ईसू ला मिरतु डंड देहल जाथे
19
1 तेकर पीलातूस हर ईसू ला ले के ओके कोड़ा में पीटवाईस। 2 अऊ सिपाही मन कांटा कर मुकुट बनाए के ओकर मूड़े खाएप देहीन अऊ ओमन ईसू ला एगोट भंटा रंग कर ओढ़ना ला पहिराईन। 3 अऊ ओमन ओकर जग आए-आए के मजाक उड़ाईन अऊ कहिन, “ए एहूदी मन कर राजा, पालंगी।” अऊ ईसू ला झापड़ मारीन।4 तेकर राएजपाल पीलातूस हर फेर गढ़ी ले बाहरी आईस अऊ ओ एहुदी नेता मन ला कहीस, “सुना, मंए ईसू ला तुमन जग बाहरी लानत हों, तेमेकि तुमन जाएन लेआ कि मंए ओमें कांहीच दोस नई पायें।” 5 त ईसू हर कांटा कर मुकुट अऊ भंटा रंग कर ओढ़ना पहिरल बाहरी आईस। तेकर राएजपाल पीलातूस हर ओमन ला कहीस “देखा एहर ओही मईनसे लागे।” 6 जब मुख आजक मन अऊ मंदिर कर पहरादार मन ओके देखीन, त किरलाए कहीन “एके कुरूस में चघाए के मरवाए दे, कुरूस में चघाए के मरवाए दे” तेकर राएजपाल पीलातूस हर ओमन ला कहीस, “तुंही मन एके ले जावा अऊ कुरूस में चघाए के मरवाए देआ, काबरकि मंए एकर ऊपरे कांहीच दोस नई पायें।” 7 त एहूदी नेता मन पीलातूस ला जबाब देहीन, “हमरो एक ठे कानहूंन हवे अऊ ओ कानहूंन कर अनुसार ए माएर देहे कर लाईक हवे, काबरकि एहर अपन-आप ला परमेसवर कर बेटा बनाईस।” 8 जे घनी पीलातूस हर ए गोएठ ला सुनीस, त ओहर अऊ डराए गईस। 9 त ओहर गढ़ी में जाए के ईसू ला पूछीस, “तंए कहां कर लागस?” बकिन ईसू हर ओके कांहीच जबाब नई देहीस। 10 तेकर पीलातूस हर ईसू ला कहीस, “तंए मोर जग काबर नई गोठियास? का तंए नई जानस, कि तोके ला छोंड़े कर अऊ कुरूस में चघाए के माएर मरवाएयोच कर अधिकार मोर जग हवे।”
11 त ईसू हर जबाब देहीस “अगर तोके परमेसवर कती ले ए अधिकार नई देहल जातीस, त मोर ऊपर तोर कांहीच अधिकार नई रतीस, ओकरे ले जेहर मोके तोर हांथे धरूवाईस हवे, ओहर तोरोच ले बगरा दोसी हवे।”
12 एला सुईन के पीलातूस हर, ईसू ला छोंड़े कर कोसिस करीस। बकिन एहूदी नेता मन किरलाए-किरलाए के पीलातूस ला कहीन, “अगर तंए ए मईनसे ला छोंएड़ देबे, त तंए महाराजा कएसर कर संगता नई कहाबे अऊ जे कोनो अपने-आप ला राजा बनाथे, ओहर महाराजा कएसर कर दुसमन हवे।” 13 जे घनी पीलातूस ए बात ला सुनीस, त ईसू ला बाहरी लानीस। अऊ ओहर नियाओ कर आसन में बईठीस, जेहर एगोट पखना कर चबूतरा रहीस, जेला इबरानी भांसा में गबता कहत रहीन। 14 एहर फसह तिहार कर तियारी कर दिन रहीस अऊ ओ मझेनी जुआर रहीस, तेकर पीलातूस हर एहूदी मन ला कहीस “देखा एही लागे तुमन कर राजा।” 15 बकिन ओमन अऊ कीरलाए के कहीन, “एके ले जा, एके ले जा, एके कुरूस में चघा।” तेकर पीलातूस राजा हर ओमन ला पूछीस “का मंए तुमन कर राजा ला कुरूस ऊपरे चघाए देओं?” त महा आजक मन जबाब देहीन, “महाराजा कएसर कर छोंएड़ हमर अऊ कोनो राजा नईए।” 16 तेकर पीलातूस हर ईसू ला कुरूस में चघाए के मरवाए बर, ओमन कर हांथे सोंएप देहीस।
