تكوين 38

يَهُوذَا و تَامَار

١ وَ فِي الْوَكِتْ دَا، يَهُوذَا فَرَقْ مِنْ أَخْوَانَهْ وَ مَشَى بَكَانْ رَاجِلْ وَاحِدْ أُسْمَهْ حِيرَى مِنْ حِلَّةْ عَدُلَّامْ. ٢ وَ فِي الْبَكَانْ دَا، يَهُوذَا شَافْ بِنَيَّةْ وَاحِدَةْ وَ أَبُوهَا مِنْ كَنْعَانْ أُسْمَهْ شُوعْ. وَ يَهُوذَا أَخَدْ الْبِنَيَّةْ دِي وَ دَخَلْ بَيْهَا. ٣ وَ هِي بِقَتْ غَلْبَانَةْ وَ وِلْدَتْ لَيَّهْ وِلَيْد وَ يَهُوذَا سَمَّاهْ عِيرْ. ٤ وَ بَتَّانْ بِقَتْ غَلْبَانَةْ وَ وِلْدَتْ وِلَيْد وَ سَمَّتَهْ أُنَانْ. ٥ وَ بَتَّانْ كُلَ وِلْدَتْ وِلَيْد وَ سَمَّتَهْ شِيلَى. وَ فِي الْوَكِتْ الْهِي وِلْدَتْ فَوْقَهْ دَا، هُمَّنْ قَاعِدِينْ فِي حِلَّةْ كَزِيبْ.

٦ وَ يَهُوذَا أَخَدْ لِعِيرْ، وِلَيْدَهْ الْبِكِرْ، مَرَةْ أُسُمْهَا تَامَارْ. ٧ وَ لَاكِنْ عِيرْ، بِكِرْ يَهُوذَا، هُو نَادُمْ فَسِلْ قِدَّامْ اللّٰهْ وَ بِسَبَبْ فَسَالْتَهْ دِي، اللّٰهْ جَعَلْ لَيَّهْ الْمَوْت. ٨ وَ بَعَدْ دَا، يَهُوذَا قَالْ لِوِلَيْدَهْ أُنَانْ: «آخُدْ مَرِةْ أَخُوكْ وَ جِيبْ لَيَّهْ ذُرِّيَّةْ. دَا شَيّءْ الْوَاجِبْ تِسَوِّيهْ لِأَخُوكْ الْمَرْحُومْ.»

٩ وَ لَاكِنْ أُنَانْ عِرِفْ كَدَرْ الذُّرِّيَّةْ دِي مَا تَبْقَى لَيَّهْ هُو. وَ وَكِتْ يَرْقُدْ مَعَ مَرِةْ أَخُوهْ، يِخَلِّي الْمَنِي يِدَفِّقْ بَرَّا أَشَانْ هِي مَا تَبْقَى غَلْبَانَةْ وَ تِجِيبْ ذُرِّيَّةْ لِأَخُوهْ. ١٠ وَ الشَّيّءْ الْأُنَانْ سَوَّاهْ دَا، فَسِلْ قِدَّامْ اللّٰهْ. وَ اللّٰهْ جَعَلْ الْمَوْت لَيَّهْ هُو كُلَ.

١١ وَ فِي الْبَكَانْ دَا، يَهُوذَا قَالْ لِتَامَارْ مَرِةْ وِلَيْدَهْ: «هَسَّعْ دَا، أَمْشِي بَيْت أَبُوكِ وَ أَقْعُدِي أَرْمَلَةْ لَحَدِّي وِلَيْدِي شِيلَى يَبْقَى كَبِيرْ.» أَشَانْ يَهُوذَا خَايِفْ شِيلَى كُلَ يُمُوتْ مِثِلْ أَخْوَانَهْ. وَ خَلَاصْ، تَامَارْ مَشَتْ قَعَدَتْ فِي بَيْت أَبُوهَا.

