْ مَاتْ. وَ بَتَّانْ وَكِتْ قَاعِدْ يِدِسّ بِيبَانْ الدُّرْدُرْ، وِلَيْدَهْ التَّانِي الْأُسْمَهْ سَقُوبْ كُلَ مَاتْ. وَ دَا حَسَبْ كَلَامْ اللّٰهْ الْقَالَهْ زَمَانْ بِوَاسِطَةْ النَّبِي يَشُوعْ وِلَيْد نُونْ.