1 مُلوك 15

أَبِيَّا بِقي ملك في يَهُوذَا

١ فِي سَنِةْ 18 هَنَا حُكُمْ يَرُبَعَامْ وِلَيْد نَبَاتْ، أَبِيَّا بِقِي مَلِكْ فِي مَمْلَكَةْ يَهُوذَا. ٢ وَ هُو حَكَمْ تَلَاتَةْ سَنَةْ فِي مَدِينَةْ الْقُدُسْ. وَ أَمَّهْ أُسُمْهَا مَعَاكَةْ بِنَيَّةْ أَبِشَلُومْ. ٣ وَ أَبِيَّا سَوَّى كُلَّ الذُّنُوبْ الْأَوَّلْ أَبُوهْ سَوَّاهُمْ وَ قَلْبَهْ مَا مُخْلِصْ لِلّٰهْ إِلٰـهَهْ مِثِلْ قَلِبْ جِدَّهْ دَاوُدْ. ٤ وَ لَاكِنْ فِي شَانْ دَاوُدْ، اللّٰهْ إِلٰـهَهْ خَطَّ نَادُمْ وَاحِدْ مِنْ ذُرِّيّتَهْ فِي الْمُلُكْ فِي مَدِينَةْ الْقُدُسْ. وَ دَا أَشَانْ مَدِينَةْ الْقُدُسْ كُلَ تَقْعُدْ ٥ وَ أَشَانْ دَاوُدْ سَوَّى الْعَدِيلْ قِدَّامْ اللّٰهْ. وَ فِي كُلَّ مُدَّةْ حَيَاتَهْ، هُو مَا خَالَفْ أَمُرْ اللّٰهْ إِلَّا فِي مُشْكِلَةْ أُرِيَّا الْحِتِّي.

٦ وَ كَانْ حَرِبْ أَمْبَيْن عَايِلَةْ رَحَبْعَامْ وَ عَايِلَةْ يَرُبَعَامْ. وَ الْحَرْبَةْ دِي قَاعِدَةْ دَايْماً فِي كُلَّ مُدَّةْ حَيَاةْ أَبِيَّا. ٧ وَ الْبَاقِي مِنْ عَمَلْ أَبِيَّا وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا. وَ كَانْ حَرِبْ أَمْبَيْن أَبِيَّا وَ يَرُبَعَامْ. ٨ وَ أَبِيَّا مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ دَاوُدْ. وَ وِلَيْدَهْ آسَا حَكَمْ فِي بَدَلَهْ.

آسَا بِقي ملك في يَهُوذَا

٩ وَ فِي سَنِةْ 20 هَنَا حُكُمْ يَرُبَعَامْ مَلِكْ مَمْلَكَةْ إِسْرَائِيلْ، آسَا كُلَ بِقِي مَلِكْ فِي مَمْلَكَةْ يَهُوذَا. ١٠ وَ آسَا حَكَمْ 41 سَنَةْ فِي مَدِينَةْ الْقُدُسْ. وَ جِدِّتَهْ أُسُمْهَا مَعَاكَةْ بِنَيَّةْ أَبِشَلُومْ. ١١ وَ آسَا سَوَّى الْعَدِيلْ قِدَّامْ اللّٰهْ مِثِلْ جِدَّهْ دَاوُدْ. ١٢ وَ طَرَدْ مِنْ الْبَلَدْ النَّاسْ الْيِشَّرْمَطَوْا فِي بَكَانْ الْعِبَادَةْ وَ دَمَّرْ كُلَّ الْأَصْنَامْ الْأَبَّهَاتَهْ صَنَعَوْهُمْ. ١٣ وَ الْمَلِكْ آسَا مَرَقْ حَتَّى جِدِّتَهْ مَعَاكَةْ مِنْ دَرَجَتْهَا هَنَا الْمَيْرَمْ أَشَانْ هِي صَنَعَتْ صَنَمْ مُحَرَّمْ لِلْإِلٰـهَةْ أَشِيرَةْ. وَ آسَا كَسَّرْ الصَّنَمْ الْمُحَرَّمْ دَا وَ حَرَّقَهْ فِي وَادِي قِدْرُونْ. ١٤ وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ. وَ فِي كُلَّ مُدَّةْ حَيَاتَهْ، آسَا قَاعِدْ يِتَابِعْ اللّٰهْ بِقَلِبْ مُخْلِصْ. ١٥ وَ هُو جَابْ فِي بَيْت اللّٰهْ الْفُضَّةْ وَ الدَّهَبْ وَ الْمُعِدَّاتْ الْأَبُوهْ وَ هُو ذَاتَهْ خَصَّصَوْهُمْ.

