तीमुथियुस कर नांव में
परेरीत पऊलूस कर लिखल दूसर चिठी
परेरीत पऊलूस कर जोहार
1
1 मंए परेरीत पऊलूस,
परमेसवर कर इछा ले ईसू मसीह कर परेरीत बने हों। ईसू मसीह में बिसवास करे ले जे अमर जिनगी हर हमके ला मिलथे,
परमेसवर कर ओ बात जबान कर बारे में परचार करे बर ओहर मोके चुनीस हे। मोर मयारू बेटा तीमुथियुस,
तोके ए चिठी ला लिखथों।
2 दाऊ परमेसवर अऊ हमर परभू ईसू मसीह कती ले तोके ला अनुगरह,
दया अऊ सांती मिलत रहे।
पऊलूस हर तिमूथीयूस ला उकसाथे
3 मंए अपन पराथना में,
राएत दिन तोके सुरता कईर-कईर के,
परमेसवर कर धनबाद देथों,
जेकर सेवा ला मंए अपन पूरखा मन कस सूध मन ले करथों।
4 मंए तोर भेजत घनी कर आंसू ला सुरता कएर के तोर जग भेंटाए बर ढेरेच घोंखत हों,
तेमेकि मंए आनंद कर मारे झुईम उठों।
5 मोके तोर ओ बिगर कपट कर बिसवास कर सुरता आथे,
जेहर आगु तोर नानी लोईस में अऊ तोर दाई उनीके में रहीस,
अऊ मोके पका बिसवास हे कि एहीच बिसवास तोरोच में हवे।
6 एकर ले मंए तोके सुरता देवावथों कि जे बरदान ला तोर ऊपर मोर हांथ राखे ले परमेसवर हर देहे रहीस ओला ढेरेच काम में लानत रह।
7 काबरकि जे आतमा ला परमेसवर हमके देहीसे ओहर हमके डरपोकवा नई बनाए बलकी ओहर सामरथ अऊ मया अऊ माढ़ल जीव ला देथे।
8 एकरले हमर परभू कर गवाही देहे बर अऊ मोर बर तंए झईन लजाओ,
जेहर परभू बर जेहल में हों,
बकिन परमेसवर कर सकती ला पाए के,
सुघर खभेर कर परचार करे में मोर संगे दुख उठा।
9 ओही परमेसवर हर हमर उदधार करीस हे अऊ हमके ला पबितर जिनगी जीये बर बलाईस हे। एहर हमर करम कर चलते नही,
बकिन अपन ओजना अऊ अनुगरह कर चलते एकस करीस हे। ओहर ए अनुगरह ला अगास-पताल बनाए कर ढेरे आगु ले,
ईसू मसीह कर जरिये हमन ला देहीस हे।
10 बकिन ए अनुगरह हर हमर उदधार करोईया ईसू मसीह कर आए कर चलते परगट होईस हे,
ओहर मीरतू कर सकती ला नास करीस अऊ अपन सुघर खभेर कर जरिये अमर जिनगी देहीस।
11 मंए एही सुघर खभेर कर परचार करोईया,
परेरीत अऊ सिकछा देहे बर गुरू ठहराल गए हों।
12 एकरे चलते मंए ए दुख मन ला सहत हों। बकिन मंए नई लजाओं काबरकि मंए जेकर ऊपर भरोसा करे हों,
ओके मंए जानथों अऊ मोके निचीत हवे कि जे सुघर खभेर कर सेवा ला परमेसवर हर मोके देहीस हवे,
ओला ओहर परभू ईसू कर दुवारा आए कर दिन ले,
समहाएर के राखही।
13 जे खर-खर बात ला मंए तोके सिखाए हों,
ओला एगोट नमूना बनाए ले अऊ थामे रह। ओकर संगे-संगे ईसू मसीह कर बिसवास अऊ मया में बने रह।
14 जे सुघर खभेर कर सेवा परमेसवर हर तोके सोंपीसे,
ओला एगोट खजाना कस समहाएर के राख अऊ हमर भीतरी में रहोईया पबितर आतमा कर मदेत ले एकर पहरा कर।
15 तंए जानथस कि एसिया इलाका कर सबेच झेमन मोके छोंएड़ देहीन हें,
ओमन में फूगिलुस अऊ हिरमुगिनेस हवें।
16 ऊनेसिफूरुस कर परिवार कर ऊपर परभू दया करे,
काबरकि ओहर कईयो दाएर मोर जीव ला मड़हाईस,
अऊ मोर जेहल में रहे कर चलते नई लजाईस।
17 बकिन जे घनी ऊनेसिफूरुस रोम सहर में आईस,
त ढेरेच जतन कएर के,
मोके खोजीस अऊ भेंट करीस।
18 मंए पराथना करत हों कि परभू ईसू कर आए कर दिन ओकर ऊपर परभू कर दया होए,
ओहर इफिसूस सहर में केतेक बगरा सेवा मोर बर करीसे,
ओला तंए बढ़िहां ले जानथस।