مُوسَى يعرِّف الشعب بعمل اللّه
١١
١ حِبُّوا اللّٰهْ إِلٰـهْكُو وَ دَايْماً أَحْفَضَوْا وَصِيَّاتَهْ وَ شُرُوطَهْ وَ قَوَانِينَهْ.
٢ إِنْتُو الْيَوْم مَا مِثِلْ عِيَالْكُو الْمَا شَافَوْا شَيّءْ وَ لَا سِمْعَوْا شَيّءْ.
وَ لَاكِنْ إِنْتُو تَعَرْفُوهْ.
اللّٰهْ إِلٰـهْكُو دَرَّسَاكُو وَ عِرِفْتُوا عَظَمَتَهْ وَ إِيدَهْ الشَّدِيدَةْ وَ دُرَاعَهْ الْقَوِي.
٣ وَ عِرِفْتُوا عَجَايْبَهْ وَ أَعْمَالَهْ السَّوَّاهُمْ فِي لُبّ مَصِرْ ضِدّ فِرْعَوْن مَلِكْ مَصِرْ وَ ضِدّ كُلَّ بَلَدَهْ.
٤ وَ إِنْتُو شِفْتُوا السَّوَّاهْ فِي دَيْش مَصِرْ وَكِتْ قَاعِدِينْ يِطَارُدُوكُو.
هُو قَلَبْ أَلْمِي الْبَحَرْ الْأَحْمَرْ فِي خَيْلهُمْ وَ عَرَبَاتْهُمْ.*
وَ اللّٰهْ دَمَّرَاهُمْ دَمَارْ كَامِلْ لَحَدِّي الْيَوْم هُمَّنْ مَا فِيهُمْ.
٥ وَ إِنْتُو شِفْتُوا السَّوَّاهْ لَيْكُو مِنْ الصَّحَرَاء لَحَدِّي جِيتُوا هِنِي.
٦ وَ إِنْتُو شِفْتُوا السَّوَّاهْ فِي دَتَانْ وَ أَبِرَامْ* عِيَالْ أَلِيَابْ مِنْ قَبِيلَةْ رَأُوبِينْ قِدَّامْ كُلَّ بَنِي إِسْرَائِيلْ،
وَكِتْ الْأَرْض فَتَحَتْ خَشُمْهَا وَ زَرَطَتْهُمْ،
هُمَّنْ وَ عَايِلَاتْهُمْ وَ خِيَمْهُمْ وَ كُلَّ النَّاسْ التَّابْعِينْ لَيْهُمْ.
٧ أَيْوَى،
بِعُيُونْكُو شِفْتُوا كُلَّ الْعَمَلْ الْكَبِيرْ السَّوَّاهْ اللّٰهْ.
٨ وَ بَيْدَا،
طَبُّقُوا كُلَّ الْوَصَايَا النَّنْطِيهُمْ لَيْكُو الْيَوْم أَشَانْ تَبْقَوْا شُدَادْ وَ تَدْخُلُوا فِي الْبَلَدْ وَ تِشِيلُوهَا وَرَثَةْ.
٩ وَ بَيْدَا،
تَسْكُنُوا مُدَّةْ طَوِيلَةْ فِي الْبَلَدْ الْاللّٰهْ حَلَفْ يَنْطِيهَا لِجُدُودْكُو وَ لِذُرِّيِّتْهُمْ.
وَ دِي الْبَلَدْ الْمَلَانَةْ بِاللَّبَنْ وَ الْعَسَلْ.
مُسْتقْبل الشعب
١٠ أَشَانْ الْبَلَدْ التَّمْشُوا لَيْهَا وَ تِشِيلُوهَا وَرَثَةْ،
دِي مَا مِثِلْ بَلَدْ مَصِرْ الْإِنْتُو مَرَقْتُوا مِنْهَا.
