तीतुस 3

अबिसवासी मन कर मझारे बिसवासी मन कर चाल-सहूर

1 सब झन ला सुरता देवा, कि ओमन हाकीम अऊ अधिकारी मन कर अधीन में रहें अऊ ओमन कर अगींया मानें अऊ सबेच बढ़िहां काम-बूता करे बर तियार रहें। 2 ओमन ला बतावा कि ओमन ककरो बईदनामी झईन करें, झगराहा झईन रहें, बकिन लूरलगहा रहें अऊ सब मईनसे मन कर संगे पूरा नरम सुभाव ले रहें। 3 काबरकि हमू मन आगु बोया रहेन अऊ परमेसवर कर अगींया ला नई मनोईया रहेन। हमरे संसार कर भरम में भुलाए रहेन अऊ दूसर-दूसर मधे कर रिज-रंग कर गुलामी में रहेन। हमरे इसगापारी अऊ जलन में जिनगी बितात रहेन अऊ हमके कोनोच नई पतियात रहीन अऊ हमरे एक दूसर जग बएर करत रहेन। 4 बकिन जब हमर उदधार करोईया परमेसवर कर दया अऊ मईनसे मन बरीक ओकर मया हर परगट होईस, 5 तब ओहर हमर उदधार करीस। एहर हमर कोनो बढ़िहां करम कर चलते नई होईस बकिन एहर परमेसवर कर दया कर चलते होईस। ओहर हमर पाप ला धोए के पबितर आतमा कर जरिये नांवा जनम अऊ नांवा जिनगी देहीस अऊ हमर उदधार करीस। 6 परमेसवर हर ए पबितर आतमा ला हमर उदधार करोईया ईसू मसीह कर चलते हमके ला हरक दिल ले देहीस। 7 तेमेकि हमरे ओकर अनुगरह ले परमेसवर कर देख में बढ़िहां बएन के, अमर जिनगी कर पका असरा में ओकर वारिस बनी।

8 ए बात हर सही हे। मंए चाहथों कि तंए ए बात मन कर बारे में जोर देके गोठियाओ। तेकर ले कि जेमन परमेसवर कर ऊपरे बिसवास करीन हें, ओमन भलाई करे में लगे रहे बर उतसुक रहें। ए बात मन ढेरेच बढ़िहां अऊ मईनसे मन कर फयदा बर हवे। 9 मूसा कर कानहूंन कर बारे में बोया घींचा-तानी, अऊ पीढ़ी कर पूरखानी बात, बिरोध अऊ झगरा ले तंए दुरीहां रहबे, एमन बिगर फयदा कर अऊ फालतू हवें। 10 मईनसे मन कर मझारे फूट करोईया ला, एक-दूई दाएर समूझाए-बुझाए दे, तेकर ओकर जग ले दुरीहां रह। 11 तंए ए जाएन ले कि एकस मईनसे हर बिसवास ले भटेक गईस हे अऊ ओहर पाप करतेच रथे अऊ अपन आप ला दोसी ठहराथे।

ए चिठी कर आखरी बात

12 जे घनी मंए अरतिमास आखिर तुखिकुस ला तोर जग भेजहूं त तंए मोर जग निकुपुलिस सहर में आए कर कोसिस करबे, काबरकि असों कर जड़हा ला मंए उहें बिताए कर बिचार करे हों। 13 जेनास वकील अऊ अपुलोस ला, तंए बढ़िहां ले आगु कर जवाई बर मदेत कर, अऊ देख लेबे कि ओमन ला कोनो जाएत कर कमी-घटी झईन होए पाए। 14 हमर बिसवासी मन भलाई करे में लगे रहे बर सीखें, कि जेमन ला मदेत कर जरूरत हे, ओमन कर मदेत कएर सकें तेमेकि ओमन कर जिनगी हर बेकार झईन होए।

15 जेतना झेमन मोर संगे अझेर हवें ओमन कती ले तोके जोहार अऊ सब बिसवासी जेमन मोके मया करथें, ओहू मन ला जोहार। तुमन सबेच झन कर ऊपरे परमेसवर कर अनुगरह होवत रहे।