يَشُوع 11

الحرِب في عَيْن مِرُوم

١ وَ وَكِتْ يَابِينْ مَلِكْ حَاصُورْ سِمِعْ بِالْخَبَرْ دَا، رَسَّلْ نَاسْ لِيِخَبُّرُوا مُلُوكْ آخَرِينْ وَ هُمَّنْ

يُبَابْ مَلِكْ مَدُونْ

وَ الْمَلِكْ هَنَا شِمْرُونْ

وَ الْمَلِكْ هَنَا أَكْشَافْ

٢ وَ مُلُوكْ جِبَالْ الْمُنْشَاقْ

وَ مُلُوكْ وَادِي الْأُرْدُنْ

جُنُوبْ بَحَرْ الْجَلِيلْ

وَ مُلُوكْ سَهَلَةْ شَفِيلَةْ

وَ مُلُوكْ قِيزَانْ دُورْ فِي الْغَرِبْ

٣ وَ الْكَنْعَانِيِّينْ

الْقَاعِدِينْ صَبَاحْ وَ غَرِبْ

وَ الْأَمُورِيِّينْ

وَ الْحِتِّيِّينْ

وَ الْفِرِزِّيِّينْ

وَ الْيَبُوسِيِّينْ

الْقَاعِدِينْ فِي الْجِبَالْ

وَ الْحِوِّيِّينْ

الْقَاعِدِينْ فِي قَعَرْ جَبَلْ حَرْمُونْ فِي أَرْض مِصْفَةْ.

٤ وَ كُلُّهُمْ مَرَقَوْا بِدُيُوشْهُمْ. وَ هُمَّنْ كَتِيرِينْ مِثِلْ رَمْلَةْ هَنَا خَشُمْ الْبَحَرْ بِخَيْل كَتِيرِينْ وَ عَرَبَاتْ هَنَا حَرِبْ. ٥ وَ كُلَّ الْمُلُوكْ دَوْل لَمَّوْا وَ جَوْا نَزَلَوْا سَوَا جَنْب عَيْن مِرُومْ لِيِحَارُبُوا بَنِي إِسْرَائِيلْ.

٦ وَ اللّٰهْ قَالْ لِيَشُوعْ: «مَا تَخَافْ مِنْهُمْ أَشَانْ أَمْبَاكِرْ فِي نَفْس الْوَكِتْ، أَنَا نِسَلِّمْ الْمُلُوكْ دَوْل وَ عَسْكَرْهُمْ كُلُّهُمْ مَيْتِينْ لِبَنِي إِسْرَائِيلْ. وَ إِنْتَ تِقَطِّعْ عَرَاقِيبْ خَيْلهُمْ وَ تِتِشّ عَرَبَاتْهُمْ هَنَا الْحَرِبْ.» ٧ وَ يَشُوعْ وَ كُلَّ الرُّجَالْ الْمُحَارِبِينْ مَشَوْا هَجَمَوْهُمْ بِغَفْلَةْ جَنْب عَيْن مِرُومْ. ٨ وَ اللّٰهْ سَلَّمَاهُمْ لِبَنِي إِسْرَائِيلْ. وَ هُمَّنْ هَجَمَوْهُمْ وَ طَارَدَوْهُمْ لَحَدِّي صَيْدَا الْكَبِيرَةْ وَ لَحَدِّي مِسْرَفْوتْ مَايِمْ وَ لَحَدِّي وَادِي مِصْفَةْ عَلَيْ الصَّبَاحْ. وَ هُمَّنْ كَتَلَوْهُمْ لَحَدِّي نَادُمْ وَاحِدْ مِنْهُمْ كُلَ مَا فَضَّلْ حَيّ. ٩ وَ يَشُوعْ سَوَّى فَوْقهُمْ مِثِلْ اللّٰهْ أَمَرَهْ بَيَّهْ. هُو قَطَّعْ عَرَاقِيبْ خَيْلهُمْ وَ تَشَّ عَرَبَاتْهُمْ هَنَا الْحَرِبْ.

يَشُوع شال مدينة حَاصُور

١٠ وَ فِي نَفْس الْوَكِتْ، يَشُوعْ قَبَّلْ وَ شَالْ مَدِينَةْ حَاصُورْ وَ كَتَلْ مَلِكْهَا بِالْسَّيْف. وَ حَاصُورْ دِي، هِي بَسْ زَمَانْ عَاصِمَةْ هَنَا كُلَّ الْمَمَالِكْ دَوْل. ١١ وَ يَشُوعْ كَتَلْ كُلَّ نَاسْ حَاصُورْ بِالْسَّيْف وَ دَمَّرَاهُمْ لَحَدِّي مَا فَضَّلْ مِنْهُمْ مَخْلُوقْ حَيّ. وَ بَعَدْ دَا، حَرَّقْ الْمَدِينَةْ دِي.