فِي بَلَدْ مَصِرْ إِنْتُو تِتَيْرُبُوا زِرَاعِتْكُو وَ تَزْقُوهَا بِنَقِلِينْ أَلْمِي مِثِلْ جِنَيْنَةْ هَنَا خُضْرَوَاتْ.
١١ وَ لَاكِنْ الْبَلَدْ التَّمْشُوا فَوْقهَا وَ تِشِيلُوهَا وَرَثَةْ دِي،
هِي بَلَدْ الْعِنْدَهَا جِبَالْ وَ وُدْيَانْ مَزْقِيَّةْ بِمَطَرْ السَّمَاءْ.
١٢ وَ الْبَلَدْ دِي،
اللّٰهْ إِلٰـهْكُو قَاعِدْ يَرْعَاهَا وَ يِرَاقِبْهَا مِنْ بِدَايَةْ السَّنَةْ لَحَدِّي آخِرْهَا.
١٣ وَ كَنْ تَسْمَعَوْا وَصِيَّاتِي النَّنْطِيهُمْ لَيْكُو الْيَوْم وَ تِحِبُّوا اللّٰهْ إِلٰـهْكُو وَ تَخْدُمُوا لَيَّهْ بِكُلَّ قُلُوبْكُو وَ كُلَّ فِكِرْكُو،
١٤ خَلَاصْ هُو يِنَزِّلْ مَطَرْ فِي الْوَكِتْ الْمُوَافِقْ فِي بِدَايَةْ الْخَرِيفْ وَ الرِّشَاشْ.
وَ بَعَدَهْ،
يَجِي الدَّرَتْ الْفَوْقَهْ تِلِمُّوا قَمَحْكُو وَ خَمَرْكُو وَ دِهِنْكُو.
١٥ وَ هُو يِقَوِّمْ قَشّ فِي زِرَاعِتْكُو لِبَهَايِمْكُو وَ إِنْتُو تَاكُلُوا وَ تَشْبَعَوْا.
١٦ أَنْقَرْعُوا مَا تِخَلُّوا قُلُوبْكُو يِنْغَشَّوْا وَ تَعَبُدُوا إِلٰـهَاتْ آخَرِينْ وَ تَسْجُدُوا قِدَّامْهُمْ.
١٧ وَ دَا أَشَانْ،
اللّٰهْ يَغْضَبْ لَيْكُو وَ خَلَاصْ يَدْحَرْ السَّمَاءْ مَا تِنَزِّلْ مَطَرْ وَ الْأَرْض مَا تِقَوِّمْ مَعَاشْ.
وَ خَلَاصْ،
تِنْقَشَّوْا طَوَّالِي مِنْ الْبَلَدْ الْعَدِيلَةْ الْهُو أَنْطَاهَا لَيْكُو.
١٨ وَ اللّٰهْ قَالْ:
«كَلَامِي دَا أَحْفَضَوْه فِي قُلُوبْكُو وَ خُطُّوهْ فِي فِكِرْكُو وَ سَوُّوهْ مِثِلْ عَلَامَةْ التَّرْبُطُوهَا فِي إِيدَيْكُو وَ مِثِلْ هِلَالْ التِّعَلُّقُوهْ فِي جَبْهَاتْكُو أَمْبَيْنَاتْ عُيُونْكُو.
١٩ وَ عَلُّمُوهْ لِعِيَالْكُو وَ كَلُّمُوا بَيَّهْ فِي الْبَيْت وَ فِي السَّفَرْ وَ وَكِتْ رَاقْدِينْ وَ قَايْمَيْن.
٢٠ وَ أَكْتُبُوهْ فِي عِيدَانْ بِيبَانْ بُيُوتْكُو وَ فِي مَدَخَلْ حِلَّالْكُو.
٢١ وَ بَيْدَا،
أَيَّامْ عُمُرْكُو وَ عُمُرْ عِيَالْكُو يَبْقَوْا طُوَالْ فِي الْبَلَدْ الْأَنَا اللّٰهْ حَلَفْت وَ قُلْت نَنْطِيهَا لِجُدُودْكُو.
