كتاب يَشُوع
من كتب تاريخ بني إسرائيل
مقدمة
الكتاب دا أُسْمه كتاب يَشُوع و الكِلْمة يَشُوع، معناتها اللّه هو المُنجّي. و يَشُوع دا هو مُساعِد مُوسَى و هو القَاد بني إسرائيل بعد مَوْت مُوسَى. و الكتاب دا، يحجّي بككيف بني إسرائيل شالوا بلد كَنْعَان و ألْقاسموها أمْبَيْناتهم و دا وكت اللّه حقّق وعده الواعد بيه جُدودهم و قال ينْطيهم البلد دي.
الكتاب دا عِنْده تلاتة قِسِم. القِسِم الأوّل يكلِّم بككيف اللّه وقّف ألْمي بحر الأُرْدُن و بني إسرائيل قطعوا البحر. و بعد دا، مشوا حاصروا حِلّة أَرِيحَا. و راغوا حواليها سبْعة يوم لحدي اللّه رمى درادِرها و همن شالوها. و اللّه ساعد بني إسرائيل و حارب معاهم ضِدّ عُدْوانهم لحدي لِقوا النصُر و شالوا بلد كَنْعَان.
و القِسِم التاني يكلِّم بقسِّمين بلد كَنْعَان. وكت شالوا البلد دي، همن قسّموها أمْبَيْنات قبايِل بني إسرائيل الأتنا عشر. أيِّ قبيلة لِقت أرْض ورثتها الواجِب ليها.
و القِسِم الأخير يكلِّم بجدِّدين المُعاهدة. و دا، وكت يَشُوع جدّد المُعاهدة مع اللّه. و في المُعاهدة دي، بني إسرائيل قالوا ما يعبُدوا إلٰـهات بلد كَنْعَان و لاكن يعبُدوا اللّه بس. و دا أشان اللّه مرقاهم من بلد مَصِر و حفضاهم في درِبهم في الصحراء و أنْطاهم بلد كَنْعَان ليسْكُنوا في بُيوت الهمن ما بنوهم و ياكُلوا من زِراعة الهمن ما تَيْربوها. و الكتاب دا يكمِّل بمَوْت يَشُوع.