٢٤
١ وَ وَكِتْ بَلْعَامْ عِرِفْ كَدَرْ اللّٰهْ يِدَوْر يِبَارِكْ بَنِي إِسْرَائِيلْ،
هُو مَا سَوَّى مِثِلْ الْمَرَّاتْ الْأَوَّلْ لِيَعَرِفْ الْغَيْب وَ لَاكِنْ وَجَّهْ عَلَيْ الصَّحَرَاء.
٢ وَ وَكِتْ بَلْعَامْ رَفَعْ رَاسَهْ،
شَافْ كُلَّ بَنِي إِسْرَائِيلْ نَازْلِينْ حَسَبْ قَبَايِلْهُمْ.
وَ خَلَاصْ رُوحْ اللّٰهْ نَزَلْ فَوْقَهْ.
٣ وَ بَدَا بِالشِّعِرْ وَ قَالْ:
«دَا كَلَامْ بَلْعَامْ وِلَيْد بَعُورْ.
دَا كَلَامْ الرَّاجِلْ الْيِشِيفْ عَدِيلْ.
٤ دَا كَلَامْ النَّادُمْ
الْيَسْمَعْ كَلَامْ الْإِلٰـهْ
وَ وَكِتْ يَسْجُدْ،
عُيُونَهْ يِنْفَتْحُوا
يِشِيفْ الرُّؤْيَةْ
الْيِوَصِّفْهَا لَيَّهْ اللّٰهْ الْقَادِرْ.
٥ خِيَمْكُو سَمْحِينْ،
يَا ذُرِّيَّةْ يَعْقُوبْ،
وَ مَسَاكِنْكُو التَّسْكُنُوا فَوْقهُمْ،
يَا بَنِي إِسْرَائِيلْ.
٦ خِيَمْكُو مَرْصُوصِينْ مِثِلْ وَادِي
وَ مِثِلْ جِنَيْنَاتْ فِي خَشُمْ الْبَحَرْ
وَ مِثِلْ شَدَرْ الْكِتِرْ الْاللّٰهْ قَوَّمَهْ
وَ مِثِلْ شَدَرْ الْأَرْز فِي خَشُمْ الْأَلْمِي.
٧ أَلْمِي يِسِيلْ مِنْ عَيْنَهْ
وَ بِذِرْتَهْ يَزْقُوهَا بِأَلْمِي كَتِيرْ.
وَ مَلِكْهُمْ يَبْقَى زِيَادَةْ مِنْ الْمَلِكْ أَقَاقْ
وَ مَمْلَكَتَهْ تَبْقَى قَوِيَّةْ.
٨ وَ الْإِلٰـهْ مَرَقَاهُمْ
مِنْ بَلَدْ مَصِرْ
وَ عِنْدُهُمْ قُدْرَةْ
مِثِلْ قُدْرَةْ الْجَامُوسْ.
وَ يِدَمُّرُوا الْأُمَمْ
الْهُمَّنْ عُدْوَانْهُمْ
وَ يِطَعُّنُوهُمْ بِنُشَّابْهُمْ
وَ يِكَسُّرُوا عُضَامْهُمْ.
٩ هُمَّنْ مِثِلْ الدُّودْ الْيَبْرُكْ
وَ الدُّودَايْ التَّرْقُدْ.
يَاتُو الْيَقْدَرْ يِقَوِّمْهُمْ؟
مَبْرُوكْ الْيِبَارِكُّو
وَ مَلْعُونْ الْيَلْعَنْكُو.»
١٠ وَ خَلَاصْ بَلَاقْ زِعِلْ ضِدّ بَلْعَامْ وَ ضَرَبْ أَمْبَيْنَاتْ إِيدَيْنَهْ وَ قَالْ:
«أَنَا نَادَيْتَكْ لِتَلْعَنْ لَيِّ عُدْوَانِي.
وَ دَاهُو لِتَالِتْ مَرَّةْ إِنْتَ بَارَكْتُهُمْ!
١١ يَلَّا!
أَمْشِي بَلَدَكْ!
أَوَّلْ أَنَا قُلْت نِشَرِّفَكْ وَ لَاكِنْ دَاهُو اللّٰهْ دَحَرَكْ مِنْ الشَّرَفْ دَا.»
١٢ وَ بَلْعَامْ رَدَّ لِبَلَاقْ وَ قَالْ:
«أَنَا كَلَّمْتُهُمْ لِنَاسَكْ الْإِنْتَ رَسَّلْتُهُمْ وَ قُلْت:
١٣ ‹كَنْ بَلَاقْ يَنْطِينِي كُلَّ الْفُضَّةْ وَ الدَّهَبْ الْفِي بَيْتَهْ كُلَ،
أَنَا مَا نَقْدَرْ نِسَوِّي شَيّءْ ضِدّ أَمُرْ اللّٰهْ وَ أَنَا بِنَفْسِي مَا نَقْدَرْ نِسَوِّي خَيْر وَ لَا شَرّ.
