6
1 जेतना गुलाम मन बईला नियर जुआ कर तरी दबीन हें,
ओमन अपन गोंसिया ला बड़खा मरजाद कर लाईक समझें,
तेमेकि परमेसवर कर नांव अऊ हमर सिकछा कर निंदा झईन होए।
2 जेमन कर गोंसिया मन बिसवासी हवें,
ओमन अपन गोंसिया ला परभू में भाई होए कर चाड़हे माएन मरजाद में कमी झईन करें,
बलकी ओकर ढेरेच बढ़िहां सेवा करें,
काबरकि जे गोंसिया हर सेवा कर फयदा उठाथें,
ओहर परमेसवर कर बिसवासी अऊ ओमन कर मयारू लागें। ए बात मन ला तंए ओमन के सीखात अऊ समझात रह।
रुपीया पईसा कर लोभीया
3 ए सिकछा हर परभू ईसू मसीह कर खर-खर उपदेस लागे,
जेहर परमेसवर ला फुरमा करे कर जिनगी जीये में हमर मदेत करथे,
तबो ले कोनो हर ए सिकछा ला नई मानें अऊ दूसर कस सिखाथें।
4 ओमन घमंडी होए गईन हें अऊ कांही नई जानें। एमन ला बात कर बतंगड़ बनाए कर रोग धरीसे। जेकर चलते जलन,
झगरा,
निंदा कर गोएठ अऊ घिनक सक होथे।
5 एमन मईनसे मन कर मझारे लड़ाई-झगरा करुवाथें। एमन कर बुधी हर बिगेड़ गईस हे अऊ एमन सत ले दुरीहां होए गईन हें। एमन सोंचथें कि परमेसवर कर सेवा हर कमई कर जरिया लागे।
6 बकिन संतोस कर संगे परमेसवर कर सेवा में जिनगी जीये ले ढेरेच बड़खा कमई हवे।
7 काबरकि हमरे ए संसार में अपन संगे कांही जाएत नई लाने हन,
अऊ हमरे इहां ले कांही जाएत ला ले जाए बर नई सकन।
8 तेकर ले अगर हमर जग खाए बर अऊ पहिरे बर हवे,
त हमके ला ओहीच में संतोस रहेक चाही।
9 बकिन जेमन धनी होए बर चाहथें,
ओमन लालच अऊ ढेरेच मधे कर अनभनिया अऊ नुकसान करोईया आदेत कर फंदा में फंएस जाथें,
जेहर मईनसे मन कर जिनगी ला बिनास कर गड़हा में ढकेल देथे।
10 काबरकि रुपीया-पईसा कर लालच सबेच बुराई कर जएर हवे,
केतनो मईनसे मन एकर लालच में पईर के बिसवास ले भटेक गईन हें अऊ अपने-आप ला कए मधे कर दुख में डाएल देहींन हें।
तीमुथियुस ला पऊलूस हर समझाईस
11 बकिन ए परमेसवर कर सेवक,
तंए ए सब बात ले दुरीहां भाग अऊ परमेसवर कर आगु में बढ़िहां काम करत रह अऊ परमेसवर ला फुरमा करे कर जिनगी जीयत रह अऊ बिसवास,
मया,
कयास अऊ नरम सुभाव,
एही में अपन मन ला लगाए रह।
12 सही बिसवास बरीक बढ़िहां लड़ाई लड़त रह,
अऊ अमर जिनगी ला धईर ले,
जेकर बर परमेसवर हर तोके बलाईसे अऊ तंए ढेरेच गवाह मन कर आगु में अपन बिसवास कर बढ़िहां गवाही देहे हस।
13 परमेसवर,
जेहर सब झन ला जिनगी देथे अऊ ईसू मसीह,
जेहर पुनतियुस पीलातूस कर आगु में बिगर डराए गवाही देहीस,
ओमन ला हाजीर जाएन के मंए तोके अगींया देहत हों कि,
14 तंए हमर परभू ईसू मसीह कर दुबारा आवत ले,
ए अगींया ला पूरा इमानदारी कर संगे मानत रह।
15 ओ ईसू मसीह ला परमेसवर हर अपन निचट घनी में परगट करही। ओ परमेसवर हर परम धनय एकेच ठन राजा अऊ राजा मन कर राजा अऊ परभू मन कर परभू लागे।
16 ओहर एके झन अमर हवे,
ओहर अईसन इंजोर में रथे जिहां ला कोनो नई जाए सकें,
ओला कोनो मईनसे हर नई देखीस हे अऊ ओला कोनो देख नई सकें,
ओकर माएन-मरजाद अऊ राएज पाएट जुग-जुग होवत रही। आमीन।
17 ए संसार कर धनी मन ला अगींया दे कि ओमन घमंडी झईन होएं अऊ सीराए जवईया धन कर ऊपर असरा झईन राखें। बलकी परमेसवर कर ऊपरे असरा राखें,
जेहर हमर जिनगी में आनंद मनाए बर सब जाएत ला ढेरे अकन देथे।
18 ओमन ला अगींया दे कि ओमन भलाई कर काम करें अऊ ढेरेच भलाई कर काम में लगे रहें अऊ ओमन दानी बने अऊ दूसर कर मदेत करे बर तियार रहें।
19 एकस कएर के ओमन बढ़िहां धन ला जूटाहीं,
जेहर अवईया जुग बरीक एगोट नेंव कस होहीं,
तेमेकि ओमन फूरोंच कर जिनगी ला पाए जाहीं।