يَشُوع 12

نصُر بني إسرائيل في المُلوك

١ وَ أَوَّلْ، بَنِي إِسْرَائِيلْ أَنَّصَرَوْا فِي مُلُوكْ إِتْنَيْن صَبَاحْ مِنْ بَحَرْ الْأُرْدُنْ وَ شَالَوْا أَرْضُهُمْ مِنْ وَادِي أَرْنُونْ فِي الْوَطِي لَحَدِّي جَبَلْ حَرْمُونْ فِي الْمُنْشَاقْ وَ كُلَّ أَرْضُهُمْ عَلَيْ الصَّبَاحْ مِنْ وَادِي الْأُرْدُنْ. ٢ وَ الْأَوَّلْ هُو سِيحُونْ مَلِكْ الْأَمُورِيِّينْ السَّاكِنْ فِي مَدِينَةْ حَشْبُونْ. هُو يَمْلُكْ فِي نُصّ وَادِي أَرْنُونْ مِنْ عَرُوعِرْ وَ فِي نُصّ تُرَابْ قِلْعَادْ لَحَدِّي وَادِي يَبُّوقْ الْهُو حُدُودْ بَنِي عَمُّونْ. ٣ وَ يَمْلُكْ فِي وَادِي الْأُرْدُنْ مِنْ بَحَرْ الْجَلِيلْ فِي الْمُنْشَاقْ لَحَدِّي بَيْت يَشِيمُتْ قَرِيبْ الْبَحَرْ الْمَيِّتْ وَ بَتَّانْ لَحَدِّي التُّرَابْ فِي قَعَرْ جَبَلْ الْفِسْقَةْ فِي الْوَطِي.

٤ وَ الْمَلِكْ التَّانِي، هُو عُوقْ مَلِكْ بَاشَانْ السَّاكِنْ فِي عَشْتَرُوتْ وَ إِدْرَعِي وَ هُو آخِرْ وَاحِدْ مِنْ الرَّفَايِينْ. ٥ وَ هُو مَلَكْ فِي جَبَلْ حَرْمُونْ وَ سَلْكَةْ وَ فِي كُلَّ تُرَابْ بَاشَانْ لَحَدِّي حُدُودْ الْقَشُورِيِّينْ وَ الْمَعَاكِيِّينْ. وَ هُو مَلَكْ فِي نُصّ تُرَابْ قِلْعَادْ لَحَدِّي حُدُودْ تُرَابْ سِيحُونْ مَلِكْ حَشْبُونْ. ٦ وَ مُوسَى عَبْد اللّٰهْ وَ بَنِي إِسْرَائِيلْ دَمَّرَوْا الْمُلُوكْ الْإِتْنَيْن دَوْل وَ مُوسَى أَنْطَى أَرْضُهُمْ وَرَثَةْ لِقَبِيلَةْ رَأُوبِينْ وَ قَبِيلَةْ قَادْ وَ نُصّ قَبِيلَةْ مَنَسَّى.

٧ وَ يَشُوعْ وَ بَنِي إِسْرَائِيلْ دَمَّرَوْا مُلُوكْ الْبَلَدْ الْغَرِبْ لِبَحَرْ الْأُرْدُنْ. وَ أَرْضُهُمْ مِنْ بَعَلْ قَادْ الْفِي وَادِي لُبْنَانْ فِي الْمُنْشَاقْ لَحَدِّي الْجَبَلْ الْأَمْلَسْ الْقَاعِدْ جَنْب سَعِيرْ فِي الْوَطِي. وَ يَشُوعْ أَنْطَى الْأَرْض دِي وَرَثَةْ لِبَنِي إِسْرَائِيلْ حَسَبْ قَبَايِلْهُمْ. ٨ وَ دَوْل الْجِبَالْ وَ سَهَلَةْ شَفِيلَةْ وَ وَادِي الْأُرْدُنْ وَ الْقِيزَانْ وَ الصَّحَرَاء وَ صَحَرَاء نَقَبْ. وَ دَوْل بُلْدَانْ الْحِتِّيِّينْ وَ الْأَمُورِيِّينْ وَ الْكَنْعَانِيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ.

٩ وَ الْمُلُوكْ الدَّمَّرَوْهُمْ هُمَّنْ

مَلِكْ أَرِيحَا

وَ مَلِكْ حِلَّةْ عَايْ

الْقَاعِدَةْ جَنْب بَيْت إِيلْ

١٠ وَ مَلِكْ أُورُشَلِيمْ

وَ مَلِكْ حِبْرُونْ

١١ وَ مَلِكْ يَرْمُوتْ

وَ مَلِكْ لَكِيشْ

١٢ وَ مَلِكْ عَقْلُونْ

وَ مَلِكْ قَازَرْ

١٣ وَ مَلِكْ دَبِيرْ

وَ مَلِكْ قَدِيرْ

١٤ وَ مَلِكْ حُرْمَةْ

وَ مَلِكْ عَرَادْ

١٥ وَ مَلِكْ لِبْنَةْ

وَ مَلِكْ عَدُلَّامْ

١٦ وَ مَلِكْ مَقِيدَةْ

وَ مَلِكْ بَيْت إِيلْ

١٧ وَ مَلِكْ تَفُوحْ

وَ مَلِكْ حِيفَرْ

١٨ وَ مَلِكْ أَفِيقْ

وَ مَلِكْ شَارُونْ

١٩ وَ مَلِكْ مَدُونْ

وَ مَلِكْ حَاصُورْ

٢٠ وَ مَلِكْ شِمْرُونْ مَرُومْ

وَ مَلِكْ أَكْشَافْ

٢١ وَ مَلِكْ تَعْنَكْ

وَ مَلِكْ مَقِدُّو

٢٢ وَ مَلِكْ قَدَشْ

وَ مَلِكْ يَقْنَعَامْ فِي كَرْمَلْ

٢٣ وَ مَلِكْ دُورْ فِي قِيزَانْ هَنَا دُورْ

وَ مَلِكْ قُويِمْ فِي جَلِيلْ

٢٤ وَ مَلِكْ تِرْصَةْ.

كُلُّهُمْ كَيْ 31 مَلِكْ.