परमेसवर कर बेटा ऊपरे बिसवास करबो
5
1 जे कोनो हर ए बिसवास करथे, कि ईसू हर मसीह लागे, त ओहर परमेसवर ले जनमिस हवे, अऊ जे कोनो हर दाऊ जग मया करथे, ओहर ओकर लईकोच जग मया करथे। 2 जब हमरे परमेसवर जग मया करथी, अऊ ओकर अगियां ला मानथी, त एकर ले हमरे जानथी कि हमरे परमेसवर कर लईकोच मन ले मया करथी। 3 परमेसवर जग हमर मया करे कर मतलब ए हवे, कि हमरे ओकर अगियां मन ला मानी, अऊ ओकर अगियां मन कठीन नईए। 4 काबरकि जे कोनो हर परमेसवर ले जनमीस हवे, ओहर संसार कर ऊपरे जय पाथे, अऊ हमरे ईसू मसीह कर ऊपरे बिसवास करे कर चलते संसार कर ऊपरे जय पाथन। 5 त संसार कर ऊपरे जय कोन पाथे? सिरिप ओहीच जेहर ए बिसवास करथे, कि ईसू परमेसवर कर बेटा लागे।6 ओहर ईसू मसीह लागे, जेहर पानी अऊ लहू कर दुवारा आईसa। ओ तो सिरिप पानी ले नई आईस, बकिन पानी अऊ लहू दुनों कर दुवारा आईस। 7 अऊ एहर पबितर आतमा लागे, जेहर एकर बारे में गवाही देथे, काबरकि पबितर आतमा हर सत लागे। 8 गवाही देवईया मन तीन झन हवें, पबितर आत्मा, पानी अऊ लहू अऊ तीनों में सहमती हवे। 9 जब हमरे मईनसे मन कर गवाही ला माएन लेथन, त परमेसवर कर गवाही तो ओकर ले बएढ़ के हवे, अऊ परमेसवर कर गवाही ए हवे कि, ओहर अपन बेटा कर बारे में गवाही देहीस हे। 10 जेहर परमेसवर कर बेटा कर उपरे बिसवास करथे, ओहर अपन हिरदय में ए बात ला जानथे, कि ओकर गवाही हर सच हवे। जेहर परमेसवर कर उपरे बिसवास नई करे, ओहर परमेसवर ला झूठा ठहराथे, काबरकि ओहर ओ गवाही कर उपरे बिसवास नई करीस, जेला परमेसवर हर अपन बेटा कर बारे में देहीस हवे। 11 ओ गवाही एहर लागे कि, परमेसवर हर हमके ला अमर जिनगी देहीसे, अऊ ए जिनगी हर ओकर बेटा में हवे। 12 जेकर जग परमेसवर कर बेटा हवे, ओकर जग अमर जिनगी हवे, अऊ जेकर जग परमेसवर कर बेटा नईए, ओकर जग अमर जिनगीयोच नईए।
अमर जिनगी हमर लागे
13 जेमन परमेसवर कर बेटा कर नांव में बिसवास करथा, तेमन ला मंए ए बात एकर बर लिखत हों, ताकि तुमन जाएन लेआ, कि अमर जिनगी तुमन कर हवे। 14 हमके परमेसवर कर आगू में, हियाव होथे, कि अगर हमरे ओकर मन मुताबिक काहीं मांगथन, त ओहर हमर सुनथे। 15 जब हमरे जानथन कि जे जाएत हमरे ओकर जग मांगथी, ओहर हमर सुनथे, त हमरे एहुच ला जानथी, कि जे जाएत हमरे ओकर जग मांगेन, ओला हमरे पाएन।
16 अगर कोनो अपन भाई ला एकस पाप करत देखथे, जेकर फल मिरतु नईए, त ओहर पराथना करे, अऊ परमेसवर ओके जिनगी देही। मंए ओमन कर बारे में कहत हों, जेमन ओ पाप करिन हवें, जेकर फर मिरतु नईए। एगोट एहू कस पाप होथे, जेकर फल मिरतु होथे। मंए ए नई कहत हों, कि ओहर ओकर बारे में बिनती करे। 17 सबेच गलत काम हर पाप हवे, बकिन एहुच कस पाप हवे, जेकर फल मिरतु नईए।
18 हमरे जानथन कि, जे कोनो हर परमेसवर ले जनमीस हवे, ओहर पाप करतेच नई रहे, बलकि परमेसवर कर बेटा ओके बचाए के राखथे, अऊ ओ दूसट सएतान ओके छुए नई सके। 19 हमरे जानथन कि हमरे परमेसवर कर अपन लागन, अऊ समूचा संसार हर ओ दूसट कर बस में हवे। 20 हमरे एहुच ला जानथी कि परमेसवर कर बेटा आए गईसे, अऊ ओहर हमके सचा परमेसवर ला चिनहे कर समझ देहिसे, अझेर हमरे सचा परमेसवर कर संगति में रहथन, मनेकि ओकर बेटा ईसू मसीह कर संगति में रहथन। एही हर सचा परमेसवर अऊ अमर जिनगी लागे। 21 ए मोर लईका मन, अपन-आप ला मुरती मन ले बचाए के राखा।