١٢ وَ يَشُوعْ شَالْ كُلَّ الْمُدُنْ دَوْل وَ كَتَلْ مُلُوكْهُمْ بِالْسَّيْف. وَ هُو دَمَّرَاهُمْ مِثِلْ مُوسَى عَبْد اللّٰهْ أَمَرَهْ بَيَّهْ. ١٣ وَ لَاكِنْ كُلَّ الْمُدُنْ الْقَاعِدِينْ فِي الْجِبَالْ، بَنِي إِسْرَائِيلْ مَا حَرَّقَوْهُمْ. إِلَّا مَدِينَةْ حَاصُورْ بَسْ يَشُوعْ حَرَّقَاهَا. ١٤ وَ كُلَّ الْخُمَامْ هَنَا الْمُدُنْ دَوْل وَ الْبَهَايِمْ، بَنِي إِسْرَائِيلْ كَسَبَوْهُمْ مِثِلْ غَنِيمَةْ. وَ لَاكِنْ كَتَلَوْا كُلَّ نَاسْهُمْ بِالْسَّيْف لَحَدِّي مَا فَضَّلْ مِنْهُمْ مَخْلُوقْ حَيّ. ١٥ وَ دَا مِثِلْ اللّٰهْ قَالَهْ لِعَبْدَهْ مُوسَى وَ مُوسَى كَمَانْ أَمَرْ بَيَّهْ يَشُوعْ وَ دَا بَسْ الشَّيّءْ السَّوَّاهْ يَشُوعْ. هُو طَبَّقْ كُلَّ كَلَامْ الْاللّٰهْ أَمَرْ بَيَّهْ مُوسَى.

يَشُوع شال كل بلد كَنْعَان

١٦ وَ بِمِثِلْ دَا، يَشُوعْ شَالْ كُلَّ الْبَلَدْ دِي يَعْنِي جِبَالْهَا وَ صَحَرَاء نَقَبْ وَ كُلَّ تُرَابْ قَوْشَنْ وَ سَهَلَةْ شَفِيلَةْ وَ وَادِي الْأُرْدُنْ وَ جِبَالْ إِسْرَائِيلْ وَ سَهَلَةْ هَنَا خَشُمْ الْبَحَرْ. ١٧ وَ مِنْ الْجَبَلْ الْأَمْلَسْ الْقَاعِدْ جَنْب سَعِيرْ فِي الْوَطِي لَحَدِّي بَعَلْ قَادْ فِي وَادِي لُبْنَانْ فِي قَعَرْ جَبَلْ حَرْمُونْ فِي الْمُنْشَاقْ، هُو كَرَبْ كُلَّ مُلُوكْهُمْ وَ كَتَلَاهُمْ. ١٨ وَ مُدَّةْ أَيَّامْ كَتِيرِينْ، يَشُوعْ قَاعِدْ يِحَارِبْ فِي الْمُلُوكْ دَوْل. ١٩ وَ حِلَّةْ وَاحِدَةْ كُلَ مَا سَوَّتْ سَلَامْ مَعَ بَنِي إِسْرَائِيلْ إِلَّا الْحِوِّيِّينْ الْقَاعِدِينْ فِي قِبْعُونْ. وَ كُلَّ الْحِلَّالْ الْآخَرِينْ، هُمَّنْ شَالَوْهُمْ فِي الْحَرِبْ. ٢٠ وَ اللّٰهْ بَسْ قَوَّى قُلُوبْهُمْ لِيِحَارُبُوا بَنِي إِسْرَائِيلْ. وَ بَيْدَا، وَاجِبْ بَنِي إِسْرَائِيلْ يِدَمُّرُوهُمْ وَ مَا يِحِنُّوا مِنْهُمْ نَادُمْ. وَ يِكَمُّلُوهُمْ كُلُّهُمْ مِثِلْ اللّٰهْ أَمَرْ بَيَّهْ مُوسَى.

٢١ وَ فِي الْوَكِتْ دَا، يَشُوعْ مَشَى مَرَقْ بَنِي عَنَقْ مِنْ الْجِبَالْ وَ مِنْ حِبْرُونْ وَ مِنْ دَبِيرْ وَ مِنْ عَنَابْ وَ مِنْ كُلَّ جِبَالْ يَهُوذَا وَ مِنْ كُلَّ جِبَالْ إِسْرَائِيلْ. هُو كَتَلَاهُمْ كُلُّهُمْ وَ دَمَّرْ حِلَّالْهُمْ. ٢٢ وَ مِنْ بَنِي عَنَقْ وَاحِدْ كُلَ مَا فَضَّلْ فِي بَلَدْ بَنِي إِسْرَائِيلْ. وَ لَاكِنْ وَاحِدِينْ مِنْهُمْ فَضَّلَوْا فِي غَزَّةْ وَ قَاتْ وَ أَشْدُودْ.

٢٣ وَ يَشُوعْ شَالْ كُلَّ الْبَلَدْ وَ دَا حَسَبْ كَلَامْ اللّٰهْ الْقَالَهْ لِمُوسَى. وَ الْبَلَدْ دِي، يَشُوعْ أَنْطَاهَا لِبَنِي إِسْرَائِيلْ وَرَثَةْ لِيِقَسُّمُوهَا أَمْبَيْنَاتْ قَبَايِلْهُمْ. وَ خَلَاصْ، الْحَرِبْ وَقَفْ وَ الْبَلَدْ لِقَتْ الرَّاحَةْ.