الحرِب أمبين آسَا و بَعَاشَى

١٦ وَ كَانْ حَرِبْ أَمْبَيْن آسَا وَ بَعَاشَى مَلِكْ مَمْلَكَةْ إِسْرَائِيلْ فِي كُلَّ مُدَّةْ حَيَاتْهُمْ. ١٧ وَ بَعَاشَى مَلِكْ مَمْلَكَةْ إِسْرَائِيلْ قَمَّ يِحَارِبْ مَمْلَكَةْ يَهُوذَا. وَ قَوَّى حِلَّةْ الرَّامَةْ لِيَدْحَرْ الدَّرِبْ لِآسَا مَلِكْ مَمْلَكَةْ يَهُوذَا وَ نَاسَهْ مَا يَمُرْقُوا وَ لَا يَدْخُلُوا بِالدَّرِبْ دَا. ١٨ وَ خَلَاصْ، آسَا شَالْ كُلَّ الْفُضَّةْ وَ الدَّهَبْ الْقَاعِدِينْ فِي مَخَازِنْ هَنَا بَيْت اللّٰهْ وَ كُلَّ الْمَالْ هَنَا قَصِرْ الْمَلِكْ وَ أَنْطَاهْ لِمَسَائِيلَهْ. وَ رَسَّلَاهُمْ لِبَنْهَدَادْ وِلَيْد طَبْرِمُونْ وِلَيْد حَزْيُونْ مَلِكْ بَلَدْ أَرَامْ الْقَاعِدْ فِي مَدِينَةْ دِمَشْق. وَ رَسَّلْ لَيَّهْ وَ قَالْ: ١٩ «خَلِّي نِسَوُّوا عَلَاقَةْ بَيْنِي وَ بَيْنَكْ مِثِلْ الْعَلَاقَةْ الْبِقَتْ أَمْبَيْن أَبُويِ وَ أَبُوكْ. دَاهُو نِرَسِّلْ لَيْك هَدِيَّةْ هَنَا فُضَّةْ وَ دَهَبْ وَ نَطْلُبْ مِنَّكْ تَقْطَعْ عَلَاقْتَكْ مَعَ بَعَاشَى مَلِكْ مَمْلَكَةْ إِسْرَائِيلْ. وَ بَيْدَا، يِوَقِّفْ الْحَرْبَةْ الْقَمَّ بَيْهَا ضِدِّي.»

٢٠ وَ بَنْهَدَادْ قَصَّدْ بِكَلَامْ الْمَلِكْ آسَا. وَ خَلَاصْ، هُو رَسَّلْ قُيَّادْ عَسْكَرَهْ وَ هَجَمَوْا حِلَّالْ مَمْلَكَةْ إِسْرَائِيلْ وَ شَالَوْا عِيُونْ وَ دَانْ وَ آبِلْ بَيْت مَعَاكَةْ وَ كُلَّ مَنْطَقَةْ الْجَلِيلْ وَ كُلَّ أَرْض قَبِيلَةْ نَفْتَالِي. ٢١ وَ مِنْ بَعَاشَى سِمِعْ بِالْخَبَرْ دَا، خَلَّى مِنَّهْ قَوِيِّينْ حِلَّةْ الرَّامَةْ وَ سَكَنْ فِي حِلَّةْ تِرْصَةْ. ٢٢ وَ خَلَاصْ فِي الْبَكَانْ دَا، الْمَلِكْ آسَا لَمَّ كُلَّ نَاسْ مَمْلَكَةْ يَهُوذَا، وَ مَا خَلَّى نَادُمْ وَاحِدْ كُلَ، لِيَنْقُلُوا الْحَجَرْ وَ الْحَطَبْ الْبَعَاشَى لَمَّاهُمْ لِيِقَوِّي بَيْهُمْ حِلَّةْ الرَّامَةْ. وَ هُو أَسْتَعْمَلْ الْحَجَرْ وَ الْحَطَبْ دَوْل لِيِقَوِّي حِلَّةْ قَبَعْ بَنْيَامِينْ وَ حِلَّةْ مِصْفَةْ.