ईसू ला कुरूस कर ऊपरे चढ़ाल जाथे
17 “तेकर ओमन ईसू ला ले गईन। अऊ ओहर अपन कुरूस ला डोईह के बाहरी निकेल के ओ जघा में गईस, जेला खोपड़ी कर जघा कथें अऊ इबरानी भांसा में एला ‘गुलगुता’ कथें। 18 ओजग ईसू कर संगे ओमन अऊ दुई झे मईनसे मन ला कुरूस में चघाईन, एक झन ला ओकर जवनी कती अऊ दूसर झन ला ओकर डेरी कती अऊ ईसू ला ओमन कर मझार में चघाईन।” 19 पीलातूस हर ओकर दोस कर बारे में, एगोट पुठा में लिख के कुरूस ऊपरे टंगवाए देहे रहीस, जेमे एकस लिखल रहीस, “एहर नासरत गांव कर ईसू जेहर एहूदी मन कर राजा लागे।” 20 ए दोस कर बारे में लिखल चिठी ला ढेरेच एहूदी मन पढ़ीन, काबरकि ओ जघा जिहां ईसू ला कुरूस में चघाए रहीन, ओहर सहर कर लिघे रहीस। अऊ ओ चिठी हर इबरानी, लतीनी अऊ युनानी, ए तीनो भांसा में लिखल रहीस। 21 तेकर एहूदी मन कर मुख आजक मन, पीलातूस ठन कहीन, “एहूदी मन कर राजा झईन लिख, बकिन एकस लिख कि ए मईनसे हर कहीस, मंए एहूदी मन कर राजा लागों।” 22 त पीलातूस हर जबाब देहीस, “मंए जेला लिख देहें, ओला लिख देहें।”
23 जब सिपाही मन ईसू ला कुरूस में चघाए दारीन, त ओमन ओकर ओढ़ना ला ले के चाएर बांटा करीन। अऊ चाएरो झन एक-एक ठे लेहीन अऊ ईसू कर अंगोच ला लेहीन अऊ ओकर अंगा हर तो खिलल नई रहीस बकिन एहर ऊपर ले खाल तक एकेच ठे बिनल रहीस। 24 एकरे ले ओमन एक दूसर के कहीन, “एला हमरे नई चीरी, बकिन एकर बर चिठी डाली कि एहर काकर होही। ए गोएठ हर एकर ले होईस कि पबितर किताब में लिखल गोएठ हर पूरा होए,
“ओमन मोर ओढ़ना ला बांएट लेहीन
अऊ मोर अंगा बर चिठी डालीन।” अऊ सिपाही मन एहीच कस करीन।
25 ईसू कर कुरूस कर लिघे में ओकर दाई अऊ ओकर मोसी मरियम, जेहर कलोपास कर परानी रहीस अऊ मरियम मगदलीनी, ओ तीनो झेमन ओजग ठड़होए रहीन। 26 जे घनी ईसू हर अपन दाई अऊ ओ चेला जेकर जग ओ ढेरेच मया करत रहीस, लिघे ठड़होवल देखीस, त अपन दाई ला कहीस, “ए दाई, देख एहर तोर बेटा लागे।” 27 तेकर ईसू अपन ओ चेला ला कहीस, “ए तोर दाई लागे।” अऊ ओही घनी ले ओ चेला हर ईसू कर दाई ला अपन घरे ले गईस।
ईसू कुरूस में मरथे
