तीमुथियुस ला पऊलूस हर समझाईस
4
1 राजा बएन के अवईया अऊ जीयत अऊ मरल मन कर नियाओ करोईया ईसू मसीह अऊ परमेसवर ला हाजीर जाएन के मंए तोके ए आदेस देहथों,
2 कि तंए सुघर खभेर कर परचार कर,
बढ़िहां घनी अऊ रोकावट कर घरीयोच में तियार रह,
मईनसे मन ला समझा,
घुड़का अऊ उतसाहित कर। ए सब जाएत ला तंए बड़खा धीरज कर संगे सिखाओ।
3 मंए एला एकरले बताथों कि अईसन समय आही जब मईनसे मन,
खर-खर सिकछा ला सुने बर नई चाहीं,
बलकी अपन इछा कर अनुसार बात बतोईया गुरू मन ला खोएज लेहीं अऊ ओमन ओही जाएत सिखाहीं जेला ओमन सुने बर चाहीं।
4 ओमन सहीच गोएठ ला सुने बर नई करहीं बलकी झूठ-मूठ कर कहनी-किसा में अपन मन ला लगाहीं।
5 बकिन तंए ए सब बात में सवाचेती रह अऊ दुख ला सहत रह अऊ सुघर खभेर कर परचार कर अऊ अपन सेवा कर सबेच जिमेदारी ला पूरा कर।
6 मंए अपन आप ला परभू बरीक एगोट बली कस चघाल जाथों अऊ मोर मरे कर घनी हर आए पहुंचीसे।
7 मंए परभू बरीक बढ़िहां लड़ाई लएड़ दारे हों,
मंए अपन दऊड़ ला पूरा कएर दारे हों अऊ मंए अपन बिसवास ला समहाएर के राखे हों।
8 परभू कर देख में बढ़िहां जिनगी जीये कर मुकुट ला परभू हर मोर बरीक राखीस हे। सही नियाओ करोईया परभू हर मोके नियाओ कर दिन में ओ मुकुट ला देही अऊ सिरीप मोके ला नई देही बकिन ओ सब झन ला देही,
जेमन ओकर डगर देखे बर घोंखत रथें।
पऊलूस कर आखरी उपदेस
9 मोर जग हालू आए कर कोसिस कर।
10 काबरकि देमास हर,
संसार कर मया में फंएस के मोके छोंएड़ देहीस हे अऊ थिसलुनी सहर में चएल देहीस हे,
करेसकेंस हर गलातिया जिला में अऊ तीतुस हर,
दलमतिया इलाका में चईल गईस हे।
11 खाली लूका हर मोर संगे हवे। मरकुस ला लेके मोर जग आए जा,
काबरकि ओहर परभू कर सेवा में मोर ढेरेच मदेत करथे।
12 तुखिकुस ला मंए इफिसूस सहर में भेजे हों।
13 आए घनी पिछोरी ला लेते लानबे,
जेला मंए तरोआस सहर में करपूस कर घरे छोंएड़ के आए हों। मोर किताब मन ला खास कएर के चाम कर कागदो मन ला लेते लानबे।
14 सिकंदर ठठेर हर मोर ढेरेच बुराई करीस हे,
परभू ओकर करम कर पलटा ओके देही।
15 तंहूच ओकर जग ले सवाचेती रहबे,
काबरकि ओहर हमर सिकछा कर ढेरेच बिरोध करीस हे।
16 मोर पहिलो पेसी कर घनी में कोनो मोर संग नई देहीन,
बकिन सब झेमन मोके ला छोंएड़ देहींन,
बढ़िहां होतीस कि ओमन के एकर लेखा देहे बर झईन परतीस।
17 बकिन परभू हर मोर संगे रहीस अऊ मोके बल देहीस,
तेमेकि मोर जरिये सुघर खभेर कर पूरा परचार हर होए जाए अऊ सब गएर एहूदी मन एला सुईन लें। जेकस बघवा कर मूंह ले कोनो मईनसे ला छोंड़ाथें वईसने परभू हर मोके छोंड़ाईस हे।
18 ओही परभू हर मोके सब बुरा काम ले बचाही अऊ अपन सरग राएज में मोके बढ़िहां समहाएर के पहुंचाही। ओकर बड़ाई जुग-जुग होवत रहे। आमीन।
परेरीत पऊलूस कर आखरी जोहार
19 पिरीसका बहिन अऊ अकविला भाई अऊ ऊनेसिफूरुस कर घरो भेर कर मईनसे मन ला मोर जोहार।
20 इरासतूस हर कुरिंथुस सहर में रुईक गईस हे अऊ मंए तुरफिमूस ला मिलेतूस सहर में छोंएड़ देहे हों,
काबरकि ओहर बेमार रहीस।
21 जड़हा महीना ले आगु तंए इहां आए कर कोसिस करबे,
इबूलुस,
पूदेंस,
लीनुस,
कलऊदिया अऊ सब भाई अऊ बहिन मन तोके जोहार कथें।
22 परभू तोर आतमा कर संगे रहे। तोर ऊपर परमेसवर कर अनुगरह होवत रहे।