يَعْقُوب يبارِك أوْلاده
٤٩
١ وَ بَعَدْ دَا،
يَعْقُوبْ قَالْ لِعِيَالَهْ:
«لِمُّوا تَعَالُوا،
أَنَا نِبَارِكُّو وَ نِخَبِّرْكُو بِالشَّيّءْ الْبَعَدَيْن يُكُونْ لَيْكُو.
٢ «تَعَالُوا وَ أَسْمَعَوْا،
يَا عِيَالْ يَعْقُوبْ.
أَسْمَعَوْنِي أَنَا أَبُوكُو إِسْرَائِيلْ.
٣ «يَا رَأُوبِينْ،
إِنْتَ وِلَيْدِي الْبِكِرْ،
إِنْتَ بَسْ الْأَوَّلْ وِلِدْتَكْ
وَكِتْ عِنْدِي قُدْرَةْ.
إِنْتَ فُتّْ أَخْوَانَكْ بِالشَّرَفْ
وَ بِالْقُدْرَةْ هَنَا الْبُكُورِيَّةْ.
٤ لَاكِنْ إِنْتَ مَا تَلْقَى الْكُبُورِيَّةْ
أَشَانْ إِنْتَ قَمَّيْت
مِثِلْ أَلْمِي فَايِرْ.
شَهْوَتَكْ غَلَبَتَكْ
وَ دَخَلْت فِي مَرْتِي
وَ تَلَّفْت شَرَفِي.
٥ «شِمْعُونْ وَ لَاوِي هُمَّنْ أَخْوَانْ
وَ أَسْتَفَقَوْا لِيِسَوُّوا الْعُنُفْ.
٦ لَاكِنْ أَنَا مَا نِشْتَرِكْ مَعَاهُمْ
وَ قَلْبِي مَا يَرْضَى بِفِعِلْهُمْ دَا.
أَشَانْ فِي زَعَلْهُمْ،
هُمَّنْ كَتَلَوْا رُجَالْ
وَ فِي غَبِينِتْهُمْ،
عَوَّقَوْا تِيرَانْ.
٧ أَنَا نَلْعَنْ زَعَلْهُمْ الشَّيْن
وَ غَبِينِتْهُمْ الْفَسْلَةْ.
أَنَا نِشَتِّتْ عِيَالْهُمْ
فِي لُبّ قَبِيلَةْ يَعْقُوبْ
وَ يَقْعُدُوا مُفَرَّقِينْ
فِي تُرَابْ إِسْرَائِيلْ.
٨ «يَا يَهُوذَا،
أَخْوَانَكْ يَشْكُرُوكْ
وَ عُدْوَانَكْ يِدَنْقُرُوا لَيْك
وَ أَخْوَانَكْ يَسْجُدُوا لَيْك.
٩ يَا يَهُوذَا،
إِنْتَ مِثِلْ فَرْخ الدُّودْ
الْقَمَّ مِنْ رِمِّتَهْ
إِنْتَ مِثِلْ دُودْ الرَّقَدْ أَوْ دُودَايْ،
يَاتُو يَقْدَرْ يِقَوِّمَهْ؟
١٠ عَصَاةْ الْمُلُكْ
تَقْعُدْ فِي عَايِلَةْ يَهُوذَا
وَ عَصَاةْ الْحُكُمْ كُلَ
مَا تَمْرُقْ مِنْ إِيدَيْهُمْ
لَحَدِّي يَجِي النَّادُمْ
الْوَاجِبْ لَيَّهْ الْمُلُكْ.
وَ كُلَّ الشُّعُوبْ يِكَرُّمُوهْ.
١١ فِي شَدَرَةْ الْعِنَبْ
يَرْبُطْ حُمَارَهْ
أَيْوَى،
فِي شَدَرَةْ الْعِنَبْ السَّمْحَةْ
يَرْبُطْ دَحَشَهْ.
فِي الْخَمَرْ يِغَسِّلْ خَلَقَهْ
فِي عَصِيرْ الْعِنَبْ يِغَسِّلْ لُبَاسَهْ.
١٢ وَ عُيُونَهْ حُمُرْ مِنْ الْخَمَرْ
وَ سُنُونَهْ بُيُضْ زِيَادَةْ مِنْ اللَّبَنْ.
١٣ «زَبُلُونْ يَسْكُنْ فِي خَشُمْ الْبَحَرْ
بَكَانْ الْمَرَاكِبْ الْكُبَارْ يَقِيفُوا فَوْقَهْ.
وَ حُدُودْ تُرَابَهْ
يِوَصُّلُوا لَحَدِّي حِلَّةْ صَيْدَا.
١٤ «يَسَّاكَرْ مِثِلْ حُمَارْ الشَّدِيدْ
الرَّاقِدْ فِي الزَّرِيبَةْ.
١٥ هُو شَافْ الْبَكَانْ الرَّاقِدْ فَوْقَهْ دَا سَمَحْ
وَ الْبَلَدْ دِي حَلُوَّةْ.
وَ دَنْقَرْ لِيِشِيلْ التَّقَلَةْ
وَ قَصَّدْ لِيَخْدِمْ مِثِلْ عَبِدْ.
١٦ «دَانْ كُلَ يَحْكِمْ شَعَبَهْ
مِثِلْ بَنِي إِسْرَائِيلْ الْآخَرِينْ
يَحْكُمُوا قَبَايِلْهُمْ.
١٧ دَانْ مِثِلْ الدَّابِي
فِي الدَّرِبْ
وَ هُو مِثِلْ أَمْ شِدَيْقَاتْ
فِي خَشُمْ الطَّرِيقْ.
هُو يِعَضِّي رِجِلْ الْجُوَادْ
وَ يَرْمِي الرَّاكِبْ.