١٢ وَ بَعَدْ مُدَّةْ طَوِيلَةْ، بِنَيَّةْ شُوعْ مَرِةْ يَهُوذَا مَاتَتْ. وَ وَكِتْ حِزْنَهْ فَاتْ، يَهُوذَا مَشَى حِلَّةْ تِمْنَةْ أَشَانْ يَقْطَعْ صُوفْ غَنَمَهْ. وَ مَشَى مَعَايَهْ رَفِيقَهْ حِيرَى مِنْ حِلَّةْ عَدُلَّامْ. ١٣ وَ نَاسْ قَالَوْا لِتَامَارْ: «دَاهُو نَسِيبْكِ جَايِ تِمْنَةْ لِيَقْطَعْ صُوفْ غَنَمَهْ.» ١٤ وَ خَلَاصْ، هِي سَلَّتْ خُلْقَانْ الْخَبِيبَةْ وَ أَلَّفَّحَتْ بِلَفَّاحَةْ وَ أَصَّرَّمَتْ وَ قَعَدَتْ فِي خَشُمْ بَابْ حِلَّةْ عِنَايِمْ فِي دَرِبْ حِلَّةْ تِمْنَةْ. أَشَانْ هِي عِرْفَتْ كَدَرْ شِيلَى بِقِي كَبِيرْ وَ مَا أَنْطَوْهَا لَيَّهْ أَشَانْ تَبْقَى مَرْتَهْ.

١٥ وَ يَهُوذَا شَافْهَا وَ حَسَبْهَا مَرَةْ شَرْمُوطَةْ أَشَانْ هِي أَصَّرَّمَتْ. ١٦ وَ هُو وَجَّهْ عَلَيْهَا، وَ مَشَى لَيْهَا وَ قَالْ: «أَنَا نِدَوْر نَرْقُدْ مَعَاكِ.» وَ لَاكِنْ هُو مَا عِرِفْ كَدَرْ هِي مَرِةْ وِلَيْدَهْ. وَ تَامَارْ قَالَتْ لَيَّهْ: «كَنْ رَقَدْت مَعَايِ دَا، تَنْطِينِي شُنُو؟» ١٧ وَ هُو رَدَّ لَيْهَا وَ قَالْ: «نِرَسِّلْ لَيْكِ سَخَلْ مِنْ عِنْزَيِّ.» وَ هِي قَالَتْ لَيَّهْ: «إِلَّا تَنْطِينِي ضَمَانْ نَكُرْبَهْ لَحَدِّي تِرَسِّلْ لَيِّ السَّخَلْ.» ١٨ وَ هُو قَالْ: «شُنُو الشَّيّءْ النَّنْطِيكِ تَكُرْبِيهْ؟» وَ هِي رَدَّتْ لَيَّهْ وَ قَالَتْ: «أَنْطِينِي خِتْمَكْ بِحَبْلَهْ وَ عَصَاتَكْ.»

وَ هُو أَنْطَاهُمْ لَيْهَا وَ رَقَدْ مَعَاهَا وَ هِي غِلْبَتْ مِنَّهْ. ١٩ وَ بَعَدْ دَا، تَامَارْ قَمَّتْ مَشَتْ بَيْتهَا سَلَّتْ لَفَّاحِتْهَا وَ لِبْسَتْ خُلْقَانْهَا هَنَا الْخَبِيبَةْ.

٢٠ وَ يَهُوذَا أَنْطَى السَّخَلْ لِرَفِيقَهْ الْمِنْ حِلَّةْ عَدُلَّامْ لِيِوَدِّيهْ لِلْمَرَةْ دِي وَ يِشِيلْ لَيَّهْ خُمَامَهْ مِنْهَا. لَاكِنْ هُو مَا لِقِيهَا. ٢١ وَ سَأَلْ نَاسْ الْحِلَّةْ وَ قَالْ: «وَيْن الْمَرَةْ الشَّرْمُوطَةْ الْقَاعِدَةْ فِي خَشُمْ دَرِبْ حِلَّةْ عِنَايِمْ؟» وَ هُمَّنْ رَدَّوْا لَيَّهْ: «مَا فِي مَرَةْ شَرْمُوطَةْ فِي الْبَكَانْ دَا.»

