عَدد 25

بني إسرائيل عبدوا إلٰـه آخر

١ وَكِتْ بَنِي إِسْرَائِيلْ قَعَدَوْا فِي شِطِّيمْ، قَمَّوْا يَفْسُدُوا مَعَ بَنَاتْ الْمُوَابِيِّينْ. ٢ بَنَاتْ الْمُوَابِيِّينْ يَعَزِمَنْ بَنِي إِسْرَائِيلْ فِي قَدِّمِينْ الضَّحَايَا لِإِلٰـهَاتْهِنْ. وَ هُمَّنْ يَاكُلُوا مَعَاهِنْ لَحَمْ ضَحَايَاهِنْ وَ يَسْجُدُوا لِإِلٰـهَاتْهِنْ. ٣ وَ بِمِثِلْ دَا، بَنِي إِسْرَائِيلْ شَارَكَوْا فِي عِبَادَةْ إِلٰـهْ بَعَلْ هَنَا جَبَلْ فَعُورْ وَ اللّٰهْ غِضِبْ غَضَبْ شَدِيدْ ضِدُّهُمْ.

٤ وَ اللّٰهْ قَالْ لِمُوسَى: «أَكْرُبْ كُلَّ كُبَارَاتْ الشَّعَبْ الْفَسَدَوْا وَ جِيبْهُمْ قِدَّامِي أَنَا اللّٰهْ وَ قَابِلْهُمْ لِلْحَرَّايْ وَ أَشْنِقْهُمْ. وَ بَيْدَا، غَضَبِي الْمُحْرِقْ بَتَّانْ مَا يَلْحَقْهُمْ لِبَنِي إِسْرَائِيلْ.»

٥ وَ مُوسَى قَالْ لِلْقُضْيَاءْ هَنَا بَنِي إِسْرَائِيلْ: «أَيِّ وَاحِدْ مِنْكُو يَكْتُلْ رُجَالَهْ الشَّارَكَوْا فِي عِبَادَةْ إِلٰـهْ بَعَلْ هَنَا جَبَلْ فَعُورْ.»

٦ وَ وَكِتْ بَنِي إِسْرَائِيلْ قَاعِدِينْ يَبْكُوا فِي مَدَخَلْ خَيْمَةْ الْإِجْتِمَاعْ، فِي رَاجِلْ مِنْ بَنِي إِسْرَائِيلْ جَايِ لِأَخْوَانَهْ مَعَ مَرَةْ مِدْيَانِيَّةْ. وَ مُوسَى وَ كُلَّ مُجْتَمَعْ بَنِي إِسْرَائِيلْ شَافَوْه. ٧ وَ خَلَاصْ فِي الْبَكَانْ دَا، فِينْحَاسْ وِلَيْد أَلِعَازَرْ وِلَيْد هَارُونْ رَاجِلْ الدِّينْ، قَمَّ مِنْ أُسُطْ مُجْتَمَعْ بَنِي إِسْرَائِيلْ وَ شَالْ حَرْبَةْ فِي إِيدَهْ. ٨ وَ تَابَعْ الرَّاجِلْ لَحَدِّي فِي لُبّ الْخَيْمَةْ وَ طَعَنَاهُمْ هُمَّنْ الْإِتْنَيْن طَعْنَةْ وَاحِدَةْ بَسْ. الرَّاجِلْ وَ الْمَرَةْ طَعَنَاهُمْ فِي بُطُونْهُمْ. وَ خَلَاصْ الْوَبَاءْ وَقَفْ مِنْ بَنِي إِسْرَائِيلْ. ٩ وَ الْمَاتَوْا مِنْ الْوَبَاءْ دَا، عَدَدْهُمْ 24 000 نَاسْ.

المُعاهدة مع فِينْحَاس

١٠ وَ اللّٰهْ حَجَّى لِمُوسَى وَ قَالْ: ١١ «فِينْحَاسْ وِلَيْد أَلِعَازَرْ وِلَيْد هَارُونْ رَاجِلْ الدِّينْ وَقَّفْ غَضَبِي مِنْ بَنِي إِسْرَائِيلْ وَكِتْ وَصَّفْ غِيرْتِي أَنَا اللّٰهْ فِي أُسُطْهُمْ. وَ بِسَبَبْ الشَّيّءْ السَّوَّاهْ فِينْحَاسْ، أَنَا بَتَّانْ مَا نِوَصِّفْ غِيرْتِي وَ نِكَمِّلْ بَنِي إِسْرَائِيلْ. ١٢ أَشَانْ دَا، قُولْ لَيَّهْ أَنَا نَنْطِيهْ مُعَاهَدَتِي هَنَا السَّلَامْ. ١٣ وَ الْمُعَاهَدَةْ دِي تَبْقَى مَعَايَهْ هُو وَ ذُرِّيّتَهْ الْيَجُوا مِنْ بَعَدَهْ. وَ هِي تَضْمَنْ لَيْهُمْ خِدْمَةْ رُجَالْ الدِّينْ لِلْأَبَدْ أَشَانْ هُو وَصَّفْ غِيرْتَهْ فِي شَانِي أَنَا إِلٰـهَهْ وَ سَوَّى كَفَّارَةْ لِذُنُوبْ بَنِي إِسْرَائِيلْ.»

١٤ وَ الرَّاجِلْ الْمِنْ بَنِي إِسْرَائِيلْ الْكَتَلَوْه مَعَ الْمِدْيَانِيَّةْ أُسْمَهْ زِمْرِي وِلَيْد سَالُو شَيْخ هَنَا عَايِلَةْ مِنْ قَبِيلَةْ شِمْعُونْ. ١٥ وَ الْمَرَةْ الْمِدْيَانِيَّةْ الْكَتَلَوْهَا أُسُمْهَا كُزْبِي بِنَيَّةْ صُورْ كَبِيرْ هَنَا خَشُمْ بَيْت مِنْ خُشُومْ بُيُوتْ مِدْيَانْ.

١٦ وَ خَلَاصْ، اللّٰهْ حَجَّى لِمُوسَى وَ قَالْ: ١٧ «أَهْجُمُوا الْمِدْيَانِيِّينْ وَ أَكْتُلُوهُمْ. ١٨ أَشَانْ هُمَّنْ غَشَّوْكُو فِي مُشْكِلَةْ فَعُورْ وَ فِي مُشْكِلَةْ أَخُتْهُمْ كُزْبِي بِنْت كَبِيرْ مِدْيَانْ الْكَتَلَوْهَا فِي يَوْم الْوَبَاءْ النَّزَلْ فِي مُشْكِلَةْ فَعُورْ.»