3
1 सूना, दाऊ परमेसवर हर हमके ला ढेरेच मया करिस हवे, कि हमरे परमेसवर कर संतान कहाथी अऊ फुरोंच में हमरे परमेसवर कर संतान लागी, एकरे ले संसार हर हमके नई जाने, काबरकि ओहर परमेसवर ला नई जानीस। 2 ए मयारू मन, अब हमरे परमेसवर कर संतान लागी, अऊ अझेर ले ए पता नई चलीस हवे, कि हमरे का बनबो। बकिन हमरे एतना जानथी कि जब ओहर परगट होही, त हमू मन ओकरे कस बएन जाबो, काबरकि हमरे ओके ओही कस देखबो जेकस ओहर हवे। 3 जे कोनो मसीह कर उपरे ए आसा रखथे, ओहर अपन-आप ला ओही कस सुध करथे, जेकस मसीह हर सुध हवे।4 जे कोनो हर पाप करतेच रहथे त, ओहर परमेसवर कर कानून ला टोरथे, काबरकि परमेसवर कर कानून टोरई हर पाप हवे। 5 तुमन जानथा, कि मसीह हर हमर पाप मन ला ले जाए बर परगट होईस। अऊ ओमें कोनो पाप नईए। 6 जे मईनसे हर मसीह में बने रहथे, ओहर पाप करतेच नई रहे, बकिन जे मईनसे हर पाप करथे, ओहर ओके नई देखीसे अऊ ओके नई जाने। 7 ए लईका मन, ककरो बहकावा में झईन आवा, जे मईनसे हर परमेसवर कर देख में बढियां काम करथे, ओहर धरमी हवे, जेकस कि मसीह हर धरमी हवे। 8 जे कोनो हर पाप करतेच रहथे, ओहर सएतान कती ले हवे, काबरकि सएतान हर ओरेच ले पाप करत आईस हे। परमेसवर कर बेटा हर, सएतान कर काम ला नास करे बर परगट होईस। 9 जे कोनो हर परमेसवर ले जनमीस हवे, ओहर पाप नई करतेच रहे, काबरकि परमेसवर कर सुभाव ओमें बने रथे। ओहर पाप करिए नई सके, काबरकि ओहर परमेसवर ले जनमीस हे। 10 एही कस में, हमरे जानथी कि कोन परमेसवर कर संतान लागे अऊ कोन सएतान कर संतान लागे। जेहर परमेसवर कर देख में सही कर काम नई करे, ओहर परमेसवर कर संतान ना हवे, अऊ ओहू हर परमेसवर कर संतान ना हवे, जेहर अपन भाई जग मया नई करे।
एक दुसर के मया करा
11 ओ उपदेस जेला तुमन ओरेच ले सुनेहा, ओहर ए लागे कि हमरे एक दूसर ठन मया करी। 12 हमरे कएन कस झईन बनी, जेहर दुसट सएतान कती ले रहीस अऊ अपन भाई ला माएर मरवाईस। ओहर ओके काबर मारिस? एकर चांड़हे कि ओकर खुद कर काम हर बुरा रहीस, अऊ ओकर भाई कर काम हर परमेसवर कर देख में बढियां रहीस।
13 ए भाई-बहिन मन, अगर संसार कर मईनसे मन तुमन जग बएर करथें, त अचमहों झईन करीहा। 14 हमरे जानथी कि, हमरे मिरतु ले नाएक के जीवन में आए गए हन, काबरकि हमरे अपन भाई-बहिन मन ठे मया करथी। जेहर मया नई करे, ओहर मरल नियर रहथे। 15 जे कोनो हर अपन भाई-बहिन ले बएर रखथे, ओहर अपन मन में जनमरवा हवे, अऊ तुमन जानथा कि कोनो जनमरवा जग अमर जिनगी नई रहे। 16 मसीह हर हमर बरिक अपन जिनगी ला दे देहीस, एही ले हमरे जानथी कि मया का हवे? हमूच मन ला भाई-बहिन मनa बरिक अपन जिनगी ला देहेक चाही। 17 अगर ककरो जग संसार कर धन संपति हवे अऊ ओहर अपन भाई ला देखथे, कि ओके कांही जाएत कर जरूरत हवे, बकिन ओकर उपरे दया नई करे, त ओमें परमेसवर कर मया कईसे बने रईह सकत हे? 18 ए लईका मन, आवा, अब हमरे सिरिप अपन गोएठ अऊ मुंह ले मया नई करब, बकिन अपन काम अऊ सत कर दुवारा भी मया करबो।
19 एकर दुवारा हमरे जानबो कि हमरे सत कर हवन, अऊ जे बात में हमर हिरदे हर हमके ला दोसी ठहराथे, ओही बात में हमरे परमेसवर कर आगु अपन हिरदय ला भरोसा दे सकबो; 20 काबरकि परमेसवर हमर हिरदय ले बड़खा हवे, अऊ ओहर सबेच जाएत ला जानथे।
21 ए मयारू मन, अगर हमर हिरदय हर हमके ला दोसी नई ठहराए, त हमके ला परमेसवर कर आगु में भरोसा होथे, 22 अऊ जे जाएत हमरे ओकर ठे मांगथी, ओहर हमके ला देथे, काबरकि हमरे ओकर अगियां ला मानथी, अऊ ओहीच काम ला करथी, जेहर ओके बढियां लागथे। 23 परमेसवर कर अगियां ए हवे कि, हमरे ओकर बेटा ईसू मसीह कर नांव में बिसवास करी, अऊ जेकस ओहर हमके ला अगियां देहिस हे, ओकरे अनुसार एक दूसर ले मया करी। 24 जेमन ओकर अगियां ला मानथें, ओमन परमेसवर में बने रहथें, अऊ परमेसवर हर ओमन में बने रहथे, अऊ एही कस में हमरे जानथी कि ओहर हमर में रहथे। एला हमरे ओ पबितर आतमा कर दुवारा जानथी, जेला ओहर हमके देहिस हवे।