وَ دَا مِثِلْ عُمُرْ السَّمَاءْ مِنْ فَوْق لِلْأَرْض.»
٢٢ أَشَانْ كَنْ تَحْفَضَوْا كُلَّ الْوَصَايَا النَّامُرْكُو بَيْهُمْ وَ تِطَبُّقُوهُمْ وَ تِحِبُّوا اللّٰهْ إِلٰـهْكُو وَ تِشِيلُوا دَرْبَهْ وَ تِتْمَسَّكَوْا بَيَّهْ،
٢٣ خَلَاصْ اللّٰهْ يَطْرُدْ قِدَّامْكُو الْأُمَمْ الْكُبَارْ وَ شُدَادْ مِنْكُو.
وَ إِنْتُو تِشِيلُوا أَرْضُهُمْ.
٢٤ وَ أَيِّ بَكَانْ الرِّجِلْكُو تَفْجَقَهْ يَبْقَى هَنَاكُو.
وَ حُدُودْكُو يَبْقَوْا مِنْ الصَّحَرَاء فِي الْوَطِي لَحَدِّي لُبْنَانْ فِي الْمُنْشَاقْ وَ مِنْ بَحَرْ الْفُرَاتْ فِي الصَّبَاحْ لَحَدِّي الْبَحَرْ الْأَبْيَضْ فِي الْغَرِبْ.
٢٥ وَ مَا فِي أَيِّ نَادُمْ يَقْدَرْ يَقِيفْ قِدَّامْكُو.
وَ مِثِلْ اللّٰهْ إِلٰـهْكُو قَالَهْ فِي أَيِّ بَلَدْ التَّمْشُوا فَوْقهَا هُو يِدِسّ الرُّعُبْ وَ الْخَوْف فِي شَعَبْهَا وَ هُمَّنْ يَخَافَوْا مِنْكُو.
البركة و اللعنة
٢٦ وَ شِيفُوا دَاهُو الْيَوْم أَنَا نُخُطّ قِدَّامْكُو الْبَرَكَةْ وَ اللَّعَنَةْ.
٢٧ وَ تَلْقَوْا الْبَرَكَةْ كَنْ سِمِعْتُوا وَصَايَا اللّٰهْ إِلٰـهْكُو النَّامُرْكُو بَيْهُمْ الْيَوْم.
٢٨ وَ تَلْقَوْا اللَّعَنَةْ كَنْ مَا تَسْمَعَوْا وَصَايَا اللّٰهْ إِلٰـهْكُو وَ تِكِسُّوا بَعِيدْ مِنْ الدَّرِبْ النَّامُرْكُو بَيَّهْ الْيَوْم وَ تِتَابُعُوا لَيْكُو إِلٰـهَاتْ آخَرِينْ الْأَوَّلْ مَا تَعَرْفُوهُمْ.
٢٩ وَ وَكِتْ اللّٰهْ إِلٰـهْكُو يِوَدِّيكُو فِي الْبَلَدْ التَّمْشُوا لَيْهَا وَ تِشِيلُوهَا وَرَثَةْ،
أَطْلَعَوْا فِي رَاسْ جَبَلْ قَرِزِيمْ وَ بَلُّغُوا بِالْبَرَكَةْ وَ أَطْلَعَوْا فِي رَاسْ جَبَلْ عِبَالْ وَ بَلُّغُوا بِاللَّعَنَةْ.
٣٠ وَ الْجِبَالْ دَوْل قَاعِدِينْ غَادِي لِبَحَرْ الْأُرْدُنْ عَلَيْ جِيهَةْ الْغَرِبْ فِي بَلَدْ الْكَنْعَانِيِّينْ السَّاكْنِينْ فِي الْعَرَبَةْ مُقَابِلِينْ قِلْقَالْ جَنْب شَدَرْ الْكُبَارْ هَنَا مَوْرَةْ.