आतमा मन ला परखा
4
1 ए मयारू संगता मन, हर एक आतमा कर उपर बिसवास झईन करा, बलकि आतमा मन ला परखा, कि ओहर परमेसवर कती ले हवे कि नईए, काबरकि ढेरे अकन झूठा अगमजानी मन ए संसार में निकेल आईन हवें। 2 परमेसवर कर आतमा ला तुमन एही कस में चिन सकत हा, ओ सबेच मईनसे जेहर माएन लेथे कि, ईसू मसीह ए धरती में मईनसे कर रूप में आईस, ओमें परमेसवर कर आतमा हवे, 3 बकिन ओ सबेच मईनसे जेमन ईसू ला नई माने, ओमें परमेसवर कर आतमा नईए। एहर ओ मईनसे लागे, जेमें मसीह के बिरोध कर आतमा हवे, जेकर बारे में तुमन सुने हा, कि ओहर अवईया हवे, अऊ अझरोच ले ओहर संसार में हवे। 4 ए मोर मयारू लईका मन, तुमन परमेसवर कर अपन लागा, एकर ले तुमन ए झूठा अगमजानी कर उपरे जय पाए हवा, काबरकि परमेसवर जेहर तुमन में हवे, ओहर संसार में रहोईया ले बड़खा हवे। 5 ओमन ए संसार कर अपन लागें, ओकरे ले ओमन संसार कर गोएठ गोठियाथें, अऊ संसार ओमन कर गोएठ ला सुनथे। 6 हमरे परमेसवर कर अपन लागन। एकरे ले जेहर परमेसवर ला जानथे, ओहर हमर गोएठ ला सुनथे, बकिन जेहर परमेसवर कर ना हवे, ओहर हमर गोएठ ला नई सुने। एही नियर हमरे मईनसे मन कर पहिचान करथी, कि काकर जग सत कर आतमा हवे, अऊ काकर जग झूठ कर आतमा हवे।एक दूसर ले मया करा
7 ए मयारू संगता मन, हमरे एक दुसर ले मया करी, काबरकि मया हर परमेसवर कती ले मिलथे। जेहर मया करथे, ओहर परमेसवर ले जनमीस हे, अऊ परमेसवर ला जानथे। 8 ओ मईनसे जेहर मया नई करे, ओहर परमेसवर ला नई जाने, काबरकि परमेसवर मया हवे। 9 परमेसवर हर हमर जग अपन मया ला ए नियर देखाईस, कि ओहर अपन एकेच ठन बेटा ला संसार में भेजिस, ताकि हमरे ओकर दुवारा अमर जिनगी पाई। 10 मया एमें नईए कि हमरे परमेसवर जग मया करेन, बकिन मया एमें हवे कि परमेसवर हर हमर जग मया करिस, अऊ अपन बेटा ला भेजिस अऊ ओहर कुरूस में अपन जान देके हमर पाप कर दंड ला अपन उपरे ले लेहीस।
11 ए मयारू संगता मन, जब परमेसवर हर हमर जग अईसना मया करिस, त हमू मन ला एक दूसर ले मया करे बर चाही। 12 परमेसवर ला कभों कोनो हर नई देखीसे, बकिन हमरे एक दुसर ले मया करबो, त परमेसवर हमर में बने रहथे, अऊ ओकर मया हर हमर में पूरा होए जाथे।
13 परमेसवर हर अपन आतमा ला हमके देहिस हवे, जेहर ए साबित करथे, कि हमरे परमेसवर में बने रहथन अऊ ओहर हमर में बने रहथे। 14 हमरे ओके देखे हन अऊ गवाही देथन, कि दाऊ परमेसवर हर अपन बेटा ला संसार कर उद्धार करोईया कर रूप में भेजीस हवे। 15 कहों कोनो हर ए माएन लेथे, कि ईसू हर परमेसवर कर बेटा लागे, त परमेसवर ओमें बने रहथे, अऊ ओहर परमेसवर में बने रहथे। 16 परमेसवर हमर जग मया करथे, ओला हमरे जानथी अऊ ओकर मया कर उपरे हमर बिसवास हवे।
परमेसवर मया लागे। जे कोनो हर मया करते रहथे, ओहर परमेसवर में बने रहथे अऊ परमेसवर हर ओमें बने रहथे। 17 एही कस मया हर हमर मंझारे पूरा करल गईस हवे, ताकि हमके नियाव कर दिन में भरोसा होए; काबरकि ए संसार में हमरे ओही कस जिनगी जिए हन, जेकस ईसू हर जीये रहिस। 18 मया में डर नई होए, बकिन पका मया हर डर ला निकाल देथे, काबरकि डर कर कारन सजा होथे। अऊ जेहर डराथे, ओहर मया में पका नईए। 19 हमरे एकर ले मया करथन, काबरकि पहिले परमेसवर हर हमर जग मया करीस। 20 अगर कोनो हर ए कहथे, “मंए परमेसवर जग मया करथों,” अऊ अपन भाई जग मया नई करे, त ओहर झूठा हवे, काबरकि जेहर अपन ओ भाई ले मया नई करे, जेला ओहर देखीस हे, त ओहर परमेसवर जग मया नई कएर सके, जेला ओहर नई देखीसे। 21 परमेसवर हर हमके ला ए अगियां देहिसे, कि जे कोनो हर परमेसवर जग मया करथे, ओके अपन भाईयोच जग मया करे बर जरूरी हवे।