٢٣ وَ الْبَاقِي مِنْ عَمَلْ آسَا وَ كُلَّ فَرَاسِيّتَهْ وَ كُلَّ شَيّءْ السَّوَّاهْ وَ الْحِلَّالْ الْبَنَاهُمْ، كُلَّ الشَّيّءْ دَا مَكْتُوبْ فِي كُتُبْ تَارِيخْ مُلُوكْ بَنِي يَهُوذَا. وَ لَاكِنْ وَكِتْ آسَا شَيَّبْ، وَجَعْ رِجْلَيْ كَرَبَهْ. ٢٤ وَ آسَا مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ جِدَّهْ. وَ وِلَيْدَهْ يَهُوشَفَطْ حَكَمْ فِي بَدَلَهْ.

نَدَاب بِقي ملك في إسرائيل

٢٥ وَ نَدَابْ وِلَيْد يَرُبَعَامْ بِقِي مَلِكْ فِي مَمْلَكَةْ إِسْرَائِيلْ فِي السَّنَةْ التَّانِيَةْ هَنَا حُكُمْ آسَا. وَ هُو حَكَمْ سَنْتَيْن فِي بَنِي إِسْرَائِيلْ. ٢٦ وَ نَدَابْ سَوَّى الْفَسَالَةْ قِدَّامْ اللّٰهْ. هُو تَابَعْ دَرِبْ أَبُوهْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.

٢٧ وَ بَعَاشَى وِلَيْد أَخِيَّا الْمِنْ قَبِيلَةْ يَسَّاكَرْ أَتْمَرَّدْ ضِدّ الْمَلِكْ. الْمَلِكْ نَدَابْ مَعَ كُلَّ عَسْكَرْ مَمْلَكَةْ إِسْرَائِيلْ مَشَوْا حَاصَرَوْا حِلَّةْ قِبَّتُونْ الْفِي إِيدْ الْفِلِسْطِيِّينْ، فِي الْوَكِتْ دَا بَسْ بَعَاشَى كَتَلَهْ لِنَدَابْ. ٢٨ بَعَاشَى كَتَلَهْ لِنَدَابْ فِي السَّنَةْ التَّالْتَةْ هَنَا حُكُمْ آسَا مَلِكْ مَمْلَكَةْ يَهُوذَا. وَ بَعَاشَى حَكَمْ فِي بَدَلْ نَدَابْ. ٢٩ وَ مِنْ هُو بِقِي مَلِكْ، دَمَّرْ كُلَّ عَايِلَةْ يَرُبَعَامْ. مَا خَلَّى نَادُمْ وَاحِدْ كُلَ مِنْ عَايِلْتَهْ. وَ دَا بِقِي مِثِلْ كَلَامْ اللّٰهْ الْقَالَهْ بِوَاسِطَةْ عَبْدَهْ أَخِيَّا الْمِنْ حِلَّةْ شِيلَوْه. ٣٠ وَ كُلَّ الشَّيّءْ دَا بِقِي أَشَانْ الذُّنُوبْ الْيَرُبَعَامْ سَوَّاهُمْ. وَ لَزَّ نَاسْ مَمْلَكَةْ إِسْرَائِيلْ فِي الذُّنُوبْ وَ غَضَّبَوْا اللّٰهْ إِلٰـهْ بَنِي إِسْرَائِيلْ.

٣١ وَ الْبَاقِي مِنْ عَمَلْ نَدَابْ وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ. ٣٢ وَ كَانْ حَرِبْ أَمْبَيْن آسَا وَ بَعَاشَى مَلِكْ مَمْلَكَةْ إِسْرَائِيلْ فِي كُلَّ مُدَّةْ حَيَاتْهُمْ.

بَعَاشَى بِقي ملك في إسرائيل

٣٣ وَ فِي السَّنَةْ التَّالْتَةْ هَنَا حُكُمْ آسَا مَلِكْ مَمْلَكَةْ يَهُوذَا، بَعَاشَى وِلَيْد أَخِيَّا بِقِي مَلِكْ فِي كُلَّ مَمْلَكَةْ إِسْرَائِيلْ فِي حِلَّةْ تِرْصَةْ. وَ هُو حَكَمْ 24 سَنَةْ. ٣٤ وَ بَعَاشَى سَوَّى الْفَسَالَةْ قِدَّامْ اللّٰهْ. هُو تَابَعْ دَرِبْ يَرُبَعَامْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.