गलत काम करोईया मन ले सवाचेती रईहा
3
1 एकरले ए मोर भाई-बहिन मन, परभू में खुस रहा, तुमन के ओहीच बात ला बार-बार लिखे में, मोके तो कोनो दुख नई होए अऊ एमे तुमन कर भलाई हवे। 2 ओ कुकूर मन ले सवाचेती रईहा, एमन तो गलत काम करोईया अऊ झूठा खतना करोईया मन लागे। 3 काबरकि सही खतना दार तो हमरे लागी, जेमन परमेसवर कर अराधना पबितर आतमा कर दुवारा करथी अऊ मसीह ईसू कर ऊपरे घमंड करथी अऊ देंह कर काम उपरे भरोसा नई करी। 4 बकिन मंए तो देहों कर ऊपरे मे भरोसा कएर सकथों, अगर कोनो अऊ झन ला देंह कर उपरे भरोसा करे कर बिचार हवे, त मंए ओकरोच ले, बएड़ के भरोसा कएर सकथों। 5 जनम कर पाछु आठ दिन में मोर खतना होईस, इसरायल कर बंस अऊ बिनयामीन कर गोती कर लागों, मंए ईबरानी दाई दाऊ मन ले जनमल एगोट ईबरानी लागों, मूसा कर कानहूंन कर अनुसार जीवईया एगोट फरीसी लागों। 6 अगर परमेसवर बर ऊतसाह करे कर बारे में कईहा, त कलिसीया कर सतोईया रहें अऊ मूसा कर कानहूंन कर धरमीपन कर बारे में कईहा, त मंए निरदोस रहें। 7 बकिन जे जे बात हर मोर फयदा कर रहीस, ओही मन ला अब मंए मसीह कर चलते हानी समेझ लेहे हों। 8 एकरोच ले बईड़ के, मंए अपन परभू ईसू मसीह कर गियान कर बात ला, सबले सुघर जाएन के सब बात ला बेकार जानथों। ओकर चलते मंए सब जाएत के छोंड़ देहें अऊ ओमन ला कचरा समझथों, तेमेकी मसीह ला पाए सकों। 9 अऊ मंए मसीह कर संगे एक होए जाओं, एहर मोर खुद कर धरमीपन ले नहीं, जेहर मूसा कर कानहूंन कर पालन करे ले आथे, बलकी ओ धरमीपन ले जेहर मसीह ईसू में बिसवास करे ले भेंटाथे, माने कि परमेसवर ला फुरमा करे बर सिरीप मसिह कर ऊपर बिसवास करे बर हवे। 10 मंए मसीह ला अऊ ओकर ओ सामरथ ला जाने बर चाहथों, जेकर चलते ओहर जी उठे रहीस, मंए ओकर दुख में भागी होए बर चाहथों अऊ ओकर सहिक बने बर चाहथों, जेला ओहर अपन मरे कर चलते पाए रहीस। 11 तेमेकी कईसनोच कएर के मंहू मरल में ले जी उठों।निसाना कती जाए बर हवे
12 मंए ए नई कहों कि सब जाएत ला पहिले पाए दारे हवों, आखिर सीदध होए गए हवों; बकिन ओ ईनाम ला पाए बर आगु बढ़त हवों, जेकर बर मसीह ईसू हर मोके अपन बनाए लेहीस हवे। 13 ए भाई मन मंए ए नई सोंचो कि ओके पाए दारे हों, बकिन एक काम करथों, पाछु कर बात मन ला बिसेर के आगु कर चीज मन ला पाए बर बढ़त जाथों। 14 निसाना कती मंए कुदत चएल जाथों, तेमेकी सरग कर ईनाम ला पाओं, जेकर बर परमेसवर हर मोके मसीह ईसू में बलाईस हवे। 15 हमर में ले जेतना झे मन सिदध हवन, ए बिचार करा अऊ अगर ककरो गोएठ में तुमन कर आने बिचार हवे, त परमेसवर ओहूच ला तुमन के बढ़िहां ले समझाए देही। 16 एकरले जेतना सिकछा हमरे पाए हवन, ओकरे अनुसार जिनगी जीयत रही।
17 ए भाई मन, तुमन सब झे मिल के मोर कस चाल- चला। जे नमूना हमरे तुमन कर आगु में राखे हन ओकर अनुसार जेमन जीयत हवें ओमन कर ऊपरे धीयान देआ। 18 काबर कि ढेरे झेमन एकस चाल- चलथें, जेमन कर चरचा मंए तुमन जग कईयो दाएर करे हवों अऊ अझरो ले रोए- रोए के तुमन के कहथों, कि ओमन अपन चाल- सहूर ले, मसीह कर कुरूस कर बएरी हवें। 19 ओमन कर आखरी बिनास हवे, ओमन कर ईसवर ओमन कर पेट हवे, ओमन अपन लाज कर गोएठ में घमंड करथें अऊ धरती कर चीज में मन लगाए रथें। 20 बकिन हमर देस तो सरग में हवे, उहां ले हमर अपन उदधार करोईया परभू ईसू मसीह कर, आए कर डगर ला देखत हवन। 21 ओहर अपन सामरथ कर दुवारा सबो जाएत ला अपन अधीन कएर सकथे, एही सामरथ ले ओहर हमर नासवान देंह ला बदेल के, अपन महिमामय देंह कस बनाए देही।