أَنَا نُقُولْ إِلَّا الْكَلَامْ الْاللّٰهْ قَالَهْ بَسْ.›»
بَلْعَام وصّف الشيّء اليكون
١٤ وَ بَتَّانْ بَلْعَامْ قَالْ:
«هَسَّعْ،
قُبَّالْ مَا نِقَبِّلْ لِشَعَبِي،
تَعَالْ نِأَوْرِيكْ بِالشَّيّءْ الْيِسَوِّيهْ الشَّعَبْ دَا بَعَدَيْن فِي شَعَبَكْ.»
١٥ وَ خَلَاصْ،
بَدَا بِالشِّعِرْ وَ قَالْ:
«دَا كَلَامْ بَلْعَامْ وِلَيْد بَعُورْ.
دَا كَلَامْ الرَّاجِلْ الْيِشِيفْ عَدِيلْ.
١٦ دَا كَلَامْ النَّادُمْ
الْيَسْمَعْ كَلَامْ الْإِلٰـهْ
وَ عِنْدَهْ عِلِمْ مِنْ الْعَالِي
وَ وَكِتْ يَسْجُدْ،
عُيُونَهْ يِنْفَتْحُوا
يِشِيفْ الرُّؤْيَةْ
الْيِوَصِّفْهَا لَيَّهْ اللّٰهْ الْقَادِرْ.
١٧ أَنَا نِشِيفْ الْجَايِ
وَ لَاكِنْ مَا يَجِي هَسَّعْ.
أَنَا قَاعِدْ نِشِيفَهْ
وَ لَاكِنْ مَا مِنْ قَرِيبْ.
مِنْ ذُرِّيَّةْ يَعْقُوبْ تَطْلَعْ نَجْمَةْ
وَ مِنْ بَنِي إِسْرَائِيلْ يَجِي مَلِكْ.
بِعَصَاةْ مُلْكَهْ يَكْسِرْ جَبْهَةْ مُوَابْ
وَ يَكْتُلْ كُلَّ ذُرِّيَّةْ شِيتْ.
١٨ وَ بَلَدْ أَدَوْم يِشِيلْهَا
وَ يِشِيلْ سَعِيرْ بَلَدْ عُدْوَانْهُمْ
وَ بَنِي إِسْرَائِيلْ قُدْرِتْهُمْ تِزِيدْ.
١٩ وَ يَجِي مَلِكْ قَوِي
مِنْ ذُرِّيَّةْ يَعْقُوبْ
وَ يِدَمِّرْ النَّاسْ
الْفَضَّلَوْا فِي الْمَدِينَةْ.»
٢٠ وَ بَلْعَامْ شَافْ بَلَدْ الْعَمَالِقْ وَ بَدَا بِالشِّعِرْ وَ قَالْ:
«عَمَالِقْ هُو الْأَوَّلْ فِي الْأُمَمْ
وَ لَاكِنْ فِي الأَخِيرْ يِدَّمَّرْ.»
٢١ وَ بَلْعَامْ شَافْ بَلَدْ الْقِينِيِّينْ وَ بَدَا بِالشِّعِرْ وَ قَالْ:
«بُيُوتْكُو قَاعِدِينْ بِأَمَانْ
مِثِلْ عُشُوشْ فِي رَاسْ الْحَجَرْ.
٢٢ لَاكِنْ بَلَدْ الْقِينِيِّينْ تَحْرَقْ بِنَارْ
وَكِتْ أَشُورْ يَكْرُبْكُو مَسَاجِينْ.»
٢٣ وَ بَتَّانْ بَلْعَامْ بَدَا بِالشِّعِرْ وَ قَالْ:
«يَا خَسَارِتْنَا!
يَاتُو يَقْدَرْ يِعِيشْ
كَنْ الْإِلٰـهْ بَسْ جَعَلَهْ مِثِلْ دَا؟
٢٤ فِي سُفُنْ يَجُوا مِنْ قُبْرُصْ.
يَظُلْمُوا أَشُورْ وَ يَظُلْمُوا عِبَارْ
وَ هُمَّنْ كُلَ يِدَّمَّرَوْا.»
٢٥ وَ خَلَاصْ،
بَلْعَامْ قَبَّلْ بَلَدَهْ وَ بَلَاقْ كُلَ شَالْ دَرْبَهْ.