٢٢ وَ الرَّاجِلْ قَبَّلْ لِيَهُوذَا وَ قَالْ: «أَنَا مَا لِقِيتْهَا وَ نَاسْ الْحِلَّةْ ذَاتْهُمْ قَالَوْا لَيِّ مَا فِي مَرَةْ شَرْمُوطَةْ فِي الْبَكَانْ دَا.» ٢٣ خَلَاصْ يَهُوذَا قَالْ: «خَلِّي الْخُمَامْ دَا يَقْعُدْ فِي إِيدَيْنهَا أَشَانْ النَّاسْ مَا يِشَّمَّتَوْا لَيْنَا. أَشَانْ أَنَا رَسَّلْت لَيْهَا السَّخَلْ وَ لَاكِنْ إِنْتَ مَا لِقِيتْهَا.»

٢٤ وَ بَعَدْ تَلَاتَةْ شَهَرْ، قَالَوْا لِيَهُوذَا: «دَاهُو تَامَارْ مَرِةْ وِلَيْدَكْ زَنَتْ وَ بِقَتْ غَلْبَانَةْ.» وَ يَهُوذَا قَالْ: «أَمُرْقُوهَا بَرَّا وَ حَرُّقُوهَا!»

٢٥ وَ وَكِتْ قَاعِدِينْ يَمُرْقُوهَا، هِي رَسَّلَتْ لِنَسِيبْهَا يَهُوذَا وَ قَالَتْ: «قُولُوا لَيَّهْ: ‹أَنَا غَلْبَانَةْ مِنْ الرَّاجِلْ سِيدْ الْخُمَامْ دَا.›» وَ قَالَتْ بَتَّانْ: «أَكِّدْ وَ شِيفْ الْخِتِمْ بِحَبْلَهْ دَا وَ الْعَصَاةْ دِي، هَنَا يَاتُو؟»

٢٦ وَ يَهُوذَا أَكَّدْ الْأَشْيَاءْ دَوْل وَ قَالْ: «هِي عِنْدَهَا حَقّ زِيَادَةْ مِنِّي أَشَانْ أَنَا مَا جَوَّزْتَهَا لِوِلَيْدِي شِيلَى.» وَ خَلَاصْ، بَتَّانْ مَا قَرَّبْ لَيْهَا.

٢٧ وَ وَكِتْ وَكِتْهَا هَنَا الْوَالُودَةْ تَمَّ، هِي عِرْفَتْ كَدَرْ عِنْدَهَا تِيمَانْ. ٢٨ وَ وَكِتْ قَاعِدَةْ تَلْدَ، وَاحِدْ مِنْهُمْ سَلَّ إِيدَهْ وَاحِدَةْ. وَ الْوَلَّادَةْ مَسَّكَتْ إِيدَهْ وَ رَبَطَتْ لَيَّهْ خَيْط أَحْمَرْ وَ قَالَتْ: «هُو دَا الْيَمْرُقْ أَوَّلْ.» ٢٩ لَاكِنْ هُو جَبَدْ إِيدَهْ وَ أَخُوهْ مَرَقْ قُبَّالَهْ. وَ الْوَلَّادَةْ قَالَتْ: «لِقِيتْ دَرِبْ مِنْ وَيْن مَرَقْت؟» أَشَانْ دَا، سَمَّوْه فَارِصْ (مَعَنَاتَهْ دَرِبْ هَنَا مَرِقِينْ). ٣٠ وَ بَعَدْ دَا، أَخُوهْ الْآخَرْ مَرَقْ بِحَبِلْ أَحْمَرْ فِي إِيدَهْ وَ سَمَّوْه زَارَحْ (مَعَنَاتَهْ أَحْمَرْ تُشْو).