लूका कर लिखल ईसू कर सुघर-खभेर
ए किताब कर बारे में दम अकन गोएठ
ए सुघर-खभेर हर लूका कर दुवारा लिखल गईस हे। लूका हर एगोट बईध रहीस। ए सुघर-खभेर में ईसू मसीह ला सब मईनसे जाएत कर उदधार करोईया बताल गईस हे। लूका लिखथे कि “गरीब मन ला सुघर-खभेर सुनाए बर” परभू कर आतमा हर ईसू ला चुनीस हे। एकर चलते ए सुघर-खभेर हर ढेरेच मधे कर दुख में परल मईनसे मन ला सांती अऊ छुटकारा देहे कर खभेर हवे। लूका हर ए किताब ला थियुफिलूस नांव कर मईनसे बर लिखीस हे, ओहर चाहत रहीस कि थियुफिलूस हर ईसू कर बारे में बढ़िहां ले जाने।
लूका कर लिखल सुघर-खभेर कर सुरू कर पाठ में ईसू कर जनम कर बारे में लिखल गईसे, अऊ आखरी कर पाठ में ईसू हर सरग में गईस तेकर बारे में लिखल हे। लूका हर लिखथे कि ईसू हर जनमीस ते घनी सरगदूत मन गीत गाईन, चरवाहो मन ईसू ला देखे बरीक गईन; अऊ एरुसलेम कर मंदिर में लईका ईसू सियान मईनसे मन जग जबाब सवाल करे लागीस। ए सुघर-खभेर में कईयो मधे कर अहना बताल गईस हे, जेमे हमरे आने-आने बात ला सीख सकथन। ए सुघर-खभेर में तुमन ला दयालू सामरी अऊ उड़ाऊ बेटा कर अहना, बिहन कर अहना अऊ भुलावल भेंड़ कर अहना मिलही। ए भुलावल भेंड़ कर अहना में परमेसवर हर एला बताथे कि सब मईनसे मन परमेसवर जग ले ए भुलाल भेंड़ कस भुलाए गए रहीन, ए भुलावल भेंड़ ला जेकस चरवाहो हर खोज के लानीस, ओही कस ईसू मसीह परमेसवर जग ले भुलावल मईनसे मन ला खोजे बर आईसे। परमेसवर कर दुवारा पाप कर छमा कईसे मिलही तेकर बरीक ढेरेच जोर दे के ए सुघर-खभेर में लूका लिखीस हे; अऊ एहू बात हर लिखल हवे कि मईनसे मन अपन जिनगी कर बुराई ला कईसे छोंड़ही अऊ कोन किसीम ले परमेसवर कर बेटा बनही।
ए सुघर-खभेर हर खालहे लिखल भाग में बांटल हे
परिचय 1:1-4
एहूना बतीसमा देवईया अऊ ईसू कर जनम अऊ बचपन 1:5-2:52
एहूना बतीसमा देवईया कर सेवा 3:1-20
ईसू कर बतीसमा अऊ सएतान कर दुवारा ओकर परीछा 3:21-4:13
गलील जिला में ईसू कर सेवा 4:14-9:50
गलील जिला ले एरुसलेम सहर तक ईसू कर जवाई 9:51-9:27
एरुसलेम सहर में ईसू कर आखरी हपता 19:28-23:56
ईसू कर मरल में ले जी उठाई, मईनसे मन ला ओकर दरसन अऊ सरग जवाई 24:1-53