١٨ «يَا اللّٰهْ،
نَرْجَى فَزَعَكْ!
١٩ «قَادْ،
الْحَرَامِيِّينْ هَجَمَوْه
لَاكِنْ هُو غَلَبَاهُمْ وَ طَرَدَاهُمْ.
٢٠ «تُرَابْ أَشِيرْ يِقَوِّمْ مَعَاشْ كَتِيرْ
الْيَبْقَى أَكِلْ سَمَحْ لِلْمُلُوكْ.
٢١ «نَفْتَالِي مِثِلْ غَزَالَاي الْحُرَّةْ
التِّجِيبْ عِيَالْ سَمْحِينْ.
٢٢ «يُوسُفْ مِثِلْ شَدَرَةْ
الْقَاعِدَةْ جَنْب الْأَلْمِي
التَّلْدَ عِيَالْ كَتِيرِينْ
وَ فُرُوعْهَا يَطْلَعَوْا فَوْق
مِنْ الدُّرْدُرْ.
٢٣ سِيَادْ النُّبَّالْ جَقَّوْه
وَ هَارَجَوْه وَ حَارَبَوْه.
٢٤ لَاكِنْ هُو كَرَبْ نُبَّالَهْ عَدِيلْ
وَ إِيدَيْنَهْ ثَابْتِينْ.
تَلْقَى الْبَرَكَةْ
بِقُدْرَةْ اللّٰهْ الْجَبَّارْ،
إِلٰـهْ يَعْقُوبْ،
أَيْوَى،
بِأُسُمْ اللّٰهْ الرَّاعِي الْيَحْمِي إِسْرَائِيلْ.
٢٥ أَيْوَى،
بِقُدْرَةْ اللّٰهْ الْقَادِرْ إِلٰـهْ أَبُوكْ،
إِنْتَ تَلْقَى الْبَرَكَةْ وَ الْمُسَاعَدَةْ.
تَلْقَى الْبَرَكَةْ
هَنَا الْمَطَرَةْ التَّنْزِلْ مِنْ السَّمَاءْ
وَ الْأَلْمِي الْيَطْلَعْ مِنْ الْأَرْض.
تَلْقَى الْبَرَكَةْ
هَنَا وَالُودَةْ الْعَوِينْ
وَ الْبَهَايِمْ.
٢٦ وَ الْبَرَكَةْ التَّلْقَاهَا
مِنْ أَبُوكْ دِي،
هِي فَايْتَةْ الْبَرَكَةْ
هَنَا الْحُجَارْ الْقُدَامْ.
وَ الْأَشْيَاءْ الْحَلُوِينْ زِيَادَةْ
مِنْ مَالْ هَنَا الْجِبَالْ الزَّمَانْ.
يَا يُوسُفْ،
خَلِّي بَرَكَةْ أَبُوكْ تَنْزِلْ فِي رَاسَكْ،
إِنْتَ الْبِقِيتْ سُلْطَانْ فِي أَخْوَانَكْ.
٢٧ «بَنْيَامِينْ خَطِيرْ
مِثِلْ مَرْفَعِينْ الْيَكْتُلْ.
بِفَجُرْ،
يَهْجِمْ عُدْوَانَهْ
وَ بِعَشِيَّةْ،
يِقَسِّمْ الْغَنِيمَةْ مَعَ أَخْوَانَهْ.»
٢٨ وَ دَوْل الْقَبَايِلْ الْأَتْنَا عَشَرْ هَنَا إِسْرَائِيلْ.
وَ دَا كَلَامْ الْأَبُوهُمْ قَالَهْ وَكِتْ بَارَكَاهُمْ.
وَ لِأَيِّ وَاحِدْ مِنْهُمْ بَارَكَهْ بَرَكَةْ خَاصَّة.
مَوْت يَعْقُوب
٢٩ وَ يَعْقُوبْ كَلَّمْ لِعِيَالَهْ وَ قَالْ:
«أَنَا قَرِيبْ نُمُوتْ.
وَ كَنْ أَنَا مُتّْ،
أَدْفُنُونِي فِي قَبُرْ جُدُودِي.
وَ الْقَبُرْ دَا،
هُو الْكَرْكُورْ الْفِي زَرَعْ هَنَا عَفْرُونْ الْحِتِّي.
٣٠ وَ الْكَرْكُورْ دَا فِي زَرَعْ فِي مَكْفِيلَةْ صَبَاحْ لِحِلَّةْ مَمْرَا،
فِي بَلَدْ كَنْعَانْ.
وَ إِبْرَاهِيمْ شَرَى الزَّرَعْ دَا مِنْ عَفْرُونْ الْحِتِّي أَشَانْ يَبْقَى بَكَانْ هَنَا قَبُرْ هَنَايَهْ حَلَالَهْ.
٣١ وَ فِي الْبَكَانْ دَا بَسْ،
دَفَنَوْا إِبْرَاهِيمْ وَ مَرْتَهْ سَارَةْ وَ وِلَيْدهُمْ إِسْحَاقْ وَ مَرْتَهْ رِفْقَةْ.
وَ فِي الْبَكَانْ دَا بَسْ،
أَنَا دَفَنْت مَرْتِي لَيْئَةْ.
٣٢ وَ الزَّرَعْ وَ الْكَرْكُورْ دَوْل،
إِبْرَاهِيمْ شَرَاهُمْ مِنْ الْحِتِّيِّينْ.»
٣٣ وَ وَكِتْ يَعْقُوبْ كَمَّلْ وَصِيّتَهْ لِعِيَالَهْ دَا،
قَبَّلْ رَقَدْ وَ خَلَاصْ مَاتْ وَ لِحِقْ أَبَّهَاتَهْ.