तीमुथियुस कर नांव में
परेरीत पऊलूस कर लिखल पहिलो चिठी
परेरीत पऊलूस कर जोहार
1
1 मंए पऊलूस,
हमर उदधार करोईया परमेसवर अऊ हमर पकका असरा देवईया ईसू मसीह कर अगींया ले ईसू मसीह कर परेरीत बने हों।
2 ए तीमुथियुस,
तोके मंए ए चिठी ला लिखत हों तंए फूरोंच में मोर बेटा कस हवस काबरकि मंए तोके बिसवास में लाने हों। मंए बिनती करत हों कि दाऊ परमेसवर अऊ हमर परभू ईसू मसीह कती ले तोके ला अनुगरह,
दया अऊ सांती मिलत रहे।
झूठा सिकछा कर बिरोध में चेतावनी
3 मंए मकिदूनिया इलाका जात घनी तोके ला इफिसूस सहर में रहे बर बिनती करे रहें। काबरकि तंए उहां जाए के ओजग कर गलत सिकछा देवईया मन ला मना कएर दे।
4 अऊ ओमन ला चेताए दे कि ओमन कहनी-किसा अऊ पीढ़ी-पीढ़ी कर पूरखानी बात में मन झईन लगाएं। काबरकि ओमे बेकार कर बंहसा-बंहसी होथे। एकस कएर के परमेसवर कर उदधार कर उपाए ला पाए बर नई सकें काबरकि एहर सिरीप बिसवास कर जरिये मिलथे।
5 बकिन हमर सिकछा कर मतलब एकस हवे कि मईनसे मन अपन मझार में एक दूसर ले मया करें,
जेहर सफा हिरदे अऊ बढ़िहां सोंच अऊ बिगर कपट कर बिसवास ले उभरथे।
6 ए बात मन ला छोंएड़ के थोरोक झन मन बेकार कर बात में भुलाए गईन हवें।
7 ओमन परमेसवर कर कानहूंन कर सीखोईया तो बने बर चाहथें बकिन जे बात ला ओमन कथें अऊ जोर देके गोठियाथें,
ओला ओमन समझबों नई करें।
8 बकिन हमरे जानथी कि अगर कोनो मईनसे हर परमेसवर कर कानहूंन ला ठीक रीती ले काम में लानही त ओहर बढ़िहां हवे।
9 हमरे एहू ला जानथन कि ए कानहूंन हर परमेसवर कर देख में सुघर जिनगी जीवईया मन बर ना लागे बलकी एहर कानहूंन कर टोरोईया,
मनमानी करोईया,
जेमन भकती नई करें,
पापी,
अपबितर अऊ अधरमी,
दाई-दाऊ कर जीव लेवईया,
जनमरवा,
10 एक झन ले बगरा घरगोंसाईन चाहे घरगोंसिया रखोईया,
पुरुसगामी करोईया,
मईनसे मन ला गुलाम बने बर बेंचोईया,
ठगलबरा,
झूठा किरीया खवईया,
अऊ खर-खर उपदेस कर बिरोध करोईया मन बर लागे।
11 ए खर-खर उपदेस हर सुघर खभेर कर अनुसार हवे,
जेहर परमेसवर कर महिमा ला परगट करथे जेला धनय परमेसवर हर मोके सोंपीसे।
परेरीत पऊलूस बरीक परभू कर किरपा
12 मोके बल देवईया परभू ईसू मसीह कर मंए धनबाद करथों। काबरकि मोके बिसवास लाईक समझ के ओहर अपन सेवा बरीक ठहराईसे।
13 मंए तो पहिले ओकर निंदा करत रहें,
ओकर लोग मन ला सतावत रहें अऊ कसरीहा रहें,
तबो ले ओकर दया मोर ऊपर होईस,
काबरकि ओ घनी मंए बिसवास नई करत रहें,
तेकर ले मंए बिगर जाने समझे ए काम ला करत रहें।
14 हमर परभू कर अनुगरह हर,
ढेरेच अकन मोके मिलीस हे। ओकर उपरे बिसवास करे बर अऊ मया करे बर परभू मोके मदेत करीस काबरकि ओकर संगे मोर बढ़िहां रिसता हवे।
15 ए गोएठ हर सचा अऊ सब कती ले माने लाईक हवे,
कि ईसू मसीह पापी मन कर उदधार करे बर संसार में आईस हे,
जेमन में ले सबले बड़खा पापी मंए लागों।
16 बकिन मोर ऊपर एकर बर दया करीस कि मंए जेहर सबले बड़खा पापी लागों,
ईसू मसीह हर अपन सहंतरापन जेहर कभों नई सीराए ओला मोर में देखाईस। तेमेकि जेमन अमर जिनगी पाए बर ओकर ऊपर बिसवास करहीं,
ओमन बर मंए एगोट नमूना बनो।
17 अब हमेसा कर राजा जेहर कभों नई मरही,
जेहर नई दिखे,
जेहर सिरीप एकेच ठन परमेसवर लागे,
ओकर आदर अऊ महिमा जुग-जुग होवत रहे। आमीन।
18 ए मोर बेटा तीमुथियुस,
जे अगमबानी हर आगुवेच ले तोर बारे में करल गए रहीस,
ओकरे ओनतार मंए तोके अगींया देहत हों कि तंए ओला काम में लाएन के,
बिसवास अऊ सही सोंच में बने रहिके एगोट बढ़िहां जोधा कस जिनगी जीयत रह।
19 बकिन केतनो झेमन एला नई मानीन तेकर ले ओमन कर बिसवास हर पूरा टुईट गईस।
20 ओमन में ले हूमिनयूस अऊ सिकंदर हवें,
जेमन ला मंए सएतान कर हांथ में सोंएप देहे होंa,
तेमेकि ओमन परमेसवर कर निंदा करे बर झईन सीखें।