28 तेकर ईसू हर जाएन गईस कि, अब सब जाएत हर पूरा होए गईस हवे। तब ओहर परमेसवर कर किताब कर लिखल गोएठ ला पूरा होए बर एकस कहीस, “मोके पियासत हवे।” 29 ओजग अमट मेरावल अंगूर कर रस ले भरल एगोट भांड़ा मड़हाल रहीस। त ओमन तनिक रूआ ला, ओ रस में बोएथ के जूफा नांव कर भूंदरा कर एक ठे सोंटी में बाएंध के ओकर मूंह में छुवाईन। 30 जे घनी ईसू ओ रस ला चिखीस, त ओहर कहीस “सब जाएत हर पूरा होए गईस” अऊ माथ ला नवाए के अपन परान ला छोंएड़ देहिस।
31 ओहर फसह तिहार कर तियारी कर दिन रहीस। पवितर दिन में ककरो लास हर कूरुस में झईन लटके रहे काबरकि पबितर दिन हर ओमन बर एगोट खास दिन रहीस। एकरले एहूदी नेता मन पीलातूस जग बिनती करीन, कि ओमन कर गोड़ ला टोएर देहल जाए अऊ ओमन ला उताएर देहल जाए। 32 एकर ले सिपाही मन आईन अऊ ओमन पहिले मईनसे कर गोड़ ला टोरीन, तेकर दूसरोच मईनसे कर गोड़ ला टोरिन, जेमन ईसू कर संगे कुरूस में चघाल गए रहीन। 33 बकिन जब ओमन ईसू ठन आए के देखीन, कि ओ मएर गईस हवे, तेकर ले ओमन ओकर गोड़ ला नई टोरीन। 34 बकिन सिपाही में ले एक झन हर एगोट भाला ले ईसू कर पांजर ला गोएभ देहीस अऊ ओमे ले तुरतेंच लहू अऊ पानी निकलीस। 35 जे मईनसे हर एला देखीस, ओहर ए गवाही देहीस हवे। अऊ ओकर गवाही हर सही हवे अऊ ओहर जानथे कि ओहर सही कहथे, ताकि तुंहूच मन बिसवास करा। 36 ए गोएठ हर एकर ले होईस, ताकि पवितर किताब कर लिखल बात हर पूरा होए “ओकर एको ठे हाड़ा हर टोरल नई जाही।” 37 पवितर किताब कर अऊ एगोट दूसर जघा में एकस लिखल हवे, कि जेमन ओके गोभीन हवें ओमन ओके देखहीं।
ईसू ला मरघेटिया में गाड़थें
38 ए सब होए कर पाछू अरमतियाह सहर कर ईसुफ, जेहर ईसू कर चेला रहिस (बकीन ओहर एहुदी नेता मन कर डर कर मारे ए बात ला लूकाए के राखे रहीस) ओहर राएजपाल पीलातूस जग बिनती करीस, “का मंए ईसू कर लास ला ले जाए सकत हों” त पीलातूस हर ओकर बिनती ला माएन लेहीस, तेकर ईसुफ हर आए के ओकर लास ला ले गईस। 39 अऊ नीकूदेमूस जेहर पहिले एक दिन राती जुआर ईसू ठन गए रहीस, ओहुच हर करीबन चालीस किलो गंध रस अऊ एलवा नांव कर गमकेदार चीज ला मिलाए के ईसुफ कर संगे गईस। 40 तेकर ओमन ईसू कर लास लेहीन अऊ एहूदी मन कर गाड़े कर रीती कर अनुसार, लास में ओ गमके दार चीज ला लगाईन अऊ ओला कफन में लपेटीन। 41 जिहां ईसू ला कुरूस में चघाल गए रहीस, ओजग एगोट बगीचा रहीस अऊ ओ बगीचा में एगोट नांवा मठ रहीस, जेमें कभों कोनो ला नई राखे रहीन। 42 ओ दिन हर एहूदी मन कर तियारी कर दिन रहीस अऊ ओ मरघेटिया हर ठांवे रहीस, तेकरले ओमन ईसू कर लास ला उहां रखीन।