आखरी दिन कर पाप कर खतरा
3
1 ए बात ला जाएन ले कि संसार कर आखरी दिन में कठिन समय आही।
2 ओ दिन में मईनसे मन अपनेच आप ले मतलब रखोईया अऊ पईसा कर लोभिया,
बड़खा-बड़खा गोएठ गोठवईया,
घमंडी,
निंदा करोईया,
दाई-दाऊ कर कहल नई मनोईया,
नोन निंदवा,
अऊ अपबितर होहीं।
3 ओमन बिगर मया कर,
छमा नई करोईया,
लाई-चुगली करोईया,
उथुल पेटीया,
कठोर अऊ कसरीहा होहीं
4 ओमन ठगलबरा,
ढींट,
घमंड ले भरल होहीं। ओमन परमेसवर में नही बलकी संसार कर रिज-रंग में मन लगोईया होहीं।
5 ओमन परमेसवर कर भकती कर भेंस तो बनाहीं बकिन ओकर सकती ला नई मानहीं,
एकस मईनसे मन ले डोलहा रईहा।
6 एमन घर में कले-कले घुसेर जाथें,
अऊ जे भभराहीन सवांगीन मन पाप में ठेलाए गईन हवें,
अऊ सब मधे कर रिज-रंग में फंसीन हवें,
ओमन ला अपन कबजा में कएर लेथें।
7 ए सवांगीन मन हमेसा सिखत तो रथें,
बकिन सत ला कभों चिनहे नई सकें।
8 जेकस यनेस अऊ यमबरेस हरे मूसा कर बिरोध करे रहीन,
ओही कस ए मईनसे मन सत कर बिरोध करथें,
एमन अईसन मईनसे हवें,
जेमन कर बुधी हर भुलाए गईस हवे अऊ एमन कर बिसवास हर अनभनिया हवे।
9 बकिन एमन ढेर दिन बर बहकाए नई सकहीं,
काबरकि मूसा कर बिरोधी यनेस अऊ यमबरेस कस,
एहू मन केतेक मान बोया हवें,
ओला सब मईनसे मन जाएन गईन हवें।
तीमुथियुस ला पऊलूस हर समझाईस
10 बकिन तंए मोर सब सिकछा,
मोर चाल-सहूर,
मोर जिनगी कर उदेस,
ला जानथस अऊ तंए मोर बिसवास,
मोर सहंतरापन,
मोर मया,
मोर धीरज ला जानथस अऊ तंए मोर सताए जवई अऊ मोर दुख भोगाई ला जानथस।
11 तंए जानथस कि अंताकिया,
इकुनियुम अऊ लूसतरा सहर मन में केतेक सताव ला मंए सहे रहें बकिन परभू हर मोके ओ सबले छोंड़ाईस।
12 फूरोंच में जेतना झन मन ईसू मसीह ला फुरमा करोईया जिनगी जीये बर चाहथें,
ओ सब झेमन ला सताव सहे बर परही।
13 बकिन कसरीहा मईनसे अऊ बहकोईया मन,
धोखा देहत अऊ खुद धोखा खात नास होवत जाहीं।
14 बकिन तीमुथियुस,
जे बात मन ला तंए सीखे अऊ बिसवास करे हवस,
ओही में बजर होवत जा,
काबरकि तंए जानथस कि तंए ए बात मन ला भरोसा करे लाईक सीखोईया मन जग ले सीखे हस।
15 अऊ नानबड़ ले तंए पबितर किताब ला जानथस। ओहर तोके उदधार पाए कर गियान दे सकत हे,
जेहर ईसू मसीह में बिसवास करे ले मिलथे।
16 सबेच पबितर किताब हर,
परमेसवर जेकस कहीसे ओही कस लिखल गईस हे,
अऊ एहर सिखाए बर,
समझाए बर,
सुधारे बर अऊ परमेसवर ला फुरमा करे कर जिनगी जीये कर सिकछा देहे बर काम आवत हे।
17 तेमेकि परमेसवर कर लोग मन सिध बएन जाएं अऊ सब मधे कर बढ़िहां काम करे कर लाईक होए जाएं।